محطوط في موقف غريب قوي بين لانوس و فيرنا

[TICOXX]

صباح الخير الاول

اشتريت ان و جوز اختي من سنتين عربيتين انا لانوس كاملة و هوة فيرنا 1600 كاملة
و مشينا لحد دلوقتي مسافة معقولة انا 15000كيلو و هوة 25000كيلو
و طبعا العربيتين دلوقتي بنفس الحالة تماما يعني فبريكة بالكامل و عناية ممتازة
و لظروف عنده عايز يبيع عربيته علشان محتاج فلوس فقلت ليه مجربش عربيته و لو عجبتني انا اولى من الغريب؟
المهم نزلت جربتها
و حسيت بده:
الانوس من جوة اوسع و التابلوه بتاعها اشيك و شكله انعم
الفيرنا شنطتها اوسع على حساب الصالون
التكييف واحد تقريبا كتبريد و كصوت مراوح
مكن الازاز احسن في الفيرنا
الزوايا احسن في الفيرنا (زوايا الرؤية)
العفشة في الانوس اريح من الفيرنا بفرق ملحوظ و ه بيأثر على راحة اللي سايق
صوت موتور الانوس ناعم و صوت موتور الفيرنا عالي
بس موتور الفيرنا جنب موتور الانوس وحش جبااااااااااااااااااااااار اكتر من 100حصان قصاد 85حصان تقريبا للانوس
فرامل الفيرنا اقوى من الانوس بكتيير
القعدة في الانوس ارييح مش عارف ليه؟ هل هي مسألة تعود ولا ايه؟
استهلاك البنزين في الانوس معقول و هوة كان بيشتكي من ان الفيرنا وحش بنزين!!
الفتيس و نقلاته تقريبا واحد
الاضائة الامامية للفيرنا اقوى من الانوس
شكليا مش قادر احدد الاتنين شكلهم عاجبني
الثبات اقدر اقول انه في صالح الانوس من التجارب المبدئية
صاج الفيرنا افضل شوية
الكماليات تقريبا واحدة
انا بصراحة محتار جدا جدا بين انني ابيع عربيتي و اركب الفيرنا و بعدين اندم علشان عمو\غبور او اني افضل بالأصيلة الانوس و ابو غالي المريح؟؟

خصوصا اني كنت من كام يوم مع واحد صاحبي بيستلم عربيته بعد حادثة بسيطة و طلع مسمار الدينامو متلخلخ و السربنتينة مخرومة بالرغم من ان مكانش فيه شغل في الدينامو اصلا و هوة كان رايح يغيير الاكصدام بس!! و عملنا خناقة و وجعنا قلبنا معاهم اوي

فأرجو ان اي حد ينصحني يكون على دراية بالعربيتين و تكون اسبابه عن طريق تجربة او شرح مفصل
و شاكرين مهللين

[TICOXX]

طب مفيش حد يفيدني خالص؟

[passat]

انصحك تخليك فعربيتك لانها 15 الف بس وانت ادرى بيها ومش هتفرق نقلتك من لانوس لفيرنا

[tutankhamoun]

انصحك تخليك فعربيتك لانها 15 الف بس وانت ادرى بيها ومش هتفرق نقلتك من لانوس لفيرنا

+100000000000000
أنا مع الرأي ده ,,,,,, وفر فلوسك و خليك في عربيتك اللي أنت عارفها
خصوصا إن الفروق مش كبيرة قوي إلا في الموتور و أنت بتقول بيستهلك بنزين كتير في الفيرنا
يبقى خليك في اللانوس أحسن

ده كمان توكيل غبور ........... عسل ......... بس عسل أسود

[TICOXX]

من ناحية توفير الفلوس و نضافة العربيتين واحدة
في رأي تاني؟

[aif]

طبعا خليك في عربيتك ...... انت عارفها ومتعود عليها .....وبعدين لسة نقل الملكية .... وتبيع عربيتك .....
ريح نفسك وخليك في عربيتك
انا عموما مش بافضل اني ابيع او اشتري من اقارب ..... افرض ان اي حاجة في العربية باظت ..... عمرها الافتراضي ..... باظت لوحدها ...... ح يبقى شكلها مش حلو بين الاقارب ......خصوصا لو حاجة جامدة زي موتور او فتيس او دينامو او مارش .... برغم انه ممكن ما يكونش يعرف حاجة عن العيب ده .... لكن ح تبقى شكلها وحش
مش انت مرتاح مع عربيتك ......... ح تجيب وجع الدماغ لنفسك لييييييه ؟؟؟؟؟

[Rsarabia]

خليك فى عربيتك انتا ادرى بيها و هى مدام مفيهاش مشاكل متغيرهاش

[TICOXX]

شكرا يا شباب
لكن لو المقارنة بين فيرنا 1600 و لانوس هتعملوا ايه؟ بغض النظر عن الموضوع؟

[Nile_Storm]

حاسس من كلامك ان تميل للفيرنا
علي فكره هي مش وحش بنزين زي ما بتقول
بس انت ادري بعربيتك في الاول و الاخر
رايي خليك في اللانوس

[TICOXX]

انا بصراحة مجنني موتور الفيرنا الجبار خصوصا ان كان معايا النترا زمان و كانت وحش جري و كمان فراملها مش تعبانة زي الانوس
لكن نقاط زي الثبات و الاتساع الداخلي و العفشة المريحة نسبيا مقارنة بالفيرنا مخلياني خايف منها و كان عندي الينترا قديمة و كانت عفشتها مش تمام برضه
بجد محتار....!!!!

[Ahmed Anwer]

بص يا بااشا ،،

أنا لما كنت بشتري كنت مستبعد اللانوس تماما ،،

مش لأي سبب غير اني تلت اربع عيلتي كانت راكبه لانوس من سنة 97 ،،

فكنت كارهها جدا عشان الحكاية دي ،، و قولت اشوف حاجة احدث شوية

بس دلوقتي الفيرنا اصبح اعدادها اكتر من اللانوس و كمان هيعملوها تاكسي

فبرده مبقاش فيها اي تميز اطلاقا نهائيا

و الاتنين عربيتين شعبيتين ممللين

و يبقي رأيي تخليك في اللي تعرفه احسن من اللي ماتعرفهوش

لحد ما ربنا يكرمك و تغير لفئة اعلي

يعني خلاص الاتنين يالا حسن الختام ،، وقتهم فات بقه

مالهوش لازمة تضييع فلوس عشان تغير ما بينهم

[almarshal]

بالرغم من الفيرنا افضل فى التكنولوجيا واجدد من الانوس وموتورها جبار
مع ملاحظة ان الانوس الصالون اوسع حاجة بسيطة
لكن راى خليك فى عربيتك افضل طالما مريحاك وضمانها ومسترح للتوكيل
كان ممكن تكون محتار الحيرة دى لو مكنتش لسه اشتريت اى واحدة منهم
كان ساعتها ارشحلك الفيرنا
لكن طالما معاك الانوس ومريحاك وانت اول يد من الزيرو تبقى هى أولى بيك

[ASHRAFL2]

انصحك تخليك فعربيتك لانها 15 الف بس وانت ادرى بيها ومش هتفرق نقلتك من لانوس لفيرنا

[bee]

خليك في عربيتك لان ببساطة مع ان كلامي هيزعل ناس مني
اللانوس بالرغم من اني مش بحبها بس هي احسن من الفيرنا اصلا
شكلا بالنسبالي
اتساعر داخلي افضل
انعم من الفيرنا
عربية اثبتت جدارة في السوق وتوكيلها كويس

مجرد رأيي