النترا 2008 - سيراتو - اربي -معضله السعر مقابل القيمه - نصائحكم مطلبوه

[EngAhmedSakr]

السلام عليكم

عملا بمبدأ ما خاب من استشار فمحتاج نصيحه اخواني
دلوقت انا عايز أحدث عربيتي ... هنزل من الإكسل ومحتاج اركب حاجه اعلي
قدامي النترا 2008 مانيوال فبريكه بالكامل من الإكصدام للإكصدام
كماليتها كلها تعمل بس من غير اضافات يعني أوبشن الإستوك بتاعها حتي الجنوط عاديه بطاسات
دلوقت العربيه حالتها ممتازه فيما عدا حاجتين فقط يعيبوها .... فرشها الأصلي متبهدل شويه + العداد 150 الــــــف كيلو

العربيه تعمل كام .. مع العلم صاحبها ماسك علي 70 الف ... وهو جاري علي فكره وعارف العربيه كويس انها ما اتحطش فيها قلم بويه
فأخدها بالسعر دا ولا ايه

ثانيا انا كنت بفكر لو ما اخدتهاش اجيب زيرو حاجه من اتنين سيراتو مانيوال بـ 104 النهارده او اكسنت ار بي بــ 103 ... مع العلم الإتنين مانيوال .

انا امكانياتي اخد الإلنترا المستعمله ... لكن لو هجيب الزيرو سواء سيراتو او ار بي هتبقي العمليه مزنوقه شويه وهضطر استلف جزء من تمنها علشان أجيبها كاش خصوصا ان الواحد داخل علي مشروع جواز يعني مصاريف جامده لا تخفي عليكم

متطلباتي حسب درجه الاهميه من المهم للأقل أهميه

- عربيه قويه واعتماديه وقطع غيارها معمره (مش مهم رخيصه المهم معمره ومتوافره)
- عربيه تكييفها قوي وبيكون تأثيره علي السحب ضعييييف (الأكسيل تكييفها ممتاز بس بيودي السحب عالسرعات القليله في داهيه)
- عاليه عن المطبات وجبال طرقنا الجميله .
- عشفه حنينه وقعدتها مريحه .
- اعتماديه في الجري والشد مش الاقيها من اول مطب ولا حفره بتشخلل مني - خصوصا ان الواحد شاب وساعات بيحب يتعفرت شويه لو علي طريق مفتوح وانا 90% من الوقت بركب العربيه وحيدا .

فما رأيكم دام عزكم ؟ .... اجيب الإلنترا الفبريكه دي علي قد فلوسي وما اخافش من اعتماديتها ولا انها تفتحلي بوقها كل شويه قريب
ولا اضحي بالعروسه مؤقتا والبس هم السلف واركب الزيرو ؟؟

في انتظار نصائحكم الغاليه .

تم نقل الموضوع لقسم المقارنات .
3 ب

[karezzzma]

الزيرو زيرو
150000 كتير اوى على 2008 :)

[EngAhmedSakr]

الزيرو زيرو
150000 كتير اوى على 2008 :)

معاك حق طبعا الزيرو زيرو

بس 35 الف فرق مش شويه برضه خصوصا وان العربيه الإلنترا بكاملها فبريكه .

هل من اراء او نصايح اخري يا جماعه ؟؟؟؟؟

[AHMED_DINAMO]

النترا وحاول تنزل السعر شويه عشان العداد
بعدها لو زيرو يبئا سيراتو بعدها ال rb

[beshomilan]

طب مافى سيراتو دلوقتى بحالات ممتازة وب 85 الف او 90 وموجودين فكل مكان والعداد فحدود 75 الف وفابريكة
وفيه اكسنت ار بى بنفس سعر السيراتو والحاله
وكذلك الالنترا موجود حالات ممتازة بعداد قليل بنفس السعر
سيبك من جارك ومن عربيته وبص لمصلحتك..اى عربيه هتاخدها يبقى تجيب حد فاهم او تكشف فى التوكيل
اى كلا م تانى زى انى عارف العربيه وحافظها معلش اعذرنى دى مش عربيتك يعنى مش متابعها بدقه يعنى لما تكون مش تحت البيت مركونه كذا يوم انت ممكن تفتكر انه مسافر بس الحقيقة انها ممكن تكون عند السمكرى..كلامى صح ولا لا؟؟

[haissam24h]

