بيجو 405 2000 ولا فيات تمبرا 1600 ( بالله عليكم خلاص هشترى )

[gemaiy]

السلام عليكم

انا فكرت كتير جدا فى عربية مستعملة فى حدود 40000

وبعد التدوير فى كل حاجة استقريت على حاجتين

1- فيات تمبرا موديل من 90 الى 96 ايطالى 1600 سى سى

2- بيجو 405 موديل 2000 او 2002 فرنسى 2000 سى سى

ياريت يا جماعة آرائكم القيمة وتقييمكم للعربيتين

انا يهمنى الوسع الداخلى والثبات

جزاكم الله خيرا

[FLYINGPEUGEOT]

ملاحظة بسيطة ياباشا بس::
مافيش 405 بريستيج فى العالم ب 40000 !!!

[medoyahoo]

التمبرا سيارة عملية واقتصادية لأن قطع غيارها أرخص واستهلاك البنزين أقل من البيجو مع إن البيجو أعلى وأوسع منها بفارق بسيط.

[gemaiy]

بيجو - 405 2000 سى سى

15 سبتمبر 2008

40000 جنيها

موديل 1992 | 0 كم
اللون اسود دهان المصنع دواخل






بيجو - 405 2000 سى سى

19 سبتمبر 2008

42000 جنيها

موديل 1990 | 160000 كم
France made

دول اعلانين عن بيجو 405 من كونتكت كار

والسعر 40 -42 ألف

[Nour_Peugeot]

البيجو طبعا دي معانا بقلنا 3 سنين و نص و قطع الغيار مش غاليه يعني

بس بجد هتحس انك ركبت عربية متندمش عليها

[FLYINGPEUGEOT]

ياباشا ايوه كده 90...92
اصل حضرتك كنت كاتب فوق موديل 2000موديل و2002 :)

بالنسبة للسعلا فهو عادل جدا للسيارتين...الا ان التمبرا ساعات بتيجى ب 38 و39 كمان

بالنسبة للثبات بصراحة الاثنين اثبت من بعض الا ان التمبر يعيبها عدم الثبات فى المنحنيات (سرعت عالية)

كقوة وسحب وتكييف ...البيجو طبعا والف طبعا ...تقريبا مفيش مقارنة
كاستهلاك بنزين...التمبرا طبعا موفرة اكتر...لكن ماتنساش فرق السعة اللترية بردو
.....
الصالون ..البيجو اوسع
والتمبرا بردو كويسة
......
قطع غيار : الاتنين متاحيين ومتوفرين
الا ان التمبر قطع غيارها ارخص لكن مش بنسبة كبيرة بردو
......
سعر اعادة البيع :::العربيتين ماسكين نفسهم فى سوق المستعمل
.........
شغل صيانة وتصليح :العربيتين ليهم الناس اللى يشتغلوا فيهم فى كل حتة
....

دا رأيى المتواضع بكل حيادية...ولحضرتك الاختيار

[hazem_khidr]

البيجو بالتاكيد افضل
لكن فعلا السعر دا ما يجبش 405 نضيف

[Nader]

السعر دة هيجيبلك 405 موديل بعيد جداً خصوصاً لو برستيج 2000 سي سي

لذلك فانا افضل التمبرا.

[FLYINGPEUGEOT]

البيجو بالتاكيد افضل
لكن فعلا السعر دا ما يجبش 405 نضيف

السعر دة هيجيبلك 405 موديل بعيد جداً خصوصاً لو برستيج 2000 سي سي

لذلك فانا افضل التمبرا.

زى ما نادلر باشا وحازم باشا قالوا كده بالظبط
السعر دا يجبلك واحدة الفين لكن اشك الف مرة فى حالتها !!!!

السعر دا يادوب يجبلك واحدة موديل 90 92 بردو لكن 1600 cc

كمقارنة عامة بين السيارتين...فانا شايف ان التمبرا هتتظلم نظرا لاختلاف الفئه (مواتير)

وال 405 تكسب طبعااااااااااااااااااااااااااااااااا

حضرتك بردو روح بص عليها يمكن والله اعلم ودا صعب ان حالتها تتطلع كويسة
لو كويسة يبقى على البركة ...غير كدة وبالمبلغ دا فالتمبرا فعلا مناسبة جدا

[فادى]

انت بتقارن بين عربيتين انا بحبهم جدا, عشان كده صعب انى اختارلك واحدة,
بالنسبة للبيجو 405 فانا سقتها كتير (النسخة المصرية و ليست الفرنسية) و أقدر اقولك باختصار :
- تسارع جيد و لكن ليس مبهرا(ده لموتور ال1600 سى سى معرفش ال2000 ايه نظامه).
- اعتمادية بتفوق, و قوة تحمل.
- مساحة كبيرة فى الخلف و فى الأمام.
- راحة تامة فى جميع ظروف القيادة, و راحة تامة فى السفر و ثبات جيد على الطرق السريعة لحد سرعة ال160 كم/ساعة.
- فى المنحنيات ثباتها محل استفهام, اذ غالبا ما تترنح يمينا و يسارا فى المنحنيات, لكن ربما تكون النسخة المصرية تعانى بشكل خاص من هذا العيب نتيجة لارتفاع نقطة ثقلها عن شقيقتها الفرنسية.
النسخة الفرنسية ربما تكون أكثر ثباتا.

