ساعدوني بالله عليكم بسرعه.. محتار اشتري نوع ايه فيات

[sehsbond]

بسم الله الرحمن الرحيم
السلام عليكم ورحمة الله وبركاته

انا اتمني تساعدوني في سؤالي ده عشان محتار جدا بجد

مش عارف اجيب 127 ولا 128 ولا 132 وافضل موديل لكل عربيه فيهم ايه ؟؟؟؟؟؟؟؟؟؟؟

معروض عليا 128 موديل 97 او 98 تقريبا نوفا ب 22000 وممكن تنزل و 5 جنوط 1600 سي سي سقفها اسود والعربية لونها ابيض وازاز كهرباء وحاجات كتير قالي عليها

و128 معروضه برضه موديل 86 بيقول حاله كويسة ب 15000

و 132 موديل 79 برضه بيقول حاله كويسة 1600 سي سي ب 15000 وممكن تنزل
ولا اجيب 127 ولو جبتها اجيبها افضل موديل ايه وسعرها بيكون كام ؟

وعايز اعرف افضل عربية فيهم ايه مع العلم اني ممكن اسافر بيها بس مش كتير اغلبها جوة البلد وعايز اعرف اللي تبقي ماسكه نفسها علي الارض ومتكونش تكلفني كتير عشان انا داخل علي جواز برضه ومش عايز تكاليف بعد الجواز في الصيانه وكده مع العلم ان حالتي المادية اخرها 15000 و وممكن استلف واخليها 20000 واجيب النوفا لو كويسة بس اخري 20000

ياريت تساعدوني بجد عشان محتاج اجيبها خلال الايام دي عشان ظروف الشغل مسافته بعيده ... بارك الله فيكم

[mohamed_mesho3]

32 يا باشا هى اللى ماسكة نفسها ,, بس بلاعة بنزين , غير كده العربية قوية اوى و لو ايديك فيها انسى انها تسخن زى ال 28 و ال 27 ,, و ال27 افضل من ال 28 كتير بس اضيق منها ,, و ال 32 لو جبتها واقفة على رجلها هتبسطك اوى و تسافر بيها زى ما انت عايز و نصيحة منى لو تقدر تصبر شوية او تعلى المبلغ لحد ال 25 او 27 الف و تجيب ماروتى كسر زيرو هترتاح اوووووووووووى

[S O P H O S]

لو قدامك 127 نظيفة يبقي هي احسن فنظري
بعد تجربة ال 3 عربيات لسنين
والله اعلم ..

[sehsbond]

بارك الله فيكم والله بس بصراحة انتوا حيرتوني اكتر بالنسبة لموضوع الماروتي معتقدش اني هقدر اصبر وبعدين انا سمعت ان الفيات موفرة في قطع غيارها وبنزينها وبالنسبة لموضوع البنزين ف 132 انت قصدك علي 1600 سي سي ولا 2000 ولا هي عموما بتاكل بنزين؟؟؟ وال 127 انضف من ال 128 ف ايه بالظبط وانهي موديل وهل هي ممكن تستحمل سفر ولا لا ؟؟؟ انا احتمال اتفرج علي ال 128 وال 132 انهردة ياريت بجد تساعدوني اخد قرار ولو انتوا مكاني هتعملوا ايه ؟؟؟

شكرا ليكم بجد وشكرا ليك يا sophos وياريت برضه تشارك في الرد علي السؤال ده ربنا يكرمكم يارب

[mazagngi2010]

اكنس كل اللى فات واركب 323

[kempel]

السلام عليكم بخصوص سؤال سعادتك المقارنه هنا ما تنفعشى لان ال132 ،131 فئه اعلى من ال128،127 فطبعاً سعادتك لمل تشترى تشترى يا 132 أو 131 ال132 تجيبها ايطالى او المانى لان فى منها سيات مش هاتعجبك وال132 كانت معايا لمدة 10 سنين بفئتيها مو 76 gls 1600 و مو 80 2000 فطبعاً العربية ممتازه وبتشتغل 80 اوكتين بس تضبط لها الكهرباء واستهلاكها لل1600 حوالى 170 كم فى الصفيحه لل1600 جوه البلد و190 طوالى اطرح منها حوالى 15 كم لل2000 وكنت ساعات بركب لل2000 بيكات اصغرفى الكربراتير لاستهلاك بنزين اقل بص بتاثر على السحب جامد بس نصيحه هاتها حاله نضيفه وعندك كمان الريجاتا 85 الايطالى مو 84،85،86 ممتازه برضو ماتجيبشى التافيل المصرى وهاتبقى فى حدود ال20000 جنيه لكن لو عايز عربيه صغيره يبقى ال127 علشان العلب بتاعتها اللى هى زى الشاسيه اقوى من ال128 وال128 انا شايف حضرتك كاتب 1600 وده مش موتورها فماتجيبهاش لان الماتور ده هايبهدل العلب بتاعة ال128 لان شاسيها ضعيف شويه يارب اكون افدتك والله الموفق

[sehsbond]

