ارجو المساعدة ، سيارة فى حدود 11 الف جنيه

[maaheer]

انا معاى 11 الف جنية على قدى

وانا طالب مساعدة منكم

نزلت سوق مدينة نصر امبارح والجمعة اللى قبلها والجمعة اللى قبلها بردة

تمام

استقر فى نفسى

ان ال11 الف مش هيجيبوا حاجة الا واحدة من اتنين يا اما بيجو 305 او ريتمو من 79 الا 84 حسب الحالة

وكلهم رشين دواخل ما عادا البيجو 305 فبريكة جوة بس عاوز حبة مصاريف

يعنى كوبلن شمال وبربريز قدام وكسوة للصالون وترخيص فى شهر 2 /2113 ومفيهاش كماليان ولا سنتر ولا زجاج كهربا ولا كاسيت كدة يعنى موديل 80

الريتمو نفس الحكاية بردو عربية على قد فلوشها فى الكماليات


اجيب ايه

ولو فى نوع تانى كويس فى حدود المبلغ ده ياريت الافادة

اه قبل ما انسى

موضوع شاسية الريتمو اللى بيشرخ على طول ده مالوش حل

والشداد بين اكرتيرتين دا فعال ولا اونطة

ثانيا انا عاوز من احبائى المقارنة من ناحية قطع الغيار واستهلاك البنزين

وسهولة القيادة والثبات مع الترشيح فى اجيب ايه

تم تعديل عنوان الموضوع ليكون اكتر دلالة على محتواه

مشرف 2 ب
2\12\2012
17:30

[Mohamed Amr]

للاسف المبلغ ده قليل
لو جيت عربيه تعبانه حتكرهك في العربيات
و حتصرف عليها اد تمنها

[mado83]

لو ال305 حالتها سليمه توكل فيها احسن من الريتمو 100 مره

[maaheer]

طيب وقط الغيار

اوصفلك ال305 بالضبط

اللون بيج

مش رشة دواخل لكن مكشفة من الحوض والشنطة

الصالون فيه كسوة وتقريبا الفرش بتاعها متهان يعنى عاوزة كسوة

الدهان الخارجى معقول ممكن ترخص على كدة

الماتور استيراد مثبوت على الرخصة

البطارية جديدة

فحص 2014

الكاوتش يعنى الى حد ما 2 تيوبلس و2 بالون يمشى كمان سنة ولا حاجة

طبعا زى ما قلت ولا كاسيت ولا زجاج كهرباء ولاى رفاهيات

الزجاج الامامى مشروخ ولازم يتغير عشان الترخيص فى 2 2013

الكوبلن الشمال بيطقطق فى الملفات

صاحبها بيكلم فى 11500

ايه رايكم

[maaheer]

انا بقول ان الريتمو فى الشكل احسن وقطع الغيار متاحة للجميع

وبعدين فيات يعنى اى حاجة تركب على اى حاجة

انا بشوف ناس مركبين ابواب ريجاتا ومكنة 1500 cc والضريبة ارخص ولا ايه

[maaheer]

طب ايه رايكم فى دى

[url=http://www.msrcar.com/car-99698/بيجو-305-لقطه.html]

[maaheer]

ودى ممكن المقارنة بقى

http://www.msrcar.com/car-99722/ريتمو82-للبيع-لقطة-بجد-اوي.html

[egyptiandiver]

و الله يا أستاذ ماهر أنا رأيي وفر فلوسك أحسن هتشتري عربية بالمبلغ إلي معك و هي هيكل مصدي... مهما أي حد فينا يقول عربية مشية أقل شئ من 30 -40 سنة أي حد هيستنة منها إيه بظبط هي بالعربي مهما البايع حول يجمل فيها لكن هتجيب عربية و كل شوية من مكانيكي لكهربئي لبهيجي لسمكر لواحد يعالج البروووومة إلي سرحة في العربية من الاخر هتشتري قطع غيار و تكع في مصنعية و يا صابت يا بختك .... هتصرف من الاخر أد إلي دفعتو في العربية و برد مش هتلاقي فلوسك أوي أمي teegi تابع ده غير المواقف البايخة إلي غالباً هتتحت فيها في أي وقت ما العربية عمرها الإفتراضي إنتهى بقلها 20 سنة ... أنا بكلمك ذي أخوية و الله و أنا كان عند 131 و في الاخر طلعت روح إلي جابوني تصلح دي تضرب دي ... تعدل دي تتعوج التانية ... رأيي مشي حالك بمواصلات دلوقت و أدي فلوسك بتكتر و تحوش و ربنا يكرمنا و يكرمك - أخوك أحمد سامي

[hugan]

لو مصمم قوي علي العربيه في الوقت الحالي
خليك في ال27
افضل من الريتمو
اللي تقريبا انتهت من الشارع
حوض و شاسيه ال 27 افضل من الريتمو وال 28
ومنتشره وقطع غايارها متوفره بكثره استيراد وجديد
ربنا يكرمك بعد كده وغير براحتك

[maaheer]

الف شكر يا جماعة والله مش عارف اقول لكم ايه

ربنا يبارك فيكم

[S O P H O S]

لو لقيت 127 نظيفة
يبقي افضل من كل ده فراي فقط ليس الا ..

[eng_elkhashen]

125 عربيه كبيره