سوزوكي سويفت ولا متسوبيشي اتراج؟

[sara osama]

من فضلكو انا اول مره اسوق وكنت محتاجه عربيه اتوماتيك متوسط سعرها 100 الف
بعد لف هنا في المنتدي استقريت علي نوعين محتاره بينهم
الاتراج والسويفت..مين الافضل فيهم وليه؟

انا عاوزه عربيه مدنيه مش هسافر بيها كتير ..وعاوزه ابيعها كمان سنتين كده وابدلها بحاجه اعلي
فالمقارنه عندي قايمه علي حاجتين
مين فيهم هتحتفظ بجزء كويس من سعرها لما اجي اغيرها؟
ومين فيهم قطع غيارها متوافره اكتر والتوكيل وخدمه ما بعد البيع احسن؟

[hesham fawzy h]

اتراج وش

[sara osama]

اتراج وش

ممكن اعرف حضرتك فضلتها ليه؟

[J A G U A R]

النقط دى هاتتفوق فيها الاتراج
بس قطع الغيار فى الاتنين لسه منتشرتش اوى

[S O P H O S]

فرأي سويفت
ولو انتشار ممكن الاي 10 اكيد هتنتشر

[hesham fawzy h]

ممكن اعرف حضرتك فضلتها ليه؟

علشان حضرتك هتبعيها بعد سنتين

فهتمسك سعر ان شاء الله

[scientist9508]

بسم الله الرحمن الرحيم

الأخت الفاضله ساره

كنت قد شاركت فى مقارنه بين عدد من السيارات و أود أن أمنحك هذه المقارنه لعلها تكون ذات قيمه بالنسبه لك.


1 - السيارات موضوع المقارنه بالترتيب حسب سعة المحرك و القوه الناتجه منه:

1 - رينو لوجان سيدان (1600 cc بقوة 90 حصان)
2 - رينو سانديرو هاتش باك (1600 cc بقوة 90 حصان)
3 - كيا بيكانتو (1248 cc بقوة 87 حصان)
4 - سوزوكى سويفت ديزاير سيدان (1197 cc بقوة 87 حصان)
5 - سوزوكى سويفت هاتش باك (1197 cc بقوة 87 حصان)
6 - ميتسوبيشى أتراج (1193 cc بقوة 87 حصان)

2 - السيارات موضوع المقارنه بالترتيب حسب مساحه تخزين الحقائب:

1 - المركز الأول تفوز به الرينو لوجان بسعة مساحة تخزين 510 لتر
2 - المركز الثانى تفوز به الميتسوبيشى أتراج بسعة مساحة تخزين 450 لتر
3 - المركز الثالث تفوز به الرينو سانديرو بسعة مساحة تخزين 320 لتر
4 - المركز الرابع تفوز به السوزوكى سويفت دايزاير (سيدان) بسعة مساحة تخزين 315 لتر
5 - المركز الخامس تفوز به السوزوكى سويفت هاتش باك بسعة مساحة تخزين 210 لتر
6 - المركز السادس و الأخير يكون للبيكانتو بسعة مساحة تخزين 200 لتر

3 - السيارات موضوع المقارنه بالترتيب حسب سمعة الوكيل:

1 - المركز الأول تفوز به الرينو لوجان و سانديرو و كيا بيكانتو
2 - المركز الأخير يكون للسوزوكى سويفت سيدان و هاتش باك
3 - لا يمكن تصنيف وكيل ميتسوبيشى (دياموند موتورز) لأنه جديد و لم يكتشفه أحد بشكل موثق و مؤكد حتى الآن

4 - السيارات موضوع المقارنه بالترتيب حسب الفخامه و الأناقه (من وجهة نظرى الشخصيه و التى لا أفرضها و لكن أعرضها):

1 - المركز الأول مناصفة بين رينو لوجان و رينو سانديرو
2 - المركز الثانى مناصفة بين سوزوكى سويفت سيدان و هاتش باك
3 - المركز الثالث كيا بيكانتو
4 - المركز الأخير للميتسوبيشى أتراج

5 - السيارات موضوع المقارنه حسب توافر ناقل السرعه الأوتوماتيكى:

1 - تستبعد الرينو لوجان و سانديرو و تبقى باقى السيارات

6 - السيارات موضوع المقارنه بالترتيب حسب قوة المكيف (هذا الترتيب مبنى على السمعه و ليس التجربه الفعليه):

1 - المركز الأول تفوز به سيارات السوزوكى سويفت سيدان و هاتش باك (بسبب صموده و كفاءته المستمره فى السفر بعيد المسافة كثير الساعات)
2 - المركز الثانى و بمسافة قريبه جدآ جدآ من المركز الأول تأتى سيارات الرينو لوجان و سانديرو ( ما كانت المكيفات الفرنسيه تقدر على منافسة المكيفات اليابانيه و لكن بعد تعاون رينو و نيسان أصبحت رينو تقوم بتركيب مكيفات نيسان فى سياراتها الأمر الذى جعلها منافس قوى لكل السيارات فى عنصر المكيف)
3 - المركز الثالث يكون للكيا بيكانتو ( بسبب أن المكيفات الكورى فى السيارات الصغيره لداخل المدينه لا تصمد أو تثبت فى سفر طويل و بعيد و لكنها تكون بكامل كفاءتها داخل المدينه)
4 - مكيفات ميتسوبيشى لها سمعه مشرفه و لكن فقط للتأنى و عدم التسرع لا يمكن إعطاء أى مركز للميتسوبيشى أتراج حتى نتبين آداء المكيف على محرك 3 إسطوانات فقط

