مقارنه هتموتنى من الحيره

[BODY541985]

ازيكوا الاول يا احلى شباب
دلوقتى انا محتار بين :-
1- بروتون جين تو موديل 2008 (مستعمل)
2- رينو ميجان موديل 2008 (مستعمل)
3- اسبرنزا m11 (زيرو)
4- byd g3 (زيرو)

وبصراحه دى العربيات اللى حبتها من خلال تجارب اصدقاء ليا ومحتار اجيب ايه فيهم وارجو ان الجميع مش يبخل عليا بالنصيحه

[S O P H O S]

1- اذا تستحمل عز العرب ..
2- اذا احسنت الاختيار علشان تعب الصيانة فمصر والفتين الكتير _عربية تحفه للي يحافظ عليها ويعرف يركبها_..
3- + 4- الاتجاه للصيني واعتقد البي واي دي افضل ..
مجرد راي يحتمل الخطأ
والله اعلم ..

[FrozenFire]

مع إحترامي الكامل لحضرتك
ما ينفعشي أصلا تدخل الميجان في المقارنة
الميجان تكتسحهم جميعا
بس المشكلة إنك تلاقي حاجة حالتها نضيفة ومش متهانة
وسيادتك برضه تصونها وماتبخلشي عليها
حتاخد عربية حتستمتع بيها دائما

[eng.m7md.ali]

الزيرو زيرو
m11 تحفة

[BODY541985]

اولا احب اشكر الجميع على تعاونه معايا
ثانيا احب اوضح حاجه وهى انى معجب جدا بشكل جين تو بس مش هقدر اجيبها زيرو فى الوقت الحالى ونفس الحكايه مع الميجان فانا من عشاق العربيه دى بس برده مش هقدر اجيبها جديده فعشان كده فكرت انى لو هجيب مستعمل هتوكل على الله وهجيب حاجه منهم ولو انى ميال اكتر للميجان لان فيها ابشون اكتر من الجين تو بس مشاكلها برده اكتر من الجين تو وده اللى محيرنى فى العربيتين دول ,
ثالثا لو هجيب زيرو فانا فكرت فى M3 لان فيها كل حاجه ممكن احتجها فى عربيه وفى نفس الوقت BYD G3 نفس الحكايه بالضبط مع الفرق ان BYD G3 فيها اوبشن اعلى من M3 بس M3 موتورها اعلى من BYD G3 واعرف ان الاسبرانزا دلوقتى قطع غيرها موجوده لكن خايف من قطع غيار BYD بصراحه
ومتأسف جدا جدا على الاطاله

[prosecutor]

بصراحة انا مش عارف ازاى الميجان الفرنساوى تتقارن بالصينى

[BODY541985]

بصراحة انا مش عارف ازاى الميجان الفرنساوى تتقارن بالصينى

انا بقارن ميجان مستعمل سعره من 65-70 الف مع اسبرانزا m11 زيرو سعرها 75 الف
لكن انا معاك طبعا ان الميجان افضل بمراحل من الصينى بس لو بالنسبه للفئه السعريه هتلاقى ان مخاطره شراء ميجان مستعمله ده من ناحيه وشراء صينى زيرو

[BODY541985]

فين بقيه الآراء يا جماعه

[عمرو الشافعى]

يا فندم هو إزاى أصلا ميولك متضاربة كده

مينفعش تبقى محتار بين byd وميجان أبدا

يعنى الميجان والجين ماشى
انما الصينى لأ مفيش مقارنة
وسيبك من الفئة السعرية

دور على جين تكون فابريكة ونضيفة واستمتع وسيبك من الصينى ده كله
اما بالنسبة لقطع غيار البى واى دى لو مصمم يعنى
متقلقش عشان كلها تاكسى دلوقتى فهتلاقى لها قطاع غيار

وبعدين يعنى تدفع فى بى واى دى 70000 الف مثلا
ومتركبش bmw 95 316 تيجى ازاى بس

[Mamoud salah H]