الف الف شكر فعلا افدتني طيب معلش كمل جميلك انا دلوقتي معروض عليا ريجاتا علي 16000 بس مش عارف موديل كام
وفي ناس بتقولي دور علي 131 كويسة او بيجو صالون يعني ممكن استلف واكمل علي اللي معايا وتكون مثلا ب 22000 ف ايه رأيك دلوقتي 131 ولا ريجاتا ولا صالون .. طبعا دول علي مافهمت من حضرتك ومن ناس تاني احسن من 128 ولا اجيب مازدا 323 زي ماقال اخويا فوق ولا اعمل ايه بالظبط معلش استحملوني انا مبتدأ ومعرفش اي حاجة ف اي حاجة

[aw2100]

ابعد عن 128 شاسية ضعيف و الريجاتا والأرجينتا قطع غيار قليلة نصيحتى لو مابيهمكش موضوع المنظر اشترى لادا 2105 افضل وعملية وقطع غيار متوفرة او لو عاوز موتور اصغر خليك فى الأونو او الماروتى وكل دول فى حدود 22000 جنية اهم نصيحتين ماتشتريش من تاجر وماتستعجلش فى الشراء والف مبروك مقدما!!!

[sehsbond]

شكرا جدا جزاكم الله خيرا
طيب البيجو 305 ؟؟ ولا الريجاتا ؟؟؟

[S O P H O S]

بص يا باشا هو انا معرفش احتياجاتك ايه
بس واضح انك مش عارف تشتري اني فيهم
وفالحالة دي دايما وانت بتشتري مستعمل خلي قدامك قاعدة اساسية هي وانك تشتري العربية الي حالتها احسن كماتور وعفشة وخلافه مش تشتري العربية الي الناس بتقول انها حلوة وتنسي حالة العربية الي قدامك دي نقطة
تاني شئ لو قدامك 131 نظيفة يبقي خير وبركة عربية جميلة ولما بتبقي نظيفة بتبقي ممتازة ده الي شوفته فعربيتن 131 بصراحة لو عاوز حاجة صغيرة وتعمل بيها كل شئ يبقي 127 تكون حاجة محترمة هتريحك فكل شئ ان شاء الله
لو حضرتك طريقك بسيط وشوارع معقولة فكر بردوا فالماروتي
وبعيدا عن العربية شوف حضرتك محتاج ايه من العربية وابني عليه نوع العربية مش العكس
تحياتي ليك ..

[Egyp]

انا معايا 132 موديل 74

نصيحة أخوية بلاش حاجتها مش موجودة خلاص انا بقالي سنة ونص مش لاقي موتور مساحات يركب في الشاسية بتاعها وماشي من غير مساحات
بلاعة بنزين مع انها 1600
مش لاقي العوامة بتاعة البنزين
حتة فرش الابواب مش لاقي منه استيراد
فال 132 نصيحة مني بلاااااش
هتجيبها وتصرف وتيجي تبيع مش هتجيب حاجة
ابعد عن الفيات لان مفيش غير 128 اللي حاجتها عند البقال
وطبعا ال 128 لاتقارن ب 132 اصلا
لو داخلة ال 132 دماغك هاتها بس تكون محترمة علشان لو فيها حاجة هتشحتك هتشحتك وانت داخل علي جواز
فلو كده شوف حاجة تانية احدث واريح
ممكن بتمن ال 128 تزود شوية وتجيب سويفت ودي قطع غيارها عند البقال وعربية محترمة ومكنة وعفشة وزي ما تقول قول
ولو غالية عليك ممكن تجيب ال 128 ومش هتقول لا بس اهم حاجة الحالة ثم الحالة ثم الحالة

[sehsbond]

الف الف شكر ليك ربنا يكرمك انا قدامي 131 ب 22000 وحالتها كويسة وريجاتا ب 16000 انا دلوقتي بقيت بين الاتنين دول والاتنين ممكن ينزلوا الف تقريبا رأيك ايه ؟؟؟

[aw2100]

بص مفيش وجة للمقارنة 131 طبعا حتى لو ثمنها اغلى شوية حاجتها متوفرة موتور طولى عفشة قوية حتى لو متبهدلة شوية حتعرف تضبطها تمام ومبروك مقدما على الفيات 131 !!

[windofchange]

323 اعتقد حلوة وقطع غيارها متوافرة وبرضه عنده الديهاتسو شاريد الهاتش باك والسيدان لسه شايفها ب12 الف فاعلان عالفيس بوك بس بصراحة معرفش نظام الشديهاتسو شاريد في قطع الغيار ايه...عموما اي عربية نزلت الحرفيين لقيت قطع غيارها تبقي تمام واشتري

[mohamed_mesho3]

طالما المبلغ وصل ل 20000 يبقى توكل على الله فى 323 نظيفة (( قطعة الغيار انسى انها تتغير و 1300 cc و بنزينها استهلاكه كويس جدا ))
تانى حاجة ال 31 طبعا
تالت حاجة ال 32
و شيل ال 28 و ال 27 عشان انت مشوايرك كتير و فيها سفر