مقارنة بين رينو ميجان بلاى و فورد فيستا

[goodboy12340]

السلام عليكم
بقالى فترة بدور على عربية هاتشباك و النهاردة فى المعرض شوفت رينو ميجان بلاى 2015 كان سعرها 164 تقريبا
و كان فيه عربية فورد فيستا لكن كانت 2014 و عشان كدا كان عليها خصم بحوالى 157
(انا معنديش فكرة اوى عن فئات الفورد فيستا بس انا فاكر انها كان فيها مالتى فانكشن فى الدريكسيون و جنوط و مفيهاش سينسور بارك )

طبعا اللى خدت بالى منه ان حجم الرينو اكبر من الفورد و كماليات اكتر لكن تقفيل الفيستا افضل

ايه رايكم فى العربيتين من حيث الاداء و الثبات و العفشة و كمان الصيانة و قطع الغيار

و شكرا مقدما

[abo_salah]

فورد مفيش زيها
عربيه محترمه جددددددددا لابعد الحدود
بس مشكلتها كانت في قطع الغيار
ناااار

[ENG.MaRk]

الميجان شكلها حلو و شيك جداً و أوسع و أكبر و تقفيلها مايقلش عن الفورد و أنا باعتبر الميجان فلوانس هاتشباك لأنها تقريباً شبهها بالظبط من جوة و عفشتها معقولة جداً و ثباتها متجرب لحد 180 و أعتقد إن حضرتك مش هتحتاج تجيب أكتر من كدة و بالنسبة للأداء فهو مرضي إلي حد كبير ... اركب الاتنين و اعملهم test drive و اللي ترتاح أكتر فيها اشتريها
الفييستا من العربيات اللي تحب تركبها و تسوقها و فعلاً تقفيلها ممتاز و شكلها من جوة مبهر و خامات التابلوه معقولة و سحبها كويس و خصوصاً بالفتيس الباور شيفت بس خلَي بالك لأن الفتيس ممكن يخنقك شوية بسبب النتشة اللي بين الأول و التاني
مجرد رأي بص بصة علي البيجو 208 و سيتروين C4
لو هأختار بين اللي في المقارنة يبقي ميجان و لو تقدر تزود يبقي C4

[meka1990]

ميجان بلاي و مش هتندم الفيستا دي تتقارن بل سانديرو الميجان حجم و قوه و ابشنز و اعاده بيع و توكيل ممتاز الفيستا انا ركبتها مع و احد صحبي كنا قعدين بنحك في بعض جوا بدون مبالغه عربيه ديقه جدا و مش مريحه خالص و المسند اللي قدام كان حجموا صغير تحس انك مخنوق , الناس هتيجي تقول لافيستا تقفيل الماني و مش عارف ايه هقولك ماشي علي عيني و علي راسي بس انا بردوا ما اروحش اجيب فيات بنتو و اقولك اصل فيات هيا اللي بتعمل فيراري فا البنتو بالبركه كده هتقلب فيراري علي الطريق عايز تقارن الميجان قارنها بل فوكس الهاتشباك اللي فيها نفس الابشنز و هتبقي في حدود 200 الف و ساعتها برضوا هقولك متجبهاش عشان الفتيس فيه مشاكل

[ahmedmohamed7]

الفيستا اصلا فئة اصغر من الميجان بلاى .....الميجان تخش لل فوكس الهاتش باك ....
اكيد فى المقارنة ديه هتكون ال ميجان افضل

[goodboy12340]

تمام انا فعلا استبعدت الفيستا لاسباب كتير و بقارن دلوقتى بين الرينو بلاى و النيسان تيدا

[M.Elwan]

تمام انا فعلا استبعدت الفيستا لاسباب كتير و بقارن دلوقتى بين الرينو بلاى و النيسان تيدا

ممكن تدخل للمقارنة مازدا ٣ هاتشباك

[ENG.MaRk]

تمام انا فعلا استبعدت الفيستا لاسباب كتير و بقارن دلوقتى بين الرينو بلاى و النيسان تيدا

الاتنين تقريباً واحد زي بالظبط الفرق بين السنترا و الفلوانس ... واحدة فرنساوي باعتمادية الياباني و التانية ياباني بشياكة و دلع الفرنساوي :)

[goodboy12340]

شكرا للجميع على الافادة :)

[goodboy12340]

ممكن تدخل للمقارنة مازدا ٣ هاتشباك

بس دى غاااااااالية اوى تقريبا بتبدأ ب 175 يعنى اغلى من الاتنين اللى بتكلم فيهم ب 15 الف

[M.Elwan]

بس دى غاااااااالية اوى تقريبا بتبدأ ب 175 يعنى اغلى من الاتنين اللى بتكلم فيهم ب 15 الف

انا اسف على المعلومة دى كمان ياريتها طلعت ب175
دى طلعت فئة واحدة هاتشباك ب212