سيراتو ولا جين 2

[a20101d]

عايز اعرف عيوب الجين 2 لاني خيف استريها ومحتار بينه و الكيا سيراتو



تم دمج الموضوعين وتغيير إسم الموضوع ونقله إلى قسم المقارنات

مشرف قسم بروتون 12:34pm 3\4\2011

[a20101d]

عيوب الجين 2

سيراتو ولا جين 2

[kar!m]

انت لو دورت فى المواضيع هتعرف كل اللى انت عاوزة

عموما اللى أعرفه من العيوب:

صوت الموتور عالى شوية.
قطر دوران العربية قليل .. و ده عشان اسبور.
البوية بتاعتها بتطلع بسهولة.
أستهلاك بنزين عالى الى حد ما.

[Tarek Gen 2]

127000 ولا 93000 ؟!!!

[Dawns_Mist]

مقارنة غريبة شوية ... فرق 30 ألف في السعر !!!!

عموما .. أنا سوقت العربيتين و هقولك خبرتي فيهم :
السيراتو:
- موتور كويس .. قوي بالأرقام لكن لازم تجيب 5000 rpm علشان تحس بالقوة دي..بالتالي سحبها كويس مقارنة بأغلب العربيات لكن قليل على عربية 124 حصان !!!
- عفشة ناشفة نسبيا لكن مش وحشه.
- اكسيسوريز كويسه من الكراسي الجلد و المقابض و الفوجات الشيك و كمان الهاي لاين فيه فتحة سقف جميلة و زجاج ملون.
- صيانتها سهلة و منتشرة جدا بالتالي هتلاقي قطع غيار بسهولة و سعر إعادة بيع ممتاز.
- ثباتها بصراحه حلو جدا .. صحيح ماجربتهاش في المواقف الحرجة لكن إجمالا كانت معايا أحسن من أي هيونداي و أي شيفروليه.
- باور ناعم.
عيوبها ... كوري ( أقل تكنولوجيا ميكانيكية في السوق مقارنة بأي عربية من فئتها مش كوري ) .. فرامل ضعيفة فعلا على وزنها و ماتسعفكش أبدا في الحوادث ( حتى اللي بيضحكوا علينا بيها و بيقولوا فيها آي بي إس برضه فرامل أي كلام مقارنة بأي إي بي إس ) و الكلام ده عن تجربة لإني أنا بطبيعتي بكون دايما سريع و قريب أوي أوي من كل العربيات اللي قدامي و بعدي بفرق 5 سم فلما بتكون العربية اللي معايا فراملها ضعيفة بحس بيها بسهولة جدا جدا.

الجين تو:
- موتور قوي جدا .. أجمل حاجة فيه إنك بتحس بقوته دايما .. و أعتقد سحبها زي سحب السيراتوا أو متقاربين جدا.. لكن المشكلة إنك في السيراتو لازم تفعص الدواسه لإن فيه ديلاي في الجير بوكس الأوتو بتاعها.
- فرامل فوق الممتاز.
- تكنولوجيا متطورة جدا في الموتور .
- عفشة متطورة جدا مقارنة بالسيراتو و بالتالي بتدي ثبات و اتزان في أسوأ المواقف.
ABS + EBD + muli-link dependent suspension = أمااااااااااااااااااااااااااااان.
- أوبشنز ممتازة في عربية أقل من 100 ألف .. مالتي + سينسورز + فوجات + سبويلر و مساحه خلفية + جنوط عريضة ممتازة.
عيوبها ... قطع غيار مش منتشرة زي الكوري ... سعر إعادة بيع أقل ... تقفيل قليل نسبيا من ناحية الخامات الداخلية ... دهانها فعلا بيقع بسرعة مقارنة بالسيراتو.. و كمان السيراتو أوسع شوية صغيرين.

-------------------------------------------------------------------

- جين تو ... أفضل قيمة لسعر عربية أقل من 100 ألف.. ( و على فكرة التكنولوجيا الماليزي متطورة جدا لإن ليها مصدرين الأول شركة لوتس البريطانية و دي دلوقتي كلها ملك بروتون و العفشة بتاعت كل العربيات بروتون هي عفشة لوتس ، و التاني هي ميتسوبيشي لإنها متعاقده مع بروتون من زمان جدا و لما تفتح كبوت الجين تو هتلاقي حاجات كتير أوي فيها شبه اللانسر بالظبط ) و الدليل إن بروتون دايما على المنصة في الراليات الأوروبية في السنين الأخيرة.

