نيسان صنى ولا بيكانتو هاى لاين 2015

[dr-basma]

بسم الله الرحمن الرحيم

انا محتارة بين عربيتين انا كنت محتاجة عربية اوتوماتيك و قدامى البيكانتو 2015 هاى لاين و النيسان صنى الشكل الجديد اكس صالون 2015 تقريبا قريبين فى السعر
ملحوظة
البيكانتو عجبانى بس
1.حجمها صغير اوى
2. الطارة مش مالتى اوبشن
3.مفيش مدخل usb او aux
4. سعرها كتير اوى على حجمها

النيسان صنى
1.حجمها كبير و اوسع من جوا شكلها عاجبنى مع ان فى ناس كتير مش عاجبها شكلها
2.كماليتها حلوة
3.فيها عوامل امان اير باج و فرامل abs
4. اكبر و 1600 سي سي
5. يابانى برغم ان تقفيلها مصرى
6. معدش موجود مشكلة اتيل الفرامل
7.عيبها بيقولوا الصاج خفيف


انا محتارة مش عارفة افضل اية العربية هسافر بيها بس مش كتير معظم المشاوير فى القاهرة صلاح سالم و دائري
كان فى عربيات تانية فى المقارنة زى اتراج و جراند اى تن سيدان و سوزوكى سويفت و استبعدتهم
سويفت اغلى 16 الف من السعر الرسمى كتير اوى و دة استغلال او استنى 9 شهور عشان اخد السعر الرسمى وانا محتجاها دلوقتى
ياريت تنصحونى بجد لانى تعبت من كتر التدوير و نزلت كل المعارض و شفت كل العربيات دى و مش حاسة انى ميالة لحاجة عن التانية و قريت كل المواضيع هنا ياريت اعرف رايكوا و شكرااااا مقدما

[S O P H O S]

واين الســويفت من المقارنـة ؟
اعتقد اضافة وسط ما بين الاثنين وتستحق التفكير معاهم ..

[عم جحا]

اعتقد فى مجال المقارنة بين السيارتين نيسان صنى او كيا بيكانتو هاى لاين فالنيسان صنى افضل لانها اكبر واوسع من الثانية وموتورها ١٥٠٠ سى سى ومرتفعة عن الارض ولانها سيدان فطبعا حقيبتها الخلفية اكبر بالاضافة لكونها ماركة يابانية عالمية اى موثوق بها حتى ولو كانت تجميع مصرى

[hanyyacot]

هو رينج السعر اللى انتى حاطاه كام الاول عشان نقدر نفيدك

[memo_p910]

فكري تاني في الجراند اي تن سيدان

[eng.m7md.ali]

ال2 ميستهلوشي

سويفت وجراند بونتو وجين2 احسن منهم بكتيير وكل واحدة فيهم ليها مميزات وعيوب .. لكن في ال2 السابقين مش شايف اي ميزة لاي واحدة فيهم

[Yehya Badr]

تجربتى مع كيا بيكانتو 2006

عربية ممتازة - قوية جدا و شاسية قوي - حمالة أسية و الموديل الجديد رائع لا تقارن بنيسان

و أنا أنصح أن حضرتك تبصي على أى تن جراند أو العادبة

بلاش نيسان صنى لانها لا يابانى و لا تمت باليابان بصلة و تقدري حضرتك تتأكدى أنها مكونات صينى + هندى + مصري صاجها ورق مقارنة بالبيكانتو أنا شوفت بعميى حادثة بين فيرنا و صني و أتمين أتخرشموا زى بعض !!!!

[ROLAND]

انا هاتكلم من واقع تجربتى الشخصية علشان انا معايا نيسان صنى سوبر صالون بس الشكل القديم ولسه شارى بيكانتو فل اوبشن للمدام من شهر رمضان بس ,,, طبعا العربيتين غير بعض خالص ومش هاينفع نقارن بين الأتنين وخصوصا نيسان الشكل الجديد انا ماركبتهاش بس الميزة الوحيدة فيها بالنسبة لى انها عربية واسعة جدااا صالون وشنطة لكن بصراحة ماعنديش اى ثقة فيها من اللى سمعته عنها والله واعلم العيوب دى اتعدلت ولا لأ ,,,, نيجى للبيكانتو انا شايف انها عربية هايلة بكل المقاييس وعاجبنى جداا سحبها رغم موتورها الصغير وتقدرى تسافرى بيها وانتى مرتاحة ومطمنة كمان واستهلاك بنزين طبعا هايل وعيوبها فى رأيى سعرها طبعا غالى جدا عليها والخليجى منها اوبشن اعلى وخامات احسن بس الناس خوفتنى منه علشان بيطلع بره ضمان الوكيل وطبعا حجمها او بالتحديد حجم الشنطة علشان بصراحة حجم الصالون بتاعها جميل وبتشيل 4 ركاب كبار وبيقعدوا مرتاحين

[eng_amg]

ملاحظة واحدة... لو ركبتي ياباني وواخدة على العربيات الياباني مش حتحسي الإحساس دا مع الصني الجديدة.
وأعتقد انك عارفة ان التقفيل مش هو.
وبرضو مفيش مقارنة بين هاتش باك وسيدان... الهاتش باك حتتظلم