مقارنة شرسة بين سوناتا / كورولا / جيتا

[tutankhamoun]

بالأمانه لم أسمع هذه المعلومه من قبل

لكن انا شخصيآ ثقتى فى العامل المصرى وال QC المصرى شبه معدومه

طيب بُص يا باشا على الصورة دي
و أقرأ الكلام اللي فيها و قولي رأيك أيه ؟؟؟؟

ده كمان مش ثلاثة سنوات
72 شهر ......... يعني 6 سنوات متصلة أفضل سيارة متجمعة في مصانع أوبل ( جنرال موتورز ) حول العالم

الكلام ده من موقع جي إم العالمي

[mahamedaraby]

لا دى كورى ولا دى المانى ولا دى يابانى

دى كورى تجميع مصرى
ودى المانى تجميع مكسيكى
ودى يابانى تجميع جنوب أفريقى

انا شخصيآ لا أدفع 150 الف فى عربيه جمعها مصريين (باتعجب من اللى بيشتروا البى ام والمرسيدس)..

ٍرائى المتواضع ..ولا واحده!..... انا أجيب اوكتافيا

اما لو لازم واحده من التلاته دول.. تبقى الجيتا.. الكورولا غاليه قوى !!

مع احترامى لحضرتك ايه تجربتك فى التجميع المصرى

هل مثلا اشتريت مرسيدس s500 وطلع عيب فى الباور ولا حاجه مثلا على اساس انها تجميع مصرى

هل اشتريت bmw تجميع مصرى ولقيت الكاسيت بايظ ولا حاجه

كلامك ده على اساس ايه مش عارف

مش عارف ليه الناس بتهاجم وخلاص التجميع المصرى

مع ان لسه فى موضوع عن سوبارو ماليانه عيوب تصنيع والناس عماله تاخد العذر وتقول كل الشركات بتطلع تحت ايدها عيوب تصنيع وكده

لكن مثلا لقدر الله انها تجميع مصرى كنت لقيت كل دخل ويقول شفتوا التجميع شفتوا اخر اللى يدفع فلوسه فى التجميع المصرى

[mahamedaraby]

معلش نرجع تانى للموضوع راى ان افضل عربيه بينهم الجيتا

عربيه محترمه وبحب شكلها وبدفع فلوس واخد قدمها قيمه

[ahmedfd]

سوناتا أكيد...
أعلى فخامة و أكبر مساحة وأكبر و أقوى محرك (قد تكون نقطة سلبية علشان الرخصة و البنزين).
هي أصلاً فئة أعلى من ناحية التصنيف (Midsize و ليس Compact) و أعتقد كمان من ناحية الفخامة و الكماليات.

[M!NA]

رأيي الكورولا (بس الياباني - مش الجنوب أفريقي)

السوناتا يعيبها أنها 2000cc و ده غير استهلاك البنزين العالي كمان داخل في شريحة ضريبة عالية يعني الRunning Costs هتكون كتيرة أوي

الجيتا عربية جميلة ولا اعتراض الا على توكيلها فقط

التويوتا عمر طويل و اعتمادية و توكيل و انتشار

[alivara]

طيب بُص يا باشا على الصورة دي
و أقرأ الكلام اللي فيها و قولي رأيك أيه ؟؟؟؟

ده كمان مش ثلاثة سنوات
72 شهر ......... يعني 6 سنوات متصلة أفضل سيارة متجمعة في مصانع أوبل ( جنرال موتورز ) حول العالم

الكلام ده من موقع جي إم العالمي

تمام يا جميل .. يعنى التقفيل المصرى مش وحش و لا حاجة زى ما معظم الناس فى المنتدى بتقول
عيب على اى حد يبقى مصري و يقعد يعيب على بلده و يقلل من شأنها مش عاجباك مصر سافر و ابعد عنها و ابقى اشتمها فى الغربة
تانى حاجة و الله و الله انا خالى كان معاه تويوتا كامرى باعها و اشترى سوناتا و العربية بقالها معاه دلوقتى 3 سنين عمره ما اشتكى منها فى حاجة صعبان عليه يغيرها و يجيب حاجة احدث لانه مش شايف فيها اى عيب
حكاية انها 2000 سي سي ديه تحسبلها مش تحسب عليها معنى كده انها عربية دبابة موتورها جبار و كمان شكلها احسن الموجودين
الجيتا انا بحبها اوى برده بس مش بحب شكلها من قدام و تويوتا كورولا مستحيل اشتريها لان سعرها غالى عليها و فيها مشاكل كتيرة
يبقى بالنسبة لى سوناتا تكسب خصوصا ان فى تقرير ال jd power سوناتا خلت هيونداى تتقدم فى المراكز مش اقل من خمس مراكز او اكتر مش فاكر بالظبط
و مفيش حاجة اسمها كورى و يابانى بقى زى ما قولنا ميت مرة قبل كده .. طالما العربية مناسباك و فيها كل حاجة ما تدورش هى مصنوعة فين و متفكرش من قبل ما تشتريها هتبيعها بكام بعد كده
رمضان كريم
م/ ايهاب نصار

[Nile Heart]

ماشى يا جماعه

انا غلطان والتجميع المصرى ممتاز

ممكن بس واحد يقوللى فيه كام سوناتا فى الشوارع؟؟

العربيه بقالها ييجى سنتين نازله ولا اراها الا كل كام يوم مره.. مع العلم انى باعمل 100 كم فى اليوم على الطرق

[tutankhamoun]

