بونتو ايفو ولا النترا كسر زيرو !!!!!!!!!!!!!

[ahmad_starac]

كنت عملت موضوع قبل كده عن البونتو ايفو ولا اكسنت ار بى ولقيت ان الايفو احسن من اراء الاعضاء ورأى الشخصى بس مع اعتراض الحاج الشديد على الايفو وتمسكى برأى فيها فقولت اسال انهى الافضل الايفو برضه ولا النترا كسر زيرو كدا !!!! عشان ابقى قطعت الشك باليقين واتأكد من صحة موقفى وعشان برضه اسلم من شماتة الحاج فيا لو جبت الايفو و اتسكيت فيها برجاء ساعدونى مع العلم انى مش مهتم بحوار الماتور بتاع الايفو دا وف نفس الوقت لانية لغير العربيتين دول

[S O P H O S]

بصراحة بونتو بردوا ..
والله اعلم

[ahmad_starac]

بصراحة بونتو بردوا ..
والله اعلم

شكلك متحيز للبونتو زى برضه ودا بيزيد تمسكى بيها اكتر بس هل الانترا سيئه بالنسبه للبونتو ولا الفرق بسيط ؟؟! وشكرا لاهتمامك ياباشا وياريت متحرمناش من ردودك دى

[yoko]

ما إيفو محتمة بوسائل امان محترمة لو هتقارنها بالإلنترا الفاضيه الي مفيهاش ولا abs حتى أكيد الإيفو
لو هتقارنها بالإلنترا الفول أوبشن الي ب150 الف ولا 160 الف الإلنترا هتكسب عشان فئة أكبر

[hugan]

لو مكانك النترا كسر زيرو

[S O P H O S]

شكلك متحيز للبونتو زى برضه ودا بيزيد تمسكى بيها اكتر بس هل الانترا سيئه بالنسبه للبونتو ولا الفرق بسيط ؟؟! وشكرا لاهتمامك ياباشا وياريت متحرمناش من ردودك دى

ربنا يكرمك يا باشا
بس هو زي ما قال yoko بالظبط واعتقد ان الالنترا هتكون فاضية
فالبونتو هنا هتكون وسائل امان ركوبة مختلفة وزيرو فأعتقد هتكون افضل
انما لو لو الالنترا كاملة يبقي المقارنة مختلفة وهي هتكسب وبرضوا مش علشان افضل
انما علشان دي فئة ودي فئة هتشباك وسيدان وماتور 1400 وماتور 1600 اختلاف فكل شئ وكده البونتو هتكون مظلومة فالمقارنة
عموما هو حسب احتياجتك وطلما حضرتك مش عاوز ماتور شد وعاوز ماتور جيد ومرضي يبقي
البونتو اشيك وزيرو انما لو هتبيع كمان فترة قليلة يبقي الالنترا
انما لو عاوز تركب عربية يبقي البونتو
والله اعلم
مجرد راي شخصي فقط ..
وربنا يوفقك للخير

[megaman]

النترا شوف مشاكل الهيونداى عموما ومشاكل الفيات الجراند ولا اليفو حتختار الالنترا

[ahmad--ezzat]

النترا طبعا
اكبر
موتور اقوى
قطع غيار متوافره وارخص
توكيل على الاقل احسن
عربيه متداوله تعرف تبيعها اسرع

فكك من الفيات دة عذاب

[MohammedAladel]

برغم ان العربيتين فئتين مختلفتين أنا شايف الإيفو أحسن ولكن كإختيار هختار الإلنترا عشان أنا بحب العربية اللى تبقى مالية مكانها ع الأرض وبرضه امكانياتها مش بطالة ومن الآخر الفيات ليها طعم والهيونداى ليها طعم ودى بتبقى قرار شخصى فى الآخر أيا كانت آراء الآخرين

[Dawns_Mist]

