الانترا 2012 ولا نيسان تيدا hb 2011

[surfer3098]

السلام عليكم مطلوب رايكم لأني محتار بين نيسان تيدا 2011 هتشباك اوتوماتيك كل الكماليات وبين هيونداي الانترا 2012 اوتوماتيك 1 ايرباج و abs مع العلم بان السعر واحد تقريبا (من غير فتحت سقف)
بعض الملاحظات:
1-أنا مش بجري كتير بس بحب أجري وأحيانا بشد على خفييف لأن العربية اوتوماتيك مش بتعد شد بس يهمني الموتور
2-أنا طويل شوية وبأحس إني مكتوم في الهيونداي
3- يهمني عمر العربية لانها قاعدة إن شاء الله لو ليها وليا عمر مالا يقل عن 5-6 سنين
شكرا مقدما :) :)

[Sehsss]

تيدا طبعا ياباشا وتوكل على الله ومش هاتندم

[surfer3098]

سحس باشا شكرا على ردك وعلى سرعته بس ممكن تديني أسباب علشان اخلص من حيرتي ده عن قناعة كده وبالذات لو الأسباب تخص النقط الأنا حاططها معلش هتعبك معايا بس اكسب ثواب في اخوك الصغير :):)

[SAMEH_FOUAD]

شوف ياباشا عشان ماتحترش كتير :

التيدا :مميزاتها
سيارة واسعة جدا , خاماتها حلوة اوى , التكييف كويس , عالية عن الارض , ماتورها هادى جدا حتى مع الشد , قطع غيارها معمرة كحال اليابانى كلة والصراحة بقالها ثلاث سنوات والحمد لله ماعطلتش يوم
وتوكيلها جيد جدا واسعارها مش غالية ومش رخيصة فى الوسط بس يعيبها ان مافيهاش ايموبليزر

عيوبها : التكييف بيأثر مع الشد بس لكن لو خدت العربية بالراحة مش هتحس بالعيب دة
تجميع العربية قليل بعد سرعة 120 , ثبات العربية وحش للاسف بعد ال100 تبدأ تقلق شوية بعد ال120 تبدا تمسك الدركسيون كويس , فيها عيب فى التابلوة بيزيق شوية مش عارف دة عالجوة فى موديلات 2011 ولا لأ غير كدة العربية تمام اوى وخلى بالك عشان فية تيدا 2012 نازلة

الهيونداى : العربية دية محدش يعرف عنها حاجة ولسة تحت التجربة لكن فية كدة شوية ملاحظات على العربية ومن ناس ملاك للسيارة يعنى مش كلام وخلاص

* السيارة بتميل مع الملفات بشكل يقلق , فرامل وحشة لو بال abs اعتقد هتبقى احسن بس مش للدرجة اللى انت متخيلها , السيارة كلها بلاستيك ودية انا عارفها كتجربة
فية بقى حاجة مش عارف الناس بتجيبها منين يقولك العربية واسعة وللاسف السيارة مش واسعة خالص وسقفها واطى جدا واصلا انت قاعد جوة مش شايف ولا شنطة ولا كابوت ولا اجناب العربية تصميمها حلو بس غريب جدا وخلى بالك ان خبطة العربية دية هتكلف جامد جدا يعنى تقريبا مافيش حد هيصلح حاجة فيها كل حاجة هتفك وهتغير على طول , دة غير ان ماشاء الله سمعة هيونداى فى الكواليتى بتاعة السيارة كخامات واعتمادية بالنسبالى الثقة فيها قليلة جدا

وانا ارشحلك انك تنتظر معرض اخبار اليوم وتتفرج براحتك على السيارات وتقرر بنفسك

[surfer3098]

شكرا جزيلا يا باشا أنا مايل أكتر للتيدا بس على فكرة أنا أعرف إن لعربية ديه فيها ايموبليزر و نظام nats لتشفير المفتاح وده بيوقف طلمبة البنزين ويخلي العربية ماتدورش لو حد حول يدورها من غير المفتاح المشفر بتاعها وهحاول أتأكد لحضرتك من لمعلومة ديه....أما عن ماضوع الثابات بعد el-100 فـده كان مشكلة لحد موديل 2010 وبعد كده البور الكهربة بقى بيتقل كويس وده كلام واحد معاه العربية والله أعلم
في ناس هنا في منتدى في قسم نيسان بتقول إن el-2012 مش هايتغير فيها حاجة خالص ده أنا عايز التاكد منه هو أنا قرات إن بره نيسان تيدا 2012 نازلة ببموتور تربو ولكن كل لباقي زي ما هو وده ماعتقدش إنه نازل مصر عموما شكرا تاني يا باشا وياريت لو في تصحيحات أو أراء تانية عند حضرتك أو أي حد في المنتدى الجميل ده تفيدونا افادكم الله xD

[IronHead]

لو تقدر تزود على المزانية 6000 هتخش كدة فالمازدا بيزك اوتو او لانسر شارك بيزك اوتو, ودول اوسع من التيدا و ثباتهم احسن
وانا ميال للانسر عشان منزلين كماليات مش بطالة فى اول فئة اوتو
وتقبل مرورى

