اختيار اول عربيه ليا فى حدود 130 الف

[Essam95]

السلام عليكم ورحمة الله وبركاته..

انا لسا متعلم سواقه جديد وكنت بدور علي عربيه سعرها كويس يعني حتي 130 الف بس اتوماتيك.. ويا ريت لو السعر اقل...
استعمالها عائلي جدا... بصراحه اللي شوفته منتشر شويه وكويس الي حد ما كان ال hyundai i10.. kia picanto.. kia rio... hyundai accent

ال i10 بصراحه حاسس انها متستاهلش 95 الف نهائي وانا مش عايز احط فلوسي في حاجه مش مضمونه ومش كويسه :(

اتمني مساعدتكم في اختيار حاجه كويسه لاني محتار جدا ، وفي نفس الوقت محتاج احدد بسرعه هجيب ايه لاني محتاج العربيه جدا.. شكرا والسلام عليكم




تم تعديل العنوان والنقل الى القسم المتخصص
م ب 3

[Ahmed.Essam]

مبدايا الهيونداي i 10 والكيا بيكانتو اقل من الاكسنت والريو واضيق ( هما اصلا عربيات مدينة )

وبالنسبة للاكسنت والريو
انا بفضل الريو بكل تأكيد ( مش عشان عربيتي كيا ريو ) انا قبل ما اشتري قارنت بينهم واختارت الريو
الاكسنت احسن في الموتور فقط ( 1600 بـ 124 حصان ) موتور اقوي من
الكيا ريو ( 1400 بـ 109 حصان )
انا بفضل الريو عن نفسي وعشان كده اختارتها على الاكسنت
وسمعت ان الاكسنت عفشتها الخلفية فيها مشاكل وبتتنطط جامد حاجة زي كده ( معنديش معلومة اكيده لكني عرفتها من 3 اشخاص اشتكوا منها لكني مهتمتش )

[Essam95]

متشكر جدا علي رد حضرتك.. انا فعلا محتاج حاجه عيوبها قليله ومش مؤثره.. بس هل الكيا ريو عمليه وكويسه ليا كأول عربيه? ولا الاحسن اني ابدأ ببيكانتو مثلا حاجه بسيطه يعني كاول عربيه..? في ناس بتقول كده :)

[Ahmed.Essam]

متشكر جدا علي رد حضرتك.. انا فعلا محتاج حاجه عيوبها قليله ومش مؤثره.. بس هل الكيا ريو عمليه وكويسه ليا كأول عربيه? ولا الاحسن اني ابدأ ببيكانتو مثلا حاجه بسيطه يعني كاول عربيه..? في ناس بتقول كده :)

العفو يا فندم :)
والله لو حضرتك عاوز حاجة عملية فالبيكانتو كويسة ما شاء الله هي صغيرة شوية بس اكيد هتبقى اي خبطة لا قدر الله فيها اهون من الريو والاكسنت خصوصا لو استخدامك للعربية داخل المدينة اكتر
مادام في امكانية تجيب عربية معقولة مؤقتا وبعدين تغير يبقى افضل طبعا

[J A G U A R]

ازاى عربيه عائليه وبتفكر فى بيكانتو و i10

الريو والاكسنت كويسين بس الريو مسمعتش حد اشتكى منها تقريبا

[Adnfalcon]

ارشحلك الريو طبعا
والأكسنت ممتازه فحاله واحده انك تروح التوكيل وتغير مساعدين خلفيين عشان متحسس ان العربيه بتنط من ورا

[zohdy]

ارشحلك الجين2
طبعا
موتور قوي 1600 سي سي
استخدام رياضي ماشي
استخدام عائلي العربية وسعة وفيها اماكن تخزين كتير
شيك والمظهر حلو كمليات ممتازة
وسعر منافس جديا
العيب الواحيد اللي فيها هو اعادة بيعها

[Essam95]

شكرا جزيلا علي الردّّ.. ساعدتوني جدا :) الف شكرّ

[SAWA1SAWA]

ريو قطع غيارها غالية والباقى ماينفعشى خالص وأقل من الريو
دور كويس على رينو فلوانس كسر زيرو 2012 - 2013 أو نيسان تيدا موديل 2013 ولو جديد يبقى خليك فى البيجو 301 أو اللانسر بومة
والأفضل تيدا مستعمل 2007- 2009 لأن تقفيلهم يابانى سعرها لو ماشية قليل حوالى 85 ألف أو أقل وإنت الأولى بفلوسك ومادام هتكشف على العربية فى التوكيل اشترى وقلبك جامد إذا كانت حالتها كويسه أو محتاجة مصاريف فى حدود ألفين جنيه بره التوكيل

نفس الكلام بالنسبة للسى 4 موديل 2007 -2009 السعر بين 70 إلى 85 حسب الموديل والحالة وما تقلق من حوار قطع الغيار والصيانة خالص كلام فشنك قطع الغيار متوفرة لأنها مشتركة مع بيجو 207 فى كل حاجة والصيانة فيه كذا واحد كويس


أه حاجة الكشف فى التوكيل أو مركز صيانة متخصص

ولو عزت أى استفسار أنا تحت أمرك

[merosss]

الاوبترا الشكل القديم الى نزلت ممتازة جدا ومناسبة و 120 الف اوتوماتك

[S O P H O S]

ريو او اوبترا شكل قديم