متسوبيشى و لا نيسان؟؟؟؟؟؟؟؟؟؟؟؟؟؟؟؟؟؟؟؟؟؟؟أفيدونا جزاكم الله كل خير

[sab3aawy]

انا بحس ان فيه ناس كتير جدا لما بتقارن الصنى باللانسر بتتكلم كأنها بتقارن فيات 124 بمرسيدس كومبريسور، وبصراحة شايف ان السبب الوحيد فى ده اننا اتعودنا نطلع القطط الفاطسة فى اى حاجة بتتعمل فى مصر، سواء القطط دى كانت فاسطة فعلا وللا بسبع ترواح ولسة عايشة

انا سقت النسيان لحد ما شبعت وسقت اللانسر الشكل القديم كتير جدا واكاد اجزم ان الفروق بينهم صعب جدا ان الواحد يطلعها، لكن معظم العيوب والميزات متقاربة جدا، العفشة ناشفة فى العربيتين، عزل الصوت مش عظيم فى العربيتين، الموتور صوته مش عالى لكن فى نفس الوقت مش ناعم فى العربيتين وان كان النيسان صوت موتورها اعلى شوية، الصاج خفيف ومرن فى العربيتين، الثبات ممتاز فى العربيتين ،السحب معقول فى العربيتين وان كانت النيسان سحبها احسن شوية، اللانسر قعدتها اوسع من ورا والصنى قعدتها اوسع من قدام، الفرش اللى كل الناس طالعين بيه السما فى اللانسر وخاسفين بيه الأرض فى النيسان انا مش شايف فيه فروق تذكر، شكل العربية من جوة ومن برة مسألة اذواق

وفعلا من الأخر وبدون تحيزات مسبقة مبنية على رفض تقليدى لأى منتج مصرى او بالعكس احساس وطنى ابله مبالغ فيه، الفيصل النهائى فى شراء اى من السيارتين هو شكل مين فيهم عاجبك اكتر، لأن الفروق فى اى حاجة تانية لو قورنت بدون تحيزات فلن تكون اطلاقا بالحجم الذى يصورها بها البعض

والعربيتين بالمناسبة مش اعظم حاجة فى الكون، هم على قد فلوسهم معقولين وليس اكثر من ذلك، ومش ذنبهم ان العربيات فى بلدنا بتتباع بضعف سعرها فى اى حته تانية فى لعالم وبتالى احنا مستنيين اداء فائق مقابل الفلوس اللى احنا بندفعها وفى النهاية بنلاقى اداء جيد فقط

[memokokoo]

يسلم لسانك يا باش مهندس سبعاوى لسانك بينقط درر
انت قلت ان المقارنه صعبه . ولكن مش مستحيله
انت نفسك جاوبت على معظم الاسئله اللى بتدور فى دماغى
انت قلت ان السحب فى النيسان افضل وقلت ان الموتور فى النيسان افضل لاْنه ب اتنين كامه علويه
كمان قلت ان الصالون بتاع النيسان واسع من قدام وديق من ورا و قلت الانسر واسعه فى الكنبه اللى ورا كمان اتكلمنا عن الشنطه والكماليات فى العربيتين وعن العفشه
و عن سعر شراء السياره وعن سعر اعاده بيعها . ناقص ايه فى المقارنه!
المعلومات دى ماكنتش اعرفها وماكنتش ممكن اعرفها الا لو طلبت مساعده حضرتك ومساعده الاخوه فى المنتدى.
وعلى الرغم من اختلاف الاخوه فى المنتدى فى الرأى الا ان دلوقتى بقى عندى معلومات مؤكده من اكثر من عضو تخص السياراتين وعيوبهم و مميزاتهم
ومن خلال المعلومات دى اقدر اشوف انا عايز ايه بالظبط .

[memokokoo]

الصنى مناسبه ليا اكتر لان شكلها وقور من بره تناسب السن اللى فوق 35 كمان اداءها كويس موتورها قوى وسعرها اقل
الصالون بتاعها الخامات بتاعته ربما تكون اقل من الانسر دى ماتهمنيش كتير سعر اعاده بيع الانسر افضل بكتييير بس انا بردو ماتهمنيش دى الانسر و الدايو منتشرين جدا بعض الاعضاء بيعتبروا دى ميزه وهى حقيقى ميزه من وجهه نظرهم لكن بالنسبه ليا لا.لانى بحب ابقى مميز الى حد ما ياريتنى اقدر اشترى الفيرارى:)
انا بحب ابقى العربيه اللى انا راكبها مش منتشره الانتشار الفظيع ده # ده مجرد راى ممكن تتفق معاه وممكن لا # وخصوصا ان سعر قطع الغيار مش فارقه كتير
ومن الاخر العربيتين زى الفل ماحدش يقدر يقول عليهم حاجه انا بس كنت بشوف ايه اللى يناسينى من خلال التفاصيل بتاعه العربيتين مش من خلال راى شخص ما لان كل شخص بيبنى رايه من خلال المواصفات اللى تناسبه هو شخصيا.
الصنى فيها شويه عيوب من وجهه نظر بعض الاعضاء بالنسبه ليا ممكن اتقبل الحاجات دى والعكس صحيح انا ممكن اشوف شويه عيوب فى الانسر بالنسبه لشخص اخر دى مميزات مش عيوب .
المهم دلوقتى انا كونت راى عن العربيتين
محدش عارف الفيرارى دلوقتى بكام ؟وهل هى فول اوبشنز ولا لأ؟ اصل انا ناوى اشتريها الصيف الجاى :)