[zangry]

انا لسه مستلم التيدا اعلى فئة هاتش باك امبارح وجيت بيها من القاهرة الى المحلة الكبرى بسم الله ماشاء الله السحب ممتاز جدا بالنسبة للميجان اللى كانت معايا العربية بتجرى وكنت جاى مشغل التكيف والعربيةسحبها ممتاز بس طبعا معدتش 90 عشان التليين والعفشة ناعمة جدا ومش تحس بالمطبات

[AutoTycoon]

التيدا عربية مريحة واسعة بس فقيرة جداً جنب النترا الجديدة (مفيش كماليات تقريباً خالص!)
موتور اضعف من النترا شكل عادي بتنزل بجنط 15 كواتش عرضه 185 بس!!

النترا نفس مستوى وسع التيدا في رأيي بس بقاعدة عجلات اطول (مساحة اكبر للقدمين) و العربية نفسها اعرض (قاعدة عجلات اطول + عربية اعرض + كاوتش اعرض = ؟؟) و في نفس الوقت العربية اغلى و اشيك و كمان التيدا تم الإعلان عن الشكل الجديد بتعاها يعني خلاص الشكل هيتغير و يبقى قديم و الاتنين نظام تعليق خلفي غير مستقل

النترا افضل طبعاً لو ب abs

[SAMEH_FOUAD]

المشكلة ان معظم الشعب المصرى بيدور على الشكل والاوبشن مقابل انة مابياخدش بالة من قوة المحرك , الاعتمادية , الثبات

وللاسف الكورى بيفتقد العوامل دية لكن انا اقولك بكل جدارة اليابانى ماشاء الله علية هو بس عيبة ان الاوبشن بتاعة وشكلة مش زى الكورى وسعرة اغلى بس اكيد الناس دية مش بتهزر يعنى وعارفين هما بيعملوا اية كويس وصدقنى لو عايز مقارنة بسيطة جدا وتعرف مين الاحسن هتلاقى بمجرد ماتركب الاتنين بس للاسف الشكل عندنا 3/4 المطلب من السيارة والكوريين عرفوا يعملوا دية كويس

[blazer]

بص على الفلونس
بجد عربيه تحفه

[tutankhamoun]

المشكلة ان معظم الشعب المصرى بيدور على الشكل والاوبشن مقابل انة مابياخدش بالة من قوة المحرك , الاعتمادية , الثبات

وللاسف الكورى بيفتقد العوامل دية لكن انا اقولك بكل جدارة اليابانى ماشاء الله علية هو بس عيبة ان الاوبشن بتاعة وشكلة مش زى الكورى وسعرة اغلى بس اكيد الناس دية مش بتهزر يعنى وعارفين هما بيعملوا اية كويس وصدقنى لو عايز مقارنة بسيطة جدا وتعرف مين الاحسن هتلاقى بمجرد ماتركب الاتنين بس للاسف الشكل عندنا 3/4 المطلب من السيارة والكوريين عرفوا يعملوا دية كويس

مش متفق معاك في النقطتين اللي معلم عليهم بنفسجي .
أعتمادية ممتازة و قوة محرك جبارة
متفق معاك في الثبات علشان بيعملوا عفشة ناعمة زيادة عن اللزوم .

فيهم عيب كمان ( صاج ضعيف و بيبان فيه عوامل التعرية المصرية بسرعة )
`نما أعتمادية و قوة محرك ......... حدث و لا حرج .

و على فكرة هيونداي فازت بعدة جوائز في الأعتمادية في الولايات المتحدة الصهيونية

مع أني مش في المخطط أني أشتري أي حاجة كوري أو عمري أشترت كوري
بس كلمة حق لازم تتقال .

[tutankhamoun]

لصاحب الموضوع
شوف أنت مستريح لأيه و بعد ما تقرر أسأل أصحاب العربية اللي ناوي تشتريها عن عيوبها و مميزاتها ووازن الموضوع كله و ربنا يكون في عونك في القرار .

==================
رأيي الشخصي البحت
و لا عربية فوق 120 ألف تستاهل ثمنها و غاليين زيادة عن اللزوم و البلد أصلا ما تستهالش عربيات بالمبالغ دي .

[SAMEH_FOUAD]

مش متفق معاك في النقطتين اللي معلم عليهم بنفسجي .
أعتمادية ممتازة و قوة محرك جبارة
متفق معاك في الثبات علشان بيعملوا عفشة ناعمة زيادة عن اللزوم .

فيهم عيب كمان ( صاج ضعيف و بيبان فيه عوامل التعرية المصرية بسرعة )
`نما أعتمادية و قوة محرك ......... حدث و لا حرج .

و على فكرة هيونداي فازت بعدة جوائز في الأعتمادية في الولايات المتحدة الصهيونية

مع أني مش في المخطط أني أشتري أي حاجة كوري أو عمري أشترت كوري
بس كلمة حق لازم تتقال .

