عاوز مقارنة فى عربية مستعملة موديل التمانينات

[الحمادوى]

بفكر فى شراء عربية موديل تمانينات على قد الميزانية
التى لا تتعدى ال12000

طبعا فيه كتير فى حدود السعر ده فى التمانينات
ودورت فى النت كتير وقريت مواضيع كتير
كنت خلاص نويت على ال127
لكن
قريت موضوع عن البولونيز فبصراحة دخلت دماغى
وخصوصا ان اسعارها تشبه سعر ال127

والى عاجبنى فيها اكتر وسع صالونها وشنطتها وحوضها
ووسع الحوض ده يعطى مجال ان الواحد يسقط موتور حديث للعربيه
على عكس ال127 موتورها معروف

ياريت تساعدونى فى المقارنة والافضل فيهم
ولو فيه
اقتراحات تانية لنفس الميزانية ياريت اعرفها
مع الشكر

[AlphaCharlie]

البولونيز عربية جميلة. مشكة وحيدة في نظري. الموتور كامة سفلية. وصعب صيانته. ممكن تكون مش مشكلة عند ناس كتير. بس الكامة العلوية أسهل في الصيانة وأفضل في الأداء.

[Abo_Mazen]

هي البولونيز إختيار موفق ..بس ناشفه قوي ..أقرب للادا منها إلى أي عربيه تانيه

[الحمادوى]

كل عربية وليها مميزات وعيوب واستحالة الواحد يجيب عربية كلها مميزات
بس انا وقع اختيارى على النوعين دول
127 موفرة فى البنزين عن البولونيز لكن التانية عزم اقوى
127 كبالن التانية كرونة وافضل بالنسبة للطرق بتاعتنا

بس انا خايف من البولونيز لقلة الرغبة فيها وصعوبة فى البيع وسخونة الموتور فى فصل الصيف

[جيتزاوي55]

اعتقادي الشخصي البولونيز ممكن تبقي مشاكلها أكتر من ال 127 لصعوبة ميكانيكتها شوية , ومش كل الناس بتفهم فيها اوي زي ال 127 , ولأنها أقل , ف مش مضمون تلاقي واحدة حالتها نضيفة قوي , لكن ال 127 ظريفة وصغيرة وعلي قد الأيد , وقطع غيارها موجودة ومنتشرة زي الرز واي حد يفهم فيها وأعتقد ممكن تلاقي منها كام حاجة نضيفة ,
وربنا يكرمك

[م أحمد]

لو بولونيز هات الموتور ال 1600 سى سى و ابعد عن ال 1500 لانه بيضرب وش سلندر كتير

مفيش مقارنة من ناحية المتانة بين ال 127 و البولونيز.....البولونيز اشبه بالنصف نقل.....متينة جدا يعنى

برضه مفيش مقارنة من ناحية السعة.....ممكن تلاتة يقعدو قدام .....و بالعافية جدا جدا ممكن يقعدو فى لانوس او فيرنا...... فما بالك بال 127

[الحمادوى]

طبعا مفيش مقارنة بين ال127 والبولونيز
لان
البولونيز تتفوق على 127 من حيث الوسع والمتانة وامكانية تركيب موتور غير موتورها
بس
انا بعد ما قريت مواضيع كتير فى الفيات وقع اختيارى على النوعين دول وميال اكتر للبولونيز
بس سؤال
ايه الموديلات اللى فيها موتور ال1600؟؟؟؟؟؟؟؟