مقارنة سريعة بين النترا 2012 فولى لودد و فانتازيا اعلى فئة

[SAMEHNOSHI]

من حوالى اسبوعين سوقت الالنترا 2012 الفولى لودد و عجبتنى جدا و امبارح سوقت فانتازيا 2011 اعلى فئة اللى بى 210 الف و بردة عجبتنى جدا فقلت اعمل مقارنة سريعة بينهم.
اولا مدة السواقة لكل سيارة كانت اقل من نصف ساعة + حوالى ساعتان جلوس بجانب السواق + حديث مع صاحب كل عربية عن كماليتها و تجربة عملها + قراءة رفيوهات اجنبية و مقارنات عن تقييم و اعتمادية و اداء كل سيارة, يمكن ده مش كفاية انى اعمل مقارنة بس على الاقل حدى انطباعاتى للافادة:




الالنترا 2012 فولى لودد كانت عاملة 2500 كيلو و الفانتازيا 2011 هاى لاين اعلى فئة وكيل و عاملة 3000 كيلو

• السعر الالنترا: الالنترا 155 الف الفانتازيا 210 الف
• التسارع الالنترا: الالنترا 130 حصان, الفانتازيا 102 ~ 105 حصان, الالنترا تحس انها طيارة, الفانتازيا تحس انها تقيلة شوية بس مش بالشكل اللى كنت فاكره و فى الزحمة اللى البلد فيها دلوقتى مش حتحس بفرق كبير
• صوت الماتور متساويين: متقاربين جدا, فى الدوراة والثبات الاتنين ملهمش اى صوت و الاثنين ليهم صوت خفيف فى الاول و الثانى و بعدين يختفى كل ما السرعة تزيد بس الفانتازيا اعلى شوية نتيجة لتقل العربية فبتحتاج تقرص شوية فتلاقى صوت الماتور على, بس رغم ان صوت ماتور الفانتازيا اعلى من الالنترا بس فى نفس الوقت صوتة لية زنة جميلة احسن من زنة الالنترا.
• الثبات لم يتم اختبارة بس بالسمع فانتازيا: انا معدتش ال 120 كيلو فمش حقدر احكم فى النقطة دى بس اللى دايما اسمعة ان الفانتازيا ثبات عالى نتيجة للتعليق المالتى لينك + وزن السيارة, بس خدو بالكو ان قاعدة عجلات الالنترا اكبر و العربية عريضة جدا و ده بيدى ثبات عالى و على 120 فى طريق المطار كنت حاسس ان العربية واقفة.
• نشوفية العافشة متساويين: الالنترا كانت ناعمة, نفس نعومة الفيرنا اللى معايا تقريبا, الفانتازيا ممكن تكون انشف حاجة بسيطة جدا بس مش ذى ما كنت متخيل من اللى بسمعة
• قوة الصاج فانتازيا: مفيش وجة مقارنة, تحس ان الفانتازيا دبابة و اكصدمات مصفحة, الالنترا 2012 صاجها افضل من 2011 طبعا بس بردة لا يقارن بالفنتازيا
• الكماليات الفانتازيا: الفانتازيا تزيد مرايات ضم كهرباء + وحدات رفع + زينون + كاسيت تاتش سكرين + ثلاجة + مراقبة ضغط الاطارات + ASR --- الالنترا تزيد مفتاح بصمة + تشغيل المحرك بزرار + نظام eco لتوفير البنزين
• اسعار قطع الغيار النترا: طبعا لسة منعرفش اسعار قطع غيار الالنترا الجديدة بس الكورى مهما غلى عمرها محتوصل لسعر الالمانى
• سعر اعادة البيع النترا: بردة لسة غير معروف الالنترا بس التاريخ يشهد على تفوق الهيونداى
• الشكل الخارجى و الداخلى النترا: دى وجهات نظر بس انا شدنى تصميم الالنترا الخارجى جدا, تحس انها سابقة الفانتازيا بى 10 سنين شكل الفانتازيا تحس انه تصميم قديم و مش شبابى خالص و بالذات الفوانيس الخلفية بسيط جدا و تحس انها موديل قديم جدا ولا يتناسب مع عربية سعرها 210 الف --- اما الشكل الداخلى فبردة الالنترا احلى و شكل العدادات و الكنسول و التابلوة اجمل ومع الوسع تحس انك راكب فئة اعلى ذى السوناتا او الكامرى.
• النظام السمعى متساوى: العربيتن صوت الكاسيت و السماعات جبار و مش حتحتاج تعمل اى تعديلات علية
• وسع الصالون النترا: الالنترا واسعة جدا جدا و كمان عريضة جدا, انا طولى 180 سم رجعت كرسى السواق على الاخر و رجعت الكنبة اللى ورا لقيت مساحة كبيرة جدا بعكس الفانتازيا, فرق كبير جدا فى وسع الصالون لصالح الالنترا و ليهم حق يصنفوها برة من فئات mid size و ليس compact يعنى فئة السوناتا و الكامرى.
• وسع الشنطة فانتازيا: الفنتازيا شنطة واسعة جدا بس معجبنيش الازاز اللى بيفتح مع الشنطة كانها هاتش باك.
• استهلاك البنزين النترا: النترا افضل طبعا بالذات مع نظام eco لتوفير البنزين.
• قلة الاعطال و الاعتمادية غير معروف و العربيتين كويسين
• الديمومة والعمر الافتراضى فانتازيا: بعد 5 سنين حتلاقى الفانتازيا لسة جديدة جنب الالنترا اللى حتلاقيها متبهدلة نتيجة لضعف الصاج.