إلنترا موتورها أقوى اكيد ...
الإيفو أنعم في السواقة ...
قطع الغيار و إعادة البيع ( لازم برضه تحطهم في اعتبارك خصوصا لإن توكيل فيات سيء جدا )
الإيفو في الأمان ممتازة جدا و الثبات بتاعها أعلى من الإلنترا ..
إلنترا أوسع من جوه و شكلها من جوه كويس برضه و عندك مشكلة هتقابلك ( الإيفو أعلى باكدج 2 زجاج كهربا مش 4 ) و اسأل و اتأكد كويس .. و للعلم حاجة زي دي ممكن تخليني أتقفل أوي من العربية مع إني بموت فيها ..

* خلاصة الكلام ..
لو العربية دي لاستخدامك الشخصي و ماحدش هيسوقها غيرك و هتعرف تسلك في صيانتها .. يبقى الإيفو هتعجبك جدا
لو دي عربية عائلة ، و كل يومين سفر مع الأسرة ، و ممكن حد غيرك يسوقها .. خليك في إلنترا
- و للعلم في عربيات بالسعر ده ممتازة و تناسبك جدا و هتكون مسكت العصاية من النص مثلا لو اشتريت شارك كسر زيرو أو بروتون بيرسونا إليجانس زيرو .. و هتبقى صفقة أفضل من الإيفو و الإلنترا في رأيي .

[Land_Cruiser]

الالنترا تكسب فى حاله لو جبتها فيها ABS و airbags . الفكره ببساطه انها اكبر و اوسع و سعر اعاده البيع بتاعها كويس و قطع غيارها منتشره و العربيه بصفه عامه منتشره فى الشوارع و شنطتها كبيره و تنفع عربيه اسره و الكلام ده مش فى الفيات مع الاسف فلو الانترا كان فيها وسائل امان و خاصه ان حضرتك بتقول انك ناوى على كسر زيرو يبقى هتلاقى فيها كل المميزات . اما لو اتوماتيك فاضيه فبصراحه الموضوع هيبقى مقلق و ما انصحكش به لانك هتبقى عامل زى اللى بيجرى على سرعه ٢٢٠ كم على رجله و فى رأيي ما تستاهلش تدفع فيها كل الفلوس دى و فى الحاله دى تبقى الايفو احسن و ده نظرا لاهميه الامان يعنى الملخص دور على النترا فيها ABS و airbags كسر زيرو لان دول مهمين جدا و مش مهم مثلا فتحه السقف. و لا مرايات الضم و لا الاشارات اللى فى المرايات و ربنا يوفقك لما فيه الخير

[ahmad--ezzat]

الفكره ببساطه انها اكبر و اوسع و سعر اعاده البيع بتاعها كويس و قطع غيارها منتشره و العربيه بصفه عامه منتشره فى الشوارع و شنطتها كبيره و تنفع عربيه اسره و الكلام ده مش فى الفيات مع الاسف

دى اسباب تخليه ياخد الالنترا حتى لو مفهاش فرامل

[Land_Cruiser]

دى اسباب تخليه ياخد الالنترا حتى لو مفهاش فرامل

مع حضرتك طبعا بس الأهم من ده كله اكيد سلامه الركاب و خاصه و ان العربيه دى بتسحب و بتجمع بسرعه يعنى بتغرى على الجرى و حتى لو لم يجرى ممكن لاقدر الله الاخطاء تيجى من الاخرين او من الطرق نفسها و مشاكلها و لذلك يجب ان صاحب الموضوع يدور على وسائل الامان و يبعد عن الفئه الفاضيه من الانترا حتى لو اضطر يدفع اغلى شويه لكن اللى ممكن يسهل الموضوع انه بيفكر فى كسر زيرو . هى هتبقى الصعوبة الحقيقيه انه يعرف هى اللى فيها abs و airbags دى اى فئه بالضبط خاصه و ان المبدع غبور مطلع منها يجى عشرين فئه حسب الكماليات اللى بيحطها فى كل فئه