150 الف كثير قوى والسعر مبالغ فيه
بتاعت صاحبى شاريها ب65 الف والعداد 105 الف
حاول تشوف النترا شكل تانى بس تكون حالتها الميكانيكه تمام وعدادها تمام مش مهم تكون رشه برة ولالا ديه سهله الاهم الميكانيكا بتاعتها تكون تمام التمام عشان مش تقرفك

لكن بالنسبه الاختيارات

فى حدود ال70 ارشحلك الاتى
تويوتا الشكل القديم كاعتماديه وابشن
متيسوبيشى لانسر 2007 و2006 و2008 1600 سى سى
النترا
سيراتو
ار بى
بروتون جن تو او بيروسونا تكون بعد السيراتو

[aymn6666]

لو مستعمل امسك في الالنترا وكفايه انك عارف العربيه ودي حاجه كويسه جدا لان شراء المستعمل مجازفه كبيره لو العربيه مش معروفه
فرق السعر كبير والانترا عربيه محترمه وفيها كل متطلباتك
بنسبع لل150 الف كبلو داخل المدينه لا سفر يعني جارك بيسافر كتير ولا دي مشاوير داخل المدينه
الفرش سهل يتعمله تنظيف كيماوي او بالبخار في مكان محترم يرجه تاني فبريكه مع طقم جلد خلصت
مع طقم جنوط مع شويه اكسسورات حتلاقي عربيه مختلفه
انا انصحك دوس فيها

[Samir Elshahawy]

متطلباتي حسب درجه الاهميه من المهم للأقل أهميه

- عربيه قويه واعتماديه وقطع غيارها معمره (مش مهم رخيصه المهم معمره ومتوافره)
الالنترا 2008


- عربيه تكييفها قوي وبيكون تأثيره علي السحب ضعييييف (الأكسيل تكييفها ممتاز بس بيودي السحب عالسرعات القليله في داهيه)
الألنترا 2008


- عاليه عن المطبات وجبال طرقنا الجميله .
ال 3 عربيات تقريبا نفس الارتفاع


- عشفه حنينه وقعدتها مريحه .
النترا 2008


- اعتماديه في الجري والشد مش الاقيها من اول مطب ولا حفره بتشخلل مني - خصوصا ان الواحد شاب وساعات بيحب يتعفرت شويه لو علي طريق مفتوح وانا 90% من الوقت بركب العربيه وحيدا .

ال 3 عربيات مش بتوع شد و جري و عفرته لكن ممكن تجري بيهم بحساب لحد 140 كم/س

فما رأيكم دام عزكم ؟ .... اجيب الإلنترا الفبريكه دي علي قد فلوسي وما اخافش من اعتماديتها ولا انها تفتحلي بوقها كل شويه قريب
ولا اضحي بالعروسه مؤقتا والبس هم السلف واركب الزيرو ؟؟
لأ هات الالنترا 2008 طبعا و بالنسبة للفرش تعالي عند الحاج أحمد مشعل JENZ CAR و أعمل فرش جلد كامل

[تامر.محمد]

خد الالنترا و لو السعر ما جابش دور على زيها بكيلو متر قليل

دي احسن حاجة ليك

[DEVILRIDER]

النترا ١٥٠٠ كتير جدا انا اعرف واحد جاب ب ال ٧٠ فورد فوكاس ٢٠٠٧ ماشىة ١٠٠ و الله حرام فى الالنترا ماشية كل ده ٧٠ و لو عايز النترا ممكن تجيب بالسعر ده واحدة ماشية من ٨٠ ل ١٠٠ الف او تزود شوية و تجيب سيراتو مستعملة و اوتو كمان و فيها كماليات مش اول فئة و الله شوفت سوبارو امبرىزا ماشية فى حدود ١٠٠ كانت ب ٧٥ اكن الالنترا ديه راىى بلاش و الربى مش حلوة و السىراتو متتجابش غير فئة تانىة او تالتة

[EngAhmedSakr]

النترا وحاول تنزل السعر شويه عشان العداد
بعدها لو زيرو يبئا سيراتو بعدها ال rb

ان شاء الله دا اللي هيحصل ساعه الفحص الشامل والدقيق هحاول اهز السعر شويه لأي غلطه محتمله ممكن الاقيها

