الفيات 1300 او ممكن بيسموها ( 1500 ) استفسااااارات ؟؟؟

[abdalah_hashem]

السلام عليكم ورحمة الله وبركاته

العربية فيات 1300 يا جماعة اية هى اخبارها
1- سعرها كام لو حالة مظبوطة يعنى دلوقتى شهر 11 -2012
2- عيوبها ( من حيث الاعطال وكدة وحلولها ؟؟)
3- قدرتها تتتحمل لو احتجتها فى سفرية بتاع 110 كيلوا رايح جاى وللا مخوعة ؟؟
4- قطع غيارها موجودة يعنى وللا نادرة واسعارها اية ؟؟؟
5-حد معاه العربية يقوللى ظروفها اية معاه ؟؟

عارف انها قديمة بس هو الموجود فى السوق موديلات من كام لكام ؟؟

انا شفتها مع واحد منضفها ومروقها على الاخر وشكلها حلو ونضيف يعنى


صورها اهية

[Dr'AhmZZong]

متابع ..

[abdalah_hashem]

وانا كمان متابع كل متابع بيتابع :d :d

[benmatar]

السلام عليكم
اليومين اللي فاتوا طلب مني صديق مساعدته في شراء حاجة متواضعة زي العربية اللي حضرتك بتتكلم عنها فيات1300 الستينات وعلى فكرة دي النسخة القديمة من 128 بس دفع خلفي (موتور طولي)، المهم وبدون إطالة كان المعروض أسعاره من 5 آلاف إلى 10 آلاف، وبعد سؤال أهل الخبرة في الموديلات العتيقة وجدنا إن أفضل ما تشتريه ولا يتعدى الحدود دي هو فولكس بيتلز الستينات وبالفعل تم بفضل الله شراء واحدة بيتلز موديل69، وكانت ب6500ج.م، ودي أفضل من مثيلاتها أو قريناتها كشراء فيات 1300 أو 1500 أو 127 السبعينات أو بيجو 304... إلخ. وأحب أقول لحضرتك إن الأمر ده بسبب انتشار قطع غيار البيتلز ووجود الاستيراد منها أكتر وموديلاتها من الخمسينات وحتى السبعينات ومتقاربة جدا في أجزائها، وليها ميكانيكية في أماكن كتير متخصصين ومطلوبة من قبل فئة عريضة من الشباب، وتستحمل السفر، وإنها موتور ألماني قوي (فعلا جربتها مسافة 120كم وبسرعات مختلفة حتى 110كم تقريبا/س) ومتشتكيش طالما الموتور سليم وبتحافظ على الزيت وحمالة قسية زي مابيقولو. آسف للإطالة بس حبيت أنقل لحضرتك تجربتي مع صديق أثناء الشراء والإختيار بعد استشارة أكتر من واحد.

[abdalah_hashem]

شكرا يا باشا بس البيتلز كدة هتبقى عايزة شغل جامد ,, ثم العربية ال 1300 شكلها افضل من البيتلز بكتييير,,,
بس سؤال لحضرتك اية الاسباب اللى قالوهاللك الناي الى انت سالتهم غير قطع الغيار والميكانيكية انا سمعت ان موتورها هو موتور ال 124 وكدة يبقى الميكانيكية متوفرين,,,,,, وبعدين دية من سنتين كانت لسة شغالة تاكس يعنى الميكانيكية موجودين ؟
,,,,, * طيب العربيات اللى شوفتوها كانت حالتها اية فى رنج ال 6 الى 7 الاف جنية اساسياتها والموتور حالتهم اية؟؟؟؟؟

[abdalah_hashem]

محدش عندة اراء خالص كدة

[abdalah_hashem]

O_o اين انتم ؟؟؟ اين انتم ؟؟؟ ^_^

[aboomar22]

