مقارنه غريبه بين البيجو301 والاوبترا

[simon659]

سؤال يمكن غريب 301 ولا الاوبترا طبعا العاديه مش الصيني
من حيث الراحه
من حيث الماتور
من حيث العافشه
من حيث الفتيس
استهلاك البنزين
من حيث الثبات وهل العفشه مالتي لنك ولا ايه في البيجو
وهل البيجو مصفحه ولا لا
وهل قطع الغيار متوافراه بره الوكيل
طبعا انا مش بقارن عربيه بعربيه يعني الاوبترا انا شايفها من غير مشاكل وانها اعتماديه جدا وعافشه مالتي لنك وعاليه عن الطريق
والبيجو انا اولا ناوي اجيبها زيرو فافي نقط انا بظبطها في دماغي قبل ما اجيبها البيجو اكيد فرامل احسن علشان abs طيب وبعدين التقفيل اكيد البيجو احسن انما الثبات والراحه والماتور والاعتماديه
معلش يا جماعه محتاج مساعه واراء علشان الزيرو مافيهوش هيذار ومحتاج
وياريت اول فئه وصلت بكام دلوقتي اوتو

[simon659]

وموضوع ناتشه الفتيس يا جماعه بتاع البيجو ده ايه انا سمعت عنه كتير ده عيب ولا نظام ولا احساس

[amrelsaqqa]

احسن واحد يفيدك في الموضوع ده : د.عماد صلاح
معاه الاتنين زيرو ويقدر يقارن بينهم كويس

[dodo2000]

الفرامل و الايرباج و الايمبولايزر لصالح البيجو غير كده الاوبترا افضل منها فى كل حاجة

[raad13]

لو معاك فلوس ال301 اكيد لازم تجيبها طبعا خصوصا موضوع الفرامل و الوسائد الهوائية مفهمش هزار!! ده غير ان فيه فارق كبير في التقفيل و الكماليات و الحجم و كل حاجة

[J A G U A R]

احنا فى انتظار تقرير شامل بين العربيتين من الدوك عماد

[simon659]

واحنا في انتظار انا مش بقارن عربيه بعربيه
انا بقارن نقط بنقط
الي هما ثبات
راحه في العافشه
راحه داخليه
تكييف وده بصراحه انا شايفه هيكسب في الاوبترا

[S O P H O S]

انا شايف الاعتمادية لل اوبترا
والراحة والكمليات ووسائل الامان للبيجو
وفأنتظار التقيم بالتأكيد ..

[abou-yahia]

احسن واحد يفيدك في الموضوع ده : د.عماد صلاح
معاه الاتنين زيرو ويقدر يقارن بينهم كويس

فعلا
اقدر واحد حيديك راي موضوعي هوه الدمتور عماد

[د.ياسر]

متابع

[Mohamed_301]

البيجو معاياا ماشاء الله جميله جداا
والاوبترا ركبتها كتيير جدا وجميله جداا وكنت هجيبها خلاص بس لاقيتها ب 123 الف قولت حرام واللى شجعنى ابعد عنها انها بتتسرق والصاج ضعيف وبقالها اكتر من 7 سنين وعايز اجدد رغم ان شكلها عاجبنى جدا بس الحمد لله انى جيبت ال 301
وصلى استخاره وربنا يوفقك فى الاختيار

[د.عماد صلاح]

مسااااااء الخير .....هاوضح لكم المقارنه بين العربيتين ..بطريقه مختصره لان موضوع المقارنه كاملا محتاج وقت لاني عايز اجرب التوكيل
التكييف ....الاوبترا تكييفها احسن بكتير وكمان مابيحملش علي الموتور زي البيجو
الثبات ....الاوبترا احسن خاصه في الملفات
التقفيل ...خامات الاوبترا احسن و اماكن التخزين اكتر
السحب ...الاوبترا احسن تحت ال 60 و البيجو احسن فوق ال60 ...موتور البيجو والاوبترا صوتهم عالي
الفتيس ...فتيس العربيتين كويس و محسيتش بموضوع النتشه بتاع البيجو
الوسع....حسابيا البيجو المفروض تبقي اوسع بس انا راكن العربيتين في جراج واحد وفتحتهم الاتنين و بصيت جو وقعدت في كل الكراسي والنتيجه الاوبترا اوسع خاصه بالعرض
الكراسي ...كراسي البيجو اريح
وضعيه القياده ...البيجو اعلي من الاوبترا في وضعيه القياده بس دواسه البنزين جنب الفرامل بطريقه مستفزه
الصاج والدهان ...البيجو احسن
الفرامل ..البيجو احسن
الامان ...طبعا البيجو احسن
التعليق الخلفي البيجو تورشن بيم الاوبترا مالتي لينك وده يفسر ثبات الاوبترا في المنحنيات
استهلاك البنزين ...واحد
الشنطه ...البيجو اوسع حاجه بسيطه
ملاحظه ...اللاكصدام الامامي للبيجو ضعيف جدا جدا جدا
الاعتماديه ..الاوبترا ممتازه البيجو لسه ماعرفش

طب نصيحتي ليك ايه ...الاوبترا بقت ب 123 الف وده كتير جدا ...هات البيجو ...بس موضوع استهبال التوكيل في موضوع المصنعيه و تغيير كل حاجه بدري يقلق الصراحه

[د.عماد صلاح]

البيجو مصفحه كلها من تحت
سعرها في التوكيا 124 الف بس تحجز و تستني 3 اشهر لو عايز فوري تعمل من 129 الي 132 الف انت وشطارتك في الفصال

[د.عماد صلاح]

كمان في حاجه في البيجو ان استجابه دواسه البنزين بتتاخر ثانيه كده

[amrelsaqqa]

ههههه يعنى حضرتك يا دكتور طلعت الاوبترا احسن في حاجات كتير جدا وفي الاخر تقول له هات البيجو ازاى بس

على فكرة انا بحب الاوبترا جدا لو كان فيها وسائل امان على الاقل خالص ايموبلايزر كنت جبتها والله بس انا معاك في كل اللى قلته
مشكلة الاوبترا بالنسبة لى ان ضعف الفرامل وانعدام وسائل الامان ﻻغى ميزة الثبات خالص


و ايه رأي حضرتك في احساس العفشة كنعومة وكدة في الاتنين ؟