- لو مستعد تدفع فوق الـ 120 يبقى على طول فكر في التيدا أو السيتي أو الإيفو أو الإيبيزا ... و نصيحة سيبك من كل الكوري .. بس حاول تحافظ على عربيتك كويس.
( أنا مازلت مكانك و كنت متردد كتير قبل ماختار الجين ... لكن بعد خبرتي في العربيات الفترة الأخيرة قررت إني عمري ما هشتري عربية كوري حتى لو مش هركب عربيات طول عمري )

[Dawns_Mist]

127000 ولا 93000 ؟!!!

فعلا الجين 2 مظلومة في المقارنة دي .. بس حضرتك معاك العربيتين .. ياريت لو تقولنا مزايا و عيوب كل واحده فيهم من وجهة نظرك لإنك أكيد خبرتك فيهم أكتر مني .

[moroxp]

muli-link dependent suspension

ممكن نفهم من حضرتك معنى الجمله دى
وشكرا

[Dawns_Mist]

multi-link
هو نظام حديث لعفشة السيارات .. بيخليها أكثر ثبات و اتزان .. و تقدر تقرا عنه أكتر بالتفاصيل و المعادلات و الرسم الهندسي على ويكيبيديا.
و النظام ده مش موجود في كل العربيات .. و فيه بيكون كل جنط من الجنوط الخلفية مرتبط بأكتر من بار غير متصل بالجنط المقابل .
تقدر تشوفه في الهوندا سيفيك ، و المازدا 3 ، و الفلونس رينو ، ... مش هتشوفه ف أي عربية أقل من كده أبدا غير في الجين تو .. لكن في الجين تو بيكون التعليق لكل جنط على بارين فقط .. مش 5 أو 4 بارات زي باقي العربيات دي .. بالتالي بنسميه ( غير مستقل ) dependent و ده طبعا أقل نسبيا في الكفائة لكن إجمالا هو مناسب تماما لشاسيه و وزن الجين تو.

أعتقد حبايبنا المحترفين زي ( formulator ) هيفيدوك فيه أكتر مني كمان .. و تقدر تقرأ عنه بالتفاصيل في how staff works أو الويكيبيدا.

[ahmad alshaaer]

لو حابب تعرف تفاصيل اكتر عن الجن 2 خاصة وبوروتون عموما ارجو الانضمام لهذا الجروب على الفيس بوك

Login | Facebook

تحياتي للجميع

[moroxp]

Dawns_Mist
مشكور يا باشا عالتوضيح وماشاء الله معلوماتك جميله

tweety26980

انا مشترك فى الجروب بالفعل ولكن مش عليها معلومات كتير على بروتون

ومشكور اخى

[tito_1980]

السيراتو : اداء محرك جيد , ثبات جيد , عفشه تقطم الوسط , توكيل ممتاز , قطع غيار متواجده نسبيا خارج التوكيل , توكيل ممتاز .

جين 2 : اداء محرك ممتاز , ثبات ممتاز , عفشه جيده , قطع غيار نادره بره التوكيل , توكيل زي الزفت .

[mido_soliman]

السيراتو : اداء محرك جيد , ثبات جيد , عفشه تقطم الوسط , توكيل ممتاز , قطع غيار متواجده نسبيا خارج التوكيل , توكيل ممتاز .

جين 2 : اداء محرك ممتاز , ثبات ممتاز , عفشه جيده , قطع غيار نادره بره التوكيل , توكيل زي الزفت .

+1111111111

[أبومعاذ]

السيراتو : اداء محرك جيد , ثبات جيد , عفشه تقطم الوسط , توكيل ممتاز , قطع غيار متواجده نسبيا خارج التوكيل , توكيل ممتاز .

جين 2 : اداء محرك ممتاز , ثبات ممتاز , عفشه جيده , قطع غيار نادره بره التوكيل , توكيل زي الزفت .

تمام بس توكيل كيا من ساعة ما السيراتو و الكارينز نزلوا واتباعوا بالشكل ده مبقااااااااش ممتاز

[د.اشرف هنداوى]

و يا تري البيرسونا لها نفس مميزات و عيوب الجين و لا فيه فرق ؟

هل عيوب الحين مش موجودة في البيرسونا ؟

شكرا مقدما

[mido_soliman]

و يا تري البيرسونا لها نفس مميزات و عيوب الجين و لا فيه فرق ؟

هل عيوب الحين مش موجودة في البيرسونا ؟

شكرا مقدما

الجين هى البرسونا فى العيوب والمميزات
ميزة الجين عن البيرسونا الثبات فى الجين اعلى حاجة بسيطة علشان الايرودينامك
ميزة البرسونا عن الجين الشنطة اوسع
العيوب الاتنين مجتمعين فى العيوب ايا كانت