بص ياباشا العربية دى بصرف النظر عن حالتها او قوتها الا انها فى طريقها للانقراض وده بيصعب قطع الغيار واعادة البيع لكن الفولكس فاجن لاتزال مطلوبة وبتتباع بص حضرتك اقف فى الشارع او وانت رايح الشغل وشوف قابلت كام فولكس وكام فيات اما الشكل بقى دى انا اختلف مع حضرتك لو تسمحلى انا شايف الفولكس اجمل وبيظهر عليها التظبيط ممكن كمان تشوف بيجو 304 لو انتى افضل انك تشوف 128

[abdalah_hashem]

المشكلة ان المبلغ مخدود جدأ ولسة جزء منة مش معايا يعنى ربنا يسهل فى مصلحة بتخلص وربنا يفرجها منها ..
عشان كدة عايز حاجة تبقى رخيصة وحالة معقولة واقدر امد ايدى فيها عشان مش هقدر كل شوية اتنطط عند الميكانيكية ...
وال 127 او ال 128 الحالة المعقولة فيهم هتبقى غالية عليا...

وانا اصلا تعبت وزهقت بقالى كذا سنه نفسى اجيب عربية بس الفلوس حهى المشكلة .. وبدات اتعب نفسيا بسبب الموضوع دة اصلا ..
ا

[aboomar22]

مش عايز اعملك احباط بس برضه انبهك ان العربيات القديمة بتصرف كتير ودوشتها مبتخلصش ومتعرفش المفاجاه هتيجى منين وامتى انا عايزك لما تشترى يكون معاك مبلغ كده على جنب علشان تقدر تصرف منه على العربية خصوصا انك هتسافر بيها

[crayvor]

وانا اصلا تعبت وزهقت بقالى كذا سنه نفسى اجيب عربية بس الفلوس حهى المشكلة .. وبدات اتعب نفسيا بسبب الموضوع دة اصلا ..
ا

كلنا قلنا كدة لغاية ما جيبناها... حاتعرف باقي الجملة بعد ما تجيبها انت كمان ان شاء الله...
ملحوظة.. هنا ف اسكندرية ال 127 والسيات القديمة أكتر بكتير من ال1300 ومن البيتلز كمان. برضه حاول تصبر حبة كمان وتدخل في حاجة مضمونة بدل ما بعد الشر تجيب عربية من هنا وتكهنها من هنا خصوصا انك بتتكلم في قديم. كمان خلي معاك سمكري يكشف عن الصاج والدواخل والبارومة دول أهم من الميكانيكا والكهربا.

ربنا يوفقك ان شاء الله.

[abdalah_hashem]

Aboomar هو انا مش هسافر بيها دايما دى هتبقى سفرية كل شهر مرة او مرتين بس لكن الاغلب جوة القاهرة

crayvor ربنا يسهل ووتبقى باقى الجملة حلوة لانى تعبت من اللى مش حلو :)

[crayvor]

crayvor ربنا يسهل ووتبقى باقى الجملة حلوة لانى تعبت من اللى مش حلو :)

أنا مش حاخدعك وأقولك انها حلوة... بس علي الأقل العربية بتحفظ كرامتك عن المواصلات الغير أدمية بالمرة ف مصر(أحسن الوحشين زي ما بيقولو). أنا اهه لسة بايع العربية وتحولت لأبو قردان في المواصلات لغاية ما ربنا يكرمني والاقي اللي في دماغي.

[mohamed_rhem]

حضرتك الموديل ده بقاله كتير

انصحك بحاجه زي 132 في حدود 10 الاف او زود شويه وهات 131

لو غاوي فيات

انما صدقني وعن تجربة شخصية القديم اعطاله كتير

[benmatar]

السلام عليكم
بالنسبة للبيتلز اللي بقول لحضرتك عليها صرفت حوالي 600ج.م ميكانيكا، وحالته بفضل الله فل، يعني بتحري 120كم/س، ومش محتاجة غير وش نظافة زي مابيقولوا وسمكرة بسيطة جدا. بس النقطة إنها موتور ألماني وقطع غياره في السوق اكتر من الموديلات السابق ذكرها.