محتار بين النيسان صني والكيا السيراتو

[vagus2000]

السلام عليكم
أنا بصراحة محتار بين النيسان الصني الfull option
والسيراتو الSX
فرق السعر 17000
بس الناس بتقول لي الصني تقفيل مصري لكن السيراتو كوري
انا من ناحيتي باحب الجري ومش باعتني اوي بالعربية (ممكن نقول مهمل لضيق الوقت)
وبالذات ان طول عمري باسوق مستعمل قديم
واخر حاجة عندي كانت ريجاتا 88
وكانت وحش على الطريق وباقلب بيها ميكروباصات

ما علينا
ممكن يا جماعة تشاركوني لاني احترت

[SonaSteel]

انا من رأي تنقل الموضوع ده قسم المقارنات افضل
لان هنا كلهم ملاك نيسان ثحدش هايقولك هات سيراتو
بش انا لاحظت حاجة
انت بتقول بتاع جري.... وديه ميزة السيراتو
ةبتقول انك مش بتعني بالعربية وبتقلبها ميكروباس.... وديه ميزة الصني انها حماله اسيه.
انت شوف محتاج لايه اكتر
بس مش قصدي الصني مش بتجري... لا ماتورها محترم بس ماتور السيراتو اقوي.... وانا سمعت انك علشان تتمتع بعربية زي السيراتو لازم تجيب اعلي فئة... معرفش الكلام ده صح ولا لا
ومتنساش الاستخارة طبعا وربنا ييسرلك الخير

[vagus2000]

يا باشا شكرا على الرد
انا مش متعود على الرفاهية في العربيات
لكن دي هتبقى عربية العمر ان شاء الله

[FBIAhmed]

سيراتو

[Hossam_Zaky]

طالما فرق السعر مقبول بالنسبة لك يبقي هات السيراتو
مع العلم أن اختيار السيراتو عشان وسعها و حجمها من صالون و شنطة و فتيس 6 سرعات و كماليات معقولة في الـsx
و الصني معقولة علي سعرها لو مكنتش حتعدي حاجز ال100 ألف
لكن و علي الرغم من أن السيراتو سريعة و ده ميختلفش عليه أتنين لكن مع السرعة تبقي مشكلة الثبات لأن عفشة السيراتو نفس تصميم عفشة الصني تقريبا تعليق أمامي مستقل و خلفي قنطرة ( زي معظم العربيات في الفئة دي ) و ده زي الفل و السيراتو ثابتة فعلا لغاية سرعات عالية لكن عشان مساعدين العربية قصيرة نسبيا ( عكس الصني ) عشان تدي ثبات زي عربيات السباق تبقي مشكلتك مع مطبات الهواء اللي غالبا ممكن تفقد العربية السيراتو جزء من ثباتها لأنك لو أخدت مطب الهوا بسرعة عالية العربية بتنضغط لتحت و بعدين رد الفعل أنها ترتفع و هنا المشكلة أن شوط المساعد قصير فعجلة العربية احتمال ترتفع عن الطريق و هنا ربنا يستر لو طريق مستقيم عادي ممكن متحسش بالقصة دي لكن لو داخل علي ملف أو عاوز تعمل مناورة بالعربية فهنا يتوقف الموضوع علي أحتراف السائق لأن العجلة اللي أرتفعت عن الطريق طبعا فقدت تماسكها يبقي أكيد العربية حتعوم منك ( حسب السرعة ) و ده اللي بيسموه عجلة القيادة أختلت في يد السائق
و كل ده مش موجود في المازدا 3 القديمة و الجديدة ولا الجيتا طبعا ولا السيفيك لأن كل دول تعليق مستقل للأربع عجلات فمش محتاج يقصر المساعد ولا ينشف العفشة لأن تماسك العربيات دي من تصميم العفشة نفسها !
و يا ريت محدش يتداخل في الموضوع بأن السيراتو مغناطيس علي الأرض لأن التوكيل نفسه و أحنا بنشتري العربية سيراتو 2011 بيقولنا العفشة المعدلة عشان تماسك العربية ( عربية نزلت 2010 و عدل العفشة 2011 ! )
و ده مش معناه أن السيراتو وحشة بالعكس تماما عربية زي الفل لكن مش عربية سباق ولا طرقنا أصلا تسمح بالسباق يبقي العربية ممتازة في حدود الأستعمال العادي
صديقي الأنتيم كان معاه صني ex أتوماتيك و باعها و عشان يغير مالقيناش غير السيراتو 2011 بسعرها المقبول نسبيا و جبناها sx أول فئة بدون فتحة سقف عربية ممتازة جدا و جودتها عالية

