أفيدونى أفادكم الله

[Saeed-Taha]

السلام عليكم ورحمة الله وبركاته..

انا محتار من 3 شهور فى شراء عربية مستعملة
معايا لغاية 43000

لفيت واتفرجت وسألت كتير

ووصلت ان احسن حاجة بما انها اول عربية انى اشترى كورى ومعظم الناس نصحونى بالدايو خاصة الانوس

المهم فى كمان انواع كتير فى حدود المبلغ دا (اكسنت/لانوس/جوليت/بيجو 206/هوندا سيفك)

وحاليا اخر حاجة معروض عليا عربيتين

الاولى هيونداى أكسنت 2006 فابريكة جوا بمبلغ 45000
الثانية هوندا سيفك 1993 خليجى فابريكة برا وجوا

ياريت تفيدونى لأنى محتار جدا فى الاختيار بغض النظر عن قطع الغيار وكدا المهم الكفاءة
خاصة انى هسافر كيتر بالعربية دى

وشكرا,,

[Dr'AhmZZong]

هوندا سيفيك ديه تحفة ..

[Saeed-Taha]

الف شكر ياباشا للرد

بس حتى لو مقارنة بهيونداى أكسنت موديل يعتبر جديد زى 2006

برضه اختار الهوندا لو حالتها كويسة ؟

[Sehsss]

سيفيك طبعا بدون تفكير، شرط الحالة الجيدة

[lad]

لانوس وش بدون تفكير

[Saeed-Taha]

الف شكر يا sehsss باشا
انا ان شاء الله هروح اشوفها النهاردة ولو حالتها كويسة هشتريها باذن الله

وبالنسبة للانوس يا استاذ lad
كل الناس نصحونى بيها بس حاليا مش قدامى واحدة حالتها كويسة,,شكرا

[benmatar]

السلام عليكم
نصيحة من وجهة نظري ومن تجارب طالما حضرتك هتسافر كتير، بصفة عامة توجه للمدرسة الأوروبي، لييييه؟ صناعة محترمة، مواتير قوية، ثبات واتزان عالي في السرعات، متانة هيكل، معدلات أمان أعلى من الشرقي (الكوري والياباني والصيني)، كفاءة محركات وميكانيكا وعفشة أنشف وممتازة... وأنصح حضرتك بالأخص بيجو الأسد الفرنسي ماختلفش عليها اتنين، المبلغ اللي مع حضرتك يجيبلك حاجة بيجو 405 محترمة جدا أواخر التسعينات أوائل 2000 موتور 1600 عنيف واسعة ثبات في السرعات لغاية 170ك/س وتجيب أكثر وعالية عن الأرض، وقطع غيار تمام التمام ومحدش اشتكى من العربية دي وجميع الكماليات. عندك كمان تركب رينو كليو ودي عربية ناس كتير مش فاهماها ومحترمة وتركب حاجة 2003-2005 عربية كويسة جدا وقطع غيارها معمرة وبتاعت سفر وموفرة في البنزين واتزانها في الجري ممتاز. الأوروبي بصفة عامة يحب قطع غيار أصلي عشان كده ناس كتير تقولك قطع غياره غالية أقولك فعلا أغلى من الياباني وبيعيش أكتر منه أربع أضعاف. وعشان تكون العربية تمام الصيانة تكون عند فني متخصص في النوع مش أي واحد ودي حاجة مش سيئة. المهم تركب عربية محترمة مش حاجة تخاف تجري بيها أكتر من 100 وتحط إيدك على قلبك. وتفتح بقها كل يومين بسبب مطب أو سفرية طويلة. وبالتوفيق

[Saeed-Taha]

والله كلامك مقنع جدا يا استاذ benmatar وانا عن نفسى كنت مقتنع بيه رغم كل الكلام والتخويف من قطع الغيار
بس كل العربيات الاوربى اللى شفتها كانت حالتها مش تمام ومكنش فيه نصيب
اخر حاجة شفتها كانت بيجو 206 بس عشان شبابى وكدا صاحبها كان جايب أجلها
ومشكلة الشراء فى المستعمل ان الواحد مش بيقدر ياخد النوع اللى هوا عاوزه بالظبط لأن اللى بيحكمه حالة العربية

[dr_hady4447]

السيفيك افضل

[Saeed-Taha]

انا الحمدلله النهاردة شفت العربية السيفك

وبشكر كل الناس اللى ردت عليا هنا ونصحونى

وفاضل بس تفيدونى فى سعرها

هيا العربية مبدئيا الحمدلله حالتها كويسة وبكرة هفحصها تانى فى بنزينة
سيفك موديل 94
90 الف كيلو
كاملة اوتوماتيك ومواصفات خليجى
مطلوب فيها 45 الف جنيه

ياترى السعر دا كويس واتوكل على الله ؟ولا ممكن تبقى بأقل من كدا

شكرا,,

[Sehsss]

تنزل ألفين أو ثلاثة

[dr_hady4447]

انا الحمدلله النهاردة شفت العربية السيفك

وبشكر كل الناس اللى ردت عليا هنا ونصحونى

وفاضل بس تفيدونى فى سعرها

هيا العربية مبدئيا الحمدلله حالتها كويسة وبكرة هفحصها تانى فى بنزينة
سيفك موديل 94
90 الف كيلو
كاملة اوتوماتيك ومواصفات خليجى
مطلوب فيها 45 الف جنيه

ياترى السعر دا كويس واتوكل على الله ؟ولا ممكن تبقى بأقل من كدا

شكرا,,

مبروك انك لقيت

اهم حاجة تاكد من كل حاجة فيها ومتتسرع
ربنا يوفقك

[Saeed-Taha]

الف شكر يا دكتور هادى
وانا النهاردة ان شاء الله هفحصها فى البنزينة زيادة تأكيد

وهيا زى ما قلت عاملة 90 الف كيلو فقط
وفابركية كلها ماعدا رفرف

والراجل مصمم على ال 45 الف مش راضى ينزل شلن :s
فا ياترى لو كدا اخدها بالسعر دا ولا لاء

شكرا ,,

[dr_hady4447]

لو فابريكة زى مابتقول تبقى كويسه توكل على الله

والبنزينه هتاكد لك

[Saeed-Taha]

الحمدلله العربية طلعت كويسة وزى الفل وخلاص اشتريتها

الف شكر لكل اللى اهتموا وردوا عليا

جزاكم الله كل خير