مبتدىء عايز نصيحة فى عربية رخيصة تقسيط

[SuperTest]

السلام عليكم ورحمة الله وبركاته

باختصار اول عربية هشتريها وبالتقسيط

فمبدئيا لو حد يعرف ارخص مكان تقسيط يقولى ، وايه نظامه ، علما انى طبيب امتياز وفى اسكندرية

_____

الجزء بتاع العربية بقى

فى حدود 70 الف ان شاء الله

انا هستعملها عادى على خفيف ، بس هسافر مرة كل اسبوع اقاليم على بعد 80 كيلو وارجع تانى يعنى 160 كيلو عشان عياده هناك يوم فى الاسبوع،، ممكن اسافر مرتين فى الاسبوع

ثانيا التكييف عندى مهم اوى ، ويكون استهلاك بنزين قليل وقطع غيار رخيصه عشان الحالة لسا على الأد فى الاول ،، وياريت متكونش من العربيات الصغيره زى الألتو والماروتى والحاجات دى

وشكرا جزيلا

آسف للازعاج

اه نسيت اقول ،، انا مش فارق معايا صينى ولا كورى ولا يابانى ولا الكلام ده لأنى مش مقتنع بيه عن تجربة فى كذا حاجه فى مجال شغلى، فهعامل كل عربية على انها بذاتها بس، فممكن ترشيح اى عربية عادى

[أسامه طياره]

لو عاوز زيرو هات لانوس .. لو عاوز مستعمل فالسوق واسع لكن منصحكش تجيب مستعمل وبالتقسيط

[M I D O]

فيرنا احسن حاجة لاحتياجاتك

[SuperTest]

عايز زيرو هجيبه بالتقسيط ان شاء الله...

يعنى فيرنا افضل حاجه ؟؟ مفيش اى نصائح تانية ولا عربية صينى ؟؟

[SuperTest]

سعر البى واى دى اف 3 عامل كام دلوقتى ؟؟ عشان مش عارف اوصله من النت

[J A G U A R]

الفيرنا لايقه عليك اوى وبتقولك انت تلزمنى

[M I D O]

البي واي دي عربية ممتازة بس عاملة 78 الف وللاسف توكيلها سئ بس كعربية ممتازة

[lidosasa]

حضرتك هى ميزانية ال 70 ألف هى الميزانية الإجمالية للعربية مضافاً ليها الفايدة بتاعت القسط ولا دا سعر العربية الزيرو من غير إضافة سعر الفايدة
وأيه هى المقدمة اللى ممكن حضرتك تدفعها والقسط الشهرى فى حدود كام يعنى حتدفع كام فى الشهر
كل حاجة فى التقسيط متوقفة على الأسئلة دى عشان الرد يكون سليم ومظبوط

[SuperTest]

انا ممكن ادفع 1000 فى الشهر ، وممكن ادفع مقدم فى حدود 15 الف.. يبقى ايه المناسب كده ولا مش مناسب حاجه من دول؟؟

انا واحد صاحبى جاب تقسيط من بنك ناصر، بس انا لأن البنك مش مالك العربية وفيه طرف تالت فى البيعه ، فانا مش عايز شبهة الربا دى، وبدور على مكان يكون فيه تقسيط مباشر..

طيب وبالنسبة للفيرنا والبى واى دى اللى اتعرضوا هنا ، مين افضل فيهم فى استهلاك البنزين وقطع غيار رخيصه وانى اسافر بيها مرة فى الاسبوع زى ما قلت؟؟

وشكرا جزيلا

[SuperTest]

لو عاوز زيرو هات لانوس .. لو عاوز مستعمل فالسوق واسع لكن منصحكش تجيب مستعمل وبالتقسيط

انا مش هجيب مستعمل ان شاء الله، مبحبش المستعمل الصراحه، انا عايز اعيش اول فترة من غير دوشة تصليحات

فيرنا احسن حاجة لاحتياجاتك

طيب اهى ادامى ، شكلها هتبقى هيا

الفيرنا لايقه عليك اوى وبتقولك انت تلزمنى

وانا بقولها انا خاطب هههههههههه، واضح ان الاراء للفيرنا، هى سعرها كام زيرو حاليا؟