[Hossam_Zaky]

نسيت
أوعي تجيب الجنط ال17 خليك في ال16 أخرك

[omar-saad]

طالما فرق السعر مقبول بالنسبة لك يبقي هات السيراتو
مع العلم أن اختيار السيراتو عشان وسعها و حجمها من صالون و شنطة و فتيس 6 سرعات و كماليات معقولة في الـsx
و الصني معقولة علي سعرها لو مكنتش حتعدي حاجز ال100 ألف
لكن و علي الرغم من أن السيراتو سريعة و ده ميختلفش عليه أتنين لكن مع السرعة تبقي مشكلة الثبات لأن عفشة السيراتو نفس تصميم عفشة الصني تقريبا تعليق أمامي مستقل و خلفي قنطرة ( زي معظم العربيات في الفئة دي ) و ده زي الفل و السيراتو ثابتة فعلا لغاية سرعات عالية لكن عشان مساعدين العربية قصيرة نسبيا ( عكس الصني ) عشان تدي ثبات زي عربيات السباق تبقي مشكلتك مع مطبات الهواء اللي غالبا ممكن تفقد العربية السيراتو جزء من ثباتها لأنك لو أخدت مطب الهوا بسرعة عالية العربية بتنضغط لتحت و بعدين رد الفعل أنها ترتفع و هنا المشكلة أن شوط المساعد قصير فعجلة العربية احتمال ترتفع عن الطريق و هنا ربنا يستر لو طريق مستقيم عادي ممكن متحسش بالقصة دي لكن لو داخل علي ملف أو عاوز تعمل مناورة بالعربية فهنا يتوقف الموضوع علي أحتراف السائق لأن العجلة اللي أرتفعت عن الطريق طبعا فقدت تماسكها يبقي أكيد العربية حتعوم منك ( حسب السرعة ) و ده اللي بيسموه عجلة القيادة أختلت في يد السائق
و كل ده مش موجود في المازدا 3 القديمة و الجديدة ولا الجيتا طبعا ولا السيفيك لأن كل دول تعليق مستقل للأربع عجلات فمش محتاج يقصر المساعد ولا ينشف العفشة لأن تماسك العربيات دي من تصميم العفشة نفسها !
و يا ريت محدش يتداخل في الموضوع بأن السيراتو مغناطيس علي الأرض لأن التوكيل نفسه و أحنا بنشتري العربية سيراتو 2011 بيقولنا العفشة المعدلة عشان تماسك العربية ( عربية نزلت 2010 و عدل العفشة 2011 ! )
و ده مش معناه أن السيراتو وحشة بالعكس تماما عربية زي الفل لكن مش عربية سباق ولا طرقنا أصلا تسمح بالسباق يبقي العربية ممتازة في حدود الأستعمال العادي
صديقي الأنتيم كان معاه صني ex أتوماتيك و باعها و عشان يغير مالقيناش غير السيراتو 2011 بسعرها المقبول نسبيا و جبناها sx أول فئة بدون فتحة سقف عربية ممتازة جدا و جودتها عالية

بس النيسان صنى اثبت من السيراتو
فعلا بتاخد بيها غرز وتعمل بيها مناورات
ماتقدرش تعملها بالسيراتو

