مقارنة بين الماروتى و 128

[mman2005]

لو سمحتوا أنا مش عارف هل أنا كده حطيت موضوعى فى القسم المناسب ولا لا والموضوع بإختصار أنا معايا مبلغ 16000 جنيه وعايز عربية مستعملة وعايز رأيكم وخبراتكم هل أشترى عربية 128 موديل أوائل الثمانينات ولا أشترى سوزوكى ماروتى موديل التسعينات، ولو فيه سيارة ثالثة تقترحوها علية، وجزاكم الله كل خير.

[Zing0]

بصراحة أنا زيك بالضبط لسة فى مرحلة تحديد الموديل المناسب
و طبعاً لازم تعرف أن كل عربية ليها مميزات . و لااااااازم هتلاقى فيها عيوب
لذلك لازم تعرف العيوب قبل المميزات و تقرر إذا كنت هتقدر تتماشى معاها و لا هتضايقك
دى شوية بيانات قدرت أعرفها و أتمنى المتخصصين يفيدونا أكتر....

عندك الـ 128 : مميزاتها:
- شعبية و بياعه ( يعنى بتتباع بسرعه) مش هتلزق فيك لو عاوز تتخلص منها
- قطع غيارها عند البقال , يعنى أى صبى ميكانيكى هيجيبلك اللى أنت عاوز تغيره فيها و أنت واقف

عيوبها: قطع غيارها مش معمرة, و بالتالى هتحتاج تصاحب الميكانيكى لأنك هتزورة كتير


الماروتى: مميزاتها:
- بدأت تأخد شعبية خاصة فى موديلاتها الأخيرة
- صغيرة و ده بيجعلها مفضله فى شوارعنا الزحمه
- موفرة جداً فى إستهلاك البنزين: و ده لأن محركها cc 800

عيوبها:
- لا يتحمل محركها العمل لمسافات طويلة. و بالتالى السفريات البعيده متنفعش فيها خااااالص
( لاحظ إن الـ127 محركها أعلى 950 سى سى)
====================================
أرشح لك اللادا 2105 / 2107
أنا مقتنع بيها مبدئياً للأسباب التالية
- محترمة فى الطرق المكسره و المطبات بتاعتنا
- قطع غيارها متوفره و رخيصة
- قوية , و خلى أى سائق ميكروباص يحكهالك, هو اللى هيتحك
- معدل ثبات عالى على السرعات العالية

عيوبها:
- طبعاً شكلها الرخم اللى مفيش فيه أى نوع من الفشخرة و المنظره
- صوت الموتور إلى حد ما عالى عن الـ 128 و الماروتى

لو مش مقتنع بيها: عندك
البولونيز
الـ 127
الريتمو
ستروين Ax


و ربنا يوفقك و يوفقنا للخير

[Sehsss]

127 أفضل من الاثنين، خاصة في موضوع العفشة أفضل من 128 بس شرط الحالة الجيدة

[Abdm]

أنا شايف أن أحسن وأفضل عربية فى السعر دة هى 128 عربية عملية وواسعة عن ال127 وcc بتاعها أكبر من 127 والماروتى وأقتصادية وأنعم وقليلة المشاكل عن اللادا .. طبعا أن كل كلامى دة عن المستعمل

والله الموفق والمستعان

[original]

الماروتى ممتازة بس لو لقيت 128 حالة الفبريكة يبأا هاتها لأن قطع غيارها ببلاش

[mman2005]

شكراً للأخوة الأفاضل على تفاعلهم فى موضوعى وإفادتى وجزاهم الله كل خير... ويا ريت إلى عنده معلومة مش يبخل بيها.

[Sehsss]

العفو يا باشا

[Dr'AhmZZong]

سوزوكي ماروتي جميلة جدا اهتم إنت بس بصيانتها و هي تروح اسوان كل أسبوع ..

[lad]

ماروتى

[el_nahal2004]

مارووتى

[heshamzaky]

الماروتى حلوة بس لا أظن ان فية ماروتى ب 16 الف اعتقد اغلا من كدة
بس حجم الماروتى صغير صعب جدا تركب فيها عائلة دة عيبها صغيرة جدا
ال 128 كصاج اقوى طبعا
بس الماروتى مش وحشة
ال 128 اكبر و اجمد