طب مافى سيراتو دلوقتى بحالات ممتازة وب 85 الف او 90 وموجودين فكل مكان والعداد فحدود 75 الف وفابريكة
وفيه اكسنت ار بى بنفس سعر السيراتو والحاله
وكذلك الالنترا موجود حالات ممتازة بعداد قليل بنفس السعر
سيبك من جارك ومن عربيته وبص لمصلحتك..اى عربيه هتاخدها يبقى تجيب حد فاهم او تكشف فى التوكيل
اى كلا م تانى زى انى عارف العربيه وحافظها معلش اعذرنى دى مش عربيتك يعنى مش متابعها بدقه يعنى لما تكون مش تحت البيت مركونه كذا يوم انت ممكن تفتكر انه مسافر بس الحقيقة انها ممكن تكون عند السمكرى..كلامى صح ولا لا؟؟

معاك حق طبعا ان فيه حاجات تانيه بعداد قليل
بس الحقيقه العربيع دي فعلا عارفها وكل يوم بعدي عليها .. وموضع انها فبريكه 100% دا متأكد منه جدا .

150 الف كثير قوى والسعر مبالغ فيه
بتاعت صاحبى شاريها ب65 الف والعداد 105 الف
حاول تشوف النترا شكل تانى بس تكون حالتها الميكانيكه تمام وعدادها تمام مش مهم تكون رشه برة ولالا ديه سهله الاهم الميكانيكا بتاعتها تكون تمام التمام عشان مش تقرفك

لكن بالنسبه الاختيارات

فى حدود ال70 ارشحلك الاتى
تويوتا الشكل القديم كاعتماديه وابشن
متيسوبيشى لانسر 2007 و2006 و2008 1600 سى سى
النترا
سيراتو
ار بى
بروتون جن تو او بيروسونا تكون بعد السيراتو

هي ميكانيكتها وكل حاجه فيها كويسه وان شاء الله احاول اهز السعر الف ولا اتنين للعداد الكبير دا

لو مستعمل امسك في الالنترا وكفايه انك عارف العربيه ودي حاجه كويسه جدا لان شراء المستعمل مجازفه كبيره لو العربيه مش معروفه
فرق السعر كبير والانترا عربيه محترمه وفيها كل متطلباتك
بنسبع لل150 الف كبلو داخل المدينه لا سفر يعني جارك بيسافر كتير ولا دي مشاوير داخل المدينه
الفرش سهل يتعمله تنظيف كيماوي او بالبخار في مكان محترم يرجه تاني فبريكه مع طقم جلد خلصت
مع طقم جنوط مع شويه اكسسورات حتلاقي عربيه مختلفه
انا انصحك دوس فيها

ان شاء الله هعمل كدا
هي عدادها كبير لان الراجل شغله اليومي بعيد - وهو كبير في السن وعاقل جدا ومحافظ عالعربيه اوي


----------
بارك الله فيك يا بشمهندس سمير علي الرد التفصيلي وان شاء الله اعمل بالنصيحه واحاول اخلص في الإلنترا

خد الالنترا و لو السعر ما جابش دور على زيها بكيلو متر قليل

دي احسن حاجة ليك

ان شاء الله اخلص فيها
ولو ما حصلش نصيب يبقي القدر بيقولي خليك في الزيرو بقي .... لان بصراحه المستعمل لو مش عارفه علي ايديك اعتقد ممكن يطلع فيه عفريت .

النترا ١٥٠٠ كتير جدا انا اعرف واحد جاب ب ال ٧٠ فورد فوكاس ٢٠٠٧ ماشىة ١٠٠ و الله حرام فى الالنترا ماشية كل ده ٧٠ و لو عايز النترا ممكن تجيب بالسعر ده واحدة ماشية من ٨٠ ل ١٠٠ الف او تزود شوية و تجيب سيراتو مستعملة و اوتو كمان و فيها كماليات مش اول فئة و الله شوفت سوبارو امبرىزا ماشية فى حدود ١٠٠ كانت ب ٧٥ اكن الالنترا ديه راىى بلاش و الربى مش حلوة و السىراتو متتجابش غير فئة تانىة او تالتة

الكلام دا حلو اوي
بس للأسف انا من الزقازيق وحاجه الفوكس او الإمبريزا او حاجه تانيه من الحاجات المحترمه الغير منتشره دي هتتعبني في قطع غيارها وصيانتها ... وزي ما حضرتك شوفت اهم حاجه عندي الإعتماديه وتوافر قطع الغيار


ان شاء الله تعالي افحص العربيه فحص دقيق جدا - واحاول اهز السعر شويه تاني علشان العداد العالي دا
ولو محلش نصيب لاي سبب يبقي اخليني في الزيرو بقي وبلاش مستعمل انا مش عارفه ممكن يتعبني مستقبلا

