محتار بين لوجان و ريو 2012 .. و اسئلة اخرى !!

[كوباية شاى]

السلام عليكم !!

بصوا يا شباب انا متابع المنتدى من غير ما اشارك بقالى فترة علشان انا لسة معنديش عربية .. بس قريبا ان شاء الله على اخر الشهر دة 6-2012 ناوى اجيب اول عربية ليا .. طبعا انا سوقت عربيات كتير جدا بحكم عملى و كلها ايجار . بس الموضوع بيختلف تماما لما تبقى عربية ناوى تكمل بيها 10 سنين قدام.

انا محتاج منكم نصيحة فى كذا حاجة

اولا عايز رايكم فى الاختيار لو بقارن فى الشريحةالسعرية لوجان و سانديرو و لانوس ( انا مستبعد الفيرنا تماما )

ثانيا عايز اقارن لوجان 2012 الاوتو ب كيا ريو سيدان

عارف انهم مش نفس الشريحة السعرية بس بصرف النظر عن الفلوس.. انا عارف ان لولا اتفاقية اغادير كانت اللوجان هتبقى بنفس سعر الريو فى حدود ال 97 الف.

هقولكم احتياجاتى فى العربية علشان تقدروا تدونى معلومات مفيدة فى المقارنة..

انا عايز عربية مريحة فى السفر ( معدل مرة الى الاسكندرية و مرة الى الصعيد شهريا )

ثبات على الطريق السريع

همشى بيها حوالى من 40 ل 60 كيلو يوميا داخل القاهرة

راحة السائق فى المسافات الطويلة شئ مهم جدا بالنسبالى

خدمة ما بعد البيع و اسعار قطع الغيار.


سؤالين صغيرين فى الاخر بقى

( حد عندة معلومات لو ركبت غاز للعربية و هى زيرو دا تاثيرة اية سواء لوجان او ريو علشان بعد ازمات البنزين المتكررة و ارتفاع سعرة المتوقع قريبا هيبقى الغاز ضرورى خصوصا انى بسافر و بمشى كتير جوة المدينة ) اللى اعرفة ان اجهزة الغاز الجديدة شالت معظم السلبيات اللى كانت بتاثر على الموتور و بقى الغاز بيدى كفائة زى بنزين 95

( هل تركيب الغاز بيخرج العربية من الضمان ؟؟ )


انا اسف للاطالة و منتظر ردودكم

شكرا

[Last-Fighter]

شباب سلام عليكم انا كمان فى نفس حالة الاستاذ كوباية شاى و نفسى حد يجاوب على اسئلته بس ارجوكم اللى يجاوب يكون عن تجربة فعلية مش يقولى انا سمعت
انا زيه محتار جدا و محتاج مساعدتكم بجد

[S O P H O S]

انا هقولك راي الشخصي لو بين الاثنين دولا انا اختار الريو
بس بشرط مش اقلبها غاز
والاثنين معقولين ومتقاربين
بس انا اختار الكيا ...
مجرد راي

[samyyousef]

السلام عليكم
لا أظن أن ايا من السيارتين الرينو او الكيا يستهلك بنزين بشكل يستدعي التحويل الى غاز

[S O P H O S]

السلام عليكم
لا أظن أن ايا من السيارتين الرينو او الكيا يستهلك بنزين بشكل يستدعي التحويل الى غاز

بالظبط كده علشان كده اخترت الريو مع عدم التحويل لغاز ...
ما افضل ترك الشئ كما صنع

[mido_soliman]

لا يوجد وجة مقارنة بين اللوجان والريو فى كل شىء
الريو افضل بمراحل

[tutankhamoun]

( حد عندة معلومات لو ركبت غاز للعربية و هى زيرو دا تاثيرة اية سواء لوجان او ريو علشان بعد ازمات البنزين المتكررة و ارتفاع سعرة المتوقع قريبا هيبقى الغاز ضرورى خصوصا انى بسافر و بمشى كتير جوة المدينة ) اللى اعرفة ان اجهزة الغاز الجديدة شالت معظم السلبيات اللى كانت بتاثر على الموتور و بقى الغاز بيدى كفائة زى بنزين 95
( هل تركيب الغاز بيخرج العربية من الضمان ؟؟ )

أولا تركيب الغاز بيخرج العربية من الضمان طبعا (الموتور على الأقل )
طيب ردا على سؤال الغاز

مين اللي قال لحضرتك أن الضرر جاي من نوعية الجهاز الخاص بالغاز ؟

الضرر بييجي من الغاز نفسه و لذلك أيوة الغاز بيضر الموتور بس لها طرق للحفاظ على الموتور لفترة طويلة شوية .
الغاز فيه كبريت عالي و الكبريت هو اللي بيعمل تآكل داخليا عند حرقه .
البنزين مفيهوش الكبريت .