هو حضرتك شايف ان الكورى عموما معمر واعتمادية عالية

معلش انا من تجاربى وتجارب اصدقائى بقولك غير كدة وعلى فكرة لو عايزها تبقى كدة يبقى لازم العربية تتعامل بحنية ماتقساش عليها , مش زى اليابانى تفحت وتدخلة فى اى حتة وهتلاقى العربية تمام معاك وماتقولش لأ

[AutoTycoon]

معلش انا من تجاربى وتجارب اصدقائى بقولك غير كدة وعلى فكرة لو عايزها تبقى كدة يبقى لازم العربية تتعامل بحنية ماتقساش عليها , مش زى اليابانى تفحت وتدخلة فى اى حتة وهتلاقى العربية تمام معاك وماتقولش لأ

طب و بالنسبة لتجارب باقي الشعب ...؟؟ الكام مليون اللي راكبينها من سنين و بيـ........ فيها ؟؟

[tutankhamoun]

هو حضرتك شايف ان الكورى عموما معمر واعتمادية عالية


فعلا يا فندم أنا شايف كدا لعدة تجارب من أصدقاء أو أقارب
معلش انا من تجاربى وتجارب اصدقائى بقولك غير كدة وعلى فكرة لو عايزها تبقى كدة يبقى لازم العربية تتعامل بحنية ماتقساش عليها , مش زى اليابانى تفحت وتدخلة فى اى حتة وهتلاقى العربية تمام معاك وماتقولش لأ

فيه عربية دايو لانوس (من أقل الكوري )
كانت شغالة في شركة تابعة لواحد قريبي و تقريبا كل يوم واحد مختلف هو اللي بيسوقها
و طبعا العربية يا دوب تغير زيت فقط لا غير .
العربية عملت فوق 200 ألف بدون أصلاحات في الموتور و تم أصلاح العفشة تقريبا مرة واحدة ده علشان العربية أصلا شغالة في أماكن أرياف على مدن و طبعا اللي بيسوقها مش صاحبها و بالتالي بيسوق و خلاص و مش مهتم يحافظ عليها
و ده كان باين على صاجها بعد قوي .

المهم العربية ساعة ما أحتاجت شغل في الموتور مكنش عمرة كاملة و لكن كان شوية حاجات كدا مش فاكرها بصراحة بس الموتور كان معقول وشغال كويس .

عربية تانية هيونداي النترا اللي هي الشكل اللي قبل الشكل بتاع السنة اللي فاتت
ما شاء الله أتباعت و هي عاملة فوق 300 ألف كم بالصيانات العادية فقط فقط ( بس صاحبها بيحافظ عليها )
أعتمادية يعني العربية مش بتعطل ........ يعني تعتمد عليها بدون خوف أنها تعطلك أو تعطل بيك
أعتمادية يعني تلاقي قطع الغيار في كل مكان و اي وقت

على فكرة طول العمر للشئ مش معناه اعتمادية
لوفرضنا أن معاك قطعة غيار و عمرها الأفتراضي 5 أيام و قطعة تانية عمرها الأفتراضي 10 أيام
و الأولى سعرها واحد جنيه و التانية سعرها 2 جنيه
هل ده معناه ان التانية أكتر اعتمادية من الأولى ؟

الاجابة لا و الاجابة نعم
طيب ليه لا و ليه نعم
لا ........ لأن الاعتمادية متساوية لأختلاف السعر يبقى هنا أم جنيه زي أم 2 جنيه
أنت أشترت عمر أفتراضي بجنيه لمدة 5 أيام و دفعت الضعف علشان تحصل على عمر افتراضي مضاعف يبقى أنت عمليا معملتش حاجة و لكن وفرت وقت تغيير قطعة الغيار ومصاريف تركيبها علشان كدا قلنا نعم .

بالنسبة بقى لقوة المحرك
ده هيونداي مش بتهتم بحاجة في العربية زي قوة المحرك و نعومة العفشة
مواتير طيارة و فتيس ما شاء الله أستحابته ممتازة و عمره طويل بالتجربة مش بالكلام .

عيوب العربيات الكوري عموما (و لكن لا يُطبق على 100 % من العربيات الكوري )
الثبات مش تمام بأستثناء (السيراتو ثباتها معقول - و الكوبيه الهيونداي ثباتها كويس جدا و طبعا السوناتا )
و العيب التاني موضوع الصاج ....بيبقى ضعيف زيادة عن اللزوم خصوصا هيونداي .. بيعملوا صاج ورق زيادة عن اللزوم وده بيبقى بايخ في مصر لأننا بنسوق زي البهايم هنا و أي لمسة للعربية بتبان و كمان العيال و الكبار في الشارع الللي بيريحوا على العربية و عاملينا أمتداد لكنبة البيت.
على فكرة أنا مش بيعجبني الشكل الجديد لعربيات هيونداي
هو عصري و جميل و لكنه غير عملي زي ما انت قلت أن الصاج لو أتلمس مش هايتصلح
شيل و حُط جديد على طول .
شكرا يا فندم لسعة صدرك