مقارنة بين لوجان 2011 وباسات 2000

[mezoworld]

اولا انا معايا لوجان 2011 مانيوال ورخصتها انتهت ونا اشريتها بتوكيل مش بعقد مسجل
وطبعا لازم اعمل عقد مسجل واسجلها باسمي وافحص
ولكن معروض عليا باسات موديل 2000 اتوماتيك فول اوبشن بحوالي 67 الف والعربيه حلوه
وعربيتي حبيت ابيعها جايبالي 57 الف

رائيكم ابيع اللوجان واجيب الباسات رغم فرق المسافات في الزمن بينهم
والا اخلي اللوجان معايا

منتظر ردود الاعضاء

تم تعديل العنوان ليناسب محتوى الموضوع
وفقاً لقواعد المنتدى
وتم النقل الى القسم المخصص
مشرف ب 5

[ameerahmad]

رأيي خلي اللوجان معاك

[mezoworld]

طيب وجهه نظر حضرتك ايه ممكن اعرف بعد اذنك

[K_E]

عربية موديل سنة 2000 يعني ماشيه 14 سنة
ماتعرفش صاحبها كان بيعمل ايه في صيانتها ولا كان بيمشي بيها ازاي

كل قطعة فالعربية ليها عمر افتراضي

انا شايف تخلي عربيتك احسن

[Ahmed Saad]

بص الحاله هي اللي تفرق يعني لو الباسات حالتها حلوه تبقى أفضل مليون مره من اللوجان وعلى فكره الباسات دي قطع غيارها أرخص من اللوجان وقطع غيارها كتير وقعدتها وركوبتها أفضل من عربيات 2014 انا معايا العربيه وبجيب بيها ال 200 عادي وثباتها ممتاز دي كفايه أن اودى هي اللي عاملاها بس السعر ده للعربية دي يبقى هتصرف عليها شويه لأن النضيف منها بيتكلم في السبعينات بس في حاجه العربيات الالمانى بالذات مابتعجزش يعني الموديل مش بيفرق معاها يعني عندك الزلموكه موديل 86 وتحط على العربيات الجديده كلها وعلى فكره الباسات دي عليها ضمان 13سنه على البودي بتاعها ضد البارومه وهي كعربيه عربيه متكلفه ومعموله بمزاج وبرضه علشان ماتلبسش خليك في اللوجان واهو اللي تعرفه احسن من اللي متعرفوش واللوجان مش وحشه اوى يعني توكل على الله واستخير ربنا وشوف هتعمل ايه وأي استفسار انا في الخدمه

[mezoworld]

جزاك الله خيرا
ولكن معلومه انا مش مرتاح ي اللوجان المانيوال تعبني وخاصه ظروف عملي في وسط البلد
كمان في حاجه نسيت اقولها اني ناوي اشتري زيرو بس بعد سنه من الان
فلو فيها رخامه وحضراتكم اهل خبره مني
ممكن اعرف اعاده البيع لمين تكسب ؟

[mezoworld]

وياريت تقولي علي عنوان مركز الخدمه اللي بيقولولي عليه في جسر السويس ده علي اساس انه اقرب ليا
مع انه بعيد لاني ساكن في المقطم بس اللي اعرف اروحه احسن من اللي معرفش

[Ahmed Saad]

بص ياسيدي الباسات الفتيس بتاعها ممتاز جدا ومافيهوش أي مشاكل بس اهم حاجه تغير الزيت بتاعه كل 60000 كم وبالنسبه لإعادة البيع الباسات ضايعة ومحدش بيشتريها غير اللي غاويها لأنها عربيه محترمة وده مش مطلوب في مصر وعلى فكره الباسات دي قطع غيارها أرخص من الانسر البوما جديد واستيراد عدا طقم المقصات لأن فيها 8 مقصات ألومنيوم اماميه فالطقم بيعمل 4000 ج جديد و 1200 استيراد دي أغلى حاجه فيها وكل قطع غيارها رخيصة وحلوه ومعمره بس لو عاوز تركب حاجه ألماني وليها اعاده بيع حلوه ومطلوبه هتزود شويه وتجيب اوكتافيا a4 علشان ليها سعر بيع ومش هتخسر فيها وهتبيعها زي الكورى والياباني بس الباسات لو دماغك فيها يبقى أكشف عليها كويس موتور وفتيس وعفشه ولو تمام توكل على الله بس اعمل حسابك أنها هتقرفك شويه في بيعها ده غير انك لو ركبت الموديل ده من الباسات نضيف مش هتعرف تركب بعدها أقل من ألماني حتى الياباني هتحس بفرق لو ركبته وبالنسبه لمراكز الصيانة عندك هاني اللي ورا حديقه بدر في جسر السويس ده أستاذ بس مصنعيته غاليه شويه بس ده يتراحله في الحاجات التقيله أي حاجه تانيه مقدور عليها وعموما هاني ده أفضل مركز لصيانة الفولكس عموما

[محمود سامح]

ممكن تشوف حاجة رينو كاملة

[mezoworld]

اشكركم علي ردودكم انا هصلي استخاره وبجد نفسي اركب الماني وكل مره بخاف وبروح اشتري عربيات اي كلام نفسسسسي اركب الماني والله بس كتر خيركم علي المعلومات القيمه جزاكم الله خيرا
طيب متعرفش الكشف علي العربيه عند هاني بكام ولو في حد قريب تعرفه يكشف علي العربيه ياريت تقولي

[svneleven]

رأيي طالما هتجيب زيرو كمان سنة يبقي مالوش لازمة تجازف في الباسات و كمان لما تيجي تبيعها هتتعب زي ما الأعضاء ذكروا لحضرتك. كمل السنة بالطول و العرض و حوش فلوسك و هات حاجة زيرو الا لو هتخلي الباسات معاك علي طول يبقي تكشف عليها و تجربها و تتوكل علي الله.

[hilal]

انا انصحك لو الباسات بحالة جيدة
توكل على الله ، وسوف تشعر انك كنت راكب علبة صفيح
ولن تركب بعد الالماني الا الالماني
دي نصيحة من واحد جرب رينو ميجان (مش لوجان) وغيرت للالماني
فرق السما للارض

[automea]

خليك في عربيتك

[drcobra]

لا خليك فى الرينو ان شاء الله تعيش مش اقل من 3 سنين مرتاح
لو انت غاوى فخامة وقصادها وجع قلب روح للباسات

[ahmedfouad]

لا خليك فى الرينو ان شاء الله تعيش مش اقل من 3 سنين مرتاح
لو انت غاوى فخامة وقصادها وجع قلب روح للباسات

كلام مظبوط
وخلى بالك العربية الباسات رغم فخامتها
ممكن تكرهها فعلاً ... وهتصرف عليها
وعمرها ما هترجع لحالتها الاصلية مهما عملت
ربنا معاك