الرجاء الإفادة (عربية زيرو أتوماتيك فى حدود 100 ألف)

[ahmed_afifi]

السلام عليكم ورحمة الله وبركاته
أنا كنت متابع المنتدى من فترة من خارج مصر ودلوقتى الحمد لله انا موجود فى مصر وعايز أشترى عربية زيرو و أتوماتيك فى حدود 100 ألف وعايز رأيكم

أنا بحثت فى الفئة دى و أعتقد ان الخيارات المتاحة هى
البروتون بيرسونا
شيفورلية أوبترا
نيسان صنى ( والاختيار دى انا مستبعده)

فأرجو من الأخوة فى المنتدى افادتى فى المقارنة بين العربيتين دول أو اقتراح بدائل ودى اهم أولوياتى

1- العربية تكون كفائة الماتور بتعتها كويسه وفيها وسائل أمان كويسة
2- التكيف بتاعها يكون محترم
3- ميكونش صالونها ضيق وتكون خامته معقولة
4- متبهدلنيش معاها فى صيانتها
5- ثباتها يكون كويس
6- شكلها يكون فخم

وشكرا مقدما

[SonaSteel]

هههههههههههههه انا شفت العنوان ولسه بقول ياهادي لقيتك كاتب الصني مستبعده ..... انت قفلتني بصراحة هههه
يعني الاولويات اللي انت كاتبها بالظبط وازيد .... للصني السوبر صالون او الهاي لاين ماشاء الله
لكن كترتيب للعربيتين التانين
اعتقد الاوبترا ثم البيرسونا ....... في انتظار رأي الاعضاء ان شاء الله
ومتنساش الاستخارة
وربنا ييسرلك الخير ان شاء الله
أقعد بالعافية

[ghazy12]

ليه بس الصني مسبعده..!!!!!

الغريب ان كل اللي حضرتك طالبه في العربيه (6 طلبات) و السعر, كلهم في صالح النيسان صني تماااااااااااامااااااا :))

يا ريت تقولنا سبب استبعادك للصني, لان بصراحه رأي و بناء على متطلباتك ان الصني هي الانسب... والله أعلم

ربنــا يوفقك للخير...

[M.Alaa92]

حضرتك كنت بتتكلم عن الصنى و بعدين استبعدتها ممكن نعرف السبب
ممكن تفكر فى الرينو سكالا ( هى الصنى الجديدة)

[mido_soliman]

برسونا اليجانس او جين2 لو عايز ليفت باك
مفيش اختيار احلى من دول فى الفئة السعرية دى

[eng.m7md.ali]

السلام عليكم ورحمة الله وبركاته
أنا كنت متابع المنتدى من فترة من خارج مصر ودلوقتى الحمد لله انا موجود فى مصر وعايز أشترى عربية زيرو و أتوماتيك فى حدود 100 ألف وعايز رأيكم

أنا بحثت فى الفئة دى و أعتقد ان الخيارات المتاحة هى
البروتون بيرسونا
شيفورلية أوبترا
نيسان صنى ( والاختيار دى انا مستبعده)

فأرجو من الأخوة فى المنتدى افادتى فى المقارنة بين العربيتين دول أو اقتراح بدائل ودى اهم أولوياتى

1- العربية تكون كفائة الماتور بتعتها كويسه وفيها وسائل أمان كويسة
بيرسونا اليجانس وصني ( 2ايرباجز + (abs + ebd
2- التكيف بتاعها يكون محترم
اعتقد ال 3 حلوين ان لم يكن الصني احسنهم
3- ميكونش صالونها ضيق وتكون خامته معقولة
اوبترا اوسعهم
4- متبهدلنيش معاها فى صيانتها
طالما جديدة ان شاء الله مش هتتبهدل معاها
5- ثباتها يكون كويس
ال3 حلويين بس البيرسونا احسنهم
6- شكلها يكون فخم
ال3 كويسين بس البيرسونا اليجانس اجدد شكل لسة نازل من كام شهر

وشكرا مقدما

[ahmed_afifi]

شكرا لكم جميعا على الردود
الصنى مستبعدة لعدة أسباب وهى كالتالى
1- انا أنا معايا شهادة إعفاء جمركى ب 10000 جنيه ومينفعش استخدمها فى الصنى
2- الصنى شكلها كلاسيك أوى وقديم نسبيا و أنا عايز حاجة مميزه الى حد ما.
3- خايف من التقفيل المصرى.

