ما رأيكم بيجو 508 ام اوبل إنسيجنيا

[Waleed_Fathy]

السلام عليكم و رحمة الله
الاخوه الكرام
انا حبيت استأنس برأيكم فارجو الرد و الافاده
البيجو اوسع شويه في الشنطه
ارخص في مصاريف الصيانه و قطع الغيار
سعر أعادة البيع افضل

الإنسيجنيا اتزان افضل نسبيا و مواصفات فنيه افضل نسبيا
اسعار الصيانات و قطع الغيار اعلي و في بعض قطع الغيار السعر اعلي بكثير
سعر اعادة البيع سئ طبعا

انا نفسي ان العربيه تقعد معايا 3 سنوات علي الاقل و لو ربنا اداني الصبر لاكتر من كده هبقا سعيد جدا

انا عقليا بافضل بيجو 508
قلبيا بميل للإنسيجنيا

فما رأيكم و نصائحكم

[mostafa3000]

البيجو في رايئ افضل
متجربة في السوق محدش اشتكي منها
اعتقد وكيلها افضل من منصور
انتشارها هيخلي لها اكتر من مستورد قطع غيار واكسسوارات

[K.Ossama]

خلى بالك ان ال508 تلفيس ليفت نازل قريب خلاص

[DEVIL333]

الإنسيجنيا طبعا كفايا انها المانى

[samyyousef]

يا ترى هل سعرهما متقارب...تمنياتي بالتوفيق في الاختيار

[Adnfalcon]

العربيتين وهم ما شاء الله
وكيل بيجو افضل من اوبل طبعا
بصراحه قلبي بيميل دايما للانسينيا

[Omar Mahmoud]

الاتنين ممتازين
لكن انا بفضل الانسيجنيا

[Abdo Taha]

هو العربيتين شياكة جدا و عربيات محترمة بس ال 508 خلاص نازل منها facelift و انا معاك في موضوع قطع الغيار و التوكيل بس كعربية الانسجنيا احلى شكلاً اولا خصوصا بعض الالوان منها و ثاني حاجة فيها دلع احلى من جوة و عربية ملفتة عن البيجو ، بس الحوار ده عشان تقرره لازم تعمل استخارة و تجرب الاتنين لأن العربيتين اثبتو كفاءة عالية و افضل اختيارين في فءة ال200 الف

[J A G U A R]

الانسيجنيا انا ركبتها قبل كده ابهرتنى الصراحه

[monamize4]

خليك ف ال 508 ,,
العقل بيقول كدا و دا شئ مفهوش خلاف ان هى الانسب حاليا ف الفئة دى
رغم ان اى حد بيشوف الانسيجنا بتلفت نظره اوى لكن للاسف دا مش كفايه

اكتر حاجة بتشدنى ف الانسيجنا ,, ال headlight system
حاجة وهم و ال beam مركز بشكل رهيب ,, رغم ان عربيات VAG دايما مميزة ف الجزئية دى
الا ان ال headlight system ف الانسيجنا يضرب الباسات و الاوكتافيا بالجزمة

[Moratoz]

508 افضل زي ما حضرتك قلت في قطع الغيار وفي الصيانات الدوريه وفي التوكيل وفي اعادة البيع وفي انتشار السيارة والأحسن من دا كله لنها متجربه ومحدش اشتكي من حاجة .
اما الأداء فالطرق المصريه لن تسمح بالأحساس بفرق الأداء بين ال 508 والأنسجنيا بالأضافة علي سمعه منصور
لوتقدر تصبر استني الفيس ليفت بتاع البيجو لو مش فارق معاك توكل علي الله البيجو رائعه من كلام الأعضاء عنها ومن تجاربهم الفعليه .

[hany63]

الإنسيجنيا طبعا كفايا انها المانى

عندي مداخله بخصوص كفايه انها الماني
انا كنت زيك فاكر كده لغاية ما التجربه اثبتت ان فيه فئه من الالماني اعتماديه سيئه جدا وغير صالحه لطبيعة شوارعنا
بالنسبه للانسجنيا انا الصراحه كنت ناوي عليها قبل ما اجيب البيجو ٥٠٨ بس لاحظت ان انتشارها بطئ لدرجة اني مشفتهاش في الشارع غير ٣ مرات في ٦ شهور و توكليها اقل من توكيل البيجو و الله اعلم هتعمل ايه مع بنزين ٩٢ على المدى الطويل باختصار لسه ما اثبتتش نفسها عمليا فقلت اروح لل ٥٠٨ حتى لو طلعت اقل شويه من الانسجنيا و خليني في المضمون و كنت عارف موضوع الفيس لفت عشان العربيه متجربه ٣ سنين و محدش اشتكى منها نهائي اللهم موضوع كان بيشتكي ان الثبات في ملفات كورنيش اسكندريه بعد ال ١٨٠ كم مش حلو !!!!!!!!
وعلى العموم العربيتين دول احسن عربيات و بفارق شاسع عن اقرب المنافسين من ٢٠٠ الف - ٣٠٠ الف
اللي معاه ٢٠٠ يزود شويه و يجيب ٥٠٨ و اللي معاه ٣٠٠ الف يختار براحته

[محمد المصرى]

احسن تعبير
القلب مع الاوبل
والعقل يقول البيجو

[melouk1]

ببساطة شديدة البيجو صفقة رابحة و فلوسك مضمونه في اعادة البيع بعد ما تستمع بالعربية
و لازم تستنى الفيس ليفت لان الناس برا بيعملوا ابحاث بالملايين عشان يقدمو شيء محترم متطور
و انت من حقك تستفيد من ده
في حاجه مهمه جدا ان واحد صاحبي بيشتغل في توكيل منصور في خدمة العملاء ، مش قادر اقولك
على كمية الشتائم اللي بياخدها كل يوم من كل العملاء و هو بنفسه بيقولي احنا حراميةواوحش توكيل
في مصر لان الخدمة سيئة ....
اهرب من الاوبل .. ألماني يعني بنز و بي إم بس ...

[mariachi]

اوبل إنسيجنيا أفخم بكتير و ألمانى