مقارنه بسيطه بين البيكانتو 2014 و السانديرو 2014

[mohammedmnmz]

المقارنه دي مقارنه بسيطه و مبدئيه و اكيد فيه اللي يعمل مقارنه احسن مني بس انا قولت افيد الناس باللي عندي و يا رب الناس المحتارين يلاقو ليهم جواب هنا
طيب نقول بسم الله الرحمن الرحيم
احنا هنتكلم على اعلى حاجه في الاتنين
يعني عن البيكانتو EX FO و السانديرو high line

1-السعر
البيكانتو 99900
السانديرو 97000
(السانديرو تكسب)

2-المحرك و عدد الاحصنه
البيكانتو 1200 سي سي 87 حصان
السانديرو 1600 سي سي 90 حصان
(السانديرو تكسب و دا بيفرق قوي على السريع و لما تيجي تشغل التكييف)

3- ناقل السرعه
البيكانتو اوتوماتيك
السانديرو مانيوال
(البيكانتو تكسب عشان الحر و الزحمه اللي احنا فيها دي)

4- الامان
البيكانتو فيها ايموبلايزر و كشاف ضباب بس (طقبا لموقع اوتوماك فورميلا)
السانديرو فيها ABS ESP كشافات ضباب و ايموبلايزر و اتنين اير باج
(السانديرو تكسب قوي عشان دا الامان و من اهم الحاجات في العربية)

5- الثبات
نظريا ثبات البيكانتو المفروض اعلى لقربها من الارض لكن اللي يأكد كده احد ملاك البيكانتو و عموما السانديرو ثابته تماما لغاية 150 و عن تجربة
(اظن النقطه دي تعادل)

6= ابعاد العربية
من غير ارقام واضح جدا ان السانديرو اكبر من البيكانتو و اعلى و دا يفيد في المطبات جدا
(السانديرو تكسب)

7- الشكل الخارجي
دي مسألة ازواق مع اني اظن ان البيكانتو احلى بس حريمي قوي
(تعادل)

8- التقفيل
البيكانتو عربية محترمة جدا جدا في تقفيلها و خاماتها و انا حسيتها لما جيت اقفل بابها و باب السانديرو لا بصراحه هناك فرق كبير
السانديرو تقفيلها زبااااااااااااااله و الخامات مش قد كده
(البيكانتو تكسب اكيد)

9- اتساع الصالون الداخلي
السانديرو اوسع كتير و هي اساسا عربية عائلية و تاخد من الحبايب خمسه غير السواق مستريحين (لو رفيعين) و ممكن تقعد عيل صغير في الشنطه عادي
(السانديرو تكسب)

10- السحب
نظريا السانديرو اقوى في السحب نظرا لمحركها الاقوي بس احنا بنشوف ناس على الطرق بالبيكانتو و بيسحبو كويس جدا فدي اللي يفصل فيها حد جرب البيكانتو اما بالنسبه لسحب السانديرو فهو كويس و مرضي جدا
(السانديرو تكسب نظريا لحين التأكد)

11- الكماليات
الاتنين فيهم جميع الكماليات بس السانديرو تتفوق في وجود Bluetooth في الكاست ممكن تعمل منه مكالمات بعد ماتربطه بالموبيل(خاصيه فشيخه و مريحه جدا) دا غير كمبيوتر الرحلات
( السانديرو تكسب)

12-التجهيزات الخارجية
نفس التجهيزات تقريبا بس السانديرو فيها ياركينج سينسور
(السانديرو تكسب)

13- استهلاك البنزين
البيكانتو اوفر نظرا لماتورها ال 1200 سي سي
(البيكانتو تكسب)

14- سعر اعادة البيع
البيكانتو اظن انها مطلوبة اكتر شويه من السانديرو بس بصراحه مش متأكد من الموضوع دا
(البيكانتو تكسب لحين التأكد)

15- اسعار قطع الغيار
في نفس الرينج (تعادل)

النتيجه في النهاية 8 للسانديرو 4 للبيكانتو و 3 نقاط تعادل

و يا رب اكون قدمت موضوع مفيد
و شكراااااااااااااااااااااااااااااااااااااااااااا

[blazer]

مقارنه جميله
بس اعتقد السانديرو هتنزل كمان شويه بفتيس اوتوماتيك و ماتور اقوى " تقريبا 110 حصان " + اوبشنز زياده زى الجنوط و الفرش و الكاسيت هيتغيروا " و اعتقد وقتها هتبقى السانديرو صفقه رابحه اكتر واكتر خصوصا مع الاسعار العبيطه الى فى السوق الى وصلت البيكانتو 100 الف

[mohammedmnmz]

مقارنه جميله
بس اعتقد السانديرو هتنزل كمان شويه بفتيس اوتوماتيك و ماتور اقوى " تقريبا 110 حصان " + اوبشنز زياده زى الجنوط و الفرش و الكاسيت هيتغيروا " و اعتقد وقتها هتبقى السانديرو صفقه رابحه اكتر واكتر خصوصا مع الاسعار العبيطه الى فى السوق الى وصلت البيكانتو 100 الف

الف شكر يا ريس
و يا رب يظبطو السانديرو لانها فعلا عربية حلوه

[S O P H O S]

وجهة نظر فالمقارنة جيدة

[eng.m7md.ali]