نيجى باقى لبعض الملاحظات الهامة اللى اخدت بالى منها و معجبتنيش فى الالنترا رغم غلو سعرها!!! يعنى عربية كورى بى 155 الف و مفهاش:

• مفهاش وحدات رفع!!!
• لو باب مفتوح مش بيقولك انهى باب اللى مفتوح!!! مع انة موجود فى السيراتو الاقل سعرا!!!
• السنسور صوت بس!!! مفيش اى حاجة تظهر على التابلوة!!! مع انة موجود فى السيراتو الاقل سعرا!!!
• البلوتوث فيها اهبل جدا, ترد على التليفون و تكلم و تقفل المكالمة وخلاص!!! يعنى متعرفش تعمل مكالمة غير من الموبيل, منه لله غابور حاجة مختلفة خالص عن الالنترا التاتش سكرين اللى بتنزل برة و فيها خاصية اصدار اوامر صوتية للاتصال من خلال السيارة --- بعكس بلوتوث الفانتازيا رائع بتشوف كل contact list اللى فى موبيلك على كاسيت العربية التاتش و تقدر تعمل بروفيل و تحط preset contacts للاتصال السريع و تقدر تعمل بحث, بصراحة لا يقارن ببلوتوث الالنترا ده فى الفانتازيا الهاى لاين مع الكاسيت التاتش معرفش النظام حيبقى اذاى فى الفانتازيا البيز لاين.

بختصار العربيتن فعلا حلويين جدا و اكيد الفانتازيا الهاى لاين (مش البيز لاين) افضل و افخم و امتن طبعا و السؤال هل الفرق بين العربيتين يستاهل فرق السعر 55 الف جنية ؟؟؟
الاجابة لو انت مستريح ماديا يبقى فرق السعر يستاهل اما لو مش معاك او حتقسط يبقى فرق السعر ميستهلش

الخلاصة:

• لو معاك 210 الف ثمن الفنتازيا الهاى لاين هاتها بدون تردد هى افضل طبعا من الالنترا و فرق السعر يستاهل لو معاك و انت مستريح ماديا ... مش تكون معكش و حتقسط!!!
• اما لو معاك 155 الف و بتقارن بين فانتازيا بيزلاين مانيوال و النترا اتوماتيك فولى لودد يبقى النترا افضل طبعا... الالنترا الفولى لودد افضل طبعا من الفانتازيا البيزلاين مانيوال.
• لو حتبيع فى خلال 3 او 4 سنين هات النترا اما لو مش حتغير بسرعة و عايز عربية معمرة هات فانتازيا افضل.
• لو فارق معاك الشكل و عايز عربية شكلها شبابى و جراية و واسعة جدا هات النترا لو مش فارق معاك النقطة دية يبقى هات فانتازيا افضل.