بالنسبة للتمبرا, فأنا مسقتهاش لكن أقدر أقولك الأتى من السمعة المكتسبة عنها و من مواصافتها :
- المحرك غالبا سوف يكون أكثر عصبية من محرك البيجو, كما أن الفيات تمبرا أخف وزنا, مما سوف يجعلها أكثر رشاقة و تسارعا فى الأغلب.
- الفيات تمبرا ربما تكون أكثر ثباتا فى المنحنيات, كما أنها أكثر رشاقة بالطبع و مناسبة أكثر للمناورات الخطيرة, بحكم أنها ايطالية.
- الفيات تمبرا أقل راحة و حجما, كما أنها تنتمى الى فئة حجمية( عائلية صغيرة) أقل من البيجو 405( فئة عائلية كبيرة).

فى النهاية فان التمبرا أكثر عنفوانا و شبابا, و البيجو أكثر راحة و كلاسيكية و أكبر حجما, و لك أن تختار, و كلا السيارتين معمرين جدا و اعتماديتهم ليست محل جدال, لكن ربما تتفوق البيجو قليلا من ناحية الاعتمادية و طول فترة الخدمة.
و برضو لازم نذكر انو البيجو 405 صعب تتقارن بالتمبرا لأن البيجو 405 فئة أعلى, و يقابلها فى وقتها الكروما من فيات أما التمبرا فكانت تقارن بال309, و طبعا التمبرا تكسب بمراحل.

[FLYINGPEUGEOT]

ياباشا اكثر عنفوانا اية وتسارع اية
احنا مش بنقارن ال 405 ال 1600 بال تمبرا ال 1600
دى مقارنة بين ال 405 ال 2000 cc والتمبرا ال 1600
يعنى لا يوجد وجه للمقارنة بينهم كقوة وتسارع اصلا
وبرغم ثبات التمبرا الا انها وعن تجربة شخصية
سيئة جدا فى المنحنيات
...........................

احنا لو هنقارن التمبرا
ممكن نقارنها بالشاهين
وفى الحالة دى ال 405 هى اللى تكسب بردو !!

[kareem_Ashmawy]

فى المنحنيات ثباتها محل استفهام, اذ غالبا ما تترنح يمينا و يسارا فى المنحنيات

مش فاهم قصدك حضرتك ايه ... ممكن حضرتك توصف الموضوع ده اكتر
عشان احنا معانا العربية و هاريها ملفات و مش حاسس الحكاية دى

[ahmed_su]

من حكم امتلاكى وقيادتى للتمبرا لمدة 4 سنوات ثبات السيارة مافيش احسن من كده وعمرها ماعملت اى مشكلة فى المنحنيات بالعكس كانت رائعة

البيجو طبعا رائعة بس لم اقم بقيادتها فا مش هافيدك فيه

وهنا احد الاعضاء كان بيسئل عن التمبرا وجوبته على سؤاله كما يلى:

بقيادتى للتمبرا لمدة 4 سنوات اكون قد كونت حكما على اداء هذه السيارة

الفيات التمبرا هى سيارة ايطالية تم انتاحها بديلا عن السيارة التيبو بدء من سنة 1990 حتى 1996 توقف انتجاها فى ايطالية وان ظلت تصنع فى تركيا والبرازيل حتى 2001 وكانت تجمع فى النصر للسيارات حتى سنة 2000