الميجان والجين 2 احسن حاجة يعني الي حالتها احسن تخلص فيها
وعلي فكرة معايا ميجان موديل2006 وعايز ابيعها فابركة بالكامل معادا جنب شمال
وسيبك من الصيني وممكن تدور في الصني بردو عربية جميلة

[kliken]

ميجان ثم جين تو حسب الحاله اللى هتلاقيها جيده

[abogharib]

اليمجان طبعا و بعد كده الجين تو
صينى ايه و بتاع ايه هو الصينى اصلا بيعيش ؟ لا موبيلات ولا سماعات ولا حتى اقلام رصاص صينى بتعيش تروح تجيب عربيه صينى
مجرد رائى

[amrelsha3er]

اليمجان طبعا و بعد كده الجين تو
صينى ايه و بتاع ايه هو الصينى اصلا بيعيش ؟ لا موبيلات ولا سماعات ولا حتى اقلام رصاص صينى بتعيش تروح تجيب عربيه صينى
مجرد رائى

كلام مظبوط+111

[MoH.SaLaDiN]

بص انا زيك كده بردة معايا 70000 وكنت محتار بين الجين تو والميجان واليارس
طبعا الميجان افضل واحدة فى الامكانيات والثبات والعفشة والعزل دى غير ان شكلها فخم و برستيج جدا وغيرها من المميزات ولكن عيبها انها مكلفة جدا فى الصيانة يعنى لو مصرفتش عليها واهتميت بعمل الصيانة الدورية حتظهر مشاكل كتير وحتكلفك جامد انا واحد صاحبى اشترا ميجان 2005 بانوراما باقالى 7 شهور صرف عليها 2000 جنيه فى الارض فى الاول سير المارش اتقطع فراح دفعلوا 600 جنيه وبعدين زرار البانوراما باظ اشتراه ب 1000 جنيه و صلح الستارة الخلفية و كان فى مشكلى فى الزجاج الكهربا كمل بقية المبلغ
بالنسبة للجين تو تلى الميجان فى الابشنز و الثبات وقوة الموتور وصاج العربية وشكلها رياضى وجميل بس انا دورت كتير فى المستعمل ومالاقتش حاجة حالتها كويسة لان معظم اللى بيشتريها شباب تقريبا وانت عارف الشباب بتعمل ايه فى العربيات تانى حاجة فى ناس كتيرة اشتكت من عدم توافر قطع الغيار وده بردة حصل مع واحد جارى استنى اكتر من 3 شهور عشان يغير الاكصدام الامامى والناس بتقول برده ان قطع الغيار غالية شوية وتانى مشكلة هو تقفيل العربية مش اد كده
اخيرا اليارس طبعا الامكانيات اقل حاجة وبردة اقل ثبات واقل موتور و اقل شكل بس عملية جدا داخل المدن وموفرة فى البنزين واعتمادية من الدرجة الاولى بالرغم انى كنت شايفها انها اقل واحدة فيهم الا انى بفكر جديا انى اشتريها لانى مش مستعد اصرف فلوسى على قطع غيار غالية زى الميجان او اعطال متكررة وغبية زى الجين تو والافضل انك تعمل الصيانات الكبيرة بس فى التوكيل وتوفر فلوسك
هى فعلا معادلة صعبة لازم تعرف انت محتاج ايه من العربية وايه اللى بيفرق معاك وايه اللى ممكن يزعلك لما بتحدد هدفك من العربية حتستريح كتير وحتعرف تاخد قرار صح
المشكلة فى المنتدى هنا ان فيه اراء كتيرة مش محايدة بعنى مثلا لو دخلت فى قسم الميجان او الجبن تو او اليارس حتلاقى كل قسم بيشكر فى عربيته جدا و حيقنعك انها احسن عربية فاستشير ناس محايدة والاهم انك تستشير ربنا وان شاء الله يهديك ويهدينى الى الصواب

[MoH.SaLaDiN]

حاجة تانية سعر الجين تو اتوماتيك 2008 يعمل 65.000 تقريبا
اما الميجان 2008 متوسط سعرها 75.000 او اكتر كمان لو بانوراما اعلى فئة
فى فرق 10.000 اصلا والله اعلم
تحياتى