ابيزا 94 ولا جولف 92 جزاكم الله خيرا

[zahra10]

السلام عليكم اولا..
الحقيقة انا لسه عضوة جديدة معاكم من دقائق فقط وعشان مطولش عليكم انا كمان كنت غير مهتمة بموضوع العربيات دا خالص عشان كدا انا معنديش خبرة خالص ومحتاجة الخبراء منكم يساعدوني بارك الله فيكم.
انا اول ما اتعلمت السواقة ونظرا للظروف المادية جبت مازدا 323 موديل 82 والحقيقة انها كانت حلوة بس اخويا كان بيخاف عليا منها لأنها ناعمة وبتشد علي الطريق وطبعا عشان قديمة كل يوم والتاني عند الميكانيكي وكنت شرياها ب 22 الف بعتها بعدها ب 10 شهور ولا حاجه ب 20 الف دا غير الاصلاحات اللي عملتها فيها.. والحقيقة اتعقدت شوية وبعدين قررت اشتري عربية تاني، اخويا قالي هاتي جديد بس ماديا مش هاقدر اجيب جديد غير الماروتي بس اخويا قالي دي تعبانة وعربية فاضية، وانا ادامي دلوقتي ابيزا 94 علي 25000 ، 1300 سي سي وبدون تكيف، وجولف 92 1300 سي سي برضه علي 35000 طبعا الجولف سمعتها معروفة بس برضه ابيزا حلوة وشكلها بناتي وارخص زي ما انتوا شايفين، طبعا الكشف اللي هيوضح ايهما افضل بس انا عايزه حضراتكم تفيدوني وتنصحوني وانا اصلا تحركاتي قليلة جدا وبروح الشغل بالباص بتاع الشغل يعني مش محتجاها فحت وردم زي ما بيقولوا :) بس كمان مش هاينفع اجيب عربية وتعطل مني في نص الطريق وقعد اعيط جمبها والله انا بخاف من المواقف دي جدا واخويا سايب الاختيار ليا .. اسمحلولي اعتمد عليكم اخواتي الخبراء اللي هنا بعد الله. وجزاكم الله عني خيرا علي اي حال.

[zahaan]

الابيزا ممتازه جدا و عن تجربه و على فكره انا ببيع اللى معايا 2001 كامله من كله حتى الفينيش النهائى من جنوط 15 لساوند سيستم كامل لعفشه رياضيه و تكييف و زينون المانى فوق و تحت عالى وواطىووحدات رفع و مرايات كهربا كل حاجه بس اتعقدت منها لان كله بيقولى من كتر دلع العربيه باينه انها بتاعه بنت

[egyptiandiver]

أهلاً بحضرتك يا انسة زهرة عضوة جديدة في منتدانا العزيز، دة أولاً، ثانياً إيه إلي يخلي حضرتك تجيبي عربيات بالها بتدحر في الشوارع و بتجري ليل و نهار و موديلها داخل تقريباً في 20 سنة ؟ و في شوارع مصر إلي حضرتك شايفة هي تحفة أد إيه؟ إسم العربيات دي ذي الطبل بس السن له حكم ! هتدخلي من مكانيكي لسمكري لبهيجي لكهربائي لبتاع كاوتش و واحد بتاع شكمانات و اللستة ملهاش أخر و كل دة ليه ؟ إستخدام حضرتك محدود و أكيد تعبتي من الاديم و عمايلو. أنا كان عندي فيات 131 الاول كانت تمام بس بعد كدة تذبتيهة يمين تضرب شمال تلمهة من هنا تضرب من هناك. رأي جيبي Maruti بيركبلهة تكييف كويس و إركبيهة يا ستي 5 أو 6 سنين و لما ربنا يكرم إبئي بيعيها. أنا سؤت العربية دي أبل كدة و واللهي جاراية و ظريفة جداً لحد 100km و قطع غيارها متوفرة و رخيصة كمان و بنزينها و رخصها حاجة بسيطة ما تكسرش الوسط. دة رأيي. ربنا يعمل لحضرتك الصالح - أحمد سامي

[zahra10]

شكرا جدا علي رد حضرتك ، بس يعني مش هندم بكرة علي اني مجبتش الجولف؟!! خصوصا ان الاتنين موديلات قديمة شويتين بس بصراحة حاليا انا مقدرش ماديا علي الجديد ولا المستعمل موديلات جديدة.

