عربية في حدود 200-260 في ظل ارتفاع الاسعار و البنزين

[Mezox]

أنا بقالي فترة طويلة بقول عاوز اجيب عربية جديده و كنت في الأول عاوز عربية في حدود 150-180 بالكتير بس قولت استني شوية لحد مايتوفر مبلغ اكبر ( و ياريتني ما استنيت ) و اجيب حاجات أحسن , خاصة إني مش بغير كتير

أنا في الأول كنت حاجيب ال ford mondeo , عربية ممتازه و كانت حتبقي ب 160 بس منوال , فقولت اصبر شوية و اجيب حاجة في نفس الفئة بس اوتوماتيك زي ال 508

طبعا ال 95 غلي و بقي ب 5.85 , و توكيل Peugeot المهندس هناك بنفسه قالي زمان قبل ما ال 95 يغلي إن في عملاء حطوا 92 و العربية حصل فيها مشاكل و حكايات و روايات ... خلاصة الموضوع لازم بنزين 95 , و سبحان الله بعد ما البنزين غلي الاقي وجيه اباظة منزل إعلان بطول الصفحة في جورنال السيارات إن ال 508 تعمل بال 92 بدون مشاكل ؟؟!!
طبعا أنا عايز عربية تعيش معايا علي الأقل 8 أو 10 سنين , و عاوز احافظ علي الموتور فمحدش يحاول يقنعني إن ال 508 حتشتغل بال 92 بدون مشاكل لمدة 10 سنين قدام

دلوقتي ال عربيات غليت بطريقة فظيعة

حاجة زي الفانتازيا ب 205 ال basic !! و الخليجي ب 215 لحد 225 بعد ما كانت ب 168 و 186 و مع إنها عربية ممتازه بس مستحيل اشتريها بالسعر ده و افضل طول ما أنا راكبها محروق دمي علي 40 ألف دفعهم زيادة في سعرها

أنا محتاج عربية كراسيها كبيرة و صالونها واسع , لإن حجمي كبير وزني 160 و طولي مترين . و كمان لازم تكون بتشتغل ب بنزين 92 بدون مشاكل , و تكون اعتماديتها عالية و اعطالها قليلة

رايكم في إيه ممكن يتجاب ؟؟

أنا عجبني ال B-class مع إني لسه ماركبـتهاش لكن خايف من الفتيس بتاعها لانه dual clutch

و في ال bmw ال 316i سعرها دلوقتي وصل ل 287 لكن فتيسها برده غريب و 8 سرعة و معرفش هل حيسبب مشاكل ولا لأ , زاد إن الموتور متربن بس التوكيل بيقوللي 92 مناسب للعربية

ياريت اراكم يا جماعة في إيه ممكن يتجاب في حدود ميزانيتي أو ازيد حاجات بسيطه

[Mezox]

منتظر ردودكم يا شباب

[omar-saad]

انتا ماقدمكش غير ال316
عربية جميلة تيربو وبتشتغل ب 92 بدون اى مشاكل
وفتيس 8 سرعات مش زى الdsg
دة غير انك راكب عربية محترمة
فيها كل اللى تتمناه

[Formulator]

للعلم:

- فتيس الـB200 فعلا ديوال-كلتش.. 7G-DCT، بس dual Wet-clutch
مش dual dry-clutch زى الفولكس DSG والفورد PowerShift والألفاروميو TCT؟!!

- وبردو: فتيس الـZF 8-speed بتاع البيمر.. أقل ما يقال عنه راااااااااائع بالنسبة لفتيس أوتو بـTorque-converter؟!!
والـ8 نقلات دى عشان توفير البنزين، من غير compromise للتسارع!

عن تجربة فـ 118i بتاعة واحد قريبى:
العربية بتجيب 200 كم/س عـ الـ6th، والتوب-سبيد بتاع العربية ممكن تقفله عـ الـ7th؟؟!!!
الـ8th ده مجرد Overdrive جير لتوفير البنزين فـ الـhigh-speed cruising؟!!

طبعا الـ116i الأداء هيبقى أقل شوية، والـ316i هيبقل أقل كمان عشان الوزن!

