رينو ميجان2 و مازدا 3 و اوكتافيا a4

[FAR!D]

مطلوب يا شباب مقارنه بين رينو ميجان2 و مازدا 3 و اوكتافيا a4 من كل الاوجه من حيث التسارع والاداء و الثبات و الرفاهيه و الاعتماديه و قطع الغيار و اسعارها و مدى توافرها و سعر اعاده البيع

[FAR!D]

32 مشاهده بلا اي رأي؟؟؟؟

[S O P H O S]

لو هختار هيبقي مازدا
ده بعيدا عن اسعار قطع الغيار

[Batman372]

كسياره بصفه عامه المازدا 3 ايرو من 2007 .... لكن يعيبها غلو و ندره قطع الغيار ...
كأفضل اعاده بيع ال a4 ...

تحياتى ...

[تامر.محمد]

هممم , هاقول لك اللي اعرفه بس نقلا عن تجارب الناس , انا مالك للميجان و سقت المازدا مرة و ركبت الa4 مرة
و الكلام هنا عن الa4 لأن الa5 و الفانتازيا مختلفين

التسارع : المازدا - (الميجان و الاوكتافيا مش عارف مين فيهم تسارعه احسن)
والاداء : مش عارف تقصد ايه بالاداء
الثبات : اللي اعرفه ان التلاتة كويسين
الرفاهيه : الميجان بفرق ملحوظ - المازدا - الاوكتافيا فقيرة جدا
الاتساع : الميجان بفرق ملحوظ ثم الاوكتافيا ثم المازدا ضيقة جدا
الكماليات : الميجان , ثم المازدا ثم الاوكتافيا فقيرة جدا
و الاعتماديه : الاوكتافيا - (مش عارف الميجان ولا المازدا اكتر بس اظن المازدا)
و قطع الغيار :
اسعارها : مش عارف الميجان ولا الاوكتافيا ارخص بس اظن الميجان , المازدا اغلى من الميجان بفرق ملحوظ
و مدى توافرها : الاوكتافيا اظن متوفرة , و الميجان برده بس في اماكن معينة استيراد , و في محلات معينة جديد , و في التوكيل موجودة , المازدا مش عارف
و سعر اعاده البيع : الاوكتافيا تكسب , الميجان و المازدا مش قد كده الاتنين

انا لما اتحطيت في المقارنة دي نفسها (مع عربيات تانية كمان) اخترت الميجان , و عموما كل واحد بيختار طبقا للي بيناسبه
استبعدت الاوكتافيا لأنها فقيرة جدا من حيث الفخامة و الكماليات , و استبعدت المازدا لأنها ضيقة جدا و قطع غيارها نااااااااار بالمقارنة بالميجان

[FAR!D]

شكرا ليكم يا شباب كلكم و للاستاذ تامر بالاخص الف شكر هيا فعلا الميجان خلاص حتفرتك دماغي بس خوفي الوحيد منها الاعطال و خصوصا انا بشتغل ظابط جيش و بسافر علطول مسافات كتيره و اكيد حركنها في الصحرا جنبي فاياتري يا تامر حتسد معايا الميجان و لا انت رأيك ايه؟ ( انا قصدت تامر عشان هوا معاه العربيه بس لكن الاحترام للشباب كله طبعا)

[تامر.محمد]

شكرا ليكم يا شباب كلكم و للاستاذ تامر بالاخص الف شكر هيا فعلا الميجان خلاص حتفرتك دماغي بس خوفي الوحيد منها الاعطال و خصوصا انا بشتغل ظابط جيش و بسافر علطول مسافات كتيره و اكيد حركنها في الصحرا جنبي فاياتري يا تامر حتسد معايا الميجان و لا انت رأيك ايه؟ ( انا قصدت تامر عشان هوا معاه العربيه بس لكن الاحترام للشباب كله طبعا)

هممم , طب هاقول لك اللي اعرفه بالظبط

انا مالك لميجان موديل 2010 بقى لي سنة و 3 شهور , عملت فيهم 30 الف كيلو , من 20 لـ50 الف
اعطال جوهرية , لحد دلوقت الحمد لله مافيش , مرة واحدة كادت انها تقف يوم ما البطارية خلصت , و لحقت غيرتها
سفر , قليل جدا, تقريبا رحت بيها مرة واحدة (القاهرة -اسكندرية -العجمي - مارينا - القاهرة) في يوم واحد صد رد
بعض الزملا سافروا بيها شرم عادي (حد كان بيتكلم ان الفتيس ممكن يسخن لو مشيت بيها فوق ال170 لفترة طويلة و حلها انك تنزل بالسرعة لحد 100 ساعتها)
الزميل hegazio بيقول انه سافر بيها من جدة تقريبا لمصر في one shot

