محتار بين كيا ريو ولانسر شارك

[محسن كرم]

السلام عليكم

أخواني ارجو منكم ان تدلوني علي الطريق السليم

محتار في شراء سياره جديده
ما بين كيا ريو ها ي لاين وما بين لانسر شارك الفئه الثانيه مثلا

ارجو افادتكم والنصيحه لوجه الله :d

[abo_salah]

الريو اوبشن اكتر

[محسن كرم]

هل تتوقع ان سعر الريو هايرفع السنوات القادمة ذي ما حصل مع الكارينز
بدأت ب 120و دلوقتي ب 220 موديل2015

هل الريسيل بتاع الريو هايبقي كويس
مع العلم ان تنقلاتي خفيفه جدا يعني ممكن في السنه لا يزيد عن عشر الاف كيلو

[hugan]

شارك

[عم جحا]

السيارتين حلوين ولكن الميتسوبيشي لانسر تتميز بحجم اكبر مقارنة بالكيا ريو وصناعة اليابان التى تمتاز بجودة الخامات وقوة التحمل .

[ahmedmohamed7]

فلوانس
كروز
شارك
ده لو عايز تجيب عربية فى حد ذاتها ....ماليش فى موضوع ال Resale ده ....انا هجيب عربيىة بتلعب او مش ثابته علشان ال resale بتاعها كويس ؟

[Omar Sarray]

خليك مع كيا كورى خامات حلوا واعاده بيع

[mhmdabdo]

الريو انعم لكم ممكن تحط عربيه اطفال بالعافبه في الشنطه
الشارك بحر في المقصوره الاماميه اوسع من عربيات كتير
الاتنين كويسين جدا لكن حسب احتباجاتك الاتنين منتشرين

[م أحمد]

فى نقطة لازم تضعها فى الاعتبار عند إختيارك لأى سيارة و هى المستوى التقنى للبلد بشكل عام لا نصناعة السيارات مش مجرد مصنع بيعمل كل حاجة بنفسه و إنما هناك صناعات مغذية لصناعة السيارات زى بقية المكونات الكهربية و الخامات البلاستيكية و دقة أجهزة القياس و دى بتبقى من شركات داخل نفس البلد، مش موضوع موتور و فتيس و بس
بعد المستوى التقنى للبلد شوف سياسة الشركة نفسها بتطلع عربيات محترمة و لا لأ ، لإن ممكن تبقى شركة سياستها إقتصادية فتبعك الدنيا
و بناء عليه قارن حضرتك بين شركة ميتسوبيشى اليابانية و كيا الكورى

الاتنين ان شاء الله على مدى خمس سنين و مع انتظام الصيانات مفيش واحدة هتقول لأ حتى لو صينى

و لكن لو ناوى تحتفظ بعربية على المدى الطويل اليابانى يفرق

بالنسبة انك عايز تشترى عربية على أمل سعرها يرفع بعد كدا فدا من أفشل المشاريع بجدارة زى اللى بيشترى عربية بالتقسيط بتمن زيادة مرة و نص و يبيع بنصف الثمن

لان ظاهريا لو حتى سعرها رفع ...هيرفع لقيمة عملة موازية للقيمة الاصلية مش زيادة حقيقية

يعنى ال 220 بتوع اليومين دول هما ال 200 بتوع سنتين فاتو مثلا

[Omar Sarray]

عندك حق مهندس أحمد بس متنساش لانسر تركى مش ياباني والمواصفات تختلف من وكيل لوكيل ودول لدوله انا شايف كيا احسن تقفيل وسعر واوبشنز حاليا فى مصر عندك رقم واحد الكورى رقم اتنين اليابانى ده رأى الشخصى

[محسن كرم]

يا مستر احمد انا مش هاجيب العربيه عشان سعرها يرفع بعد كده انا مش هادخل في علم الغيب لا سمح الله
لكن كل سؤالي كان علي الريسيل بتاعها هل كويس ولا لا زي باقي فئات الكيا مثل الكارينز

[محسن كرم]

استاذ عمر هل فعلا الانسر تركي زي مابتقول ولا ياباني كلها ؟

[Omar Sarray]

انا سألت عند الليثى قالى لانسر شارك تركى مش ياباني زى مازدا

[devil_storm]

انا حاليا معايا الشرك ماجرها لمده شهر و شايفها كويسه و العفشه كويسه جدا مع المطبات و ليها رنه جميله تخليك عايز تمشي علي المطبات :) ، صوت الماتور عالي شويه بس اعتقد دي مقصوده و صوته رياضي و جميل، الباور تقيل شويه و زيت بس برده علشان الاداء الرياضي، العزل برده وحش و صوت الاسفلت مسموع شويه، باقي الحجات ممتازه و العربيه جميله بصراحه علي سعرها و انصحك بيها و لو مكانك حختار الشرك طبعا بدون تردد

[Omar Sarray]

الى معاك ماجرها موديل كام