ارجو المقارنة بين شاهين 1600 و فيرنا 1600

[mohamed10]

ارجو المقارنة بين السيارتين من حيث قوة التحمل والاداء وعدم الحك فى المطبات والتحمل للمشاويير الطويلة يعنى فى حدود 100 كيلو يوميا وشكرا

[ابوحميد]

فيرنا طبعا
بس الميزة اللى فى الشاهين قطع الغيار المتوفرة والمنتشرة
واكيد طبعا الصاج والاكصدامات المتينة عكس الفيرنا
غير كدا كله فى صالح الفرنا
ثبات وسحب صاروخ

[amrrashed]

قوة تحمل واداء ومطبات واستعمال تقيل ومشاوير طويلة وبهدلة كمان يبقى الشاهين
دلع ورفاهية ونعومة وسحب واستعمال حنين يبقى الفرنا

وربنا يوفقك

[محمدايهاب]

قطع الغيار متوفرة في الحالتين سواء فيرنا أو شاهين بس طبعا الشاهين أرخص بكتتتتتتتتتتتتتتتتتتتير أنا عندي واحد صاحبي عنده شاهين بيدفع على تصليحها أرقام وهمية ( قليلة جدا)

[mina_ramsis]

الشاهين بتاعت شغل جامد بس مش بتاعت سحب و رفاهية و الكلام ده مع انها فيها عيب فى المساعدين اللى ورا اعرف اتنين اصحابى جايبنها زيرو و الاتنين غيروا مساعدين فى الضمان و اول ما هتشتريها هتغير اربع فرد كاوتش اما الفيرنا بتاعت سحب و دلع و الكلام ده كله بس عيبها انها واطيه و بتحك فى المطبات و انت محملها

[Hossam_Hassan]

هات الفيرنا و خد المطبات بالراحة، العملية دلوفتى مابقتش دلع بقت أساسيات، التكيف فى الولعة اللى احنا فيها بقى أساسى و القعدة المريحة بعد يوم شغل مهلك أساسية لأن أقل مشوار بياخد ساعة و الراحة فى السفر مع علشان تخطف يومين مصيف أساسى، مش تبقى محتاج يوم راحة من السواقة.

يوم بعد يوم معايير الدلع بتزيد و ربنا يقدرنا نلاحق على الأساسيات.

[sab3aawy]

تصحيح بسيط

باعتبارى مالك شاهين سابق وباعتبارى سقت الفيرا كتير انا حابب اوضح مجموعة من الملحوظات على كليهما بعضها فى صالح الشاهين وبعضها فى صالح الفيرنا لكن معظمها قد يختلف عما قاله الجميع:

الشاهين عربية سريعة جدا فى السحب وليست بطيئة كما يشاع، الفكرة ان فيه ناس كتير مش بتحب شكلها وبالتالى بتفترض بالتبعية مجموعة م العيوب فيها بناء على ان شكلها مش عاطفى

لو حبينا نقارن سحب الشاهين بسحب الفيرنا هنلاقى ان طلعة الفيرنا من السكون احسن من الشاهين، وسرعتها القصوى اكثر، لكن مجرد ما العربيتين اتحركو من السكون مش فارقة حاجة والتسارع تقريبا واحد حتى تصل الشاهين لسرعتها القصوى (160-170 حسب حالة السيارة) ووقتها الفيرنا هتعدى منها بقرق السرعة القصوى

تصحيح اخر لكن فى صالح الفيرنا هذة المرة، صاج الفيرنا ممتاز ، مختلف تماما عن الأجيال السابقة من نفس الفئة(اكسيل واكسنت) ، يكاد يكون مثل صاج الشاهين، كما ان اكصدامات الشاهين ضعيفة جدا وتتبهدل من اى خبطة

موتور الشاهين صوته انعم بشكل ملحوظ من موتور الفيرنا، على عكس ما يظن الكثيرين، مواتير فيات عموما صوتها ناعم جدا بالمقارنة بمعظم الماركات الكورى من نفس الفئة، لكن الفيرنا اسهل فى القيادة، بسبب ان عصا الفتيس اخف والدبرياج اخف

الديريكسون فى الإتينن (باور ستيرج) ومعقول جدا

قيادة السيارة الشاهين بتحتاج نقلات كتير بسبب ان المحرك مصمم اساسا ليعمل فى RPM عالية ونسب تخفيض الفتيس مش عالية ، لكن دة بيعطى لأداء السيارة طابع رياضى، بعكس الفيرنا القليلة فى طلبها للنقلات

فرامل الفيرنا افضل من فرامل الشاهين

ثبات الشاهين فى السرعات العالية افضل من الفيرنا، بشرط تغيير الكاوتش النسر والمساعدين الأمامية بمجرد استلام السيارة

قدرة الفيرنا على المناورة افضل من قدرة الشاهين

السيارتين فقيرتين من الداخل بالمقارنة بسيارات اليومين دول، ربما تكون الفيرنا احدث شوية لك فى النهااية السيارتين مش دلع اوى بالمقارنة باخر صيحات السيارات حاليا

العربيتين على فكرة عربيات شغل، والإتنين الواحد يقدر يعتمد عليهم فى الشقاء

الصالون واحد فى الإتساع لكن شنطة الفيرنا أوسع

معظم قطع غيار الشاهين الخارجية ارخص ، لكن قطع غيار الميكانيكا تقريبا واحدة

الفرق الأساسى اللى انا شايفه بين السيارتين هو فرق برستيج لا أكثر، لكن الفروق الادائية وفروق المتانة ليست بالصورة التى يتصورها البعض، الفيرنا امتن مما يعتقد الجميع والشاهين اسرع وانعم مما يعتقد الجميع، الفرق الذى اراه اساسيا هو البرستيج لا أكثر، السوق المصرى قرر اعتبار ان راكب الفيرنا هو رجل ايسر حالا من راكب الشاهين، ولذلك انا لو هاختار واحدة منهاما هختار الفيرنا، لكن فيما عدا ذلك الفروق مش واسعة

[mohamed10]

شكرا جزيلا على الردود الرائعة واتمنى لكم دوام الصحة والعافية

[ahmed_gamal777]

تسلم الايادى على المقارنة الرائعة
مع انها ختا متاخرة 5 سنين