معى 77 الف اشترى فيرنا اتوماتيك ولا مانيول

[menshawy]

معى 77 الف اشترى فيرنا اتوماتيك ولا مانيول

الاول كنت هاجيب الفرنا مانيول فول اوبشن ب 70
صحابى قالولى زود 7 الف وهاتها اتوماتيك احسن

ايهما افضل ولماذا

[menshawy]

1- مش كل الأوتوماتيك زى بعضه، يعنى مثلا هنلاقى ان الأوتوماتيك بتاع السيارات الكورية موديلات التسعينات (هيونداى-دايو- كيا) يجيب شلل ، سحبه بطيييييييئ جدا وبتحتاج انك تجيب البنزين على الأرض علشان العربية تتحرك ، لكن الأوتوماتيك بتاع اليابانى من اول التسعينات وبتاع الكورى الحديث (ما بعد 2004)(زى الفيرنا والماتريكس والأوبترا والإلانترا) تسارعه ميفرقش كتير عن المانيوال ، والعربية بالفعل بتطير من على الأرض مع لمسة بنزين لدرجة انك مبتعرفش تحكمها فى الزحمة غير بالفرامل، برضه فية تباين فى الأداء بين الموديلات الأوروبية والأمريكية المختلفة لكن بالفعل الجير الأوتوماتيك ديلوقتى غير التسعينات

3- تسارع الأوتوماتيك ممكن يكون اقل شوية من مثيلتها المانيوال لكن ده بيعوضه ان الفتيس بينقل فى وقت اقل كتير من اللى انت هتنقل فيه (جربتها 100 مرة انى اطلع حرق مع سيارة مانيوال، دايما هو بيتأخر عنى فى لحظة الطلوع ولحظة الغيارات، ممكن يعدى منى او يحصلنى او يتأخر عنى بعد كدة حسب مهارته فى القيادة، لكن بالفعل فى السرعات العالية مبتفرقش كتير)

2- الميزة الأساسية اللى بحسها فى المانيوال هى سهولة التحكم فى العربية فى الاختناقات المرورية فى شوارع مصر، او بكلمة اخرى بقدر اتحكم فى العربية المانيوال انى الزق فى ضهر العربية اللى قدامى علشان محدش يكسر عليها، وده بفضل وجود الدبرياش،لكن بالنسبة للأوتوماتيك لازم اسيب مسافة لأن لمسة البنزين بتخلى العربية تطير لقدام ولو ملحقتهاش بالفرمل ممكن البس فى اللى قدامى

3- مقابل هذة الميزة فأنه بعد القيادة لمدة نصف ساعة بسيارة مانيوال فى اختناق مرورى تحس ان الرباط الصليبى بتاع ركبتك الشمال هيطق خلاص،وطلعلك كاللو فى بطن قدمك اليسرى ، وكوعك اليمين جاله جفاف واعصاب كفك اليمين انت مش حاسس بيها ، بعكس السيارة الاوتوماتيك التى كل ما ينالك منها بعد الزحام هو حالة من الملل المرفه، لكن مهما كانت حالة الزحام انت مبتتعبش بدنيا لو العربية اوتوماتيك

4-المانيوال له ميزة الاستجابة للقيادة الاقتصادية، يعنى مثلا فى الطريق الدائرى آخر 2 كيلومتر قبل التقاطع اللى انت هتخرج منه على شكل منزل تقدر تمور العربية، الميزة دى غير متاحة فى الأوتوماتيك ، وبالتالى لو انت سائق اقتصادى تقدر تعمل بالمانيوال استهلاك افضل من الأوتوماتيك بحوالى 5-10%

5- المانيوال تقدر تدوره لو المارش او البطارية عطلانة، الأوتوماتيك مينفعش

6- تسقيط غيار فى الأوتوماتيك اسهل واسرع من المانيوال كتير جدا ، وبالتالى على عكس ما يظن البعض، استجابة الأوتوماتيك للطوارى فى الطرق السريعة بتكون سريعة جدا ولا تشغل السائق بالدبرياخ والفتيس وتترك له الفرصة للتركيز فى الحالة الطارئة الموجودة امامك

