كورولا 2011 ولا استرا 2011 ولا سيفك 2011

[Spndo]

يا جماعة محتاج مساعدة بسرعة جدا ... معايا من 160-180 ألف اجيب أنهي في التلاتة كورولا 2011 ولا استرا 2011 ولا سيفك 2011
وليه , أنا خايف من اعادة البيع للاسترا بس حاسس إن امكانياتها أعلى من السيفك والكورولا .. والسفيك واطية اوي
فأجيب إيه ؟ ولا ممكن اجيب حاجة غيرهم بنفس الفلوس ديه ؟

[masterzmind]

ســــــــــــــــــــــفـــــــــــــــــــــــيــ ــــــــــــــــــــــــــــــــــــــــــــــك

[melagouze]

السيفيك احلي في الموتور

الاوبل اشيك من بره و من جوه ..........مع ان الهوندا بردو حلوه من جوه ( بالذات العدادات)

السيفيك بردو هتخسر فيها لانها الهاي لاين و هتغير شكل السنه اللي جايه ان شاء الله

الامكانيات اعتقد الاوبل

التوكيل كويس مع سيفيك و سئ مع الاسترا

انا رائي الاتنين كويسين ....لو العربيه هتقعد معاك ...يبقي استرا

[ahmedsadek82]

فنيا الاوبل تتفوق من جميع الجهات بدون الدخول في تفاصيل , لكن يعيبها التوكيل و اعادة البيع و توفر قطع الغيار , ليه ما فكرتش في جولف 6 ؟؟ نفس امكانيات الاسترا و ذات شعبية في مصر

[Mustafa_Farouk]

السلام عليكم،

أعتقد لو الفلوس معاك إشطة، جيب استرا عشان الشكل دة لسة نازل جديد وبصراحة عربية وهمية شكلاً وموضوعاً مع كامل احترامي الهوندا وتويوتا. الجولف 7 أغلى من استرا وبتكون base line لكن الاسترا نزلها بامكانيات أعلى من ال-base line بتع الجولف.
من خلال تعاملي مع منصور، هو مش أد كدة في الصيانات بس عندو مراكز معتمدة كويسة جداً زي مقار وأوتوماستر، بالنسبة القطع الغيار، بتكون موجودة وإلي مش موجود بيجبو ليك بس ممكن تاخد فترة، أنا أكتر حاجة خددت فترة مني كان شهر إلا كام يوم ودة كان كمبيوتر نقلات الفتيس عشان مكنشي موجود، غير كدة أنا كان معية كلو كويس. بس قطع الغيار اسعارها غالية بس أعتقد كلو باءة زي بعدو.

[Omar_H]

أنا لو مكان حضرتك كنت هختار الاسترا بجد جامدة قوي من جوه و من بره و بعدين مش منتشرة زي السيفيك (آه ده عيبه في اعادة البيع وقطع الغيار بس الواحد يحس إنه راكب عربية مختلفة)

[N.a.j.d]

الاسترا جااامده يا باشا بس عيبها الوكيل بتاعها بس لو تيجي للصراحه الماني يكسب ومش حتحتاج حاجه ف الصيانه غير الفلاتر والزيوت

[bero0o0o0]

طبعا الاسترا
مادام بتفكر في فئة سعرية عالية كده يعني مش هاتبقى فارقة كتير مصاريف الصيانة و قطع الغيار يبقى خليك في الاوبل

[Ayoob]

ممكن حضرتك تفكر في الفنتازيا او الجيتا.. الفنتازيا رائعة عن تجربة سيارة فخمة من الداخل مقارنة بالسيارات الاخرى من نفس الفئة - مناسبة للطرق المصرية - توكيل معقول ليس سيئ ولا ممتاز -اعادة البيع معقولة ايضا

[MAHDI]

استرا ياعم من حيث الثبات اقوى وافضل
من حيث الاقتصادية الكورلا والاسترا متقاربين جدا
قطع الغيار اللاسترا تقريبا بتخسر
عموما انا افضل الاسترا لانها ااقوى بكل شي

[Dino]

طالما قولت سيفيك.. اركن الكورولا على جنب, لأنها أقل من السيفيك فى كل حاجة!

يبقى المقارنة بين الأسترا والسيفيك

الهوندا تتفوق فى الموتور والسرعة (وده لا يقلل من الأوبل), وكمان التوكيل
الأسترا تتفوق فى الشكل (جديد لكن السيفيك اتغير 2012 بالفعل) والأمان والثبات والهاندلينج والصاج والتقفيل.

يعنى زى ما الأستاذ ahmedsadek82 قالك.. الأوبل تتفوق كـ technology

أنا لو هختار.. الأسترا طبعا

ولو عايز بدايل:
سيدان: الفلونس والمازدا3
هاتش: برافو تربو 120 حصان pkg5 أو pkg6.. تتفوق بكتير فى الأداء الرياضى عنهم, يعيبها فقط التوكيل!
بالتوفيق isa

[N.a.j.d]

كلااام سليم ياباشا