محتار بين الفيرنا و اللانوس و السيفيا

[tarek_cobra]

بسم الله الرحمن الرحيم
السلام عليكم ورحمة الله وبركاته
أعضاء المنتدى الكراااام
زى ما العنوان واضح انا معايا 45 ألف و محتار اجيب ايه انا عايز عربيه عائليه و موديل بعد 2000 و محترمه مش عايز حاجه تقل اصلها معايا كل شويه علشان اللى شوفته من ال124 القديمه خلانى متعقد بمعنى الكلمه
وانا محتار و قدامى فيرنا 2004 1600 ب43
لانوس 2005 ب 45
و كيا سيفيا 2003 ب 43
ولاقيت اعلانات عن فيرنا 2006-2007 1600 فى حدود 46 معرفش ده كده كويس ولا ايه
ياريت اعرف رأيكوا لأنى متأكد ان خبرتكوا هاتفيدنى جداا فى اختيارى مع العلم انى ارشح الفيرنا بصرف النظر عن الموديل شايف انها انسب حاجه فى السعر ده بس مش عارف موضوع ان ال2004 علشان كورى هايفرق عن ال2006 التجميع المصرى ولا حاجات بسيطه !!؟ و اسف لو طولت عليكوا :)

[al_manara]

السيفيا اوسعهم وعربية حلوة ما شاء الله . موتورها قوي وتكيف حلو وقطع غيار موجودة
وعندك كمان النوبيرا فكر فيها

[tito_1980]

انا مبرشحش الفيرنا يوزد فخليك في السيفيا بس هتتعب في قطع غيارها شويه غير كده يبقي اللانوس

[tarek_cobra]

والله السيفيا حلوه وواسعه و قطع غياره موجوده بس انا بحاول ابص للأجدد مع افتراض الحاله الجيده فى ال2 و بما ان السفيا والفيرنا صناعه كورى و جوده قريبه فا علشان كده بحاول اختار الأحدث لأن الفيرنا احدث بحوالى 3 سنين و انشاء الله العربيه هتقعد معايا فتره مش هاتتغير !
و ياريت المهندس أحمد يقولى ليه حضرتك مترشحش الفيرنا يوزد !؟

[Ahmed Nasser]

السيفيا اوسعهم وعربية حلوة ما شاء الله . موتورها قوي وتكيف حلو وقطع غيار موجودة
وعندك كمان النوبيرا فكر فيها

[tarek_cobra]

ايه يا جماعه يوم الجمعه قرب محتاج أرائكم !!

[Karim_Mohy]

http://www.nilemotors.net/Nile/178919-a.html

http://www.nilemotors.net/Nile/141618-vs.html

نفس حيرتك بالضبط كنت محتارها ودي موضوعات كنت عاملها يمكن تفيدك.......

[tarek_cobra]

أستاذ كريم تقريبا نفس الموضوع 100% ياريت تعرفنى حضرتك قررت ايه انا دلوقتى منحصر تفكيرى بين الفينا والسيفيا !

[ghazy12]

طبعاً الحاله في المستعمل هي الفيصل الوحيد مهما كانت الأسماء...

لكن لو افترضنا ان كلهم حالتهم متقاربه نسبياً... يبقى السيفيا طبعاً أفضلهم

السيفيا عربيه ممتازه ما شاء الله و أفضل من الفيرنا و اللانوس...

ده رأي الشخصي المتواضع...

تحيــاتي...

[sab3aawy]

ارشح لك اللانوس: اكثر ثباتا من الفيرنا، اطول عمرا واكثر تحملا، صالونها اوسع من الفيرنا ، وركوبتها ممتعة اكتر، صحيح ان الفيرنا افضل فىالجرى بس الجرى مش كل حاجة، وقطع غيار العربيتين عند البقالين وبتوع الطرشى بس قطع غيار اللانوس اكتر
السيفيا انا مش حاببها لأن انتاجها توقف من فترة طويلة ودة بينعكس بالسلب على جودة وكمية قطع الغيار المتوافرة لها، ده بالاضافة ان مش هتلاقى عربية سيفيا التابلوه بتاعها مش منفخ ومشقق ودى حاجة بتضايقنى انا شخصيا انى احط مبلغ كبير فى عربية الجزء اللى انا شيفه طول الوقت منها ممزق ومؤذى للعين

[Karim_Mohy]

أستاذ كريم تقريبا نفس الموضوع 100% ياريت تعرفنى حضرتك قررت ايه انا دلوقتى منحصر تفكيرى بين الفينا والسيفيا !