7- المانيوال بيدى للسائق حالة من الاحساس بالتواصل مع السيارة حيث يكون لكل طرف من اطراف السائق الأربعة دور فى القيادة وبالتالى يشعر بالإتصال مع السيارة بشكر افضل، وده بيحقق حالة افضل من الاشباع النفسى للسائق، بعكس الأوتوماتيك التى تقاد بيد واحدة وقدم واحدة وبالتالى تقل حالة التواصل بين السائق وبينها

الخلاصة: الأوتوماتيك افضل بكتير لمن يحتاج للسيارة لتسيير اموره ويتعرض بكثرة للطرق المزدحمة، المانيوال افضل لمن يحب القيادة فى حد ذاتها، بس ميزعلش من اللى هيحصل له فى الزحمة

[newcar2011]

الدنيا زحمممممممممممممممممممه زحممممممممممممممممممممه هات اتوماتيك وارتاح

[ahmad--ezzat]

متجبش فيرنا اصلا

[AutoTycoon]

فيرنا عربية كويسة للناس اللي بتعرف تسوق... هات اوتو

[raedegypt]

معى 77 الف اشترى فيرنا اتوماتيك ولا مانيول

الاول كنت هاجيب الفرنا مانيول فول اوبشن ب 70
صحابى قالولى زود 7 الف وهاتها اتوماتيك احسن

ايهما افضل ولماذا

زحمه مصر يفضل الاتوماتيك والفيرنا ميزتها موتور القوة الحصانيه 112 على ما اعتقد عاليه مع حجم العربيه ووزنها فالاتوماتيك فيها كويس . بس اتوماتيك فى عربيات قوة حصان اقل من كدة بيكون ضعيف ومع التحميل والتكييف تبقى ضياع

[احمد المصرى]

بدون تفكير اتوماتيك طبعا انا بعت عربيتى علشان اجيب اتوماتيك ودا السبب الرئيسى فى البيع

[Donzi]

هات اتوماتيك بس بلاش فيرنا اصلا

[ahmed2y]

فيرنا عربية كويسة للناس اللي بتعرف تسوق... هات اوتو

فعلا كلامك صحيح انت جبت الخلاصة

[SAMEHNOSHI]

اتوماتيك طبعا مش شايف البلد بقت عمله ازاى!!! انا حموت و ابدل الفيرنا اللى معايا بواحدة اتوماتيك

[Eng.Geo]

زحمه مصر يفضل الاتوماتيك والفيرنا ميزتها موتور القوة الحصانيه 112 على ما اعتقد عاليه مع حجم العربيه ووزنها فالاتوماتيك فيها كويس . بس اتوماتيك فى عربيات قوة حصان اقل من كدة بيكون ضعيف ومع التحميل والتكييف تبقى ضياع

هو مقالكش انها 106 ؟

[Eng.Geo]

الفيرنا الأوتو كويسة
بس 4 غيار بس وأستهلاكها أعلي طبعا من المانيوال بتاعها
تسارع حلو .. حسيت انها أثبت من العادية ... يمكن عشان الجنط 14

[osama_ruan]

زود شوية وهات النترا بعد 2007 مستعملة اوتو فرق رهيب

[Sehsss]

بصرف النظر عن إن الفيرنا عربية سيئة (خاصة إني من الناس اللي ما بتعرفش تشوقها .. لأنها ليها طريقة مخصوصة محدش يعرف يسوقها غير اللي معاه العربية هههه) إلا إنك لو عاوز تركب أوتو يبقى ابعد عن الكوري أولك يبقى الياباني

[elpasha1]

الفيرنا الاوتوماتيك ممتازة نفس فتيس الماتريكس ونفس فتيس الالنترا الشكل القديم 2005
وبالنسبة للبنزين الفرق بين سحب البنزين الاوتو والمانيول مش كبير