طيب تعمل أيه علشان تتفادي كدا

الأول العربية لازم تدور الصبح بالبنزين و تمشي بها مسافة و بعدين تنقل لغاز .

قبل ما تركب الغاز أصلا لازم تكون مشيت بالعربية مسافة لا تقل عن 5000 كم علشان البنزين بيكون طبقة من مادة معينة (نسيت أسمها) بتقلل تأثير الكبريت في البساتم .

الحاجة بقى الأخيرة و هي موضوع أن الغاز بيديك قوة بنزين 95 ؟

طبعا اللي قال لحضرتك الكلام ده ............... ميعرفش حاجة في البالوظة !

مبدئيا
الموتور مُصمم بضغط مُعين و كل نسبة ضغط لها نوعية من الأوكتان لا يجب أن تقل عنها
فلو مثلا أنت عربيتك هاتحتاج بنزين 90 أو 92 و أنت بتحط 95 ................... و لا هاتحس بالهوا و لا أي فرق .

أنت مش هاتطلع قوة أكبر من قوة الموتور الأصلية علشان حطت وقود درجة أشتعاله و طاقته أعلى من وقود آخر .

طيب الغاز بقى ؟

الغاز أصلا ............ أقل في الطاقة من البنزين
يعني بالبلدي
العربية بتبقى بطة بلدي في السحب لما بتشتغل بالغاز ............ مقابل البنزين طبعا .(يعني حتة كفائته في السحب أقل من بنزين 90 كمان ) فرضا أن موتورك مُصمم لبنزين 90 .
ميزة الغاز هو التوفير فقط لا غير .

أنت بتقول بتسافر كتير
درجة توافر محطات الغاز على الطرق اللي بتسافر عليها هاتفرق معاك لأن لو أنت بتسافر على طرق مفيهاش محطات غاز يبقى أنت عندك جهاز غاز في العربية ملوش أي لزمة .

طبعا داخل القاهرة إلى حد كبير هاتستفيد لأن محطات الغاز منتشرة تقريبا .

[horeen]

أنا محول عربيتى غاز بعد 5 الاف كيلو
الغاز زى الفل

[ashouhdy]

ولا مش عارف ارد اقول اية بنقارن نيو ريو ب داتشيا لوجان أذاى بس

[minicooper20]

ولا مش عارف ارد اقول اية بنقارن نيو ريو ب داتشيا لوجان أذاى بس

مش كل الناس فاهمه يا باشا
و هو لو فاهم مكنش سال يعنى
الراجل محتار يبقا ردنا يكون ايجابى با دكتور
اسف على النقد

[كوباية شاى]

يا جماعة انا مهندس كهربا و عمر ما العربيات كانت من اهتمامى كل تعاملى مع العربيات انى باجر عربية نضيفة علشان اسافر بيها يومين و ارجعها .. بحاول اتصفح الموضوعات المختلفة علشان اكسب معلومات اكتر قبل ما اختار

بالنسبة لموضوع الغاز شكرا جزيلا tutankhamoun
على ردك المفصل بس معلش فى نقطتين محتاجين توضيح اكتر
1- وضع الضمان مع تركيب الغاز هل بتخرج تماما من الضمان ولا الموتور بس ولا اية بالضبط
2- التاثير السلبى على الموتور قل بنسبة قد اية بعد الاجهزة الجديدة اللى بتدور اجبارى بنزين و بعد ما تسخن العربية كويس تقلب غاز

و بالمناسية انا ركبت مع 2 سواقين تاكسى واحد لانسر بومة و التانى فيرنا و الاتنين مدحوا فى الغاز مدح مبالغ فية و قد اية هو موفر جدا و لا يؤثر على الموتور ولا بياثر على السحب اطلاقا

