أفضل سيارة فى رينج من 110 - 130 الف

[mr_mizo]

السلام عليكم ورحمة الله

اخوانى الاعزاء انا معايا نيسان صنى 2008 الشكل القديم وحابب ابيعها واشترى عربية فقدامى حليين :


1- اما انى اكمل عليها حاجة بسيطة واشترى حاجة مستعملة بس هيكون اخر سعر اقدر اوصله هو 100000 وفى الحلة دى هتكون اختياراتى ( مازدا 3 موديلات 2007-2009 أو كيا سيراتو الشكل القديم أو نيسان صنى الشكل الجديد كسر زيرو )

2- هو انى اقسط زيرو بقى واخلص من فكرة أم المستعمل بقى وهنا هتيجى المقارنة الفشيخة :

1- سوزوكى سياز

2- رينو ستيب وار

3- بروتون جين 2 أو بيرسونا

4- بيجو 301 أو سيتروين اللى شبهها

5- سوزوكى ارتيجا

6- اوبترا الجديدة

7- كيا ريو ( اكيد فى السعر ده هتبقى أول فئة مثلا ولا ايه مش عارف )

8- شارك ( وبردو اكيد فى السعر ده هتبقى اول فئة برده وفاضية )

9- صنى 2015 ( مش طالباها )

10- اكسنت ( بكرهها )

11- فيات بونتو 2015 ( خايف من التوكيل )



ارجو من حضراتكم اولا نقولولى انهى افضل اتوكل فحوار المستعمل ولا الزيرو

ولو الزيرو هو اختياركم انهى عربية فدول تحتل المركز الاول بجدااارة على كل المستويات ( اداء + اوبشنز مع العلم انى بعشق الاوبشنز والفخامة + توكيل + قطع غيار واعتمادية )

هو انا ميال اوى للسياز بس قلقان من حكاية الماتور ال 900 حصان وانها 1400 سى سى ديه برغم انها هتكون موفرة فى البنزين



اسف للاطالة وجزاكم الله خير ومستنى ردودكم

[د.هشام]

أحسنهم صني اللي مش طالباها
والله اعلم

[fineart607]

بيجو 301 او بروتين جين 2 بالتوفيق ان شاء الله

[MOSTAFA.EID]

بيرسونا ٫٫ اوبشن كتييير واداء رهيب وشكل تحفه وقطع غيار في كل مكان وسعرها ١١٩ الف

[ahmedhadhoud98]

انصحك بالسياز .. افضل قيمة مقابل سعر في فئتها والموتور قوي الفرق بينه وبين 1600cc مش ملحوظ ابدا انا معايا العربية من شهر 2 مشتكتش من اي حاجة فيها ولينا جروب على الفيسبوك تجد فيه كل ما تحتاج وتوكيل قريب مننا دايما

[ENG.MaRk]

سياز يا فندم من غير تفكير كتير و خصوصاً إن حضرتك قولت إنك بتحب الoptions و الفخامة و هي أحسن عربية في المقارنة ممكن توفرلك البند ده و عموماً سحبها و ثباتها مش وحشين بالنسبة للباقي و هي the best value for money

[ahmzd]

أولا انسى المستعمل تماما.
ثانيا سياز أفضل اختيار وأحسن قيمة مقابل المال، كماليات كتيرة، وسع داخلي، شنطة كبيرة، توفير في البنزين، انتشار لافت للنظر، أما موضوع قوة الموتور فمفيش مشكلة - من وجهة نظري - بالذات لو عيلة حضرتك مش كبيرة، وبعد ما تقضي بيها 5 سنين بلا مشاكل إن شاء الله، ابقى غيرها بحاجة أكبر في الموتور والفئة السعرية لما ربنا يكون كرمك وكرمنا بإذن الله.
هذا رأيي والله أعلى وأعلم.

[حماده عزو]

سياز
أنا معايا العربيه بقالها 3 شهور والحمد لله حاسس أنى كسبت كتير لما جبتها
فخامه وشكل واداء وكماليات
وان شاء الله توكيل بيحاول يقوم الماركه كلها على رجليها من أصغر موديل لأكبر موديل

[Mohamed694]