و اى حد عنده سؤال او استفسار انا تحت امره اذا كنت اعرف الاجابة حرد علية فورا

[MOUSTAFA_SAAD]

جزاك الله خيرا
مقارنه ممتازه

[omar-saad]

مقارتة ممتازة
الهيونداة فعلا بقت بتعمل تصمايم ثورية
بعكس الالمانى الى طول عمره متحفز جدا فى تصميماته
يعنى تشوف الاوكتافيا ال98 و2012
هتطلع حاجات كتير متشابهة
دة اللى بيميز الالمانى

[mahmoud_afifi]

مقارنة جميله جدا تسلم ايديك بس في نقطه محل جدال كبير بين الاعضاء وهي جودة الخامات والتقفيل. ياريت حضرتك تفيدنا هل الفرق بينهم واضح وان الالنترا بلاستيك وخلاص ولا الخامات في 2012 احسن من القديم ؟

[PoweRPassioN]

Fair Enough
Thanks for your Comparison.

[medo_2060]

تسلم ايدك مقارنه رائعه...
بس وانت سايق انهى عربيه الى حسيت ان سواقتها ممتعه مزاج يعنى ههههه..بجد زى متعه السواقه المشهوره عن الهوندا كمثال
الانترا ولا فانتازيا؟

[SAMEHNOSHI]

جزاك الله خيرا
مقارنه ممتازه

متشكر يا مصطفى باشا

مقارتة ممتازة
الهيونداة فعلا بقت بتعمل تصمايم ثورية
بعكس الالمانى الى طول عمره متحفز جدا فى تصميماته
يعنى تشوف الاوكتافيا ال98 و2012
هتطلع حاجات كتير متشابهة
دة اللى بيميز الالمانى

فعلا و ده رايى بردة, تصميمات الهيونداى الجديدة كلها رهيبة و فرق كبير بينها و بين القديمة بعكس الالمانى الفرق بسيط بين ال a5 و الفنتازيا

مقارنة جميله جدا تسلم ايديك بس في نقطه محل جدال كبير بين الاعضاء وهي جودة الخامات والتقفيل. ياريت حضرتك تفيدنا هل الفرق بينهم واضح وان الالنترا بلاستيك وخلاص ولا الخامات في 2012 احسن من القديم ؟

بصى يا باشا, الالنترا GL فيها بلاستيك كتير فعلا فى البيبان, لكن الفولى لودد حاجة تانية و خامتها حلوة جدا و كلها جلد ممتاز و اكيد خامات الالنتر 2012 احسن من الشكل القديم.

تسلم ايدك مقارنه رائعه...
بس وانت سايق انهى عربيه الى حسيت ان سواقتها ممتعه مزاج يعنى ههههه..بجد زى متعه السواقه المشهوره عن الهوندا كمثال
الانترا ولا فانتازيا؟

بصراحة انا استمتعت بالالنترا اكتر علشان تسارعها كان رائع و تصميمها و شكل ال interior بتاعها و عداداتها كانت عجبانى اكتر... الفنتازيا برستيج و كل حاجة بس كلاسيك اوى و حسيت انها مش شبابية خالص تصميم و اداء بس كعمر افتراضى و تحمل اعتقد الفنتازيا افضل ... كمان الاوبشن فى الفنتازيا اجمل و كفايا البلوتوث الرائع اللى فيها( اللى فى الهاى لاين مش البيز لاين ) مش الغبى اللى فى الالنترا

[abdalah_hashem]

مقارنة حلوة تشكر يا كبير

[AutoTycoon]

احب الناس الفاهمة

[tito78]

مقارنه هايله
بس على أى أساس خلصت إن الفارق يستحق
وكمان لو جيت بعت بعد مثلا 6 سنين فى خبرتك تقول كل واحده تنزل لكم
من فضلك جاوبنى لإنى خلاص على وشك أشترى

[SAMEHNOSHI]

مقارنة حلوة تشكر يا كبير

العفو يا باشا

احب الناس الفاهمة

شكرا ده بس من ذوقك

مقارنه هايله
بس على أى أساس خلصت إن الفارق يستحق
وكمان لو جيت بعت بعد مثلا 6 سنين فى خبرتك تقول كل واحده تنزل لكم
من فضلك جاوبنى لإنى خلاص على وشك أشترى

يا باشا انا مقلتش الفرق يستحق... انا قولت الفرق يستاهل او لا يعتمد على امكانياتك + انت عايز ايه من العربية
وانا معرفش سعرهم حيبقى كام بعد 6 سنين بس طالما بنتكلم فى 6 سنين يبقى متفكرش كتير فى سعر اعادة البيع... سعر اعادة البيع تفكر فيه لو حتبيع خلال سنتين او ثلاثة او اربعة بالكتير.