تقرير جميل وشامل

تصحيح بسيط

اعتقد ال سانديرو مفيهاش abs ولا ebd بالنسبة للموتور ال 1 كامة "90 حصان" ممكن حد يأكد المعلومة دي من ملاكها

وطبعاً مفيهاش esp زي ماحضرتك كاتب

[eng.m7md.ali]

تقرير جميل وشامل

تصحيح بسيط

اعتقد ال سانديرو مفيهاش abs ولا ebd بالنسبة للموتور ال 1 كامة "90 حصان" ممكن حد يأكد المعلومة دي من ملاكها

وطبعاً مفيهاش esp زي ماحضرتك كاتب

[J A G U A R]

ناس كتير كانت محتاجه المقارنه دى
مشكور على الموضوع

[memo823000]

المعلومات الصحيحة
اللوجان والسانديرو والستب واى غيرت شكل بالكامل
فمواصفات السانديرو الجديدة اتغيرت تماما وهى فئه واحده دلقتى مانيوال وب 97000 جنيه
الشكل بقى احلى بكتييير والفرش وبقى فيه مخدع والاهم من دا كله الاستبن بقى فى الشنطه مش متعلق وكمان الزجاج بقى فى البيبان
الدهان اعلى ونازله مانيوال فقط دلوقتى 90 حصان واحد كامه ولكن حسنو من صوته نظرا بقى فيه عوازل حراريه فى الموتور وكمان بقى الكبوت على زراع هيدرولك
والتوماتيك بالموتور ال 110 حصان اعتقد على اخر السنه على حسب كلام التوكيل دا لو مغيرش كلامه
الاوبشن
2 ايرباج - abs - جنط اسبور 15 - سينسور للركن - مخدع - 2 مفتاح ريموت - بلوتوث - مثبت سرعه ومحدد سرعه - العدادات زى بتاعت الفلوانس الشكل 2012 و 2013
راديو سى دى عريض شيك جدا وفيه usb & aux
تكييف اوتوماتيك
يعنى مينفعش اقارنها بالبيكانتو
البيكانتو ميزتها انها اوتوماتيك وكوالتى على لكن اضيق من السانديرو وسيفتى اقل
والفئه ال 99000 حنيه
فيها جنط اسبور 14 ومقابض نيكل و2 مفتاح ريموت وفوانيس شبوره ومرايات كهرباء والكرسى بيعلا ويوطى و4 زجاج كهرباء

من الاخر اللى مش هيفرق معاه الفتيس يركب سانديرو او ستب واى الجداد وهو مغمض
واللى لازم واتوماتيك يبقى افضل حاجه البيكانتو
وشكرا

[Dr.zamalkawey]

مقارنه مفيده جداااااااااااااااااااااا تسلم لان الحيره كبيره وانا ناوى اشترى الاسبوع اللى جاى واحده منهم ان شاء الله

[El Prince]

اعتقد ان الاوتو لوحده سبب فاصل

[D . a .\ AYMAN]

نقطة بس أحب أتكلم عنها في الموتور بحكم إني حاليا لفيت عليهم هما الإثنين وجربتهم جنب بعض


السانديرو موتور 1600 سي سي ... وفي الآخر ناخد منه 90 حصان فقط (حسب البروشور) ... لأنه 8 صباب فقط كامة واحدة ... ده غير وزن العربية الأثقل لأنها أكبر في الحجم

في حين إن البيكانتو وزنها أقل بحوالي 150 كيلو تقريبا وموتور 1200 سي سي يعني توفير في الوقود وكمان قدرته برضه 87 حصان ... يعني الفرق فقط 3 حصان (حسب البروشور) على وزن أقل بكثير

ومن جوة البيكانتو إلى حد ما واسعة وتقترب من السانديرو كتير ... السانديرو الشنطة بتاعتها واكلة فرق الحجم كله تقريبا


وعلى فكرة القدرة الحقيقية للإثنين هي تساوي بالضبط 85.8 حصان مش الأرقام اللى كاتبينها دي خالص ... يعني الموتورين زي بعض بالضبط مع فارق بسيط في العزم لصالح السانديرو

بصراحة فرق المواتير بين الإثنين يخليني ما أجيبش السانديرو أبدا .. ليه أجيب موتور أكبر بيطلع نفس القدرة وعلى عربية وزنها أكبر ... حقيقي ده إهدار كبير لموارد الطاقة


أي عربية 1600 إنهاردة بطلع 110 حصان على أقل تقدير

وفي كمان السويفت ديزاير السيدان وكمان الهاتش باك موتور قوي زي البيكانتو 1200 سي سي وبرضه قدرة حقيقية 85 حصان ونفس الوزن تقريبا .. وواسعة من جوة زي البيكانتو تقريبا وسعرها هايكون في حدود 107 ألف للسيدان و 98 ألف للهاتش باك (الأسعار لسة غير محددة رسميا ولكنها من كلام بتوع المبيعات في التوكيل) وياباني تقفيل مصنع سوزوكي في الهند

[Ammpage]

البيكانتو الاتوماتيك بتستهلك بنزين ١١ لتر ل ١٠٠ كيلو دا مع استخدام التكييف ، من غير التكييف اقل استهلاك تقريبا ٩ لتر ل ١٠٠ كيلو ، ودي قيادة داخل البلد اغلبها زحمة .
البيكانتو خفيفة جدااااا علي الطريق ، تقفيلها جيد جدا و اعتمادية .