السفر في حد ذاته مش مشكلة في العربية , المشكلة هي لو لا قدر الله عملتها و وقفت و الواحد مسافر
مش هاقول ان ده ما بيحصلش, بعض الزملا حصلت معاهم و بعضهم لأ
اظن كلمة السر الصيانة و طبعا الحالة
اللي حالتها كويسة و متصينة كويس بتعطل كل فين و فين زي اي عربية
و اللي مش بتتصين و حالتها وحشة اكيد بتعطل كتير , و ده عيب باين شوية في الميجان طبقا لكلام الزملا , هي مش زي العربيات اللي تطنشها و ما تصينهاش و تفضل ماشية عادي , معروف عنها انها كعربية لو هنتها بتهينك و بتكرهم في العربيات كلها

يعني باختصار لو جبتها بحالة محترمة و احترمتها في الصيانات , هاتسد معاك كويس جدا و اعطالها هاتبقى زيها زي اي عربية تانية

احد عيوبها كمان ان فيها حاجات مش اي حد يشتغل فيها , خصوصا كهربتها , انما العفشة مثلا عادي جدا
فيها قطع غيار مش هتلاقيها غير عند حد بتاع رينو , مش هاتدخل اي محل قطع غيار تقول له عايز كذا

تسارعها مش قد كده , لما سقت المازدا3 (الشكل قبل الحالي) حسيت بفرق تسارع ملحوظ , بس برده حسيت بفرق احساسي بالمساحة الداخلية و تصميم و خامات التابلوه

التكييف مش قوي , يعني ممكن نقول انه متوسط , بياخد وقت شوية على ما يسقع الكابينة بس شغال يعني , الناس بحثت في حلول للقصة دي و حسنت اداء التكييف شوية فعلا , لكنه مازال مش بجودة تكييف الياباني و الكوري

كهربا غلسة شوية , يعني عشان تغير الكاسيت ابو سيديهات mp3 و مافيهوش aux ولا usb و مش عايز تفقد المالتي فانكشن لازم له وصلة غالية شوية , عشان تركب لها انذار على الريموت بتاعها غالي جدا سواء في التوكيل او برة (معدي الالف جنيه) , نقطة الانذار اتحلت جزئيا بتركيب انذار هاند فري (بيفتح العربية لوحده لما تقرب منها و بيقفلها لوحده لما تبعد عنها و بالتالي ما بتحسش بيه)

قطع الغيار مش رخيصة في التوكيل , ممكن نقول انها في التوكيل مقاربة لقطع غيار الكوري الجديد مثلا (و معقولة اوي برة كاستيراد بالذات , او كقطع غيار مش اصلية)

بالنسبة للمميزات ,
فالزملا ملاكها اكبر مشكلة عندهم انهم ما بيعرفوش يركبوا بعدها حاجة بسهولة , يعني الزملا اللي اعرفهم كملاك سابقين للميجان , واحد جاب 320 و واحد جاب فلوينس و واحد جاب نيسان جوك , و ان كنت اظن ان الموديلات اللي نزلت جديد في 2013 اعلى منها في العموم
العربية عموما مصممة كعربية عائلية مريحة و آمنة , عزل صوت داخلي كويس جدا , , عفشة مريحة بنسبة كبيرة , ثبات كويس , كماليات كتير , عوامل أمان (Standard : ABS, EBD , 6 air bags) , فرامل قوية
استهلاك بنزين مش عالي (بتعمل معايا 200 كيلو في الصفيحة , دائري على جوة البلد و انا حتى سواقتي عنيفة شوية)
الايموبيلايز اللي فيها ما بيخليكش قلقان عليها من السرقة اوي , يعني اللي عايز يسرقها لازم يشيلها بونش او يسرق منك كارت التشغيل , مالهاش مفتاح اصلا عشان يتعمل عليه
تعامل العربية معاك ذكي شوية (بس ده في كل العربيات الجديدة دلوقت تقريبا) , و الكاسيت رغم انه عقيم في المصادر ال ان صوته نقي

انا باختصار لما اتحطيت في الحسبة دي اخترت الميجان لأنها مناسبة لاحتياجاتي خصوصا اني من سكان القاهرة , و مش فارق معايا تسارع العربية للدرجة , و عندي القابلية ان ايدي تبقى فيها على طول و لو عارف ان الميكانيكي الكويس في الحتة الفلانية اروح له و اداوم على الصيانات
وقتها استبعدت المازدا3 عشان خفت من اسعار قطع الغيار , و استبعدت الA4 لأني لما ركبتها حسيت انها فقيرة من ناحية الخامات و الكماليات و الاتنين مش واسعين و انا طويل شوية و النقطة دي فارقة معايا

بالتوفيق ان شاء الله

[FAR!D]