ويوجد منها موديلان نوع ذو عدادت عادية واخر ديجتال
والسيارة ذات محرك متميز 1600 سى سى يتسم بالقوة والهدوء خصوصا السيارات المصنعة فى ايطاليا عكس المجمعة فى مصر لان محركها مش اد كده بالمقارنة بالايطالى
السيارة ذات تصميم جيد من ناحية الاتزان ودينامكية الهواء وان كان يعبها ارتفاع الشنطة وصعوبة الرؤية الخلفية فى حالة الركن
الصالون واسع ومريح جدا وبقليل من الصرف يبان انه فخم
التكيف فيها ممتاز من ناحية التبريد بس عيبه انه بيسحب جزء محترم من قدرة الموتور بيبان اوى فى السحب
تسارع العربية مش جامد بطىء نبسيا بس العربية بتجرى كويس اوى
استهلكها فى البنزين منقدرش نقول انه موفر بس تقريبا زى اللانوس فى السفر انما جوه البلد عالى زى الماتريكس
الفتيس يدوى خمس سرعات يعتبر ناعم احسن من الاكسيل على سبيل المثال وفى منها موديلات اتوماتك بس الحقيقة مجربتهاش
ويوجد منها نوعين واحد كربراتير ودى اللى عندى والتانى انجكشن بس مش متعدد النقاط والاشعال الكترونى رائع
يعنى لا ابلاتين ولاكوندنسر ولا كلام فاضى والشفاط بها اتوماتكيا تبعا لدرجة حرارة الموتور
والعربية فيها شوية تجهيزات كهربائية والكترونية كتير شوية وبتتطلب واحد كهربائى بيفهم كويس علشان يعمل فيها اى شغل والعربيات المزودة بتبلوه ديجتال بتبقى مشكله اكتر شويتين من العادى وان كان الاتنين شكلهم حلو

قطع الغيار ياسيدى متوفرة بس مش عند كل الناس ناس بعينهم فى التوفقية وشارع شمبليون عتدهم كل حاجة اسعرهم اعلى بحاجة بسيطة عن الفيات عموما بس تعتبر فى رينج الهيونداى والدايو
وفى منها التركى والبرازيلى والمكسيكى وفيه حاجات صينى ابعد عنها هى والايطالى لانه مش ايطالى ولا حاجة

العربية هادية على الطريق ماتسمعش دوشة الموتور والعجل خصوصا اذا كنت قافل الازا ز ومشغل التكيف

العربية فيها كل الكماليات باور -زجاج كهرباء وفيه بعض الموديلات المرايات بتتظبط كهرباء


العفشة فيها غريبة شوية بس متينة ووزنة العربية كويس عيبها مثلا ان لو عاوز تغير جلبة مقص يبقى المقص كله لازم يتغير لانه يعتبر حته واحده والتعليق عموما يعتبر ناشف حاجة بسيطة بالمقارنة بالعربيات الحديثة وده بتحس بيه وانت سياق بس القاعدة ورا باشا اخر راحة بيستمتع بيها اللى قاعد فى الخلف وكمان فيه فتحة للتكيف علشان الركاب فى الخلف تقدر تشغلها اوتقفلها حسب الحاجة

[hazem_khidr]

فى النهاية فان التمبرا أكثر عنفوانا و شبابا, و البيجو أكثر راحة و كلاسيكية و أكبر حجما, و لك أن تختار, و كلا السيارتين معمرين جدا و اعتماديتهم ليست محل جدال, لكن ربما تتفوق البيجو قليلا من ناحية الاعتمادية و طول فترة الخدمة.
و برضو لازم نذكر انو البيجو 405 صعب تتقارن بالتمبرا لأن البيجو 405 فئة أعلى, و يقابلها فى وقتها الكروما من فيات

كلام مضبوط يا باشمهندس فادي:)

الفيات التمبرا هى سيارة ايطالية تم انتاحها بديلا عن السيارة التيبو بدء من سنة 1990 حتى 1996 توقف انتجاها فى ايطالية وان ظلت تصنع فى تركيا والبرازيل حتى 2001 وكانت تجمع فى النصر للسيارات حتى سنة 2000

تصحيح بسيط يا احمد باشا:)
التمبرا خليفه الريجاتا
التيبو عباره عن النسخه الهاتش باك من التمبرا.
مثال الفيات ريتمو و ريجاتا
فيات برافو و ماريا.

[ahmed_su]

تصحيح بسيط يا احمد باشا:)
التمبرا خليفه الريجاتا
التيبو عباره عن النسخه الهاتش باك من التمبرا.
مثال الفيات ريتمو و ريجاتا
فيات برافو و ماريا.

صح ياباشا

غلطة استعجال هى فعلا خليفة الريجاتا وبنيت على شاسيه التيبو سنة 90 هى ولانشيا ديدرا والفارميو 155
وفيه منها نسختين السيدان والستيشن واجن وكانت بتنزل بعدة محركات

1.4 SOHC ويعطى 76 حصان
1.6 SOHC ويعطى 84 حصان
1.8 DOHC ويعطى 109 حصان
1.9 SOHC ديزيل 90 حصان
2.0 DOHC يعطى 113 حصان
2.0 DOHC 16 V ويعطى 148 حصان (حقن متعدد النقاط)

معلش الموضوع قلب للكلام على التمبرا اصل العربية دى بحبها بجد