جوليت 2005 ولا بروتون جين 2 موديل 2007

[mxz911]

السلام عليكم

انا الايام دى بدور على عربيه نظيفه وكنت بفكر من فتره ف الكورسا 94 والابيزا والبولو والحاجات دى ونزلت شفت لفه عليهم كلهم لقيت ان 99% منهم عربيات متفرتكه وصعب تلاقى نظيف حتى اللى يقولك نظيف بتبقى بالنسباله نظيف لكنها برضه متبهدله بحكم الزمن !

المهم انا هحاول اعلى شويه المبلغ وبدأت ابص لحاجات اعلى وكنت بدور على جوليت نظيفه ولقيت واحده 2005 فابريكه كلها ف اواخر الاربعينات .. وببص على العربيات عموما لقيتها هتفرق مثلا من 5 - 7 الاف عن جين 2 موديل 2007 .. بقيت مش عارف اختار ايه علما بأنى اكتر حاجه اكرهها انى اروح لميكانيكى او ادوخ على قطع غيار ف يوم الايام ..
العربيتين مانيوال فول اوبشن فابريكه بره وجوه
وبالنسبه ل دى او دى ياريت تقولولى اكشف على ايه
انا بصراحه عاجبنى اوى شكل الجين 2 .. بس خايف اجيبها تطلع عربيه مقلب والبس ف قطع غيار نار او صيانه صعبه لانى معرفش حد معاه العربيه دى

ولو حد عنده اى اقتراحات تانى ياريت يقول وانا بتكلم فى سعر مثلا 45 - 50 الف .. ولو هنزيد اوى اخرى 53 الف لانى اى مبلغ فوق ال 40 الف يعتبر مش جاهز وهتصرف فيه عموما !
مستنى الاقتراحات علما بأنى اكتر عربيه بسوقها حاليا هيه نوبيرا 2004 مانيوال بتاعت اهلى


شكرا

[Dr'AhmZZong]

gen2 عربية حلوة جدا .. بس للاسف قطع غير نااااااااااااار و توكيل سيء جداااااااااا

[تامر.محمد]

الجولييت تتفوق في اسعار قطع الغيار و انتشارها فقط

[eng.m7md.ali]

لو هتجيب جين2 موديل 2007 يبقى مش هتتعامل مع التوكيل الزبالة ده ... بس هتضطر تجيب بعض قطع الغيار زي سير كاتينة وسير ديناموا والسيور دي كلها عشان تبقى مضمونة انك تجيب الاصلي
ومفيش ادنى ادنى ادنى مقارنة بين الجوليت والجين2 من كل حاجة الا من ناحية النعومة وقطع الغيار ورخصها بس

[Sehsss]

الجولييت تتفوق في اسعار قطع الغيار و انتشارها فقط

+11111111

[mxz911]

شكرا يا جماعه للمساعده

انا برضه عاوز اجيب الجين 2 .. بس معظم الناس بتقولى شوف جوليت احسن حتى الحاج والدى بيقولى شوف جوليت ..

واانا نفسى فى جين 2 بس خايف البس فى الحيط واجيب حاجه تعسفنى معاها ..

طيب يعنى هيه قطع الغيار غاليه اد ايه مثلا ممكن امثله عن الفروق بينها وبين الجوليت .. وهل الجين 2 ليها مشكله معينه لانى بصراحه دخلت منتدى الجين 2 لقيت مواضيع كتير عن المشاكل ف قلقان !!

وبالنسبه لجين 2 مانيوال 2007 فابريكه كلها على كلام الراجل ماشيه 80 الف كيلو المفروض تبقى بكام ؟

[Sehsss]

الفروق في أسعار قطع الغيار بين الجوليت والجين 2 مش قليلة

[lanos2004]

شوف الجين 2 ماتور اقوى ومشاكل اكتر--الانوس ماتور عادى ومشاكل اقل جدا--نعومه وبور تتفوق الجين 2 طبعا بس الانوس مش وحشه يعنى --بس هوة فيه جوليت 2005

[mxz911]

تمام يا رجاله .. طيب يعنى مفيش موضوع يكون فى اسعار قطع الغيار موضوع جديد لان كل اللى لاقيته قديم

انا النهارده نازل اشوف جوليت والدى كان مكلم و احد عليها موديل 99 مع انى مش عاوزها قديمه اوى كده بس هنزل اشوف لو الحاله حلوه ربنا يكرم واخدها

واحتمال اشوف برضه ال جين 2 اللى قلت عليها ف الموضوع

وايوه اخر موديل للجوليت هوه 2005 ..

لو فى نصائح اخرى ياريت وتسلموا

[lanos2004]

انا عن نفسى هركب جوليت ومش هركب بروتون بسسب غلاء قطع الغيار الدايو الاصلى فيها ببلاش ومعمر وعربيه عمليه جدا

[mxz911]

يا جماعه هيه قطع الغيار ازمه اوى كده ف الجين 2 ؟ حد يقولى لو سمحتوا امثله عن فرق الاسعار

[mxz911]

انا دخلت قسم البروتون ف المنتدى هنا .. بصراحه انا صعقت ! وزعلت

[تامر.محمد]

انا برضه عاوز اجيب الجين 2 .. بس معظم الناس بتقولى شوف جوليت احسن حتى الحاج والدى بيقولى شوف جوليت ..
واانا نفسى فى جين 2 بس خايف البس فى الحيط واجيب حاجه تعسفنى معاها ..

