ارجو المساعده في اتخاذ قرار شراء سياره من فضلكم

[mohamed ali]

يا جماعه انا نازل مصر كمان اسبوعين ان شاء الله وناوي باذن الله اشترى عربيه جديده وياريت تساعدوني في الاختيار وفي المقام الاول يكون توكيل محترم وموفر قطع الغيار لان انا قبل كده كان عندي فورد وسوفت العذاب مع رجب فورد وكرهت العربيه وبعتها
*من ناحيه الامكانيات الماديه فا انا ممكن ادفع من 90الي100 الف وممكن ازود سويه صغيرين لو فيه حاجه تستاهل
*السياره تكون عائليه لاسره من 5افراد وانا سواقتي هاديه مش بتاع شد وغرز ولاحتى سرعه
*العربيه تكون 1600 وما تفرقشى كتير مانيول او اتوماتك بس لازم تكون جميع الكماليات
*موضوع كورى وياباني متفرقشى معاي لانى عايش في بلد فيها تقريبا السعر واحد فا هايكون صعب عليا نفسيا ادفع الفرق دا في الياباني وانا عارف ان مفيش فرق
*العربيه تكون استلام فوري يعني ادفع واستلم في نفس اليوم ولو امكن ارخص والين كمان :lol: *الحاجات الي بفكر فيها هي
1 الكيا سيراتو لكن مش عارف ايه اخبار التوكيل والمشاكل اتحلت ولا لا وهل فيه تسليم فوري وايه ااخبار العربيه نفسها لان العربيه عجبنى شكلها بره وجوه والباقي معرفشي عنه حاجه.
2 الالنترا الجديده لكن خايف من التوكيل والكلام الي باسمعه عنه
3 الاوبترا كان فيه واحد ثقه عنده مركز لصيانة السيارات مرشحها لي وانا ميال شويه ليها
4 الانسر ولكن انا خايف من موضوع الشكل الجديد وخصوصا ان انا باستعمل السياره شهر واحد في السنه يعنى بعد شهر استعمال هايكون اتكسرعليها موديل
انا اسف جماعه وجعت دماغكم وطولت عليكم لكن محتاج ارائكم وشكرا مقدما وجزاكم الله الف خير

[jimmy]

ايه رايك فى النيسان

[mohamed ali]

مشكلة النيسان التقفيل المصري وانا صراحة وللاسف الشديد وللعلم انا مصري حتى النخاع لا اثق في التقفيل المصري وخصوصا الي معمول علشان يتسوق في مصر والنيسان الياباني سعرها علي ما اعتقد 115 الف
ومتشكر لرد حضرتك

[crossfire]

balash el kia 3shan mawdo3 el tawkeel
we balash el optra 3shan el tawkel bta3hom mosh moree7 bardo
el elantra 3arabeya 7elwa awy we ghabour mesh momtaz bas mesh we7esh bardo
el lancer bardo 7elwa bas ana arasha7 el elantra ableha
rabena yekremak

[hazem_khidr]

فكر في الكورولا ممكن تكون اغلي من كده شويه و 1300 سي سي بس جنيه دهب حتبيعها اي وقت مش حتخسر فيها كتير و اعمل حسابك اي عربيه حتجيبها سواء لانسر او غيره تمنها حيقل لما تبيع

[mohamed ali]

مش عارف ليه انا مش متقبل الكورولا يعني حاسس ان سعرها مغالي فيه شويه زد علي ذلك موضوع الحجز ما ينفعشى معاي
شكرا علي الرد

[fahd_628]

طيب اية رأيك فى البروتون واجا بس مشكلتها اعادة البيع بس هية كعربية ممتازة ؟

[ahmed1981]

الأبترا تقفيل كوري
وأظن سعرها معقول
التوكيل منصور شيفورليه
والله أعلم

[معاذ الشرباصى]

السيراتو ممتازة الصراحة و سمعتها حلوة فى مصر, و فى انباء بقوة ان مشكلة توكيل كيا قاربت على الحل

فى شوية اقتراحات زيادة, لو حضرتك تفكر فيها

1 بروتون واجا

2 دايهاتسو ماتيريا (ممتازة لعائلة)

انا عن نفسى ميال للماتيريا, توكيلها من احسن التوكيلات فى مصر و عربية ممتازة

[ahmed1981]

هو طبعا توكيل الماتيرا الديهاتسو عبد اللطيف جميل
وهو الوكيل في السعودية برضه
وهو أكبر موزع سيارات في العالم
ويعتبر فعلا من أحسن التوكيلات في مصر

[Islam_galal]

- اعتقد المضمون هو الهيونداي الانترا بناءا علي طلبك (توكيل كويس و قطع غيار معقولة)
- الكيا بلاش لان في مشاكل في التوكيل
- الاوبترا سمعت ان التوكيل (منصور) اسعار قطع الغيار مبالغ فيها.
- الواجا حلوة بس الصيانة في الصحراوي قرب القاهرة.
- الماتيريا اعتقد التوكيل سمعته جامده بس الشكل غريب علي حسب الذوق :roll:
- اللانسر جامدة جدا بس انت مش مستريح لها و لا للكورولا
يبقي بناءا علي كلام حضرتك نرتبهم كده
1-الانترا
2-واجا
3- لانسر
بينما رأي الشخصي هو!!!!!!!
1-لانسر
2-واجا
3-الانترا

