الـــقرار الحاســــــــــــم( الجزء الاخير)

[ZIMOFOX]

يا جماعة وصلنا لنهاية التفكير وعلى الله ثم مساعدتكم التدبير
بعد الفحص والتمحيص والبحث والتفتيش
محتار بين ثلاثة

-تويوتا ياريس 1300 اوتوماتيك 2008 اللون فيرانى السعر 103000

-بروتون جين 2 1600 اوتوماتيك سبورت 2008 اللون اسود 94000

-نيسان صنى super salon 1600 اوتوماتيك 2008 اللون فضى 103000


بجد ساعدونى وماتبخلبوش عليا بالنصيحة واللى هقتنع برايه ليه عندى هديه:smile:

[ZIMOFOX]

ايه يا جماعة انا عارف انكم زهقتوا منى بس مش للدرجة ديه
"ان الله فى عون العبد ما كان العبد فى عون اخيه"

[MoToRiZeR]

انا شايف من توقيعك ميلك الشديد للياريس فا أهم حاجة راحتك النفسية من ناحية العربية و إنك تكون بتحبها فا أرشحلك ياريس

[blazer]

ارشحللك الجين 2
مميزات
اكتر شبابيه=جين 2
اكترقوه ماتور وسحب و سرعه قصوى =جين 2
اكتر اوبشن=جين 2
سعر اقل=جين 2

عيوب

اصغر مساحه شنطه=جين 2
اقل سعر اعاده بيع(بس مش بيخسر جامد هى فارقه مبلغ بسيط عن باقى السيارات)=جين 2

[hazem_khidr]

ياريس
صدقني متعه تانيه خالص
و كمان الفول اوبشن الاتوماتيك حتحس انك دايما مميز.
توكل علي الله

[Hosam_Optrawy]

تويوتا ياريس

[محمد عز]

نيسان صنى من رايي

[tutankhamoun]

السلام عليكم يا زيمو باشا
أنت بتقارن بين ثلاثة عربيات حلوين
بُص يا سيدي

أنا هاشرحلك مميزات كل واحدة و أنت وازن المميزات بتاعة كل عربية و شوف أيه اللي يناسبك

عربية شبابية شكلا يبقى الترتيب
الجين 2
الياريس
النيسان صني

عربية بموتور شديد
الجين 2 و النيسان ..
الياريس بعديهم و ده طبيعي علشان الفرق في قوة الموتور

توفير بنزين
الياريس
و بعدها على طول و مش فرق كبير الجين2
و بعدين النيسان صني

صاج قوي و عوامل أمان
الجين 2 من ناحية الصاج القوي , بعدين الصني
و أدام بتقارن بأعلى فئة في الياريس و الصني
يبقى الثلاثة متساويين و فيهم فرامل ABS و ووسائد هوائية
و بيزيد على الجين 2 فرامل EBD


ثبات و إتزان على الطريق و سرعات عالية
الجين 2 و الصني يكتسحوا الياريس

أفضل أوتوماتيك فيهم
نيسان صني
جين 2
ياريس

إستخدام طرق سريعة و سفر كتير
نيسان صني و جين 2
ثم الياريس

إستخدام أكثر داخلي ( مدن و طرق داخلية و سرعات معقولة )
يبقى الياريس تكتسح علشان هاتوفر في البنزين و مش هاتحتاج قوة الموتور 1600
و بعدها الجين 2 علشان إستهلاك الصني للبنزين عالي شوية

أفضل توكيل
تويوتا سمعته ممتازة في خدمة ما بعد البيع
و نيسان كويس برضه
و عز العرب الخاص بالجين 2 ....... معقول و عادي جدا

توافر قطع الغيار
ياريس و نيسان صني
و يليهم جين 2

سعر اعادة بيع
حاليا الياريس
ثم الجين 2 بتنتشر اﻵن كثرا و أصبح عليها طلب عالي في السوق الجديد و المستعمل خصوصا في فئة الشباب
ثم النيسان صني

أفضل صالون و فرش داخلي
الصني سوبر صالون
و الجين 2 و الياريس ....... زي بعض و لو أن أنا شايف ( ذوق شخصي ) إن تابلوه الجين 2 أشيك من تابلوه الياريس و النيسان بس بتاع النيسان أفخم من الأثنين

و أنا شايف أنك حاطط ياريس في توقيعك
و لو أنت مرتاح للياريس
أشتريها على طول و بدون تردد
خصوصا إن محدش بيشتكي منها و الكل بيشكر فيها و الأستاذ حازم خضر أولهم و ربنا يباركله في عربيته
لأن العربيات دي قرف و نفسية
يبقى أشتري اللي ترتاحله و بتحبه


دي شوية صور للثلاثة عربيات مع بعض

[tutankhamoun]

دي الأسبورت اللي أنت حاطيتها في المقارنة

[Ahmed Hassan]

على فكره الصني مفيش فيها Abs حتى السوبر صالون

[bee]

لو عايز رأيي
أنا لو مكانك هاخد الجين 2
وزي ما الاخوة قالولك اهم حاجه راحتك النفسية بردو :)
ومبروك مقدما

[hazem_khidr]

كلام الاستاذ توت طبعا ليس عليه اي غبار
ممكن يكون فيه شويه تحيز بسيط للجين 2 بحكم انه مالكها
لكن برضه الكلام في مجمله كويس جدا.
و بعيدا عن كلام (الاخوه)
من رايي ابعد عن الصني نهائيا تقفيل مصري و زباله
و كمان موديل انتهي بره من 2006 فمالوش لازمه تركب عربيه قديمه.
شوف الياريس او الجين 2
لكن الياريس عمرها الافتراضي اعلي

[Yarisawy]

انت لسه ماشترتش عربيه ... انا قلت انت اشتريت وهاتيجى تقول باركولى يا جماعه

انا عايز اقولك على حاجة ذى الناس ما قالت ... انت مايل لايه .. الراحة النفسيه

انت مختار عربيات كلها كويسه بس شوف انت عايز من العربيه ايه
اقول تانى ... شوف انت عايز من العربيه ايه

انت الوحيد اللى تعرف وانت اللى هاتقرر وانت اللى هاتركب العربيه وانت اللى هاتدفع الفلوس

معلش هاتلاقى كل واحد بيقول رأيه هنا بيكون متحيز لعربيته علشان هو شايف فيها حاجات احلى

شوف انت شايف انى واحده احلاهم وتوكل على الله

عايزين نقولك مبروك بقى