[memokokoo]

باش مهندس سبعاوى اللنك اللى انا كاتبه ده بتاع كونتاكت كار مكتوب فى التفاصيل ان العربيه فيها abs كمان شكل الفتيس الاوتوماتيك مختلف انا الشكل اللى شفته فى عربيات كتير كانت الغيارات على استقامه واحده اقصد الفتيس كان مجره
الكلام اللى بيقولوه ده صحيح ولا دى خدعه

http://www.contactcars.com/NewCars_Profile.asp?EngineID=1409

[dental__h]

Lancer طبعا للاكتساح في السوق للانسر وده أكيد أكيد مش من فراغ

[sab3aawy]

باش مهندس سبعاوى اللنك اللى انا كاتبه ده بتاع كونتاكت كار مكتوب فى التفاصيل ان العربيه فيها abs كمان شكل الفتيس الاوتوماتيك مختلف انا الشكل اللى شفته فى عربيات كتير كانت الغيارات على استقامه واحده اقصد الفتيس كان مجره
الكلام اللى بيقولوه ده صحيح ولا دى خدعه
http://www.contactcars.com/NewCars_P...?EngineID=1409

واضح ان الناس بتوع كونتاكت ناشرين مواصفات الصنى اللى بتتباع فى الخليج واخدينها كوبى بيست من موقع خليجى، اصل المشكلة فى كونتاكت ان اللى متولى الدعم الفنى لموقع اهتمامه الأساسى السيارات هم ناس بتوع IT

المواصفات دى بتاعة الشكل الخليجى، لكن الشكل الموجود فى مصر بدون ABS عصاية الفتيس بزرار LOCKوليس حارات

[sab3aawy]

Lancer طبعا للاكتساح في السوق للانسر وده أكيد أكيد مش من فراغ

لو قسناها بالطريقة دى يبقى المفروض ان الناس كلها تشترى صنى يدلوقتى لأن الصنى بتبيع حاليا اكثر من لانسر الشكل القديم بمراحل

اللانسر باعت لما كانش لها منافس فى فئتها السعرية، والصنى ديلوقتى بتبيع بهبل لأن برضه مالهاش منافس قوى فى فئتها السعرية، بالنسبة لسوقنا انتشار سيارة معينة هو ضمان لسهولة الصينة واعادة البيع لكن ليس معناه انها احسن عربية فى الدنيا، لكن معانه ببساطة ان فى الفترة اللى انتشرت فيها كانت هى احسن سعر فى فئتها، سوقنا ماشى بالطريقة دى، وعلشان كدة هتلاقى مافيش عربية فى سوقنا انتشرت بكل موديلاتها، موديل ينجح واللى بعديه يسقط حسب سياسة التسعير، وارجع لأيام التسعينات هتلاقى اكتر عربية يابانى كانت بتتباع فى اوائل التسعينات هى الهوندا سيفيك وبعديها الكورولا، واللانسر البطة قليلة جدا، مع ظهور اشكال 1997، الهوندا اختفت والكورولا العيون اختفت واللانسر الكريستالة اكتسحت، مع ظهور اشكال 2000برضه الهوندا مش موجودة لكن الكورولا اكتساح واللانسر المكوة معملتش اى شغل، وفى 2003 اللانسر البومة عملت مبيعات عالية جدا لحد النهاردة علشان فرق السعر الواضح من الكورولا، وبرضه الهوندا مش موجودة
ومن 2006 مع ظهور الصنى المجمعة محليا وهى مبيعاتها فى ازدياد ، لكن كانت العقبة هى اللانسر القريبة منها فى السعر ، لكن النهاردة لما هتبص على السوق وهتلاقى ان اللانسر الشارك غليت جدا، والكورولا الجديدة برضه غالية جدا لدرجة انهم بقوا بسعر الهوندا سيفيك رجعت الهوندا سيفيك للسوق بعد غياب 12 سنة وبتبيع اكتر من الكورولا واللانسر الجداد، اما الصنى المحلى اللى موجودة فى السوق من 2006 فقط (يعنى مش اكتر من سنتين) فمعدل مشاهدتها فى الشارع يكاد يقارب اللانسر اللى بتتباع بقالها 6 سنوات والكورولا اللى بتتباع بقى لها 7سنوات وده مش علشان هى احسن من اللانسر لكن علشان اللانسر الشكل القديم غليت بهبل، لأن فى النهاية التسعير فى مصر له اكبر الاثر فى الانتشار، ولو الانتشار معناه ان السيارة ممتازة يبقى المفروض ان السبرانزاA516 تتحط ضمن قائمة افضل سيارات فى مصر(مع كامل احترامى للسيارة واصحابها)

[memokokoo]

اكتساح ايه؟