ايهم أفضل بولو بونتو ايبزا !!!

[marmar611]

صباح الخير ...دى أول مشاركه ليا فى المنتدى :) عايزه رأيكم أنا معايا 35000 وعايزه عربيه هاتشباك تكون كويسه ياترى أجيب إيه فى رأيكم ؟ بولو ولا بونتو ولا ابيزا ولا عندكم إقتراح رابع ؟

[marmar611]

وفيه كمان اسبرنزا a113

[mohamedomar777]

لو لقيت بولو حلوه خلص فيها و ممكن كمان تبص علي دايو الجوليت عربيه جميله جدا

[marmar611]

شكراً على الرد ...إنتوا فين يا جماعه !!!!!!

[marmar611]

؟؟؟؟؟؟؟؟؟؟؟ظظظظظظ

[eslam3344]

مساء الخير اولا انا ممكن اساعد حضرتك بصفتي شخص عادي جدا مش خبير اوي في السيارات اه غيرت حوالي 5 عربيات بس الحمد لله الخبره اللي عندي منهم تكاد تكون كفيله للرد علي سؤالك حضرتك حطيتي اكتر من اختيار
اولا لو هتجيبي اسم فولكس وفيات يبقي مينفعش تحطي اسم سيات جنبهم لان دول عربيات محترمه جدا بكل فئتهم بكل موديلاتهم وانا افضل اني اركب منهم موديل 70 ولا اني اركب سيات 2012 لييييييييييييييييييييييه ؟؟ اعطال السيات كتير جدا وهي كعربيه ضعيفه جدا ثانيا كهرباء السيات معقده مشاكلها غير سلسه بمعني ان مش اي حد بيعرف يحلها وقطع غيار غاليه جدا وغير متوفره وغير معمره مشكله تانيه من المشاكل اللي بتقابل اصحاب السيات الحراره السياره لا تحتمل حراره عاليه وان تواجدت تلك الحراره يقل عزم العربيه يزيد استهلاك البنزين وان كانت الظروف قاسيه الي نوعا ما ممكن تجيب جوان وش سلندر طيب وعلي اييييييييييييييييييييييييييييه ما بلاش من الاول
ثانيا كصالون فهي تمتاز بصالون غير رحب (( مش واسع )) بالمقارنه بالبونتو او البولو

ننتقل الي العربيات التانيه لو فولكس فاجن يبقي يا جولف يا بلاش هي البولو كويسه وحلوه جدا بس من رايي الشخصي الجولف احلي بكتير اما بالنسبه للبونتو فا يااااااااااااااااااااااااااااا سلام علي العربيه دي انا بعشقها بكل موديلاتها والكلام للامانه لو كان لك نصيب من العربيه دي صدقيني والله مش هتندمي انا اذكر يوم ما واحد صاحبي كان بيبعها كان بيعيط عليها مع العلم انها موديل مش حديث 98 او 99 بس العربيه ما شاء الله طلقه علي الارض وثبات لا يضاهي واستهلاك البنزين غير موجود بيتهيالي هي كان فيها كل حاجه وسافرنا بيها من القاهره للاسكندريه في ساعه وتلت مع ان العربيه كان فيها 5 اشخاص ومع ذلك ما شاء الله هدوووووووووووووووووووووووء في المشي ده بالاضافه السحب عالي جدا بالمقارنه بموتور 1300 فهي ما شاء الله عربيه جميله جدا
ثالثا انا بقول ودي وجهة نظر شخصيه للمره الالف لو معاك فلوس عربيه اوروبي اوعي حسك عينك تفكر في حاجه كوري او صيني او حتي ياباني يبقي من وجهة نظر شخصيه بحته اوعي تفكري في الكوري او الصيني مع احترامي لكل ملاك هذه السيارات مع العلم اني واحد منهم صدقني والله الاوروبي لا يقارن بالاسيوي بالمره وانا عندي مقارنه هتوضحلك الفرق

ليه الباسات ( فولكس فاجن ) اوروبي موديل 95 او 96 بتتباع ب 80 واحيانا 90 مع المقارنه بمثيلتها من السيارات الكوري ليجانزا ( دايو ) كوري موديل 99 بتتباع ب 50 بحد اقصي 60 ؟؟ والحدق يفهم

[marmar611]

أستاذ إسلام أنا متشكره جداااااااااااااااااً على إهتمامك بالرد .... أنا إن شاء الله ها احاول أدوّر على بونتو تكون بحاله جيده وإذا ماكانش ها يبقى إختيارى التانى البولو بس ربنا يكرم عموماً أنا مش مستعجله وبدوّر على مهلى أوى
بكرر شكرى لإهتمامك وجزاك الله كل خير :)