[zahra10]

شكرا يا استاذ احمد علي ردك عليان وفعلا عندك حق ، انا عارفه كده كويس كمان انا اول ما اتعلمت اتعلمت علي ماروتي ومعملتش بيها مشاكل خالص، بس الجديد بتاعها بحوالي 37 او 38 الف، وفاضية لا تكييف ولا كاسيت ولا حاجه خالص وكمان 800 سي سي بس، بصراحة مستخسرة مبلغ زي دا فيها، انا بصراحة بحب ابيزا من زمان بس الجولف برضه اسم وحلوه، وانا كل اللي عايزاه امشي بعربية نص عمر سنه ولا اتنين اخبط فيها وتخبط فيا لحد ما احس اني شاطرة بجد في السواقة، وبعدين اشوف موضوع الجديد لأن بصراحة خدش صغير في الجديد انا ممكن يجيلي سكتة قلبية :)

[eng.m7md.ali]

لا مقارنة ابدا بين الجولف او الابيزا وبين الماروتي
الجولف او الابيزا مهما كانت حالتها فسهل جدا تتلم لكم الماروتي بجد حسبي الله ونعم الوكيل في التوكيل المتخلف بتاعها ده اللي بلانة بعربية مصيبة ملهاش اي 30 لازمة وصنفها من ضمن العربيات مع ان سعرها اصلا غالي جدا عليها (مع احترامي لملاكها طبعا)
مفيش فرق بين الجولف والابيزا والاختلاف الوحيد هو الشكل الخارجي
ممكن تكون الحالة والسعر هو الفيصل

[zahra10]

شكرا جدا يا باشمهندس علي الرد، بس ربنا يخليك ساعدني شوية زيادة عشان فيه فرق 10 الاف زي ما انت شايف وانا كدا كدا انا شاء الله هارفعها واجيب ميكانيكي وسمكري عشان يشوف حالتهم بس لو فعلا الاتنين تمام او مجرد حاجات بسيطة تتعمل فيهم وتبقي تمام ن الكفة ترجح لمين الابيزا ولا الجولف ؟ الابيزا موديل 94 والجولف 92 .. وشكرا يا اخي.

[zahra10]

ايه يا جماعة مافيش حد عنده خبرة في الموديلات دي يرد عليا ؟؟ انا محتاجه اخد قرار خلال كام يوم ان شاء الله.

[eng.m7md.ali]

انا بقول خليكي في الابيزا
لان الجولف شبابي جدا وصعب تلاقي حالة كويسة ودايما هتلاقيها راشة جوة كمان نادر تلاقيها فبريكا جوة
على فكرة حاجت الابيزا سواء عفشة او ميكانيكا او كهربة رخيصة وزيها زيها الجولف

[zahra10]

شكرا يا باشمهندس ، كتر خيرك علي الافادة وان شاء الله خير

[benmatar]

السلام عليكم
النصيحة لحضرتك من واقع خبرة في الثلاث موديلات وبصفة عامة في الأنواع المتاحة في حدود 35 ألف وده الواضح من الكلام مانصحش حضرتك أبدا بالسوزوكي الماروتي إلا لو استخدامك بسيط جدا وموضوع التكييف مش فارق معاكي ومش هتسافري بيها، والعربية دي اشتريتها لوالدتي من حوالي 6 شهور وبالطبع ده بسبب إن استخدامها حوالين البيت وأبعد مشوار لها بيكون 7- 8 كيلو في المنطقة، هو ده استخدام الماروتي داخل المدينة وبدون جري ولا تحميل ولا سفر وهي عربية موفرة في البنزين جدا 3 سلندر 800سي سي هندي وقطع غيارها رخيصة، ولو هتشتريها تكون زيرو أو كسر زيرو وفاربرقة بالكامل ولمعلوماتك اشتريناها ب 30 ألف موديل 2010 وكانت عاملة 9000ك وفابريقة، ولو مش هيناسبك الكلام ده والمكيف مهم وعاوزة موتور قوي ومناسب للاستخدام داخل المدينة وللسفر أنصحك بالجولف وبلاش إيبيزا خالص وخاصة إن الأسعار متقاربة مع ارتفاع قطع غيار الجولف إلى حد ما عن الإيبيزا وخليكي في الألماني. لو متاح ليكي الخروج لدائرة اختيارات أكثر ممكن أطرح على حضرتك شوية موديلات تفكري فيهم مع الأخذ في الإعتبار في أي عربية هتشتريها الحالة الجيدة، والكلام ده لو في حدود 35 ألف:
1- هيونداي أكسنت أواخر التسعينات وأوائل الألفينات... 1300 الأغلب ويوجد 1500 مانيوال تكييف، وباور، قطع غيار متداولة ورخيصة وصيانة سهلة، ومعدل استهلاك وقود جيد، صاج ضعيف، خفيفة في السرعات العالية.
2- سكودا فيليشيا وش أوكتافيا كاملة أوخر التسعينات.. 1300 مانيوال، قطع غيار أغلى حجم بناتي صاج أقوى، موفرة في الوقود معدلات أمان أوروبي، صيانة معقدة إلى حد ما تتطلب فني سكودا للحفاظ عليها.
3- رينو كليو أوائل الألفينات... 1200 مانيوال 16 صباب جميع الكماليات محرك قوي توفير وقود أمان اتزان في السرعات عالية على الأرض صيانة تتطلب متخصص رينو قطع غيار أغلى من الكوري.
آسف للإطالة وأنصح بالأكسنت بالسبة لك مع شديد احترامي وتقديري للفولكس الألماني بس صعب تلاقي منها حالة ممتازة. وبالتوفيق