البي واي دي عربية ممتازة بس عاملة 78 الف وللاسف توكيلها سئ بس كعربية ممتازة

سمعت ان توكيلها فى اسكندرية احسن من القاهرة فى المعاملة، قريت كده فى المنتدى بس مش متأكد، بعدين لو اى صنايعى بيفهم فيها، انا هروحله مبحبش التوكيلات الصراحه

حضرتك هى ميزانية ال 70 ألف هى الميزانية الإجمالية للعربية مضافاً ليها الفايدة بتاعت القسط ولا دا سعر العربية الزيرو من غير إضافة سعر الفايدة
وأيه هى المقدمة اللى ممكن حضرتك تدفعها والقسط الشهرى فى حدود كام يعنى حتدفع كام فى الشهر
كل حاجة فى التقسيط متوقفة على الأسئلة دى عشان الرد يكون سليم ومظبوط

تمت الاجابة فى المشاركة اللى فوق

[lidosasa]

انا ممكن ادفع 1000 فى الشهر ، و70 الف تمن العربية من غير فايده، وممكن ادفع مقدم فى حدود 15 الف..

انا واحد صاحبى جاب تقسيط من بنك ناصر، بس انا لأن البنك مش مالك العربية وفيه طرف تالت فى البيعه ، فانا مش عايز شبهة الربا دى، وبدور على مكان يكون فيه تقسيط مباشر..

طيب وبالنسبة للفيرنا والبى واى دى اللى اتعرضوا هنا ، مين افضل فيهم فى استهلاك البنزين وقطع غيار رخيصه وانى اسافر بيها مرة فى الاسبوع زى ما قلت؟؟

وشكرا جزيلا

بنك ناصر إجراءاته معقدة جداً أسأل فى بنك أبو ظبى الإسلامى ( البنك الوطنى للتنمية سابقاً ) وهو فيه نظام المرابحة بالسيارات ودا لينك فيه معلومات أكتر
مرابحة السيارات
وبالنسبة لنوع العربية فمش عايز أفتى لكن كل عربية ليها مميزات وعيوب لكن البى واى دى أحسن بمراحل وفيها كل وسائل الأمان الحديثة وصالون أوسع وثبات أكبر ولكن يعيبها عدم توافر قطع الغيار عكس الفيرنا والتوكيل سىء جداً على الرغم إن غبور وكيل الفيرنا مش كويس هو كمان بس أحسن من شركة الأمل وكيل بى واى دى

[SuperTest]

يعنى بى واى دى اوسع واحدث،، ولكن العيب ان مفيش قطع غيار منتشرة برا التوكيل

لكن الفيرنا اقل بس قطع غياره منتشرة واكيد ارخص

وبالنسبة لاستهلاك البنزين والتكييف فى الاتنين ؟؟

وآسف اسئلة كتير بس انا مليش خبره عربيات قبل كده الصراحه

[J A G U A R]

الفيرنا تقريبا 73500

[lidosasa]

يعنى بى واى دى اوسع واحدث،، ولكن العيب ان مفيش قطع غيار منتشرة برا التوكيل

لكن الفيرنا اقل بس قطع غياره منتشرة واكيد ارخص

وبالنسبة لاستهلاك البنزين والتكييف فى الاتنين ؟؟

وآسف اسئلة كتير بس انا مليش خبره عربيات قبل كده الصراحه

البى واى دى تتفوق فى كل المقارنات على الفيرنا ما عدا التوكيل وقطع الغيار وممكن حضرتك تاخد جولة فى القسم الخاص بالبى واى دى وتشوف كلام الناس عنها والمميزات والعيوب وخد لفة فى قسم الهيونداى وشوف كلام الناس عن الفيرنا

[SuperTest]

شكرا جزيلا لتفاعلكم ، انا هعمل موضوع جديد مقارنة بين عربيات اقل لأن اتضحلى ان العربية بالفوايد هتزيد كتير اوى ، فهضطر اجيب حاجه من الهاتشباك للأسف اللى مبحبهمش بس عشان على اد الفلوس انا محتاجها اول 5 سنين بعد كده مسافر ان شاء الله .. هعمل موضوع جديد وشكرا جزيلا