[eslam3344]

استاذه marmar611 احنا هنا كلنا اخوات واكيد اي حد عنده معلومه ممكن تفيد ميبخلش بيها علي اخوه او اخته وانا مع اني مواضيعي ومشاركاتي قليله بس ده عشان مايفتيش في حاجه مبفهمش فيها وان شاء الله توصلي لحاجه كويسه في البونتو وانا لو لاقيت لحضرتك حاجه كويسه ان شاء الله هقولك هنا

[pharohtemo]

مع خالص إحترامى لكل الأراء الإبيزا و البولو ولاد عم ، الإثنين من مجموعة فولكس و أنا شخصياً كنت بجيب قطع غيار كثير للإبيزا بتاعتى من عربيات بولو و الإثنين هوية ألمانية بس التقفيل اللى مختلف ..
البونتو عربية كويسة بس كجودة و متانة و ثبات بتيجى بعد البولو و الإبيزا و ده رأى شخصى لواحد ركب إبيزا قبل كده و عارف ناس كان معاها بونتو .. طبعاً كل واحد ركب عربية بيكون متحيز لها و متعصب فى بعض الأحيان بس أنا بعت الإبيزا و ما زلت أكن لها كل إحترام .. الجولف رائعة طبعاً بس المبلغ مش حيجيب حاجة عالية أو موديل قريب للحاجات التانية ..
بالتوفيق و ربنا يكرمك بحاجة كويسة

[eslam3344]

استاذ pharohtemo مع كامل احترامي وتقديري لحضرتك ولوجهة نظرك بس انا ليا وجهة نظر شديدة التعصب انا لو القطعه مش الاصليه او المضرويه بس بتاعت عربيتي مش بركبها وبكره شغل التعديلات والاختراعت اللي بيعملها الاخوه الميكانيكيه مانا لما الردياتير بتاع الابيزا ضرب مني العربيه وقفت اسبوع ونص او 2 عشان مش لاقي الاصلي بتاعها مع انها موديل حديث والميكانيكي وبتاع الردياتير قالولي ركبلها بتاع عربيه مش فاكر ايه هي وانا قولت لا مش هركب حاجه الا بتاعتها مع ان اي ردياتير تاني هيقوم بنفس الغرض وهو التبريد بس انا مبحبش الشغل ده صراحه ده مبدئيا ويمكن مش كل الناس زيي كده وفي ناس بتقول اني بحبكها بس انا كده ودي وجهة نظري

النقطه الثانيه ودي وجهة خلافي مع حضرتك : يعني حضرتك عايز تفهمني ان البولو في سحبها زي الايبيزا....................... طب ازاي !!
المتانه والاداء في الاتنين زي بعض ................ طب ازاي!!
عايز تفهمني ان صالون دي زي دي ................. ازاااااااااااااااااااااااااااااااااي !!!
يا سيدي بلاش شغل تكييف دي وشغل تكيف دي ازاااااااااااااااااااااااااااااااااااي تقارن الاتنين ببعض .................. ازاي !!
يا باشا لا يختلط الزيت بالماء وعلي رائي الرئيس بتاعنا Gas & Alcohol don't mix
يا باشا انت غلطان سيات دي لو اصبحت السيارة الاولي علي العالم لن اكرر تجربتي معها حتي وان كانت ببلاش او هيدوني فلوس عشان اركبها
اما بالنسبه لكلامك عن ان المبلغ ده ميجيبش حاجه عاليه في الجولف انا معاك بس يجيب حاجه موديل 85 فابريقه دواخل وصالون محترم و 1300 سي سي والحاله العامه جيده وبيتهيألي كده كويس جدا انما لو حاجه مثلا واخر التسعينات يبقي الاختيار ما بين البولو والونتو اما عن الايبيزا ف دي اختيار مستبعد بالنسبه ليا انا علي الاقل

[pharohtemo]

استاذ pharohtemo مع كامل احترامي وتقديري لحضرتك ولوجهة نظرك بس انا ليا وجهة نظر شديدة التعصب انا لو القطعه مش الاصليه او المضرويه بس بتاعت عربيتي مش بركبها وبكره شغل التعديلات والاختراعت اللي بيعملها الاخوه الميكانيكيه مانا لما الردياتير بتاع الابيزا ضرب مني العربيه وقفت اسبوع ونص او 2 عشان مش لاقي الاصلي بتاعها مع انها موديل حديث والميكانيكي وبتاع الردياتير قالولي ركبلها بتاع عربيه مش فاكر ايه هي وانا قولت لا مش هركب حاجه الا بتاعتها مع ان اي ردياتير تاني هيقوم بنفس الغرض وهو التبريد بس انا مبحبش الشغل ده صراحه ده مبدئيا ويمكن مش كل الناس زيي كده وفي ناس بتقول اني بحبكها بس انا كده ودي وجهة نظري

