الحيره اللعينه

[mohamed.heiba]

السلام عليكم يا شباب

اتمنى انكوا تكونوا باحسن حال

انا مقبل على شراء عربيه زيرو ان شاء الله و اتوماتك فده ينطبق على كل الكلام

و لكن المشكله انى حيران بين 3 عربيات و كل واحده فيها ميزه و عيب و بصراحه حاجه تقرف .. طبعا انا مش ناوى اغير قبل 5 سنين على الاقل
المسافه المقطوعه يوميا 60 كم تقريبا فى ايام العمل

اول عربيه : فيرنا اوتو
الميزه : سهوله التصليح و الصيانيه و رخص ثمن قطع الغيار و اى حد ممكن يشتغل فيها
السعر مناسب نوعا ما
العيوب : واطيه جدا على الارض و خصوصا انى ساكن فى فيصل بلد المليون مطب
ضيق المساحه الداخليه
فقر عام فى الخامات الصلون و تحس ان فلوسك ملهاش لزمه

تانى عربيه : لوجان اوتو
الميزه : الارتفاع عن الارض و الوسع الداخلى
العيوب : اسعار قطع الغيار سامع انها عاليه جدا
اماكن الزراير الغريبه
و الخوف من عدم وجود قطعه غيار فى التوكيل

تالت عربيه : صنى الاكس
الميزه : مساحه داخليه رائعه
ارتفاع عن الارض
مفيش شكاوى كتير منها
تحس ان فلوسك لها قيمه
العيوب : الشكل الغريب
نفس الخوف من اسعار و تواجد قطع الغيار
حمل مادى غير مرغوب فيه نهائيا فى الوقت الحالى

طبعا انا بقارن بين دوول بس و مش عاوز ادخل حاجه تانيه فى المقارنه

و ارجو يا ريت لو حد من ملاك اى من العربيات دى او ليه خبره سابقه مع اى منهم يفيدنى

و ربنا يهدينا جميعا للاصلح

[abohend]

صني مختلفة عنهم

فيرنا و لوجان
يبقى لوجان

لكن صني كاتيجوري أعلى
يبقى بنظلم اللوجان لو قارناها بيها

و موضوع الماديات إنت أكتر واحد عارف حالتك ايه...محدش هيقدر يقولك أزنق نفسك
أو يضحك عليك و يقولك اللوجان أحسن من الصني لأن الفرق بينهم كبير

لكن كشكل أنا أتفق معاك إن الصني شكلها مش حلو

تحياتي

[mohamed.heiba]

فيرنا و لوجان
يبقى لوجان

لكن صني كاتيجوري أعلى
يبقى بنظلم اللوجان لو قارناها بيها

و موضوع الماديات إنت أكتر واحد عارف حالتك ايه...محدش هيقدر يقولك أزنق نفسك
أو يضحك عليك و يقولك اللوجان أحسن من الصني لأن الفرق بينهم كبير

لكن كشكل أنا أتفق معاك إن الصني شكلها مش حلو

تحياتي

شكرا يا باشا على الرد

هو انت معاك لوجان او جربتها قبل كده
و بالنسبه لوضوع قطع الغيار برده و اسعارها ؟؟؟

انا عارف انى انا الى ادرى بمقدرتى الماديه و لكن الشؤال هنا
هل الفرق يستاهل ان الواحد يزنق نفسه
و لا اللوجان ممكن تقوم بالواجب
مع العلم انى بتكلم عن اشغال شاقه

[saddam]

صديقي المواطن
قولا واحدا وبكره تفتكر كلامي
نعم الفرق يستاهل تزنق نفسك وتجيب الصني وأرجوك متفكرش في الفيرنا تاني مش مقامك يا راجل يا طيب
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

[Mohammmed]

صنى وشوف الشكل القديم لو مش عاجبك الجديد

[ahmed salah90]

لو 60 كم دول سفر يعني طرق سريعه خليك في الصني انما لو بطئ خليك في الفيرنا علشان سهوله الييع في وقت قياسي

[fares_311]

السلام عليكم
أنا عارف إنك مش عاوز تضيف غير العربيات ال3 دول بس الصني الشكل القديم أحلى يعني الترتيب من وجهه نظري
صني شكل قديم
صني شكل جديد
لوجان


فيرنا

[J A G U A R]

يا باشا حد يسيب الصنى الشكل القديم ويبص لفيرنا ولوجان ... ده الصنى الشكل القديم دى فلته من فلتات الزمان ومش هاتتكرر .. انا معاك ان شكلها كلاسيكى وقديم بس بردو متتقارنش بفيرنا ولوجان .

[Batman372]

قولا واحدا الصنى طبعا :)

[mohamed.heiba]

الف شكر لكل الرجاله الى ردت

مشكله الصنى القديمه انهم شالوا الابى اس

فكده الواحد تقريبا استقر و ربنا يقدم الى فيه الخير
هحاول اشوف الصنى ان مكنش يبقى اللوجان و الامر لله

[smsm2004w]

الصنى الشكل القديم ثم الوجان

[محمد اسلام]

فيرنا - لوجان - صنى ... افضلهم الصنى .. عربية شيك ومحترمة لكن يعبها عيبين خطيرين الاول هو ضيق الكنبة الخلفية والثانى هو استهلاك للبنزين اعلى من المعدل الطبيعى ..
ونصيحه منى .. اذا كنت حضرتك تقدر تدفع لحد 100.000 جنية يبقى ممكن تزود شوية صغيرة وتجيب ستروين سى اليزية اول فئة اوتو ب 120.000 جنية عربية فيها كل المواصفات اللى بيتمناها اى واحد

[M I D O]

الصني افضلهم بس هات السوبر صالون افضل

[S O P H O S]

الصني بصراحة

[Ghost2]

لو فيرنا و لوجان ,, يبقى لوجان طبعا وبلا شك ,, لو نيسان صني ولوجان ,, يبقى نيسان