[mido51eg]

السلام عليكم اولا..
الحقيقة انا لسه عضوة جديدة معاكم من دقائق فقط وعشان مطولش عليكم انا كمان كنت غير مهتمة بموضوع العربيات دا خالص عشان كدا انا معنديش خبرة خالص ومحتاجة الخبراء منكم يساعدوني بارك الله فيكم.
انا اول ما اتعلمت السواقة ونظرا للظروف المادية جبت مازدا 323 موديل 82 والحقيقة انها كانت حلوة بس اخويا كان بيخاف عليا منها لأنها ناعمة وبتشد علي الطريق وطبعا عشان قديمة كل يوم والتاني عند الميكانيكي وكنت شرياها ب 22 الف بعتها بعدها ب 10 شهور ولا حاجه ب 20 الف دا غير الاصلاحات اللي عملتها فيها.. والحقيقة اتعقدت شوية وبعدين قررت اشتري عربية تاني، اخويا قالي هاتي جديد بس ماديا مش هاقدر اجيب جديد غير الماروتي بس اخويا قالي دي تعبانة وعربية فاضية، وانا ادامي دلوقتي ابيزا 94 علي 25000 ، 1300 سي سي وبدون تكيف، وجولف 92 1300 سي سي برضه علي 35000 طبعا الجولف سمعتها معروفة بس برضه ابيزا حلوة وشكلها بناتي وارخص زي ما انتوا شايفين، طبعا الكشف اللي هيوضح ايهما افضل بس انا عايزه حضراتكم تفيدوني وتنصحوني وانا اصلا تحركاتي قليلة جدا وبروح الشغل بالباص بتاع الشغل يعني مش محتجاها فحت وردم زي ما بيقولوا :) بس كمان مش هاينفع اجيب عربية وتعطل مني في نص الطريق وقعد اعيط جمبها والله انا بخاف من المواقف دي جدا واخويا سايب الاختيار ليا .. اسمحلولي اعتمد عليكم اخواتي الخبراء اللي هنا بعد الله. وجزاكم الله عني خيرا علي اي حال.

لو حضرتك تقدري تدفعي الـ 35000 جنيه دول يبقى مفيش داعي تدفعيهم في جولف 92. العربية عجوزة اوي وعموما العربيات دي بتاعة شد وجري يعني عربيات شباب وبتبقى مفحوتة ، ابعدي عنها لأن محدش بيبيع جولف موديل 92 الا اذا كان فرمها. الأكسنت اختيار موفق زي ما الزميل قالك لكن يشترط الحالة النظيفة

[pompo]

ازاي تقارن ماركة المانية معروفة بجودتها بحاجة كوري زي الاكسنت؟؟؟؟؟؟؟؟؟؟؟؟؟؟؟؟؟؟؟؟؟؟

طبعا انا من رأيي ان الجولف احسن من حيث الجودة والمتانة وانها اعلى من فأة الابيزا او البولو
ومن وجهة نظري ان الابيزا افضل وبتكون كويسة في السفر وسيارة اعتمادية لو حالتها حلوة ولو حلتها مش قد كدة بتتلم
لكن الماروتي مش بتاعة شغل ولا مساحة داخلية ولا عزم ..... وبصراحة حراااااااااااام فيها الفلوس

[benmatar]

السلام عليكم
طبعا الألماني أعلى وأكفأ من الأسباني والكوري والياباني وكلامي يؤكد هذا، بس فعلا صعب جدا نلاقي جولف 92 بحالة ممتازة ومش محتاجة مصاريف واللي معاه جولف كويسة جدا مش هيفكر يبيعا إلا نادرا... عشان كدة نصحت بالأكسنت طبقا لطبيعة الاستخدام والشخص المستخدم والحالة المادية، وطبعا البولو عربية ممتازة وبناتي ومناسبة برضة لو موجود منها بحالة جيدة.