سعدوني محتار بين اوبترا 2014 اوتو و كيا ريو 2014 lx اوتو

[Amgad Osama]

. سلام عليكم كل سنه وانتم طيبين

انا بقالي فتره محتار جدا بين اوبترا 2014 الشكل القديم اوتوماتيك و كيا ريو 2014 اوتوماتيك اول فئه ال LX

اولوياتي هي:
1. عربيه حماله اسيه لان انا مشوايري كتير ونص مشاويري فالزحمه وسط البلد والنص التاني طرق سريعه وبعمل فالسنه حوالي 30 ل 35 الف كيلو. فعايز عربيه تستحملني
2. قطع غيارها تكون فالمعقول .
3. تكون معقوله فالبنزين.
4.وطبعا الشكل بس انا هخرجه مالحسبه عشان عارف انها فصالح الريو.

فدلوقتي قدامي اوبترا 2014 زيرو اوتوماتيك فيها ايرباج واحده والدركسيون مالتي ومفهاش abs ب120 وطبعا مستكترهم عالاوبترا الشكل القديم.

ولا احط عليهم 10000 كمان واجيب الريو اوتوماتيك اول فئه. بس سؤالي هل هتستحملني.
مع العلم اني مش ناوي ابيع غير بعد 6 ل 7 سنين

فمحتاج مساعدتكم معايا لان فعلان محتاج عربيه ضروري جدا
وشكرا

[merosss]

الاوبترا موضوع البنزين دة مش فى صالحها ولا الشكل ....يس الحجم وقطع الغيار وبعد كدة سهولة الصيانة للاوبترا ميكانيكية الدايو بيشتغوا فيها كمان بعد الضمان على الطرق السريعة الاوبترا ثابتها كويس معرفش الريو اخبارها اية

[J A G U A R]

فى الاستحمال وقطع الغيار والسفر يعنى محتاج ثبات الاوبترا هاتبقى احسن

استهلاك البنزين قريبين من بعض بس ممكن يكون فى صالح الريو

الشكل . . ريو

[Yusefabouelnga]

١-الريو معايا و هي فعلا بتستحمل السفر و الزحمه و بسافر بيها اسكندريه رايح جاي و بعديها اعمل مشاوير تانيا ولا الهوا ،و الاوبترا برضوا مع واحد صحبي و بتستحمل كل حاجه برضو بس مش نعمه زي نعومه الريو و في التكييف و الراحه الريو احسن ٢-قطع غيار الاوبترا ارخص و متوفره اكتر برا و التنين اي حد بيشتغل فيهم ،بعد الضمان يعني.
٣-استهلاك البنزين : الريو معايا بتعمل مبين ٤٠٠-٤٦٠كيلو في التنك مع العلم ان الريو التنك بتعها ٤٢ لتر تقريبا مش فاكر كويس ،يعني تنك صغير ..الابترا معرفش استهلاكها اد اييه.
٤-و الشكل طبعا الريو خصوصا الهاتشباك!
من الاخر بعد مركبت الريو و بعديها الاوبترا هو مفيش مقرنه الريو افضل كقاعده و ركوبه و انعم و صوتها هادي و تيجي تشد و تقلب للتيبترونيك العربيه بتقلب معاك وحش و عمرك متصدق انو ماتور ١٤٠٠ ، و الاوبترا عند صاحبي و العربيه مريحه و تكيفها كان حلو ، صاحبي ده من النوع المفتري يعني دريفتات و شد و بيهلك العربيه للصبح و العربيه ماشاءالله مبتقلش لاء
و اتمناه اني اكون ساعدك في الاختيار ..

[Amgad Osama]

متشكر جدا لمساعدتكم يا شباب

[Omar Mahmoud]

كيا ريو بس اعتقد الفئة دي مفيهاش abs لكن بردو الكيا تتفوق

[ahmzd]

الأوبترا حمالة أسية وحمار شغل فعلا

[Amgad Osama]

انا بصراحه بميل للكيا ريو اكتر رغم اني عارف ان الاوبترا اقوى بس برضو مفيش حد اشتكى من الريو فانا ميال ليها خصوصا انها اول عربيه ليا بعد اللادا فعايز شويه دلع حتى لو فاضيه بس شكلها حلو وبرضو هتستحملني..

لكن لو حد يعرف عيوب فالريو غير العيوب اللي احنا عارفينها ياريت ينورني يا شباب انا ان شاء الله نازل بعد العيد اتفرج عليهم فالمعرض اللي فمول العرب وربنا يسهل..

وشكرا لمساعدتكم

[ah-elgendy]

الاوبترا القديمه اتو لسه موجوده اصلاااااا؟

[J A G U A R]

الاوبترا القديمه اتو لسه موجوده اصلاااااا؟

اه موجوده .. ونزل منها دفعه فيها ايرباج ومالتى بس مش عارفين هاتستمر ولا هايقف انتاجها

[Amgad Osama]

اه لسه موجوده زيرو موديل 2014 ولما كلمت التوكيل قالي الكميه محدوده ومكنش عنده معلومات هتنزل 2015 ولا لأ

[ahmedmohamed7]

بصراحة .......شايف انك دافع مبلع مش قليل و مش مقتنع انك مش هتاخد عربية ولا فيها ABS و ايرباجز !!!! كان فيه فئة فى الريو lx +ABS +DAB كانت ب 134 الف ؟ اسال عليها و ربنا يقدم الى فيه الخير
بالتوفيق :)

[Amgad Osama]

بصراحة .......شايف انك دافع مبلع مش قليل و مش مقتنع انك مش هتاخد عربية ولا فيها ABS و ايرباجز !!!! كان فيه فئة فى الريو lx +ABS +DAB كانت ب 134 الف ؟ اسال عليها و ربنا يقدم الى فيه الخير
بالتوفيق :)

انا فعلا شفت الفئه دي والفرق مشبعيد معاك حق شكرا يا باشا
بس انا مشعارف في منها 2014 زيرو ولا لا اصل سعر 2015 قريت انه غلي جدا مشعارف الكلام دا صح ولا لا

[ahmedmohamed7]

انا فعلا شفت الفئه دي والفرق مشبعيد معاك حق شكرا يا باشا
بس انا مشعارف في منها 2014 زيرو ولا لا اصل سعر 2015 قريت انه غلي جدا مشعارف الكلام دا صح ولا لا

بصراحة ماعنديش معلومات عن 2015.... الليثي كان عنده استكوك منها من قيمة شهر.... بس دور أن شاء الله هتلاقى

[S O P H O S]

الاوبترا هتكون اقوي وقطع غيار افضل
الريو هتكون شكل افضل وانعم
بس الريو لو فاضية خالص بلاش منها