محتار بين شيفروليه لانوس 2013 ورينو لوجان2013

[pharamawy]

السلام عليكم انا عاوز اشترى عربية زيرو وبصراحة محتار مابين
شيفروليه لانوس 2013 كاملة مانيوال
رينو لوجان2013 كاملة مانيوال
ياريت الى عنده معلومة ميخبهاش عن ميزة وعيب كل عربية ... وربنا يكرمكم جميعا

[waeel_bdr]

أنا كنت زيك كدة محتار بين العربيتان بس جبت لانوس 2013 زيرو وهي عاملة معايا 5000كيلو لحد دلوقتي وكويسة جدا وناعمة علي الطريق ومرتاح فية واللي خلانا أجيب اللانوس عشان قطع غيارة متوفرة وسعرها كويس وهتلاقي كل حاجته وكمان اللانوس الجديدة الزجاج الخلفي والجانبي فامية والاريال مدمج مع الزجاج الخلفي ومعاها جهاز انذار وريموت للعربية بردة وربنا يوفقك في أختيارك

[pharamawy]

waeel_bdr
شكرا ياباشا على الافادة وياريت مشاركة من باقى الاعضاء لأفادة اكثر.... يعنى الى معاه لوجان يقولى ايه رايه فيها بصراحة

[lenasam]

اعتقد انى اللوجان ممتازة لأنى جربتها كتير مع اصحابي و ارشحها لحضرتك بقوة ، و الله اعلم

[S O P H O S]

لولا التوكيل السئ
لكنت رشحت ليك الجين 2 مانيوال وبقوة
لكن ليس كل ما يتمناه .....

[pharamawy]

S o p h o s
اخى الحبيب الفلوس ال معايا الحمد لله يدوب فى حدود 73000 يعنى يدوب تجيب حاجة زى الى انا محتار مابينهم

[Mohab.Nabil]

اللوجان احسن كعربية

بس اللانوس صيانتها اسهل و قطع غيارها ارخص

[S O P H O S]

تمام يبقي لوجان اقرب وعلشان الايرباج
والله اعلم ..

[Mohyeldin1974]

فى اخ فى المنتدى معاه لوجان حديثه من اربع شهور فقط مسافر وممكن يبعها
دور فى المنتدى على الموضوع لو مناسبه يبقى انت كسبت عربيه تقريبا زيرو ووفرت فلوس وفى الحاله دى المقارنه ملهاش لزوم لو الفرصه متتعوضتش

[pharamawy]

شكرا يا شباب على تفاعلكم مع استفسارى ..... ربنا يكرمكم جميعا
سؤال تانى اى واحدة فيهم فى البيع بعد كدة احسن ؟؟؟ يعنى ال هى متخسرش كتير عند بيعها بعد فترة محدش ضامن الظروف

[S O P H O S]

انا شايف ان فالبيع متقاربين
مع تفوق لانوس اكتر
والله اعلم ..

[Mohab.Nabil]

شكرا يا شباب على تفاعلكم مع استفسارى ..... ربنا يكرمكم جميعا
سؤال تانى اى واحدة فيهم فى البيع بعد كدة احسن ؟؟؟ يعنى ال هى متخسرش كتير عند بيعها بعد فترة محدش ضامن الظروف

لانوس طبعا

حرام تقارن اى عربية باللانوس و الفيرنا فى اسعار قطع الغيار و سعر اعادة البيع ، دول حالة خاصة فى السوق المصرى

[rodi007]

لو حضرتك بتدور علي عربية تبيعها و متخسرش فيها كتير او بتدور علي عربية قطع غيارها اسعارها قريبة يبقي انت عليك و علي اللانوس او الفيرنا....
لكن او بتدور علي عربية محترمة عالية و ثابتة في نفس الوقت..قطع غيارها مش غالية للدرجة دي بخلاف انها معمرة و حتحس و انت قاعد فيها انها عربية قيمتها عالية و فيها ايرباج و موتور قوي يبقي اللوجان يا باشا

انا معايا لوجان اوتوماتيك و سقت اللانوس و الفيرنا و الافيو... بصراحة برقبتهم مع الاحترام للسادة ملكيهم بس بالنسبة لي انا حسيت اني راكب عربية محترمة فعلا...

يكفى ان العربية دي لولا اتفاقية اغادير اللي خلت سعر العربية دي بالشكل ده كانت وصلت لحوالي 100 الف جنيه فى سيارة اوروبي بس تقفيل مغربي ... بالاضافة الى ان التوكيل سمعته اكيد افضل كتيييييييييييييييييييييير من سمعة توكيل الشيفورليه او الهيونداي..

و الامر لكل فى الاختيار و ربنا يوفقك

و قبل كل حاجة حاول تشوف حد معاه العربية و تركب معاه و اكيد حتحس بالفرق

[waeel_bdr]

لانوس طبعا سهلة في بيعها ولية سوق كبير

[amrelsha3er]

لوجان ياريس
لانوس وفيرنا ايه بس هو لسه فى حد بيشترى لانوس وفيرنا دول حرام 72الف ولا 74الف عربيه مفهاش اى حاجه ولا وسائل امان ولا ثبات وموتور1500 وعفشتها بتروح فى داهيه على طول وتشخلل سيبك من موضوع توافر قطع الغيار انا كنت كل شويه اغير تيل اى نعم رخص ب90 وب120ج بس بيتغير كل شويه انا عندى تجيب تيل ب400ج وتنسه احسن ليك
لوجان وتوكل على الله مع ان اختلافى الوحيد عليها شكلها الخارجى لو انت مش فارق معاك توكل على الله كفايه انها مواصفات اوروبى وحاجه كمان اللانوس بعد مامنصور خدها بقت اى كلام