مطلوب نصيحة لوجه الله يا شباب في شيفروليه لانوس 2014

[tonsy1979]

السلام عليكم رجالة نايل موتورز
اخوكم ناوي باذن الله تعالی يشتري زيرو
وبصراحة اللانوس عجباني من زمان كانت مع اخويا 99 وكانت عربية محترمة وعملية وسواقتها ناعمة جدا
فكنت عايز اعرف حد من الشباب يكون معاه العربية دي بعد ما بقت شيفروليه هل فيها اختلاف وهل بقت افضل او اسؤ ولا مفيش اختلاف وايه عيوبها واكتر مشاكلها .. جزاكم الله خيرا

[Omar2017]

بص يا سيدي انا ركبت الدايو 2000 و الشيفرولية 2011 انا هقولك عيوبها و مميزاتها عموما سواء ان كانت دايو او شيفرولية
المميزات
الثبات معقول لغاية 140 و 150 بعد كدة تبدأبقى تخاطر بحياتك
الانتشار و كل ما يترتب علية من اعادة بيع و سهولة صيانة و قطعع غيار رخيصة و متوفرة
العربية سحبها معقول يعني مش بطة زي اللوجان ولا جراية زي الفيرنا بين البنين يعني
الاتساع الداخلي و اتساع الشنطة
العيوب
مشاكل الكهربا كتيير فعلا
التابلوة شكلة قديم مش جديد خالص
الصاج خفيف بس احسن من صاج الفيرنا و اسوأ من صاج اللوجان
العربية واطية بشكل غريب
الفروق بين دايو لانوس و شيفرولية لانوس
العزم بتاع دايو افضل بكتيير
استهلاك البنزين اعلى في الشيفرولية في نفس ظروف الطريق
الوان شيفرولية اجمل من الوان دايو بمراحل
التقفيل في دايو افضل
توكيل دايو افضل
التكييف كويس في الاتنين
الدايو لانوس كانت كوري 100% لكن الشيفرولية صيني بنسة90% و الباقي مصري
بس كدة و انا من رأي بصراحة جميلة و تهتم بيها هدلعك و دة كلام انا جربتة كل ما هتصرف عليها اكتر هدلعك اكتر
و اي حاجة انا في الخدمة لأن انا امتلكت كل سيارات الفئة دية الا الامجراند 7

[tonsy1979]

تسلم يا غالي على مشاركتك المتميزة
يعني تنصحني بلانوس 2014 ولا فيرنا لان هما دول اللي بفكر فيهم

[tonsy1979]

اعتقد الفيرنا اعطالها قليلية بالنسبة للانوس

[J A G U A R]

فكر يا باشا فى ايمجراند 7

[samakaerror]

فكر يا باشا فى ايمجراند 7

كلام أ/ جاجوار مظبوط و ياريت تشوف المقارنة إلي انا عاملها مع الأكسنت .. مع العلم إن الأكسنت افضل بكتيير من اللانوس مع كامل إحترامى لكل ملاكها بس كموتور و عفشة و كلام كدة بقت قديمة جدآ و السوق بقى فية احسن منها فى نفس الفئة السعرية .. و موفق فى الشراء إن شاء الله

[Ghost2]

لا فيرنا و لا لانوس فيهم امان ؟
يبقى لو هتركب في الفئة السعرية دي يبقى جيلي احسنهم

[Eng_hatemfathy]

فعلا بعد 2004 الانوس بقت مكوناتها المستوردة صينى والمحلية طبعا مش محتاجه كلام ومرات خالى كان معاها لانوس 2004 وفى 2010 اديتها لابنها وجابت لانوس برضة بس شيفروليه حست بفرق كبير وفى مشاكل فى الباور من اول الف كيلو وحست بفرق برضه فى مركز الخدمة
انا شايف بما ان العربية هتبقى مانيوال يبقى الاميجراند برقبتها وخاصة الفيميه منها حكاية
وبالتوفيق

[blazer]

فيرنا
ولو اوتو هيبقى قدامك سانديرو ب 97 الف دلوقتى

[tonsy1979]

والله يا شباب فكرت في الايمجراند بس متخوف منها لسة

[smsm2004w]

اللوجان افضل فى الفئه السعرية دى

[Ghost2]

بص هي الشكاوى في الايمجراند نوعية .. بمعنى ان مفيش شكوى بعيب شائع في العربية .. يعني حالات فردية .. ممكن واحد يشتكي من مكيف او تقفيل تابلوه ,,, فا انت ريح دماغك .. يوم ما تستلم عربية اكشف عليها مسمار مسمار و حته حته .. لقيتها تمام خدها .. ولو حصلها حاجة معاك الضمان .. و غبور بيجيب ورا بشوية صوت عالي ممكن تاخد عربية جديدة

[luckyman]

بص اللانوس كانت عربيه كويسه ايام ا كانت دايو وايام ما كان مفيش اختيارات .. لكن طالما العربيه بقت شيفروليه بمكونات اقل جوده سيبك منها وطالما الجيلي فيها شكاوي وبرضه غبور باين عليه مش ناوي ينجح العربيه دي .. ايه رايك في البي واي دي عربيه ثابته وسريعه وقويه وعاليه واثبتت وجودها في السوق بس بلاش اللون الابيض الفضي عليها روعه والاختيار لك وقطع غيار نفس الكورولا ومليان استيراد ومحرك ميتسوبيشي مضمون والوسع الداخلي اكتر من ممتاز .. تقبل تحياتي ودمت بود

[Eng_hatemfathy]

بص اللانوس كانت عربيه كويسه ايام ا كانت دايو وايام ما كان مفيش اختيارات .. لكن طالما العربيه بقت شيفروليه بمكونات اقل جوده سيبك منها وطالما الجيلي فيها شكاوي وبرضه غبور باين عليه مش ناوي ينجح العربيه دي .. ايه رايك في البي واي دي عربيه ثابته وسريعه وقويه وعاليه واثبتت وجودها في السوق بس بلاش اللون الابيض الفضي عليها روعه والاختيار لك وقطع غيار نفس الكورولا ومليان استيراد ومحرك ميتسوبيشي مضمون والوسع الداخلي اكتر من ممتاز .. تقبل تحياتي ودمت بود

البى واى دى عربية جميلة بس تغور من وش شركة الامل -اسوأ توكيل شفته فى حياتى وهو سبب فشل اللادا ال 2110 مع انها عربية حكاية بكل ما تعنى الكلمة

[S O P H O S]

يا باشا لو زيرو فكر تاني