مقارنة غلبانة (20,000)

[Qamar]

ارجو المشورة باختيار السيارة المناسبة لظروف استخدامى:
1-سفر 160كم أربع مرات في الأسبوع.( عاوز حاجة تستحمل)
2-بلاش عربية 2 باب.
3-انا مش بتاع جري أوي و بعد ما هانزل من الشاهين هاحط قدرات العربية اللى أركبها في بالي و انا سايق.
4-يستحسن سيارة ما اخسرش كتير و أنا بابيعها.

[ahmad--ezzat]

حضرتك ولا عربية من دول هتستحمل السفر دة كلها عربيات قديمة وبجد مش هتسعفك
انا راى فلوسك دى تحطها مقدم ماروتى زيرو احسن بكتير من كل دة
بلا ريتمو بلا تمنينات بلا وجع قلب
نصيحة مترميش نفسك فى التهلكة

[mohamed2002]

طيب والادا ؟ اعتقد مناسبة ليك

[mino]

حضرتك ولا عربية من دول هتستحمل السفر دة كلها عربيات قديمة وبجد مش هتسعفك
انا راى فلوسك دى تحطها مقدم ماروتى زيرو احسن بكتير من كل دة
بلا ريتمو بلا تمنينات بلا وجع قلب
نصيحة مترميش نفسك فى التهلكة

+1
طبعا الجديد هو الحاجة الوحيدة اللي هتستحمل معاك لا انصحك اطلاقاً بالمستعمل
ادفع المبلغ اللي معاك مقدم حتي لو عربية لادا و قسط الباقي

[fahd_628]

بس يا جماعة الادا غير امنة خالص فى السفر

انا اخترت مازدا من الى انت مختارهم بس نقى حاجة نضيفة حتى لو حتستنى شوية و تزود سنة بسيطة

[أبومعاذ]

مازدا او شاريد

[ams]

على حسب اولوياتك :
1. ماروتى
2. 132

[Qamar]

شكرا جزيلا لكل من صوت أو رد.
لكن هل أثق في الماروتى أنها تخدم معايا للحد ما القسط يخلص؟ (3 سنين مثلا)

[Qamar]

أرجو من المشتركين ذكر الاسباب

[ahmad--ezzat]

طبعا
العربية يبانى مش فاكر التقفيل اية بس عربية حمالة قاسية وناعمة وحلوة فى السفر بس طبعا مش عربية عائلة
قطع غيارها رخيصة
بتجرى على فكرة وموفرة جدا فى الوقود
عربية بجد عملية اوى
واهم حاجة انها زيرو وموديل 2008

[أبومعاذ]

انت عايز حاجة بتتحمل فمبدئيا انسى مقترحاتك من عيلة الفيات لان ال 127 او 128 او الريتمو مش هتتحمل كل يوم سفر ودا عن تجربة - ال132 كويسة بس صعب جدا تلاقي عربية حالتها كويسة و تتحمل معاك عشان اغلبها موديلات سبعينيات و البلونيز متتركبش في جميع الاحوال - البيجو 305 قطع غيارها نار و اغلبها استيراد ودا اكبر عيب فيها - الشاريد يعيبها غلو قطع الغيار برضو بس هي عربية حمالة قسية بمعنى الكلمة و قطعة الغيار اللي بتحطها بتنساها بس برضو يعيبها ان كتير من قطع غيارها مش موجود غير استيراد
المازدا 323 اعتقد افضل خيار بس لو قدرت تلاقي عربية بحالة كويسة لان اغلبهم بيبقى تعبان عشان من سنة 82

[احمدعبدالعزيز]

مازدا او شاريد

+1000000000

[Qamar]

شكرا لكل المشاركات.
انا بصراحة كنت بافكر في بولونيز بعد تعديل مروحه التبريد (بيركب لها مروحتين). 2 أصحابي كانت عندهم و بيقولو ناشفة لكن حمالة قسية. ايه رايكم؟ هي ليه دايما مرفوضة؟

[dodi2]

معلش تعالى على نفسك و هات الماروتى اهى مشيا حوالينا اهى من زمان و مستحملة, على الاقل حتعرف تبعها كمان 3 سنين العربيات التانية حيبقى صعب بيعها ( خلاص تعبت )

[mohamed_sabry]

مازدا 323

بداية المازدا اغلى من معدل السعر اللى حضرتك كاتبه , بس هى افضل من كل اللى موجود فى الاختيارات .
*المازدا قطع غيار رخيصة و معمرة , و الاصلى موجود و التقليد موجود .
*المازدا سحب جميل و استهلاك قليل فى البنزين ( بالنسبة لعربية موديل الثمانينات ) .
*المازدا ثابتة جدا على السرعات العالية ( لو حضرتك مهتم بيها و بتراعيها و تظبط عفشتها اول باول ) .
*المازدا عفشتها محترمة جدا و لا يمكن بيضة تملص و بلية عجل تفرط و الكلام الفارغ بتاع الفيات ده.
*المازدا لو حضرتك شوفت مقص العجل بتاعها هتعرف ان الشاهين ماكنتش قوية زى ما انت متخيل.
*انا العربية دى قعدت معايا حوالى 8 سنين , عمرى ما اشتكيت منها , عمرها ما عملت حركة نص كم معايا , و بعد ما جبت الجين 2 برضه باحن ليها و الله .
*ممكن حضرتك تنوى على مازدا هاتش باك 4 باب يكون موتورها 1500 و تكون بالتكييف هتعمل حوالى 25 الف جنيه .
*انا بعت عربيتى المازدا موديل 84 بـ31 الف جنيه.
*لا يصح مطلقا مقارنة المازدا بالماروتى !!!!!!!
*انا تحت امرك لو قررت على المازدا و محتاج اى مشورة او مساعدة .

و اخيرا ربنا يهديك لما فيه رضاه و الخير لك .