اسبرانزا ولا فيرنا

[world_of_kill]

لو سمحت انا داخل علي مشروع اني حجيب تاكسي و دلوقتي انا من محافظه المنوفيه يعني هيه كلها علي بعضها تجبها من اولها لي اخرها في ربع ساعه و مينفعش الواحد يعدي سرعه ال 60 جوا البلد عشان ياما الشارع زحمه يا اما الشارع اصلا مش طويل و الطرق مكسره برضو عندنا زي بقيت الجمهوريه كالعاده

دلوقتي قدامي اختيارين فيرنا = ديقه - قله ثبات - فرامل ضعيفه - اني لو حبيت ابيع في اي وقت حعرف مخسرش اكتر من الفين تلاته

الاختيار التاني دلوقتي اسبرانزا = واسعه - ثبات احسن - كماليات كتير بالمقارنه بالفرنا - عاليه - بس لو حبيت ابيع ممكن اخسر اكتر من 10 الاف

دلوقتي انا كل اللي يهمني عربيه حلو يعني مقايسي
قطع غيار متوفره الاتنين منتشرين عندنا + ان الاتنين رخيص في قطع الغيار - الاتنين ميكانيكيه بيشتغلو فيهم عندنا - مش ححدث او افكر في البيع قبل 16 سنه لان القانون مدي 20 سنه للأجره و احتما كبير اجيب مستعمل 2007 - 2008

انا عاوز حاجه كل اللي اعرفو دلوقتي هل قطع غيار الاسبرنزا معمره - هل ينفع احط ليها 80 زي الفيرنا او اخلط 80 علي 90 محدش يقولي غاز مش عاوز اقصف العربيه بدري

اكتر حاجه عجباني لما عرفت ان ينفع يركب عليها كل حاجه المتسوبيشي لاني معايا اصلا متسوبيشي لانسر

هل في عيوب تانيه للاسبرنزا غير موضوع العفشه الناشفه


دلوقتي برضو حجيب 2 سواقين هل العربيه حتستحمل رجلين مختلفين علي العربيه

و شكرا جزيلا

[hugan]

ربنا يعينك وتعرف تخنار
انا طبعا علشان من ملاك الاسبرانزا ها اقولك الاسبرانزا اشد من الفيرنا بمراحل

[esam722]

انت قلقان من سعر البيع لية مادام مش هاتبيع قبل 16 سنة زى مابتقول وبعدين بجانب الكماليات اللى فى الاسبيرانزا مقارنة بالفيرنا فى كمالية واحدة بتمن العربية كلها وهى الabs وهتصدق كلامى مع التجربة فى شوارع البلد اللى كلها تراب ناعم او مياة
وبالنسبة للغاز يعنى انت خايف على الموتور من الغاز ومش خايف من البنزين ال80 موضوع الغاز مش هايفرق بشرط انك تمشى بالعربية كل يوم شوية بالبنزين علشان طبقة الكربون اللى بيعملها البنزين علشان تحمى بيها الاجزاء الداخلية للموتور ونصيحة حاول تسئل اللى ساق العربية علشان فى ناس كتير زى البغبغانات بتسمع وبتردد بدون علم وربنا يوفقق للخير

[ALshahba]

حقولك بالنسبالك انت مش محتاج تبص للكماليات لانها تاكسي, والزبون راكب معاك وقت قصير وينزل...يعني مش محتاج رفاهيه
اما بالنسبة للمطبات...فحقولك الاعلي علي الارض والاقوي فى العفشه هي الاصلح لك.....المعروف (وعن تجربه شخصيه) ان الاعلي علي الارض هي اسبيرانزا 516 وعفشتها قويه لانها ناشفه شويه
اما بالنسبة للبنزين عايز اقولك ماتحطش اقل من 90 علشان عمر الموتور والابتعاد عن العمره والاصلاحات مبكرا,,,,, بس خايف تقول اني بكلفك!!!! خصوصا انها مشروع...واي مشروع بنحاول نوفر علشان نضمن الربح باقل مصاريف

وربنا يوفقك

[world_of_kill]

انا الاسبراتنزا مع ابن خالي و عجباني جدا و كذالك الفيرنا مع ابن عمي بس مش قد الاسبرنزا لما ركبتها حجما و ثبات و كل دا بس مش عارف محتار هل حتبقي عمليه ولا ايه

[ALshahba]

التاكسي محتاج عربيه واسعه علشان تساع اكبر عدد من الراكبين فى المشوار الواحد

[tito_1980]

ان الاتنين رخيص في قطع الغيار

حضترك متأكد من الكلام ده ؟ ان قطع غيار الاسبيرانز رخيصه زي الفيرنا و منتشره زيها ؟؟؟؟؟؟؟؟؟؟؟؟؟؟؟

هل ينفع احط ليها 80 زي الفيرنا او اخلط 80 علي 90

هو مين قال لحضرتك فتوي خلط البنزين في الفيرنا ؟ الفيرنا انجيكشن و مينفعش معاها غير ال 92

ان ينفع يركب عليها كل حاجه المتسوبيشي

مين قال كل حاجه ؟ المساعدين اه السوست ممكن غير كده يبقي خطأ

[Sameh]

بص يا ريس خد نصيحتى لوجه الله عشان انت بتدور على أكل عيش مش بتدور على ركوبة ويهمك فى الآخر انك تصرف قليل وتوفر مصاريف بيتك إن شاء الله ، عشان الأسباب دى ابعد عن الاسبيرانزا خالص ، ومعلش فى الكلمة انتوا الأجرة عندكم غير الاجرة فى القاهرة يعنى زميلك اللى فى القاهرة اقل مشوار بياحد فيه 15 و 20 جنيه وممكن مشاوير ب 50 و60 جنيه فبيعمل فلوس كتير تغطى المصاريف انما عندك مش هيبقا كدة
انا والدى معاه اسبيرانزا 516 وهى ركوبة محترمة وثابتة ومريحة وبتعجبنى وانا راكب اكتر من النوبيرا الى معايا بس قطع غيارها غالية فعلا ومش بتعيش كتير دايما بتطلب قطع غيار واستنزاف فلوس بالنسبة للنوبيرا مثلاً واكيد بالنسبة للفيرنا اكتر واكتر ، فرأى الشخصى هات فيرنا ومش هتفرق معاك حاجة العربية معروفة وسهلة وهتصلحها فى اى حتة انما الاسبيرانزا فيه حاجات هتضطر تعملها فى التوكيل وهم اسعارهم غالية وبيجروا رجلك بس فى الاول بسعر العربية الكويس

[world_of_kill]

استقريت علي فيرنا بعد لف و سؤال علي قطع الغيار و الارخص و كدا كدا مش حيفرق الكماليات لانها الزبون بيركب 5 دقايق و ينزل شكرا جزيلا لمساعدتكم

[Sameh]

مبروك يا باشا يبقا لينا عندك توصيلة بلوشى لو جينا المنوفية

[world_of_kill]

انت تؤمورني تعالو انتو بس