[elmadawy]

فعلا مقارنه رائعه جدا ومفيده الله ينور عليك

[ashouhdy]

ياباشا الفروقات اللى قلتها فى الكماليات ولا حاجة

يعنى مثلا البلوتوث ! انت ممكن ب 3الاف جنية تجيب كاسيت تاتش بلوتوث اللى نفسك فية و gps والدنيا كلها ويبقى استريحت نفسيا

انا ضد الاوكتافيا وبقولها صراحة ... هى كانت حلوة لحد 2004 بعد كدة ملهاش لازمة .... بيفكرونى بغبور والفيرنا ... عربية بياعة طب اوقفها لية ... المهم

اية احساسك وانت دافع 210 الف ومركب ورا اتنيين مزنوقيين !!

حاجة اخيرة ميين قال ان العربية بعد 6 سنين حتكون متبهدلة ؟؟!! لو نفس الاستخدام و الكيلوهات مش حيكون فى فرق لية العربية حتقشر لوحدها مثلا !!! قسما بالله معايا فيرنا 2008 لما بتطلع من المغسلة متفرقهاش عن الزيرو !!

العربية اولا واخرا استخدااااااااام

لو حتكلم على المانى يبقى مرسيدس بى ام اودى .... الباقى كلة اخوات من بعيد عدا الجولف والباسات طبعا

[tito78]

شارك معنا فى الإستطلاع

هل الإلنترا 2012 الهاى لاين تستحق 156 ألف

http://www.nilemotors.net/Nile/242730-2012-156-a.html (هل الإلنترا 2012 الهاى لاين تستحق 156 ألف)

[SAMEHNOSHI]

ياباشا الفروقات اللى قلتها فى الكماليات ولا حاجة

يعنى مثلا البلوتوث ! انت ممكن ب 3الاف جنية تجيب كاسيت تاتش بلوتوث اللى نفسك فية و gps والدنيا كلها ويبقى استريحت نفسيا

انا ضد الاوكتافيا وبقولها صراحة ... هى كانت حلوة لحد 2004 بعد كدة ملهاش لازمة .... بيفكرونى بغبور والفيرنا ... عربية بياعة طب اوقفها لية ... المهم

اية احساسك وانت دافع 210 الف ومركب ورا اتنيين مزنوقيين !!

حاجة اخيرة ميين قال ان العربية بعد 6 سنين حتكون متبهدلة ؟؟!! لو نفس الاستخدام و الكيلوهات مش حيكون فى فرق لية العربية حتقشر لوحدها مثلا !!! قسما بالله معايا فيرنا 2008 لما بتطلع من المغسلة متفرقهاش عن الزيرو !!

العربية اولا واخرا استخدااااااااام

لو حتكلم على المانى يبقى مرسيدس بى ام اودى .... الباقى كلة اخوات من بعيد عدا الجولف والباسات طبعا

شهدى باشا انا عارف انها كماليات بسيطة يعنى تركيب وحدات رفع مش حيكلفك 200 جنية بس انت مش حتعرف تركبها لانك ببساطة حتخرج برة الضمان
كمان الكاسيت التاتش اللى سعرة 3000 جنية ده صينى تعبان, كاسيت الالنترا التاتش الاصلى بالنفجشن و الكاميرا سعره برة 1600 دولار لوحدة.
و انا لما قلت الالنترا حتبقى متبهدلة و شكلها قديم بعد 5 سنين مقارنة بالاوكتافيا انا مكنتش بتكلم على الميكانيكا و الاعطال انا بتكلم على الشكل الخارجى فقط نتيجة لضعف صاج الالنترا و انت بنفسك على شكل الالنترا 2007 عاملة ازاى دلوقتى جمب الجيتا و الاوكتافيا 2007.
اما الاعتمادية و قلت الاعطال فانا مقتنع ان الالنترا و افضل كمان من الاوكتافيا, اينعم الشكل الجديد لسة مش معروف نظامه ايه بس الهيونداى عموما واخد مراكز متقدمة من حيث قلة الاعطال و الالنترا بجميع اجيلها تاريخها مشرف.
و انا ذى ما قلت استمتعت بسواقة الالنترا اكتر من الاوكتافيا و عجبتنى جدا و لولا الاربع ملاحظات فى الكماليات اللى قلتهم كانت حتبقى عربية ملهاش حل.