بص يا تامر انت كده بعد ماخلاص تقريبا استقريت بدأت اشغل مخي تاني يعني كل اللي انت قولته كويس بس معلش استحملني العربيه ايدي و رجلي فوووووووق ماتتصور و اكتر من اي حد يعني انا ساكن في اسكندريه و شغلى في اسماعيليه و بضطر اخد اسكندريه - مصر - اسماعيليه تخيل كده حوالي 400 كم المشوار الواحد يعني كل اسبوع 800كم رقم ماهول صح؟؟هههههه و مشكلتي انا بجري و بسقط نقلات و الطريق حلو و يساعد على الجري و معايا نوبيرا اروبي 2 كامه وبسم الله ماشاء الله جرايه وثبات حلو بردوا..... من الاخر انا عايز ده في الميجان و ضيف عليهم عايز احس بالراحه و الرفاهيه بعد الدايو و انت فاهم الدايو الاقى ولا؟ معلش يا تامر حنرغي كتير مع بعض بس استحمل مادام رديت ههههههه

[FAR!D]

ايه يا اخوانا 92 مشاهده و مفيش حد نصحني بحاجه غير أ/تامر؟؟؟

[تامر.محمد]

بص يا تامر انت كده بعد ماخلاص تقريبا استقريت بدأت اشغل مخي تاني يعني كل اللي انت قولته كويس بس معلش استحملني العربيه ايدي و رجلي فوووووووق ماتتصور و اكتر من اي حد يعني انا ساكن في اسكندريه و شغلى في اسماعيليه و بضطر اخد اسكندريه - مصر - اسماعيليه تخيل كده حوالي 400 كم المشوار الواحد يعني كل اسبوع 800كم رقم ماهول صح؟؟هههههه و مشكلتي انا بجري و بسقط نقلات و الطريق حلو و يساعد على الجري و معايا نوبيرا اروبي 2 كامه وبسم الله ماشاء الله جرايه وثبات حلو بردوا..... من الاخر انا عايز ده في الميجان و ضيف عليهم عايز احس بالراحه و الرفاهيه بعد الدايو و انت فاهم الدايو الاقى ولا؟ معلش يا تامر حنرغي كتير مع بعض بس استحمل مادام رديت ههههههه

الميجان في الثبات و التوب سبيد كويسة جدا
بس مش عارف بصراحة تسارعها فين من تسارع النوبيرا , اظن النوبيرا افضل بس مش متأكد , عموما الميجان مش من العربيات المعروفة بتسارعها
اما الرفاهية و الراحة فموجودين و ما يتقارنوش ببتوع الدايو خالص (عربيتي السابقة لانوس)

بالنسبة لحتة 800 كيلو في الاسبوع يعني تقريبا 3000 كيلو في الشهر
بالنسبة لي انا باعمل 2000 كيلو في الشهر ما بين جوة البلد و الدائري اللي بقى كأنه جوة البلد
مش الفرق المهول عن اللي انا بامشيه

بس في نفس الوقت , ظروفك دي بتخلي الامانة تدفعني اني اقول لك ان الافضل ليك عربية معروف انها ما بتعطلش (كورولا مثلا) , عشان على اقل تقدير يوم ما تعطل هاتبقى من جواك عارف انها حاجة عابرة , انما مع عربية زي الميجان سمعتها مش قد كده في الحتة دي لحظة ما تقف هاتتضايق منها حتى لو وقفت مثلا مرة كل سنة

مش عارف بالظبط , بس لو انا مكانك هاتبقى احتياجاتي في الالنترا md
او اتنازل شوية في التسارعو تبقى الa5
او اتنازل شوية عن الراحة و تبقى السيراتو , و ان كنت لا انصح بيها بسبب حوادثها الكتير

[FAR!D]

الالنترا md
او اتنازل شوية في التسارعو تبقى الa5
او اتنازل شوية عن الراحة و تبقى السيراتو , و ان كنت لا انصح بيها بسبب حوادثها الكتير

شكرا لردك يا تامر بس انا عايز اعرف ايه الانترا md دي؟
وغير كده العربيات اللي انت بترجحها غاليه اوووي عن الميجان او الاوكتافيا

[تامر.محمد]

شكرا لردك يا تامر بس انا عايز اعرف ايه الانترا md دي؟
وغير كده العربيات اللي انت بترجحها غاليه اوووي عن الميجان او الاوكتافيا

الالنترا دي


و ممكن دي , بس هاتبقى اغلى من الميجان , و مش بنفس الرفاهية , هاتحس انك طلعت بس مش اوي كده يعني ,هيجبك التسارع اوي لكن الفخامة والثبات اقل , و نفس الكلام بالنسبة لعربية زي الاوبترا لكن التسارع مش اللي فارق عن النوبيرا يعني



انا عليت معاك في السعر عشان اعرف الم طلباتك مع بعضها في عربية مالهاش عيوب معروفة
لكن في حالة ما هيكون ده صعب , هايبقى عليك انك تنزل شوية في حتة هنا حتة هنا

[FAR!D]

تسلم يا تامر لك كلامك المفيد ده
انا والله العظيم كنت بتعذب و انا باخد قرار اني انسى الميجان انا اول مره احس بالحسره عشان انا نفسي اركب عربيه و معايا فلوسها ومش قادر اركبها عشان مش حتستحملني كده انا مقدميش الا الاوكتافيا و بكرر شكري ليك ولكل اعضاء قسم الرينو