النقطه الثانيه ودي وجهة خلافي مع حضرتك : يعني حضرتك عايز تفهمني ان البولو في سحبها زي الايبيزا....................... طب ازاي !!
المتانه والاداء في الاتنين زي بعض ................ طب ازاي!!
عايز تفهمني ان صالون دي زي دي ................. ازاااااااااااااااااااااااااااااااااي !!!
يا سيدي بلاش شغل تكييف دي وشغل تكيف دي ازاااااااااااااااااااااااااااااااااااي تقارن الاتنين ببعض .................. ازاي !!
يا باشا لا يختلط الزيت بالماء وعلي رائي الرئيس بتاعنا Gas & Alcohol don't mix
يا باشا انت غلطان سيات دي لو اصبحت السيارة الاولي علي العالم لن اكرر تجربتي معها حتي وان كانت ببلاش او هيدوني فلوس عشان اركبها
اما بالنسبه لكلامك عن ان المبلغ ده ميجيبش حاجه عاليه في الجولف انا معاك بس يجيب حاجه موديل 85 فابريقه دواخل وصالون محترم و 1300 سي سي والحاله العامه جيده وبيتهيألي كده كويس جدا انما لو حاجه مثلا واخر التسعينات يبقي الاختيار ما بين البولو والونتو اما عن الايبيزا ف دي اختيار مستبعد بالنسبه ليا انا علي الاقل

أستاذ إسلام انا مقصدتش انى حأركب قطعة بدل قطعة لأنى متفق معاك و بعتبر ده غلط بس أنا بتكلم على قطع متماثلة تماماً !! يعنى مفتاح النور بتاع الإبيزا هو بالكربون مفتاح البولو !! الكتاوت اللى راكبة عندى كانت كتاوت أودى و هى اللى كانت نازلة فى العربية .. تابلوه البولو كامل بيركب فى الإبيزا و العكس صحيح لأن العربيتين إنتاج فولكس فاجن جروب و المكونات متماثلة فى نواحى كثيرة مش كبديل لكن كقطع أصلية و مستخدمة فى العربيتين من الشركة الأم ..
نيجى بقى للمقازنة بين الإبيزا و البولو .. العربيتين من نفس الشركة الأم .. مشتركين فى كثير من قطع الغيار و معايير الجودة مطبقة هنا و هنا بل إن البولو من 1994 إلى 2000 كانت بتتعمل على شاسيه الإبيزا و بتتقفل فى مصانع سيات فى أسبانيا بجانب مصنع فولكس فى ألمانيا و الفيس لفت من 2000 - 2002 كان بيتقفل فى أسبانيا و سلوفاكيا يعنى مش ألمانيا أصلاً !!! يعنى العربية دى أسبانى أكثر منها ألمانى و العربيتين أستخدموا نفس شاسيه الجولف Mark3 باللإضافة لإشتراكهم الثلاثة فى أنظمة تعليق واحدة و بعض الأجزاء الميكانيكية .. مع الجولف اللى حضرتك و انا مقتنعين بيها و بكفائتها ..
يبقى مفيش مشاكل لما أقارنها بالسيات بل بالعكس لما أقول إن العربيتين اخوات مش ولاد عم كمان :)
واضح إن حضرتك عشت تجربة مش كويسة مع الإبيزا و ده وارد لو العربية مكانتش مظبوطة أو الصنايعى مكانش شاطر بس ده وارد مع أى ماركة حتى المرسيدس علشان العربية حالة و صيانة ...
البونتو بتيجى بعد الإبيزا و البولو و ده ميقللش من شأنها لأنها عربية كويسة برده بس بعد العربيتين دول ..
و أنا سعيد بسماع رأى حضرتك و أتمنى إنى أكون شرحت و جهة نظرى المتواضعة و تحياتى ...