ال ستيب واي جميلة منتشرة و توكيلها كويس و فيها وسائل أمان ، السياز جميلة كأوبشن بالنسبة لسعرها عيوبها توكيل تعبان ( نفس توكيل نيسان ) و عربية جديدة محدش شاف مشاكلها علي الأرض ، كان في كام واحد ( أقل من 5 ) اشتكوا من ان في صدأ في الصاج ، محرك 1400 ممكن ما يديلكش تسارع زي ال 1600 لكن بيوفر بنزين ، تعتبر أكتر واحدة فيها أوبشن ، البيجو و الستروين حلوين و ثبات و أوبشن كويس و الأمان فيهم بيبدأ من أول فئة بس سمعت ان في مشاكل في الفتيس ، الريو و الأكسنت واحد تقريبا بس الأكسنت 1600 و توكيلين محترمين و قطع غيار متوفرة و أوبشن كويس لكن الفئة دي ( من الوكيل ) من غير وسائل أمان ، الشارك جميلة كشكل و ثبات و كسواقة لكن فاضية ، الصني مش وحشة كأوبشن تقريبا فيها كل الأوبشن اللي في السياز ما عدا التكييف الأتوماتيك لكن لو الوكيل لو ما حلش مشكلة الفرامل يبقي بلاش منها
الكلام ده سمعته أو قريته من اللي كتبه الملاك ( باستثناء الأكسنت ) فالأحسن ادخل علي كل جروب لكل عربية من دول و اسمع من أصحابها بنفسك لأن أحيانا بتطلع إشاعات غير صحيحة عن أي عربية ( بس من غير ما تسلم دماغك ليهم لأن في ناس بتزيط بعربياتها علي الفاضي ) و انزل المعارض اقعد في كل عربية و ياريت لو تعمل test drive ، لو ساكن في محافظة غير القاهرة يبقي خلي الأولوية للعربية اللي توكيلها قريب منك و قطع غيارها منتشرة علشان ما تتعبش ، برضه حط في تفكيرك سيات توليدو عربية جميلة و عليها خصم حلو ، لو انت من اللي ممكن تبيع و تغير العربية قبل 3 سنين يبقي هات مستعمل أحسن

[Omar_alaa]

لو هنتكلم علي قوه الموتور او اعاده البيع في متسوبيشي شارك أفضل اختيار حتي لو اول فئه لو هنتكلم علي الكماليات يبقي رينو ستيب واي
اما سوزوكي مع احترامي لها عربيه جديده و في شكاوي من قوه الموتور
العربيه ده استثمار ف لازم تجيب الي يستحملك في الميتسوبيشي سهل بعد كده تركبلها جنوب و abs و كمان تغير الكاسيت و تركب فوانيس شبوره او تركب سبويلر في هتبقي مش فارقه من بره عن الفئات الاعلي منها

[tarek_gamal]

انا مع الشارك ..معايا بقالى شهرين ..بصراحه حاسس انى راكب عربيه .. و الابشن الى فيها بالنسبة لي كفاية. ..

[hesham fawzy h]

الاوبشن مش كل حاجة .. هو فعلا بيغرى بس العربيات الصينى فى اوبشن حلو برضو

السياز عربية صاجها ضعيف جدا دة من برة .. و من جوة الحاجات البلاستك ضعيفة درج التاباوة و البلاستيك الى فى الابواب و الى تحت الدربكسيون
دة غير ان سعر بيعها هتلاقية ضعيف بالنسبة لباقى السيارات .. و سمعت ان التوكيل بتاعها مش تمام


افضل خيار هو الشارك لانك واضع فلوسك فى المضمون .. جيب الفئة الى ب 143 اللف خليجى كويسة جدا

و عايز اعرف اية الفرق فى الاوبشن بين الشارك و السياز ؟؟؟؟،؟

[hesham fawzy h]

الاوبشن مش كل حاجة

[salam100100]

حيره ما بعدها حيره

لو مكانك, بختار مابين زيرو او مستعمل واقدر علة ثمن الزيرو هجيب الزيرو وهأمن على العربيه

نيجى بقا للعشر عربيات اللى حضرتك حيران مابنهم

بعض الاسئله اللى محتاجه جواب:
1. استخدام العربيه هيكون ايه (سفر- داخل البلد- مطبات- مناطق عشوائيه- عيله كبيره)
2. حضرتك ناوى تغيرها كمان كام سنه؟ مستعد تخسر فى سعرها قد ايه تقريبا؟
3. سواقت حضرتك عامله ازاى - بتحافظ على العربيه ولا بتهملها؟
3. يبانى- ايطالى-ماليزى- كورى- فرنساوى- هندى كتير قوى المعروض لازم تفاضل وتقلل الاختيارات باءا على ميولك والسوق
4. حاول تجرب تسوق بنفسك العربيه , اهو تاخد فكره بردو عنها قبل متشتريها - اضعف الايمان اركبها مع حد ومتسقش

قلل الاختيارات مينفعش عشر عربيات تقارن مابنهم عشان متهش
مستنى من حضرتك القائمه الجديده :)

[hosahamza]

بيجو 301 اوميتسوبيشى لانسر