الحاج بيجيب كلامه من الناس
الناس بيجيبوا كلامهم من التجار و الصنايعية , و التجار بيجيبوا كلامهم من الصنايعية برده

التجار مقياسهم ايه ؟ :
1- اعتمادية
2- اعادة بيع
3- توافر قطع غيار و اسعارها منخفضة و المضروب موجود

الصنايعية مقياسهم ايه ؟
1- اعتمادية
2- توافر قطع غيار و اسعارها منخفضة و المضروب موجود
3- بساطة التكنولوجيا في العربية

اللانوس عموما تتفوق في دي بس
توافر قطع غيار و اسعارها منخفضة و المضروب موجود

[engman]

موضوع قطع الغيار دة موضوع الناس فاهمة خطأ أولا عندما تريد عمل مقارنة فى تكاليف قطع الغيار لازم تقارن قطع أصلية بأخرى أصلية مثلها وليس بأخرى غير أصلية أو ببعض القطع المستعملة الواردة من الخارج وهناك مثال صغير سيارة جوليت لصديقى كانت تحتاج طقم رشاشات للمحرك وعندما سألنا عليه وجدنا الطقم الgm الاصلى سعرة 1800 ج لسيارة المفترض أن قطع غيارها رخيصة وطبعا راح أشترى طقم مستعمل ب 400 ج وجربه مع الميكانيكى وطلع كويس ومشى بيه شوية وبرضو المشكلة رجعت تانى أما بالنسبة للجين 2 هى قطع غيارها مش منتشرة زى الدايو طبعا ولكن دة نسبة وتناسب شوف كام عربية جين2 ماشية فى الشوارع وكام عربية دايو جوليت أو لانوس الاتنين واحد ولكن قطع الغيار موجودة عند التجار اللى بيشتغلوا فى أكسسوار البروتون ولو هتشرى سيارة بروتون لازم تبقى عارفهم كويس وعندهم قطع غيار ماليزى وتايلاندى غير أصلية والتوكيل عندة قطع الغيار الاصلية ولكن بكميات مش كبيرة تناسبا مع حجم السيارات اللى فى السوق أصلا يبقى الخلاصة للجين 2 القطع الاستهلاكية المهمة تجيبها أصلية من التوكيل علشان تحافظ على العربية والقطع الخارجية العادية اللى لاتؤثر على أداء السيارة تيجبها ماليزى أو تايلاندى من أى تاجر ولكن رأى الشخصى كسيارة بشكل عام الجين2 أقوى وأفضل وأكف مفيش كلام ولك حرية الاختيار وأى سؤال أنا تحت أمرك

[ahmed76us2000]

اولا مفيش وجه للمقارنة بين العربيتين لأن دي فئة ودي فئة ,, الجين 2 اقوى واثبت وكماليات احسن بكتير بس مش اي حد بيفهم فيها وقطع الغيار مش متوفرة اوي بس لو جبت العربية بالتدريج هتبدأ تعرف سكك قطع الغيار بتاعتها , اما الجوليت هي عربية كويسة وسهل بيعها وقطع غيارها متوفرة بس تخلي بالك ان الاصلي بتاعها غالي انما متبصش على اي قطعة غيار وخلاص.
بما انك هتجيب مستعمل القرار يرجع لحالة العربية اولاً واخيراً ,, يعني انا لو هجيب مستعمل احسنلي آخد عربية أقل احسن ما اجيب عربية اعلى وادوخ معاها وانا لسه جايبها يبقى هكرها حتى لو العربية كويسة
عموما انا جبتلك اسعار شوية قطع غيار للجين 2 انما اعذرني مجبتش للجوليت ممكن لو حد يعرف اسعار قطع غيار ليها ممكن يفيدنا

اسعار بعض قطع الغيار للجين 2 (غير شامل 10% ضريبة مبيعات)
تيل امامي 198 جنية
تيل خلفي 192 جنية
طلمبة مياه 496 جنية
طلمبة بنزين 1058 جنية
مقص امامي 445 جنية
مقص خلفي طولي 932 جنية
مساعد امامي 453 جنية
مساعد خلفي 261 جنية
علبة الدركسيون 3959 جنية
اكصدام امامي 639 جنية
اكصدام خلفي 665 جنية
كشاف امامي 787 جنية
فانوس خلفي 382 جنية
لوجو اماي 72 جنية
لوجو خلفي 90 جنية
شبكة اكصدام علوية 96 جنية
حلية شبكة 254 جنية
شبكة اكصدام سفلية 125 جنية
بابابريز امامي 946 جنية
بابابريز خلفي 592 جنية
ماكينة زجاج امامي 215 جنية
ماكينة زجاج خلفي 215 جنية
مفتاح مرايات 129 جنية
مفتاح رباعي 546 جنية
مفتاح فردي 112 جنية
مراية جنب عادة 264 جنية
مراية جنب كهرباء 637 جنية
مراية صالون 150 جنية
كبود 937 جنية

كمان تاخد بالك من حاجة ان الاسعار دي اسعار توكيل والصح انها تتقارن باسعار قطع غيار لعربية في نفس الفئة مش بعربية في فئة اقل وزي ما قولتلك طالما هتشتري مستعمل يبقى اهم حاجة حالة العربية الي هتشتريها