[yassal]

لو عايز أعتمادية وسيارة تعيش معاك فترة كبيرة من غير مشاكل يبقى هات الصنى بس فى المقابل حتحس انك راكب عربية قديمة ومش شبابى - الكورى حلو للجرى والمناورة والشكل الانسيابى بس انسى الاعتمادية وان السيارة تعيش معاك فترة كبيرة من غير مشاكل

[alaa7sh]

لو بتحب بالجري مع امكانيات وأوبشنز محترمة
يبقي الجين 2 وششششش

[vagus2000]

يا جماعة
شكرا جزيلا على مساعدتكو
لكن الموضوع اتعقد شوية
لاني النهاردة وانا باسأل على الصني من واحد صاحبي قال لي ماتشوف الرينو السيمبول
شوفتها
عربية تحفة والفول اوبشن منها ب95 الف
فزاد احتياري

المشكلة الاكبر ان لما تخش السيراتو
تحس انه جالك تنويم مغناطيسي من شكلها وترجع تفكر فيها تاني
مش عارف اعمل ايه

[blazer]

لو مش هتعدى ال 100 الف يبقى السوبر صالون
انما ممكن لو عاوز سيراتو فيه عربيات بالهبل كسر زيرو

[SonaSteel]

هههههههه... انت عندك حق بصراحة
السيراتو شيك جدااا... وانوارها ونور التبالوه يحولوا ههههه
بس صدقا كان شعوري اول ما قعدت فيها انها مش هاتنفعني... والله من وانا بفتح الباب وبقعد فيها... قلت ايه اللي هاشتريه ده... مش تقليل من قيمة العربيه.. بس حسيت انهر مش,هاتسد معايا لا مطبات ولا خرابيش ولا الحكات من ولاد الحلال في الشارع.... وحسيت انها منفوخة من جوة... معرفش الشعور ده جالي ليه... بس هي اذواق.
بالنسبه للرينو اسمها اسكالا... وميزتها ان اعلي فئه ب95000... يعني ارخص من السوبر صالون ب5000
عيبها بقي... ان التقفيل المصري بالنسبالها... زي التقفيل الالماني قدام كوري... خامات التابلوه والدريكيسون نفس اللوجان... وسقفها واطي... واصلا متجيش بالسعر ده خلص المفرض,تبقي اقل من الصني.. مش نفس السعر وقال هاتنافس.... كانت انتشرت... بقالها سنتين في,مصر منتشريتش ليه??
السيراتو اه تخليها تلعب في دماغك... لكن الاسكالا منصحكش.
بص عايز الخلاصه.... الكوووري كله عمره قصير وكمالباته عاليه... والياباني عمره طول وكمالياته اقل.... هايشتركوا في انتشار قطع الغيار بس هايختلفوا في الثبات.
شوف انت فين بقي من المعادلة ديه... واستخير الله عز وجل وربنا ييسرلك الخير;)))

[beckeryahia]

مشكلة السيراتو انها بقت شعبية اوييييييييييي , ودي حاجة مش حلوة اما تلاقي اشكال غريبة راكبة العربية , لكن مش اي حد بيركب الصني واتحدي اي حد يقول غير كده ان ركيب الصني مختلف تماما عن ركيب الانسر والسيراتو والكورولا وكل الكلام ده.

[Youssef.Awad]

الخلاصة ومن الاخر
لو عاوز تركب عربية كام يوم وتتسرق وتتبعت غزة فى نفق يبقى هات سيراتو
انما الصنى ما تخافش مش مطلوبة فى غزة خالص
ههههههههههههههههه

[OOOKA]

الخلاصة ومن الاخر
لو عاوز تركب عربية كام يوم وتتسرق وتتبعت غزة فى نفق يبقى هات سيراتو
انما الصنى ما تخافش مش مطلوبة فى غزة خالص
ههههههههههههههههه

بصراحه رد جااااااااااااامد وف الجون

الله ينور