رينو فلوانس e3 ولا ميتسوبيشى شارك ؟

[george912]

السلام عليكم ..

الصراحة محتار اوى يا رجالة ما بين رينو فلوانس e3 و ميتسوبيشى شارك فعايز اعرف رأيكم ؟

و لكم جزيل الشكر

[hesham fawzy h]

الاتنين حلوييين جدا

و انا افضل الشارك الهاى لاين لانها بتاعت شقا عكس الفلوانس

[yalahwy2010]

الفلوانس شنطتها اوسع........ركوبة أوروبى يعنى عزل أحسن وثبات وفرامل ورفاهية فى القيادة ...شنطة أوسع من الشارك
الشكل أذواق لكن الفلوانس شكلها أحسن........توكيلها محترم جدا
الشارك عضمها قوي ....فى لمسة أوروبية واضحة عن السيفك والنيسان والتويوتا........فى دم فى قوة عضمها من المازدا
الشارك سحبها احسن بس مش فظيعة بالذات بالفلوانس الجديدة
كماليات الفلوانس أحسن وأكتر.......
بصراحة الفلوانس تكسب بالذات ان الفلوانس واخدة سمعة كويسة جدا وقليلة الأعطال

[GMakram]

انا شايف الشارك....

انا كنت من مالكى الفلوانس,كانت معايا موديل 2012 جبتها زيرو, اه هي عربيه حلوه وكماليات ممتازه وثبات على الطريق لكن بصراحه كان مضايقنى فيها ردائه الخامات الداخليه بعض الشيئ لانها تقفيل تركى على عكس الميجان...بعد 6 شهور لما جبتها الكاسيت باظ واتصلح فى التوكيل
باختصار لو يهمك الكماليات الكتير اللي لا حصر لها والدلع يبقي خليك فى الفلوانس ولكن حط فى الاعتبار ان ممكن معظم الكماليات متستعملهاش
مثبت السرعه مش هتستعمله غير على طريق سفر
حساس المطر هتستعمله شهرين فى السنه او لما تدخل تمون وينضفولك ازاز العربيه
حساس النور هتستعمله اكيد
مريات الضم هتكره حياتك كل لما تتخبط لأنها اكيد هتتخبط طول مانت سايق
ابعاد الفلوانس وحشه اوي عكس الشارك خصوصا من الخلف
...لو يهمك الاعتماديه بجانب الرفاهيه يبقى خليك فى اللانسر شارك وده اللى انا بأيده بصراحه خصوصا كمان لو انت شاب

تحياتى

[hanyyacot]

انا اشتريت الفلوانس شهر يناير 2014 , وكنت فى حيرة بينها وبين الشارك , واصلا كنت ناوى اشترى الشارك بس لما شفت الفلوانس وجمعت عنها معلومات لقيت الفلوانس تكسب بكتيييير, انا باحترم الشارك وبحبها جدا بس الفلوانس حاجة تانى , ومعلش للاستاذ اللى بيقول ان خامات الفلوانس من جوة وحشة , اولا خامات الفلوانس احسن 100 مرة من الشارك , ثانيا الفلوانس احسن فى الوسع و العلو عن الارض مع ثبات ممتاز , زائد شنطة واسعة جدا , واوبشنز كتير اوى فى ناس تهمها وناس لا بس هى اكيد مهمة , حضرتك انزل فى اى معرض واركب الاتنين وانت هاتقرر

[just_magdy1]

امتلكت فلوانس من حوالي أسبوعين وآخر ٣ عربيّات قبلها كانو شارك والتلاته كانو هاى لاين ... فعلا الشارك عربيه محترمه وكل حاجه فيها حلو بس الفلوانس تقريبا كل حاجه فيها احلى من الشارك واسال مجرب

[mimohsen]

انا معايا شارك 2008 وبكره ان شاء الله هاستلم فلوانس e3 مع الاحتفاظ بالشارك .. الشارك عربيه ممتازه ... اتمنى الفلوانس تكون افضل

[george912]

الف شكر يا رجالة على الردود .. و بأذن الله شكلها كدة فلوانس e3

[miceg]

رينو عاملة خصم 5 الااف جنيه على الفلوانس
إسأل قبل ماتشتري والحق الفرصة

[ahmzd]

فعلا اتوكل على الله في الفلوانس والحق الخصم قبل ما يخلص، ده خصم 5000 جنيه يا عم مش أي حاجة! وبالتوفيق إن شاء الله تعالى.