بالنسبة للمواتير وبنزين 92:
- طالما مواتير الـN13/N18 بتاع الـBMW/Mini بيشتغل 92 (مع فقد فـ جزء من القدرة وزيادة بسيطة فـ إستهلاك الوقود)..
يبقى موتور البيجو 1.6 THP يشتغل بردو 92... لسبب بسيط جدا:
- انهم نفس الموتور prince 1.6T إنتاج مشترك مابين PSA-BMW/Mini (مع فرق وضعية الطلمبة وفلتر الزيت فـ البيمر عشان دفع خلفى -الموتور بالطول)!!

بالتوفيق فـ الإختيار ان-شاء الله،

[gebreel]

ال316i الاخيرة سعرها للاسف وصل 299 الnon-....llic بس عربية رائعة و سحبها حلو و شغالة ب92 عادي جدا و دي انا مكنتش مصدقها لأنها twin turbo و مكنتش مقتنع ان اي عربية تربو تشتغل ب92 لحد ما جربت بنفسي

و الفتيس ال8 سرعات بتاع الBMW اللي في 316 ممتاز

[AlGazar2]

فى الملبغ ده عشان تحافظ على العربيه لازم 95

بس البى ام 316i الجديده طبعا حلوه جدا - بى ام يعنى و بتمشى ب 92 بس ال 95 هيبقى احسن طبعا

البيجو و السيتروين طبعا زى البى ام لازم 95 بس ال 92 يمشيهم مع فقد جزء من طاقه المحرك لانهم زى ما فورميلاتور وضح نفس الموتور

فى سعر 260 بصراحه مفيش عربيه زى السيتروين ds5 عربيه لو ركبتها و معاك تمنها لازم تشتريها خصوصا لو مش بتبدل عربيات كتير اقل ما يقال عنها انها عربيه بمقصوره طياره

انا وزنى زيك كده و جسم طول بعرض و ركبتها فى معرض اوتوماك الى فات عربيه واسعه جدا بالنسبالى و فى مكان للى ورايا كمان و كراسى مريحة غير معظم العربيات الى ركبتها فى المعرض كان لازم يبقى فى حاجة غلط فى القعده الا فى العربيه دى و خاماتها الداخليه احسن من البى ام 116 و العربيه اوسع بس عيبها ان موتورها تيربو اخو بتاع البيجو بالظبط و هو نفس موتور البى ام

بس اكيد الموضوع بتاع البنزين ده ليه حل و كل الاعضاء منتظراه من فورميلاتور

[maskeen]

طيب ليه ماتفكرش ف مستعمل؟

250 الف دول يجيبولك بى ام 525 موديل 2007 حاله ممتازه كيلو متر قليل
عربيه بحر من جوه وبنزين 92 وبرستيج وكله

[AlGazar2]

طيب ليه ماتفكرش ف مستعمل؟

250 الف دول يجيبولك بى ام 525 موديل 2007 حاله ممتازه كيلو متر قليل
عربيه بحر من جوه وبنزين 92 وبرستيج وكله

خلى بالك ان ال 525 موتور كبير انا مش عارف 2000 ولا 2500 فى الحالتين مصاريف ترخيص كبيره - استهلاك بنزين انا عارف انه هيبقى اقل من ال 1600 الى معايا بتعمل 7 لتر فى ال 100 كيلو تقريبا فى السريع - بس دلوقتى و حوارات رفع الدعم عن البنزين للسعات اللتريه الكبيره فالعربيه الى 2000 سى سى دلوقتى بربع مليون بعد رفع الدعم ممكن تبقى ب 200 او 150 لو العربيه مطلوبه لو مش مطلوبه هيبقى سعرها واقع عن كده كمان

[Mezox]

شكرا لردودكم جميعا يا شباب , دلوقتي أنا ركبت ال s60 ب 278 الصراحة اتوهمت , العربية فخمة جدا من جوه , و هي ميزة علي ال 316 اللي تعتبر فقيرة نسبيا من جوه مقارنة بال 320 و ال s60 , إيه رايكم في العربية من ناحية الاعتمادية و الفتيس و اهم حاجة البنزين

[Batman372]

شكرا لردودكم جميعا يا شباب , دلوقتي أنا ركبت ال s60 ب 278 الصراحة اتوهمت , العربية فخمة جدا من جوه , و هي ميزة علي ال 316 اللي تعتبر فقيرة نسبيا من جوه مقارنة بال 320 و ال s60 , إيه رايكم في العربية من ناحية الاعتمادية و الفتيس و اهم حاجة البنزين

لا خلاف ان ال s60 تنافس ال 316 ....
و لكن يعيبها توكيلها و كذلك لو يهمك القيمه فأعاده البيع بها خساره كبيره لعدم الاقبال عليها ... لو مش فارق مع حضرتك هى فعلا عربيه من الاخر ...
تحياتى ...