ماشى يا جماعه

انا غلطان والتجميع المصرى ممتاز

ممكن بس واحد يقوللى فيه كام سوناتا فى الشوارع؟؟

العربيه بقالها ييجى سنتين نازله ولا اراها الا كل كام يوم مره.. مع العلم انى باعمل 100 كم فى اليوم على الطرق

السلام عليكم يا أستاذ نايل هارت
هو حضرتك مش غلطان ........ بس أنت عممت و لذلك وجب التوضيح
و شكرا لحسن الحوار و هذا أولا

ثانيا يا باشا موضوع الإنتشار مش دليل على شئ قوي
خصوصا إن العربية تجميع غبور يعني تجميع مصري يعني أكيد هايوفر قطع غيارها
و برضه الجيتا مش منتشرة قوي !!!!
و متنساش إن السوناتا .......... 2000 سي سي
على فكرة أنا شوفت العربية ........ فخمة قوي من برة و من و جوة
و كل سنة و أنت طيب .......... و رمضان كريم

و شكرا مرة أخرى

[sab3aawy]

من وسط التلاتة دول السوناتا اكيد

محرك واتساع وفئة اعلى وفخامة وثبات ، كما ان هيونداى النهاردة اسم قوى وموجودة بقوة فى اوروبا وامريكا

[TBondok]

سوناتا بدون تفكير
فئة أعلى وحجم أكبر وأمان أكثر وبنفس السعر
جيتا تتفوق فى مستوى جودة التشطيبات ولكن بفارق بسيط

[dodo8499]

الالماني مفيش بعده !!

[abo samra]

سوناتا مستوى مختلف عن السيارتين وفئه اعلى
الجيتا نفس فئة الكورولا

[som3aa]

ممكن بس واحد يقوللى فيه كام سوناتا فى الشوارع؟؟

العربيه بقالها ييجى سنتين نازله ولا اراها الا كل كام يوم مره.. مع العلم انى باعمل 100 كم فى اليوم على الطرق

اولا العربية مكملتش سنه (اقل بكتير كمان) مع الناس الا اللى استلموا بدرى و انا منهم مكملتش سنة و ثلاث شهور.

ثانيا بالنسبة للانتشار فى السنة دى , العربية انتشرت بشكل رهيب و ال100 كيلو دول مش مقياس , لو حضرتك طلعت كوبرى اكتوبر او المحور عد كام عربية سوناتا شفتها.
العربية انتشرت انتشار رهيب جدا فى فترة صغيرة و اراهن انها انتشرت اكتر من الفكترا اللى نزلت قبلها ب 6 شهور
بعدين الضريبة الجديدة بره لها تاثير كبير اوى على مبيعات ال2400 لان عليها 3700 جنيه سنويا ترخيص بس غير البنزين و التامين و قطع الغيار
للعلم قطع غيارها غالية جدا زى الالمانى او اغلى و اتاكد بنفسك (تيل امامى 1000 بالتركيب + الضريبة , تيل خلفى 650 جنيه), فانوس امامى 1750 جنيه مش عارف دا شامل الضريبة و التهليب (المصنعية ) و لا لأ
الناس برده بتخاف من استهلاك البنزين و بتخاف من سمعة غبور فى الصيانة و بتخاف من التقفيل المصرى و خصوصا ان ناس كتير شافوا عيبو الفرنا فخافوا , دا غير ان ناس كتير يقولك المانى و مش المانى و الكلام دا و خصوصا انهم بيقولوا المانى و كورى و الحاجات دى.
للعلم انا بحب الجيتا جدااااااااا بس برده بفضل السوناتا بكتير.
عموما العربيتين حلوين اوى
على فكرة و عن تجربة (عربيتى عامل بيها 33000 كيلو ) السوناتا ممتازة فى كل حاجة و فعلا حاسس ان اختيارى كان سليم جدا

[adidas_vip2]

اكيد السوناتا جميلة جدا بس صعب انها تقران مع تويوتا او جيتا لانها تعتبر فئه مختلفه تماما ولو دورت مثلا فتقارنها بالكامرى او الباسات مثلا فى نفس فئتها تقريبا فا معتقدش انها هتكون ليها مكان بينهم
وبصراحه فعلا هى مش منتشرة كتير بعكس الجيتا ودة دليل على انها عملية بالدرجه الاولى واعتقد انها اكثرهم اقتصادية وشكل قوى
ومسألة الشكل دى اذواق يعنى مثلا الجيتا تحس انها وحش على الطريق بعكس السوناتا تحس انها ملكة
وشخصيا اختار جيتا بالتأكيد
واعتقد انك بمقارنتك دى بتقلل من شأن السوناتا لانها ليس فى نفس الفئه
مين فينا يقارن سوناتا بسيارة مثل الباسات فلا وجه للمقارنة اطلاقا
ومسألة الموتور القوى اعتقد انك مش هتشترى سوناتا علشان تشد وتجرى بيها فا 2400 سىسى او 2000 مش مفيد على اد ماهوغير اقتصادى بالمرة
وفى الاخر تقريبا الكل اجمع على ان التلاتة عربيات محترمة ولك الاختيار

[dynamic_alpha]

بس يا جماعة ازاي بتقارنوا التجميع المصري في شركات معروفة بجودتها العالمية مثل BMW و Mercedez بتجميع Hyundai

مع احترامي , مهما انتجت Hyundai حتى لو كانت Genesis اللي تفوقت على عربيات مثل Lexus , ما زال ده اسم و BMW و حتى GM اسم تاني

و يا ريت اللي يعرف الضريبة السنوية على 2000 cc كام ؟

و شكرا