[eslam3344]

استاذ pharohtemo مساء الفل والورود انا مبسوط جدا من ردودك الموثقه بالتواريخ والارقام دي حاجه
الحاجه التانيه بقي انا اللي مخليني كده ان العربيه دي مع انها الحمد لله مشاكلها مكانتش كتير معايا بس مقرفه جدا بالنسبه لعربيات تانيه كتير مكنتش حاسس منها انها سلسه زي العربيات التانيه زائد اني ساكن في 6اكتوبر فكان ليها مشكله اني مش بلاقي قطع الغيار بسهوله والعربيه كانت بتاعت عمي من الزيرو وكانت علي طول توكيل ومراكز خدمه يعني مخدومه فوق الكويس بس للاسف كانت تجربه مريره لا احبذ تكرارها ولا ليا ولا لاي حد تاني صدقني غير ممتعه حتي في الجري اخوك هاوي شد وقرص وغرز وكلام كده بصراحه مكنتش لاقي فيها المتعه بالقياده علي عكس عربية معتز زميلي ( جراند بونتو 98) كنت ببقي حاسس ان كل حاجه ماسكه نفسها كده ده حتي الدركسيون في الغرزه كنت بحس انها يتستهبل فيها مبترضاش تديني الفرصه اني اخدها صح يالله الحمد لله كانت ايام وعدت وادينا برضو بنعرض اراء وان كان فيها نوع من الجدل فصاحبت الموضوع بردوا هي المستفيده

[marmar611]

بعد المناقشه الطويله دى يا جماعه مش شايفين إن العربيه لما تكون بقالها 13 سنه فى الشارع دا كتير ؟؟؟

[pharohtemo]

استاذ pharohtemo مساء الفل والورود انا مبسوط جدا من ردودك الموثقه بالتواريخ والارقام دي حاجه
الحاجه التانيه بقي انا اللي مخليني كده ان العربيه دي مع انها الحمد لله مشاكلها مكانتش كتير معايا بس مقرفه جدا بالنسبه لعربيات تانيه كتير مكنتش حاسس منها انها سلسه زي العربيات التانيه زائد اني ساكن في 6اكتوبر فكان ليها مشكله اني مش بلاقي قطع الغيار بسهوله والعربيه كانت بتاعت عمي من الزيرو وكانت علي طول توكيل ومراكز خدمه يعني مخدومه فوق الكويس بس للاسف كانت تجربه مريره لا احبذ تكرارها ولا ليا ولا لاي حد تاني صدقني غير ممتعه حتي في الجري اخوك هاوي شد وقرص وغرز وكلام كده بصراحه مكنتش لاقي فيها المتعه بالقياده علي عكس عربية معتز زميلي ( جراند بونتو 98) كنت ببقي حاسس ان كل حاجه ماسكه نفسها كده ده حتي الدركسيون في الغرزه كنت بحس انها يتستهبل فيها مبترضاش تديني الفرصه اني اخدها صح يالله الحمد لله كانت ايام وعدت وادينا برضو بنعرض اراء وان كان فيها نوع من الجدل فصاحبت الموضوع بردوا هي المستفيده

حضرتك أنا متشكر لذوقك و سعيد بسماع رأيك اللى أضاف لى كثير ..
يا باشا مفيش جدل و لا حاجة و أنا دايماً بأستفيد من المناقشات و سماع أراء الغير لأنها دايما بتضيف ليا و إما بتدينى معلومات جديدة أو بتأكد وجهة نظرى لو صحيحة ..
العربيات نصيب و مش كل الناس راضيين عن عربياتهم و لولا إختلاف الاراء لبارت السلع :) أنمتى إن حضرتك تكون مستريح و مبسوط من عربيتك أيا كان نوعها علشان فى الآخر حضرتك اللى حتستفيد أو لا قدر الله حتعانى .. فرأيك هو الأهم و هو أساس إختيارك ...

[pharohtemo]

بعد المناقشه الطويله دى يا جماعه مش شايفين إن العربيه لما تكون بقالها 13 سنه فى الشارع دا كتير ؟؟؟

أكيد كتير بس كل مرحلة و ليها متطلباتها و فى عوامل كتير بتتحكم فى قرار الشراء حتى لو عربية قديمة زى الميزانية أو الإتجاه لشراء عربية بميكانيكا سهلة أو غير معقدة .. كل دى عوامل ممكن تخليكى تجيبى عربية قديمة شوية ..
على العموم كل ما الموديل كان قريب و مش قديم المشاكل بتقل نوعا ما مع العلم إن فى عربيات قديمة و أعطالها قليلة .
أختارى عربية أساسها سليم و اكشفى عليها كويس عند حد فاهم . أتأكدى من توافر قطع الغيار و أسعارها و المهم المواظبة على الصيانة الدورية لتجنب المفاجآت و الأعطال ..
بالتوفيق فى الشراء إن شاء الله