الف شكر لمشاركات حضراتكم جميعا وربنا يبارك فيكم

[bakkarahmed]

حاول تنزل شويه في سعر الالنترا ..او تشوف واحده تانيه حالتها افضل
علشان 150 الف كيلو كتير علي سنها شويه..ومش هاتاخد كل خيرها

[Mohab.Nabil]

كتير اوى يا باشا 150 الف كده يعنى العربية خلاص متعتها تقريبا راحت و بدأت تنزل خلاص

و معلش اعذرنى فبريكة ماشى بس ما هى ماشية 150 الف فى شوراع معفنة و لازم هيكون ادائها قل ..

انا رأيى تزود كام الف طالما تقدر و تجيبلك سيراتو اوتوماتيك فئة اعلى من كده و خدها اكشف عليها فى التوكيل و ان شاء الله مش هيبقى فيه مشاكل لأن التوكيل بيطلع كل العيوب اللى فيها و حتى بيطلع الحاجات اللى شغالة بس خلاص عمرها بينتهى و بالتوفيق ان شاء الله

[egyptodentist]

مبروك مقدما وربنا يوفقك لما فيه مصلحتك.....
بالنسبة لل rb متستهلش تجيبها زيرو هي مش وحشة ومش حلوة
بالنسبة للسيراتو بردو نفس الكلام بالنسبة للانترا لو كان في منها زيرو بس للاسف مفيش حاليا كنت رشحتهالك المهم 150 اللف كيلو كتير بالنسبة لعربية كوري طبعا انت عايز عربية ليك وللزمن وزي مابتقول داخل علي جواز ربنا يكرمك يعني مش هتفكر تغير في القريب العاجل يعني علي الاقل هتعمل بيها 70-90 اللف كيلو (ان شاء الله ) مافتكرش عربية كوري بعد 200 اللف وهتكون ليسه تمام هوا ممكن بس صعب علي الاقل مساعدين رشاشات (من البنزين الزفت بتاعنا) كبالن بلي عجل وغيره نتيجة الاستهلاك وحتي لو الموتور تمام حاليا مش هيفضل بعد 50 اللف كمان زي ماهوا.......انا راي زي ماقالوا الاخوا الاعضاء المحترمين دور علي اللانترا كيلو قليل و باذن الله تلاقي اللي يريحك

[EngAhmedSakr]

شكرا يا جماعه لكل اللي ردوا .

الحمد لله رب العالمين .. انا اخدت وخلصت الإلنترا المستعمله ومعايا بقالها 5 ايام اهي
انا بعمل يوميا ما يقارب من 60 كيلو فقط
ملاحظاتي خلال الـ 5 ايام دول

1- العربيه سحبها رائع وتأثيره علي التكييف صفــــــــــر
2- لما بتقفل الإزاز العزل ممتاز - والموتور صوته مش مسموع لحد 120 لو ماشي من غير قرص
3- ثبات رائع بالجنوط والكاوتش الإستوك لحد 140 -- ما زودتش عن 160 لأن بمشي علي طرق ما تسمحش بالسرعه دي .
4 - العربيه من غير abs -دي الحاجاه الوحيده اللي مضيقاني - بس فراملها حساسه جدا جدا - ولو ضغط جامد في تهديه مفاجئه بتكلبش وتزحـــــــــــــف في الأرض :(( ... ربنا يسترها ويكفينا شر المواقف المفاجئه .
5- مريحه في الأماكن المكسره وصوت السماعات الأصليه جمييييل والدركسيون الكهربا راااائع .. والعربيه واســـــــــــــــــــعه .

فعلا عربيه جميله - ربنا يبارك فيها وتفضل حلوه كدا وما تطلبش مصاريف :) .

فيه مشكله واحده بس اكتشفتها ... ساعات لما اجي ادور .. بحط المفتاح في الكونتاكت واديها اول وتاني تكه عادي جدا جدا بس لما اجي ادي تالت تكه اللي بتدور فيها ما تدورش وتديني صوت المارش -- اللي هو نفس الصوت اللي بيظهر لما تحاول تدور العربيه وهي اصلا دايره -- بطلع المفتاح و أحاول مره تانيه او تالته وبتدور طبيعي .
ياتري ايه سبب المشكله دي ؟؟ حد يعرف ؟