[AlGazar2]

طبعا الفولفو لا يعلى عليها ثبات و امان بس فعلا توكيلها ملوش مراكز صيانه كتير ( معاملته مع فولفو و سيتروين غير بروتون خالص )

طبعا خسارتها فى اعاده البيع بتبقى كبيره جدا جدا بس التوكيل ممكن ياخدها منك لو هاتبدل اول سنتين تلاته مثلا بتبقى بنسبه لكل سنه

طبعا العربيه من جوه وهميه و حلوه جدا جدا لو عاجباك و مش هتبيع يبقى توكل على الله

و فى الغالب العربيه لازم بنزين 95 برضه لانها تربو

[Batman372]

طبعا الفولفو لا يعلى عليها ثبات و امان بس فعلا توكيلها ملوش مراكز صيانه كتير ( معاملته مع فولفو و سيتروين غير بروتون خالص ) طبعا خسارتها فى اعاده البيع بتبقى كبيره جدا جدا بس التوكيل ممكن ياخدها منك لو هاتبدل اول سنتين تلاته مثلا بتبقى بنسبه لكل سنه
طبعا العربيه من جوه وهميه و حلوه جدا جدا لو عاجباك و مش هتبيع يبقى توكل على الله و فى الغالب العربيه لازم بنزين 95 برضه لانها تربو

+++111
التوكيل بيقول انه حيخصم 10% سنويا عند التبديل و دى سياسه بيعيه لان ليس عليها اى اقبال ولا مبيعات مقارنه باى بى-ام او مرسيدس ... حتى اودى اكتر مبيعات منها ... و لكنهم لا ينفذوا وعودهم تحججا بحاله سوق الاستعمال ...
صديق لى وقع فى هذا الفخ و الكلام الجميل و بعد سنتين ... ثمنوها له بتقريبا 40% اقل من سعرها الزيرو و الموديل الجديد الى كان داخل فيه زودوا سعره 20 الف عن ما كان عليه !!!
تحياتى ...

[zangry]

ال ٣١٦ افضل من ال s60 كفاية الدفع الخلفي !

[Mezox]

البيت عندي شكله مستريح اكثر للعربيات ال MPV و ال SUV , هما من الآخر عاوزين عربية عالية عن الأرض و إحساس ال 4x4 الوهمي , شفت ال 3008 , , عربية ممتازه و موتور محترم جدا لكن للاسف بسبب حجمي وضع كرسي السائق مش حيسمح لحد يركب ورايا اطلاقا , ال 5008 اوسع بكتير في الكنبة طبعا لكن كرسي السائق مش مريح بالنسبالي اطلاقا بسبب وضعية الفتيس

القاشقأي ممتازه ايضا لكن كراسيها ضيقة بالنسبالي و نفس مشكلة الكنبة الخلفية

ال subaru XV الكنبة اوسع لكن كرسي السائق برده ضيق و غير مريح , زائد حجم الشنطه غير مناسب لاحتياجاتي


بعد معاناة و لف طويل و تأنيب ضمير , للاسف للاسف للاسف , شكلي حجيب السبورتج ال highline ب 250 ألف , لانها أكتر عربية البيت عندي مستريحلها و صالونها واسع وضمان 5 سينين و توكيل سمعته جيده نسبيا

هو كتير عليها طبعا , و أنا ضد مبدأ ال overprice , بس الحجز دلوقتي في التوكيل سعرها 236 و استلام بعد 6 أو 7 شهور مع عدم تثبيت السعر , و في ظل الظروف السوقية محدش ضامن سعرها حيوصل كام في الكام شهر دول

إيه رايكم يا شباب :(

[Falcon.Crest]

البيت عندي شكله مستريح اكثر للعربيات ال MPV و ال SUV
إيه رايكم يا شباب :(

ليه مش فكرت في التيجوان عربيه عاليه 20 سم clearance
dsg بس دراي مش wet
المشكله انها لازم ron 95