[emadfk]

اخى العزيز

شوف 1 + 1 = 2
عربية سعرها معقول و سعر اعادة بيعها معقول وكل الناس بتشكر فيها و70 % من ملاك السيارات
الى عندهم والىى مش عندهم ناوين يشتروا الجديدة لما تنزل تبقى ايه

طبعا اللانسر بموديلها 1600 الاوتوماتيك فول اوبشن او 1500 الفول اوبشن بس دى لسه ليها حجز

وانت عايز تستلم على طول يبقى الاختيار واضح

وربنا يوفقك

[Migo123]

الماتيريا

لو طلبك عربيه عائليه يبقى هي دي الافضل كموصفات و حجم داخلي وسمعه وكيل وماركه محترمه وياباني .. بالاضافه لسعر منافس جدا -- نفس سعر الكورولا 1300 فاضية -- لكن دي بقه حميع الكماليات و زياده و مستوى الصالون مبهر في تصميمه او الخامات المستخدمه ولكن بعد الفحص والتمحيص يوجد بعض العيوب (مع الاخذ في الاعتبار عدم وجود عربيه خاليه من العيوب)
1- خلوص العربيه من الارض اقل من اللانسر ب 2 سم و الكورولا ب 3سم يعني العربيه واطيه شويه ومحتاجه حرص في المطبات ... يعني لو طريقك الطبيعي مليان مطبات و طرق غير ممهده هتبقى ماشي قلقان. بس في المقابل ده بيدعم ثبات العربيه على السرعات العاليه وفي الملفات وبناء على كلام احد موظفي التوكيل (هو شخصيا اشتراها) العربيه ثابته لغايه 160-170 والملفات على 70-80 مستريح .

2- عصاية الفتيس بعيده شويه عن متناول ايدك في الوضع المريح للسواقه... انا مسوقتهاش بس ركبت جواها.... وان كان اللي ساقوها بينفو الموضوع ده. (والحل هنا الاتوماتيك) بس زود 7 الاف.

3 -عدم وجود كونسول بي الكراسي الاماميه رغم وجود مساحه كبيره تسمح بذلك ...

4 - عدم انتشار العربيه حتى الان قد يجعل من الصعب توفر اكسسوارات مناسبه لها خارج التوكيل معنى ذلك انك مضطر تأمن عليها لان لو حصل اي حاجه لا قدر الله هتبقى الحاجات غاليه عند الوكيل (فوانيس -- اكصدام --- خلافه)

5 -وضع الموتور في كبوت العربيه اعتقد انه بيصعب شويه من عمليه الصيانه ...-- بس مش متأكد من الكلام ده لانه استنتاج شخصي--- على فكره هو نفس موتور التريوس الجديده ويتميز بالنعومه الشديده والصوت المنخفض.

مش ها اتكلم عن سعر اعاده البيع لانه غير معروف ... بس هي مش هتبقى منتشره وهتلاقي ناس بتحبها جدا وناس بتكرها جدا .. يعني مش زي اللانسر و الكورولا مثلا الي ما بيحبهاش مش بيكرها ...

تفتكر بعد كل ده هل ها تغامر وتشتريها ....
انا شخصيا مقتنع بيها جدا وشايف ان كل العيوب دي في مقابل الوسع غير الطبيعي ووضعيه القياده الممتعه والتوكيل المحترم و الساوند السيستم الجامد والتكييف التحفه يخليني اشتريها ........

http://www.sts.com.sg/general/review.php

اللينك ده في شويه لينكات لريفيوهات اتعملت عليها ..

وربنا يوفقك في اختيار العربيه المناسبه

[جندى مجند]

أنا عندى رأى مختلف شوية عن الآراء اللى اتقالت فوق و كلها آراء محترمة ... بما ان حضرتك بتستخدم العربية شهر واحد فى السنة و بتركن العربية باقى السنة كلها يبقى ليه متفكرش انك تاجر عربية فى الشهر دة و خلاص؟ ممكن تأجر لانسر أو الانترا أو اوبترا عاملة كيلووات قليلة بحوالى 3500 أو 4000 فى الشهر و لو حسبتها حتلاقى اللى حضرتك حتدفعه فى التأجير فى خلال 3 أو 4 سنين هوه تقريباً اللى حتخسره فى بيع عربية زيرو بعد نفس الفترة و يمكن أقل كمان بس الميزة ان حضرتك:

1- حتركب كل سنة عربية موديل السنة
2- حتتجنب مشاكل و تكاليف رفع و تخزين العربية لمدة 11 شهر فى السنة
3- حتريح بالك من الصيانة و التوكيل و التأمين و كل الكلام دة
4- و كمان كل سنة ممكن تركب موديل مختلف و تجرب كل الأنواع دى
5- حتوفر مبلغ الـ 90 أو 100 ألف تمن عربية جديدة و تستثمرهم فى حاجة تانية ممكن تصرف على ايجار العربية

[Migo123]

مكرر