اللي حصل بالضبط اني كنت في نفس حيرتك وكنت حاصر الاختيارات بين الفيرنا والكريستالة والسيفيا
بس كنت حاطط قدامي اعتمادية العربية وعلو الموديل مش عايز حاجة قديمة......فكانت الكريستالة اخر حاجة.....وكمان كان سعر النضيف منها جايب ال 50 مستريح

نزلت السوق اول مرة......وكان معايا حد معرفة بيفهم في العربيات......ولازم يكون معاك حد فاهم كويس عشان يبصلك عليها........كان في تويوتا كرولا نضيفة جدا موديل 93 او 94 حاجة كدة واستعمال سيدة بس مارضيتش عشان موديل قديييم رغم انها عربية كويسة زائد انها مش كاملة كماليات

لفينا لفة ......لقينا فيرنا موديل 2004 او 2005 وكان بيتكلم في 47 ....العربية كانت نضيفة وكاملة بس كان متمسك بالسعر وكنت عايزالف بقية السوق........مالقناش حاجة فارجعنالو لقيناها متباعة اقل من 47 والحمدلله ماليش نصيب فيها وباركت للي اشتري
خرجنا لقينا فيرنا خليجي متسجلة غي رخصها اكسنت......شكل الفيفا كده و1300 سي سي بس مكانتش كاملة ونص الاربعينات برضو بس مستريحتلهاش ومشينا
الاسبوع اللي بعده لفينا لفة صغيرة .....ولقيت كيا سبكترا......بصينا عليها لقيتها كويسة ...من هنا لهنا كانت علي سبعة واربعين ونص بعد ما كان ماسك في 48....طبعا كنت رايح علي 45 او اقل اخري بس عجبتني واتصرفت في بقية المبلغ عشان مكانش معايا يكمل......والحمدلله اشتريتها

فالفكرة حضرتك ماتمسكش علي حاجة معينة.....دور ع النضيف او الحالة الكويسة......لان في موديل مثلا ممكن تبقي نازل عشانه وفي الاخر هاتلاقيهم تعبانين......فحرام تجيب العربية وتقرفك مصاريف عليها
وربنا يكرمك بحاجة كويسة........ولو حضرتك عايز تسال في اي حاجة احنا مع حضرتك.......وان شاء الله نباركلك غليها

[tarek_cobra]

بجد ربنا يكرمك انا تعبتكوا معايا اوى انا عارف بس انشاء الله هاااانت انا هاروح السوق الجمعه دى او اللى بعدها مش عارف حسب التساهيل و ربنا يكرم انشاء الله :)

[Angel_wolf]

فرنا - متور - عائلية - تكيف قوى جدا - الفل اوبشن منها معقولة جدا على سعرها - قطع غيار برخص التراب - صيانتها سهلة
العيوب الثبات ضعيف بعد الـ120 والفرامل بعد الـ مش قوية بالدرجة بس معقولة - البنزين استهلاكة عادى

وبعدين 2004 كتير عليها المبلغ دة و اتاكد تانى انها 1600 لانى اشك فى كدة اناجايب 2006 وعاملة 12 الف كيلو بس ب 45 الف

[tarek_cobra]

اولا الف مبروك على الفيرنا بس هو حضرتك جبتها امتى و من السوق برده ولا حد معرفه لأن 12 الف دى كسر زيرو و مشاء الله سعرها كويس اوى صعب اوى انى الاقى حاجه كده فى السوق انا اللى قدامى 2004 كامله مانيوال فابريكا بره و جوه 1600 بس عامله 80 الف كيلو ؟
ثانيا انا شايف ان الفيرنا و السيفيا كويسين و افتصاديين و العيوب بتاعتهم مش مؤثره معايا بالمره لكن انا بقارن بين ال2 فى اللى هتستحمل اكتر يعنى اللى هاتعيش من غير ما تطلع عينى عربيه اصيله من الأخر مش كمان سنه او 2 اركنها عند الميكانيكى اهم حاجه عندى ان العربيه تعممر معايا :)