استفتاء ومساعده في شراء عربيه

[ruaa]

السﻻم عليكم كنت عايزه اخد رايكم عايزه اشتري عربيه زيرو في حدود 120 الف وحيرانه جدا اهم مواصفات عندي تكون اتوماتيك وسيدان وطبعا اﻻمااااااان والثبات علشان عندي طفلين..استخدام مدينه والسفر نادر ممكن مرتين تﻻته في السنه بالكتير..انا من المنصوره احب برضه صيانتها تكون سهله وقريبه..وعموما انا مش همشي بسرعه..ارجو اﻻفاده

[AlphaCharlie]

ينفع حضرتك تزودي شوية وتجيبي شارك؟

[hanyyacot]

بروتون جين 2 / او بيرسونا
رينو لوجان
لكن طبعا ثبات البروتون احسن بكتير من اللوجان , شوفى اى ماركة فيهم ليهم مراكز خدمة عندك الاول وده هايحدد اختيارك

[mazen56]

أكسنت rb

[Omar2017]

جين 2 بلا منازع

[أحمد محمد]

نيسان صني Super Salon.

[ruaa]

شكرا لكل من اهتم ..بس اسمع ان اكسنت ثباتها مش كويس والنيسان في مشكله في الفرامل هل الكﻻم دا صحيح

[denjouan83]

I think u better wait and go for shark

[scientist9508]

بسم الله الرحمن الرحيم

أختنا الفاضله

حقيقة أرى أن أنسب سياره فى حدود ميزانية حضرتك هى البروتون بيرسونا و إن شئت جين 2 و أيضآ سوزوكى سياز و على ذلك يلزم زيادة الميزانية 5000 جنيه.

الثلاث سيارات لهم مراكز صيانه فى القاهره و لكن تتفوق البروتون على السوزوكى فى مجموعة نقاط هم كالآتى:

1 - يمكن إجراء صيانات البروتون عند الميكانيكيه المهره لأنها موجوده منذ عام 2005 و لذلك فهى مفهومه عند كثير من الميكانيكيه. فى نفس الوقت يستحيل ذلك للسوزوكى السياز لأنها تعمل ببرنامج تشغيل (سوفت وير)

2 - البروتون بيرسونا و الجين 2 أقوى صاج من السوزوكى سياز

3 - ثبات البيرسونا و الجين 2 تم التأكد منه بأكثر من شخص و بالكثير من المواقف فى حين لم يتم التأكد من ثبات السياز بشكل عملى حتى الآن و إن كان يتوقع منها ثبات ممتاز إستنادآ على تاريخ سوزوكى المشرف

تتساوى البروتون (بيرسونا و جين 2) مع السوزوكى سياز فى الآتى:

1 - وكيل فاشل

2 - أسعار قطع الغيار (بالتقريب متساويه و ليست بالدقه)

3 - وضوح أبعاد السياره فى القياده

تتفوق السياز على البروتون فى الآتى:

1 - السياز أوفر فى إستهلاك الوقود من البروتون (بيرسونا و جين 2)

2 - محرك السياز تقريبآ شبه صامت بخلاف محرك البروتون له صوت مرتفع و عند إحتياج السياره للصيانه يكون صوته مزعج

3 - عيوب التقفيل فى السوزوكى أقل بكثير من البروتون

4 - الرفاهيه و الأناقه و الجمال لصالح السياز و بجداره

ها أنا قد قدمت لك (بإختصار و ليس بإستفاضه) أبرز و أهم نقاط الفصل بين البروتون و السياز فإنظرى فى أمرك لتتبينى الأصلح لك.

و قبل أن أختم كلماتى أود أن ألفت نظرك إلى أننى كنت من أكثر المدافعين عن وكيل رينو إلا أنه ثبت لى فى الفتره الأخيره كثرة أخطائه و شكاوى الناس منه.

هداك الله لأررشد أمرك و أقومه

السلام عليكم و رحمة الله وبركاته

[ruaa]

شكرا لحضرتك

[ruaa]

طيب سؤال تاني لوسمحتو دي اول عربيه ليه فا رايكو اجيب زيرو وﻻ مستعمل؟؟خايفه اجيب مستعمل اتبهدل بيها عند الميكانيكي خصوصا ان اخويا اشتري كستعمل قريب وفيها عيب ومش عارفين نصلحه .صاحب العربيه نصب علينا

[AlphaCharlie]

طيب سؤال تاني لوسمحتو دي اول عربيه ليه فا رايكو اجيب زيرو وﻻ مستعمل؟؟خايفه اجيب مستعمل اتبهدل بيها عند الميكانيكي خصوصا ان اخويا اشتري كستعمل قريب وفيها عيب ومش عارفين نصلحه .صاحب العربيه نصب علينا

طبعا المستعمل مش مضمون. حتي لو صاحب العربية عنده ضمير وبايع العربية بدون اي عيوب فممكن مثلا يكون في مشكلة في الموتور مش باينة وتظهر معاكي. ودا وارد ان ناس كتير ماشيين بعربيات ومش عارفين ان في مشكلة وتظهر فجأة.
علشان كدا بنحاول نشتري موديل عالي يكون كسر زيرو او اقرب ما يكون علشان نتلافى المشكة دي.

عموما الزيرو افضل طبعا وانصحك بالبروتون في حدود ميزانيتك.

[scientist9508]

بالتأكيد سياره زيرو

[ruaa]

شكرا ليكو

[swimmer25]

رأيي مستعمل بس تكون ياباني زي كورولا 2009-2010 خليجي وتكشفي عليها في التوكيل أفضل