هل دة كلام موضوعى ولا بيبالغوا ؟؟

شكرا جزيلا لكل االى اهتم انة يساعدنى فى القرار المصيرى دة :)

[megaman]

والله يا باش مهندس عللا ما اظن بشكل كبير السياره حتخرج تماما من الضمان ايا كان توكيلها تاثير الغاز على الموتور مش حتعرفه الا لما يستهلك والناس بتقول اللى بتوفره مع الغاز حتصرفه على الموتور اساسا انا مش مقتنع تماما بالغاز لو هو ممتاز وعملى قوى وبيحافظ على الموتور كانت السيارات نزلت متجهزه بيه تمشى كده وكده على ما اظن انه اختراع مصرى جدا لو بتفكر فى عربيه جديده خدها كده زى ما هى على راى منير والريو مختلفه تماما عن اللوجان من حيث النعومه والخامات الافضل والشياكه وشكل احدث وبرستيج اعلى هذا رأيى والله اعلم

[tutankhamoun]

يا جماعة انا مهندس كهربا و عمر ما العربيات كانت من اهتمامى كل تعاملى مع العربيات انى باجر عربية نضيفة علشان اسافر بيها يومين و ارجعها .. بحاول اتصفح الموضوعات المختلفة علشان اكسب معلومات اكتر قبل ما اختار

بالنسبة لموضوع الغاز شكرا جزيلا tutankhamoun
على ردك المفصل بس معلش فى نقطتين محتاجين توضيح اكتر
1- وضع الضمان مع تركيب الغاز هل بتخرج تماما من الضمان ولا الموتور بس ولا اية بالضبط

أعتقد أن تركيب غاز هايخرج العربية تماما من الضمان و لكن للتأكد
لازم تسأل التوكيل نفسه الخاص بالعربية اللي أنت ناوي تشتريها .

2- التاثير السلبى على الموتور قل بنسبة قد اية بعد الاجهزة الجديدة اللى بتدور اجبارى بنزين و بعد ما تسخن العربية كويس تقلب غاز

مرة تانية يا باشا الموضوع ملوش علاقة بالأجهزة .
الأصل هو الغاز نفسه في موضوع الأحتراق و التأثير على الموتور

و بالمناسية انا ركبت مع 2 سواقين تاكسى واحد لانسر بومة و التانى فيرنا و الاتنين مدحوا فى الغاز مدح مبالغ فية و قد اية هو موفر جدا و لا يؤثر على الموتور ولا بياثر على السحب اطلاقا

هل دة كلام موضوعى ولا بيبالغوا ؟؟

شكرا جزيلا لكل االى اهتم انة يساعدنى فى القرار المصيرى دة :)

مميزات الغاز
موفر في القيادة نظرا لرخص سعره و بالتالي أضراره اللي مش هاتبان إلا على المدى الطويل هيتم تغطيتها بالتوفير في ثمن الغاز نفسه .

هيئة الطاقة الأسترالية كانت عاملة بحث في هذا الموضوع .
و خلاصة البحث أن الغاز أقل في السحب من البنزين (نظرا لأن الطاقة في البنزين أعلى و درجة أشتعاله أسرع )
ثانيا
على المدى الطويل .......... هايأثر على عمر البساتم
يعني مثلا بدل ما الموتور يقعد معاك 250 ألف كم من غير عمرة ممكن بالغاز يقعد 200 ألف بس ...
يعني ممكن تأثيره حوالي 20 % أقل من عمر المحرك

طبعا العيب التاني
هو عدم توافر محطات الغاز زي محطات البنزين
و طبعا الشنطة نفسها بتقل مساحتها نظرا لمساحة خزان الغاز أو التانك يعني .

[felfel2010]

ريو اجمل و احدث و اشيك

[mohamed_mesho3]

فرق شاسع يا باشا بين سحب العربية بالغاز عن البنزين
الغاز بياكل البساتم و بيخلى عمر الموتور اقل
الموتور لو عملتله عمرة ادام و هو غاز هتكلف كتير اوى
الشنطة هتتخنق اوى
العفشة اللى ورا هتتاثر بالانبوبة مع الوقت و الوزن
البنزين افضل كتير