صراحتا أنا ميال شوية للبيرسونا الجديدة ولكن رأى كل الأخوة يهمنى جدا ولو فى اقتراحات أخرى كمان أكون شاكر

[blazer]

طب هو الشهاده دى متنفعش للصنى ليه ؟
انت ممكن تفكر فى السيراتو الاوتو

[ahmed_afifi]

شكرا لاهتمامك
لأن الشهادة دى لازم تدخل فى عربية متكنش بتتقفل فى مصر

اما بالنسبة للسيراتو - أعتقد عشان آخد المواصفات اللى انا عايزها يبقا دخلنا فى 125000 تقريبا

[mshaheen1]

البرسونا اليجانس ...احسن أختيار ليك

ومش هتندم والله ..العربية جميلة جدا خصوصا مع الشكل الجديد

انا روحت شفتها وانبهرت بيها والله

[ahmed_afifi]

شكرا لحضرتك
وفعلا انا ميال للعربية دى بس هوا حضرتك شوفتها فين ( فى التوكيل نفسه ) ولا هى موجودة عند موزعين تنين

[bayoumisoft]

شيفورلية أوبترا
مع واحد صاحبى ومبسوط منها جدا ومافيهاش مشاكل خالص

[dramir1]

ممكن حضرتك تستني شهر وتشوف الالنترا الجديده ..هو ايه موضوع الاعفاء دا؟؟ ..لو فيها احراج ممكن الرد على الخاص.

[ahmed_afifi]

شكرا لكم جميعا على الردود

يفورلية أوبترا
مع واحد صاحبى ومبسوط منها جدا ومافيهاش مشاكل خالص

المشكلة ان شوفت موضوعات بتتكلم عن ضعف الصاج بتاعها واعتقد استهلكها فى البنزين أعلى هل دا فعلا صحيح

ممكن حضرتك تستني شهر وتشوف الالنترا الجديده ..هو ايه موضوع الاعفاء دا؟؟ ..لو فيها احراج ممكن الرد على الخاص.

أعتقد ان الفئة السعرية ليها حتكون أعلى من كده
بالنسبة لموضوع الاعفاء الجمركى - دى شهادة بتعطى للمبعوث القادم من الخارخ فانا ختها لانى كنت فى بعثة لدراسة الدكتوراة

[MazdaFan]

انا مش برد عشان ارشحلك عربية معينة لأني ماجربتش ولا واحدة منهم ، بس ليا صاحبي معاه برسونا اوتوماتيك بيوقلي بتستهلك بنزين جامد ، فخد بالك واسأل كويس، بس ليه مابتفكرش في الانترا ؟ فيها كل حاجة ماشاء الله مع واحد صاحبي وكان جايبها موديل 2010 خليجي من سنة ب 110 او 105 مش فاكر
واستهلاكها للبنزين معدله طبيعي ماشتاكاش منه ، وموتورها روعة جدا وواسعة من جوه و شنطتها حلوة وناعمة وبتسحب وقطع غيار متوفرة جدا ورخيصة ، انا برضو سمعت ان البروتون عامة قطع غيارها فيها مشكلة ، بس ده كان من زمان معرفش ايه الوضع دلوقتي ، لو مش مستعجل أنا رأيي تستنى لشهر 6 الجاي يكون معرض اوتوماك اتعمل وتشوف ايه الجديد و ممكن يكون في عروض كويسة، وربنا يوفقك للي فيه الخير ان شاء الله