محتار والله بجد فى شراء عربية فى حدود 100 الف

[africano19_5]

بصوا يا جماعة من الاخر يعنى انا مقررانى اشترى عربية وتكون فى حدود 100 الف متزدش يعنى وكنت مقرر انى اختار الافيو وبعد ما دخلت منتداكم العظيم فوجئت بسيل من العيوب داخل العربية وان تقفيلها زبالة بخلاف عيوب لا تنتهى ده الاكتر من كدة انى سألت عن العربية المانيوال عند احد موزعى شيفروليه بالاقصر قالى دى بقالها اكتر من 7 شهور منصور منزلهاش يعنى رضينا بالهم والهم مش راضى بينا انا مش هجيب الفيرنا الجديدة انا بكره شكلها اصلا ومش هجيب نيسان صنى بردوا من كلامكم انا اتعقدت كل شوية ادخل على صفحات المنتدى تعجبنى متسوبيشى اتراج الاقى حد يقول موتورها 1200 مش اد كدة عجبتنى عربية بريليانس s30 دخلت على صفحة العربيات البريليانس لقيتها مش موجودة اصلا فى السوق المصرى مع انها بتظهر فى كل المنتديات وضيف لذلك انها صينى انا زهقت شكلى مش هشترى ومحدش يقولى اشترى مستعمل على جثتى قولولى اعمل ايه بجد جبت اخرى وشكرا واسف للاطالة



تم تعديل العنوان ودمج المواضيع المكررة والنقل للمقارنات
م.ع 7

[hardmind_doc]

سانديرو او ستيب واى

[hotmail]

انا لسه بفكرلك وان شاء الله هرد عليك اليوم او غدا

[ali ashraf]

لو حضرتك من الاقصر

لو أقامة حضرتك فى الاقصر يبقى هيحد من اختيارتك يعنى لازم تشوف ايه انواع السيارات اللى منتشرة فى البلد و وفرة قطع الغيار و شطارة الصنيعية و وجود توكيل محترم لا تنسى هذه العوامل لأن السيارة مش شراء و بس و لكن من المهم خدمة ما بعد الشراء .....بعد كده تشوف احتياجك للسيارة هل مسافات بعيدة و لا قريبه طرق ممهدة ولا صعبة و مطبات , لفرد او اتنين او لاسرة كبيرة , الخ.... و بعد كده فى الاخر تفكر فى اى نوع بعد ما ترسى على الخطوط العريضة و بالتوفيق ان شاء الله

[aboadham]

أهلا بيك أخى الكريم. انا كنت قريب عندك فى الأقصر ولاحظت انتشار الصنى الشكل القديم و ده بالتالى يفهم منه انتشار فطع الغيار و وجود الورش أو مراكز الصيانة اللى بتشتغل فى الصنى. انا عندى صنى الشكل القديم موديل 2009. و ساكن فى اسكندرية. سافرت بالسيارة من اسكندرية للأقصر كذا مرة فى الصيف و الشتا. ولله الحمد لايوجد أى مشاكل.طريق السفر هو اسكندرية - القاهرة الصحراوى ثم الصحراوى الشرقى لحد اسيوط ثم وصلة اسيوط - سوهاج - قنا ثم الصحراوى الشرقى قنا- الأقصر.ربنا يهديك للخير و ماتستعجلشو خد قرارك و انت مقتنع تماما.انا بس حبيت انقل لك تجربتى مع الصنى حبيبتى.

[dr.omar]

يا اما تدبرلك 20 الف كمان وتجيب كيا ريو او تجيب اميجراند هي صيني صحيح لكن الناس بتشكر فيها

[fares_311]

عندك اللوجان أو السانديرو
وعندك سوزوكي سويفت
فكر كويس حتلاقي حاجة كويسة تناسبك.

[hossam_elwani]

الافيو و قفت ؟!

[africano19_5]

بس دى عاملة 116,000
كمان قطع الغيار مش متوفرة وغالية

[africano19_5]

أشكرك ,انا مستنى رد حضرتك ويارب يكون خير ان شاء الله

[africano19_5]

العضو hotmail شكرا للردك واتمنى الاقى الخير فى اهتمامك ان شاء الله

[africano19_5]

hotmail شاكر لحضرتك ومستنى ردك

[africano19_5]

ali ashraf شكرا للرد حضرتك بس المشكلة ان اغلب العربيات هنا افيو ولانوس وفيرنا ومنها اللى تفقيله مصرى وعيوب الصناعة ومشاكلها اللى اصحابها بيحكولى عليها عشان كدة كتبت الموضوع ده وانا فى حيرة فعلا لكن بوجودكم مش قلقان ونصايحكم بستفيد منها

[africano19_5]

شكرا ليك أبو ادهم على ردك بس حضرتك لو دخلت على صفحة عربيات النيسان هتلاقى مواضيع كتير عن الصنى 2015 وكلها مرعبة يكفى انها تقفيل مصرى وفراملها مش مرتاحة اما الشكل القديم فأنا مش بثق فى المستعمل لانها لو كويسة مع صاحبها طب ليه يبيعها بس عايز أسألك فى حاجة هو أنا لو رحت معرض دلوقتى ممن أطلب منه نيسان صنى الشكل القديم على الزيرو وتبقى موجودة طب والشكل القديم ده موديل سنة كام وشكرا ليك

[africano19_5]

دكتور عمر شكرا للردك بس انا مش هجيب صينى ابن عمى جايبها والناس كلها مكرهاه فى العربية مش عشان شئ الا انها صينى وبالنسبة انى ازود فى تمن العربية مش عارف اللى بسمعه اليومين دول عن سرقة العربيات يخللينى مخاطرش بأكتر من كدة فى عربية وشكرا ليك