7 - السيارات موضوع المقارنه حسب إمكانية عمل الصيانات خارج التوكيل:

1 - يمكن عمل ذلك للسيارات السوزوكى سويفت سيدان و هاتش باك
2 - نتوقع إمكانية عمل ذلك للميتسوبيشى أتراج لبساطة محركها (تطبيق ذلك بشكل عملى يتوقف على آداء التوكيل حبث ان آداء التوكيل هو الذى سيحدد إتجاه الملاك للخارج أم بقائهم معه)
3 - تستبعد السيارات الرينو اللوجان و السانديرو و الكيا لعدم الحاجه للإتجاه للخارج لكفاءة الوكيل و طيب سمعته

و الآن أعرض ما حصدته كل سياره من هذه المقارنه:

1 - الرينو لوجان و سانديرو:

1 - المميزات:

1 - المحرك الكبير القوى
2 - المقصوره الأكبر و الأوسع
3 - أكبر مساحه تخزين خلفيه للحقائب والمتاع
4 - المركز الأول فى خدمات ما بعد البيع (كفاءة الوكيل و حسن سمعته)
5 - مكيف قوى ممتاز
6 - الأناقه و الفخامه و الرفاهيه

2 - العيوب:

1 - عدم توافر ناقل حركه أوتوماتيكى

2 - السوزوكى سويف سيدان و هاتش باك:

1 - المميزات:

1 - المحرك الصغير القوى (فارق 3 حصان فقط عن الرينو)
2 - توفير الوقود (خاصة فى الزحام)+(أوفر من البيكانتو و لكن بفارق طفيف)
3 - مساحة تخزين خلفيه للحقائب و المتاع متوسطه (للسيدان فقط)
4 - المركز الثانى من حيث الفخامه و الأناقه
5 - توافر ناقل سرعة أوتوماتيكى
6 - أقوى مكيف

2 - العيوب:

1 - التوكيل من أشهر التوكيلات الفاشله (سىء السمعه و الكفاءه و كأن هذه السياره بدون وكيل)
2- صغر مساحة التخزين للحقائب و المتاع (للهاتش باك)

3 - الكيا بيكانتو:

1 - المييزات:

1 - محرك صغير و قوى (فارق 3 حصان فقط عن الرينو)
2 - المركز الأول فى خدمات ما بعد البيع (كفاءة الوكيل و حسن سمعته)
3 - المركز الثالث فى الأناقه و الفخامه
4 - توافر ناقل سرعة أوتوماتيكى
5 - مكيف متوسط الحال (داخل المدينه ممتاز لكن فى السفر البعيد لا يصمد)

2 - العيوب:

1 - مقصوره صغيره
2 - المركز الأخر فى مساحة تخزين الحقائب و المتاع
3 - قطر العجل صغير (ما يجعل هذه السياره تتأثر و تتضرر بشده من المطبات)

4 - الميتسوبيشى أتراج:

1 - المميزات:

1 - المحرك الصغير القوى (فارق 3 حصان فقط عن الرينو)
2 - ثانى أكبر مساحة تخزين للحقائب و المتاع
3 - توافر ناقل سرعة أوتوماتيكى

2 - مالا يمكن تصنيفه:

1 - كفاءة المكيف
2 - خدمات ما بعد البيع (كفاءة الوكيل و سمعته)

3 - العيوب:

1 - تدنى مستوى الفخامه و الأناقه و التقفيل و التشطيب


أذكركم جميعآ بأن أسئلتكم دائمآ موضع ترحيب و إهتمام

أسعدكم الله بإختيارتكم و بارك لكم فيها

السلام عليكم و رحمة الله و بركاته

[m.m.mohsen]

انا حاجز سويفت ديزاير وفضلتها بكتير أوى عن الاتراج من حيث أنها 4 سلندر و1200 سى سى و87 حصان انما الاتراج 3 سلندر و1200 سى سى برضو بس 78 حصان يعنى السويفت أعلى ب9 حصان يعنى أكيد هتفرق كتير فى السحب بالذات مع التكييف لان كل اللى جابوا السويفت قالوا ان سحبها جميل مع التكييف والله أعلم

[Sameh samy]

انا بفضل السوزوكي لعدة اسباب
العربيتين مالهمش سوق ف الريسيل لسة فمحدش هايفيدك مين افضل
السوزوكي اجمل
موتور افضل مع التكييف
الاتراج فيها رعشة عشان 3 سلندر
السوزوكي حريمي اكتر
الميكانيكا بعد ماتخرجي من الضمان افضل في العربية ال4 سلندر
موتور السوزوكي اقوي في السحب واقوي مع التكييف